Dibasa diokolamiso le anto akina

¹ Ɔpɔstɔlɔ Paulo akayaokaka dia nde aki la ɔkɛndɛ wa sambisha anto. Nde akeyaka dia Jehowa mbakasale dia weho w’anto tshɛ shimbamela oma lo ekimanyielo ka dikila di’oshinga wolo diaki Ɔnande. (1 Tim. 2:​3-6) Diɔ diakɔ diakate Paulo ate: “Dimi leko la dibasa le asi Ngirika, ndu le asendji, le akanga a yimba ndu le akanga a dinginya.” Nde akakambe la etete, aha la nɛmba dia futa dibasa diakandakolama le anyande anto lo mbasambisha lokumu l’ɔlɔlɔ.​—⁠Romo 1:​14, 15.

² Lo ɛnyɛlɔ ka Paulo, Akristo wa nshi nyɛ nyangaka woho wa sambisha anyawɔ anto lokumu l’ɔlɔlɔ lo diaaso tshɛ. Lam’ele ‘fɔnu ka woke’ kekɔ lo ndjasukana esadi, sho pombaka nyanga wanɛ wele la etema w’ɔlɔlɔ la shamanya y’efula. Ngandji ka mɛtɛ kokaso anto katotshutshuya dia monga la etete lo olimu ɔnɛ washimbɛ nsɛnɔ.​—⁠Mat. 24:21; Ezek. 33:⁠8.

³ Tofute dibasa diaso: Yoho ya ntondo yatanaso anto ele sambisha lo soko la soko. Lo bɛtshi dia nkɛtɛ diele anto hawoleke tanema lawakawɔ, mbɔsa nɔtɛ ya shikaa ndo kalola lo wenya ekina ayotokimanyiya dia sawola la anto efula. (1 Kor. 10:33) Sho koka nto sambisha anto efula lo sambishaka lo ɛtshi ka nkɛtɛ k’amundji w’okanda, lo toshinga, lo waa parkɛ, lo waa parkingɛ ndo lo telefɔnɛ. Sho kokaka ndjambola ɔnɛ: ‘Onde lekɔ lo sala kɛnɛ tshɛ kakokami sala dia kamba la toho tshɛ t’esambishelo la oyango wa mbewoya anto losango la lɔsɛnɔ?’​—⁠Mat. 10:⁠11.

⁴ Ombatshi mboka ɔmɔtshi akayaoke dia nde aki la ɔkɛndɛ wa woke wa sambisha anto tshɛ wa lo ɛtshi kande ka nkɛtɛ. Lo luudu lɔmɔtshi, nde akɛnaka tena tshɛ adidishi ndihama ndo ndoko onto lakongaka lo luudu lakɔ. Koko, lushi lɔmɔtshi, etena kele ombatshi mboka ɔsɔ komonga lo esambishelo, nde akɛnyi mutuka ɔmɔtshi wemadi la ntondo ka soko diele mbala ko mbala nde kotanaka onto lâwɔ. Lam’ele nde konanga shisha diaaso sɔ, nde akamine butɔ ka lo lokuke lɔsɔ dia kɔkɔla, ko pami kɛmɔtshi akatombe. Sawo dia ntondo sɔ diakakonya dia kadiyɛso kɛsɔ nde la omɛnde ndjoya mbala efula dia ndjembola pami kɛsɔ. L’ɔkɔngɔ diko, pami kɛsɔ aketawɔ dia mbeka Bible ndo ɛlɔ kɛnɛ nde aya ɔnangɛso lamboshila batizama. Nde ekɔ la lowando efula lo woho wakayaoke kadiyɛso dia nde ekɔ la ɔkɛndɛ wa sambisha anto akina.

⁵ Lam’ele ekomelo kekɔ lo ndjasukana esadi, ɔnɛ ekɔ etena ka sho futa dibasa diokolamiso le anyaso anto lo ndjasha tshɛ l’olimu aso wa esambishelo.​—⁠2 Kor. 6:​1, 2.

Tɔlɔmbɔlɛ wekelo wa Bible watahame

Etenyi 11: Tokimanyiya ambeki dia vɔ sala waendelo w’eyoyo

¹ Etena katatɛ ombeki wa Bible sambisha, nde pomanaka la anto wɛnya nsaki lo lokumu l’ɔlɔlɔ. Ngande wakokaso kimanyiya opandjudi w’oyoyo ɔsɔ dia nde sala waendelo w’eyoyo dimɛna ndo nde nomialomia nsaki kɛnyisha onto?

² Wendelo w’oyoyo tatɛka nɔngɔswama etena kasawolayɛ la onto mbala ka ntondo. Keketsha ombeki dia nde ndjasha la otema ɔtɔi le anto wasawola la nde. (Fil. 2:⁠4) Etshakande yema yema dia nde nɔmbaka wanɛ wasawola la nde dia vɔ mbisha tokanyi tawɔ, mpokamɛka kɛnɛ katawɔ ndo fundaka awui wayakiyanyawɔ. Etena kɛnya onto ɔmɔtshi nsaki, lɔmba opandjudi w’oyoyo dia nde funda dui di’ohomba diɛnyinde lo wendelo ɔsɔ. Kamba la dui sɔ dia mbokimanyiya dia nde nɔngɔsɔla asawo akina wayowotosawola.

³ Nyoyalɔngɔsɔlɛ dia sala wendelo w’oyoyo: Nyovusole awui wakanyɛnyi lo wendelo wa ntondo ndo ɛnya ombeki woho wa nde sɔna dui dimɔtshi dia losango la Diolelo diayɔngɛnyangɛnya ompokami ande. (1 Kor. 9:​19-23) Nyɔlɔngɔsɔlɛ kâmɛ mbɔtwɛlɔ kɛmɔtshi ka lo tshena pe kendana la divɛsa dimɔtshi dia lo Bible ndo odingɔ ɔmɔtshi wa lo okanda ɔmɔtshi wekaso l’anto Bible. Ndo nto, nyɔlɔngɔsɔlɛ dimbola dimɔtshi diakoka munyiyama l’ekomelo ka sawo dianyu dia mbotshika la dikambo dimɔtshi dia nyu ndjosawola lo wendelo wayela. Ɛnya opandjudi w’oyoyo woho wa nde pamiaka ewo ka Ɔtɛkɛta wa Nzambi kaki onto lo wendelo tshɛ wasalande.

⁴ Ekɔ nto ohomba efula dia mbetsha ombeki mbɔtwɛlɔ kɛmɔtshi ka wɔdu. L’ɔkɔngɔ wa mbisha ompokami mɔyɔ, nde mbeyaka mbuta ɔnɛ: “Lakangɛnangɛna sawo diaso dia mbala ketshi ndo lambokalola ɛlɔ dia sho ndjosawola dui dikina dia lo Bible [ta dui diakɔ].” Wɛ mbeyaka nto mɛnya opandjudi w’oyoyo woho wahombande sala naka onto okina mambodihola lokuke koko aha ɔnɛ latosawolaka la nde.

⁵ Lomialomia nsaki kakɛnya onto la etete tshɛ: Keketsha ombeki dia nde mbisha ɛnyɛlɔ k’ɔlɔlɔ lo kalolaka esadi eto le anto tshɛ wakɛnya nsaki. Dia tana anto lawakawɔ mbeyaka nɔmba dia sho tetemala ntshɔka towaenda. Etsha ombeki woho wa nde mbokana la onto lushi la nde ndjowenda nto ndo kimanyiyande dia nde shihodia ohomba wa kalolaka oko wakandalake. (Mat. 5: 37) Etsha opandjudi w’oyoyo dia nde monga ɔlɔlɔ, monga la eokelo k’ɔlɔlɔ ndo monga la dilɛmiɛlɔ etena katandayange anto wele oko ɛkɔkɔ ndo kalomialomiande nsaki kakawɛnya.​—⁠Tito 3:⁠2.