Sho Kokaka Sala Kɛnɛ Katɔlɔmba Jehowa
1. Ngande wakokaso ndjaoka tena dimɔtshi, ndo lande na?
1 Ɛlɔ kɛnɛ, kitanyiya ɛlɛmbɛ ndo atɔndɔ waki Jehowa ekɔ yoho ya lɔsɛnɔ yoleki dimɛna ndo yɔ tokimanyiyaka dia sho mbika etshina k’ɔlɔlɔ dia nshi yayaye ya pondjo. (Osam. 19:7-11; 1 Tim. 6:19) Koko, andja waki Satana telaka ekiyanu efula. Demba diaso diele kema kokele telaka nto ekakatanu woleki. Etena kahembaso dia kotsha ɛkɛndɛ wakatosha Afundelo, sho koka ndjaoka dia tambɔkɔmɔ efula. (Osam. 40:12; 55:1-8) Sho koka ndjambola dia kana tayokoka sala tshɛ katɔlɔmba Jehowa. Lo tena dia ngasɔ, kakɔna kakoka tokimanyiya dia tetemala la monga la wɛdimo lo nyuma?
2. Ngande wele Jehowa l’ekanelo k’ɔlɔlɔ lo kɛnɛ katɔlɔmbande?
2 Wadjango Waki Jehowa Bu Wotsho: Jehowa hatɔlɔmbɛ kɛnɛ keso bu l’akoka wa sala. Wadjango ande bu wotsho koko wekɔ dia wahɔ aso. (Euh. 10:12, 13; 1 Joa. 5:3) Nde mbeyaka wɛɔdu aso wa demba, ‘lo mbohɔka dia tekɔ ditshu.’ (Osam. 103:13, 14) La kɛtshi tshɛ, Nzambi mbetawɔka welo woleki tshɛ wadjaso dia mbokambɛ, kânga mbele awui wele laso todjɛka wekamu. (Lew. 5:7, 11; Mako 14:8) Nde tɔlɔmbaka dia sho kitsha wetsho aso le nde ndo toshaka eshikikelo ɔnɛ, nde ayotokimanyiya dia sho tshikala la kɔlamelo.—Osam. 55:22; 1 Kor. 10:13.
3. Ngande watokeketsha Jehowa dia sho mbikikɛ?
3 Ohomba wa Ekikelo: Ɛkɔndɔ wa lo Bible w’anto wakalame olowanyi awɔ, ɛnyɛlɔ Elidja, Jeremiya, ndo Paulo mɛnyaka bonde kele ekikelo ohomba. (Heb. 10:36) Jehowa akâsukɛ lo tena diakawalɔshamaka ndo diakawakɔmɔ etema. (1 Khum. 19:14-18; Jer. 20:7-11; 2 Kor. 1:8-11) Ndo sho keketshamaka la kɔlamelo yaki anangɛso wa nshi nyɛ. (1 Pet. 5:9) Kana yimba lo bɛnyɛlɔ dia ngasɔ koka tokimanyiya di’aha kɔmɔ otema.
4. Bonde kele ekɔ ohomba namaka alaka waki Nzambi lo yimba?
4 Elongamelo l’alaka waki Nzambi ekɔ oko “lungu la mashua l’utema.” (Heb. 6:19) Tɔ kakatshutshuya Abarahama la Sara dia mbetawɔ tshika ngelo kawɔ ko ‘todjasɛ oko angɛndangɛnda lo nkɛtɛ ya daka.’ Tɔ kakakeketsha Mɔsɛ dia nde mbeta l’ɔtɛmwɛlɔ wa mɛtɛ wedi la dihonga tshɛ. Tɔ kakakeketsha Yeso dia mbikikɛ otamba w’asui. (Heb. 11:8-10, 13, 24-26; 12:2, 3) Namaka daka diaki Nzambi di’andja w’oyoyo wa losembwe l’etema aso ayotokimanyiya nto dia tshikala nge.—2 Pet. 3:11-13.
5. Bonde kakokande monga ekeketshelo naka sho kana lomba lo ditshelo diaso dia kɔlamelo dia nshi yaso yakete?
5 Mbohɔ ditshelo diaso dia kɔlamelo, dia ndjahombia ndo dihonga diaki laso nshi yakete koka tokeketsha l’olimu aso. (Heb. 10:32-34) Dui sɔ toholaka ɔngɛnɔngɛnɔ wonga laso etena kashaso Jehowa kɛnɛ katɔlɔmbande, mbut’ate ndjakimɔ le nde l’anima aso tshɛ.—Mat. 22:37.