Lushi la Jehowa laya suke

¹ Akristo wekɔ lo kombola efula oyelo wa lushi la Jehowa. Lushi lɔsɔ kayondolanya dikongɛ nɛ dia akambo ko mbela andja w’oyoyo wa losembwe. (2 Pet. 3:​12, 13) Lam’ele hateye shikaa etena kayoya lushi lɔsɔ, sho pombaka tetemala sungukala ndo kimanyiya akina dia vɔ sala woho akɔ wâmɛ. (Ezek. 33:​7-9; Mat. 24:​42-44) Kana yimba lo Ɔtɛkɛta wa Nzambi wa prɔfɛsiya ayokeketsha eshikikelo kaso k’ɔnɛ, “lushi la wuki la [Jehowa] laya suki.”​—⁠Zef. 1:⁠14.

² Wahɔnelo wa mandji yakayahemɛka andja w’otondo: Oko wofundamidiɔ lo Enyelo 17:​9-11, ɔpɔstɔlɔ Joani akatɛkɛta dia “khumi ya dikanga esambeli,” yele didjidji dia wahɔnelo wa mandji esambele yakayahemɛka andja w’otondo. Joani akatɛkɛta nto dia “khum’ekanga k’enanei,” kalembetshiya nshi nyɛ Nations unies. Onde sho pombaka nongamɛ nto mandji nkina yayahemɛ andja w’otondo? Ndoko, nɛ dia prɔfɛsiya mbutaka dia nkumekanga ka enanɛi kɛsɔ “kayutsho l’elanyelu,” ko l’ɔkɔngɔ atɔ ndoko nkumi ya dikanga nkina ya la nkɛtɛ yɔtɛkɛtshiwɔ dikambo diayɔ. Onde prɔfɛsiya kɛnɛ kokimanyiyaka dia wɛ shihodia lɛnɛ ayaso lo kɛnɛ kendana la tena?

³ Danyele 2:​31-45 tokimanyiyaka dia sho shihodia oyelo wa lushi la Jehowa. Lo prɔfɛsiya kɛsɔ, lohingu la woke lakɛnyi Nɛbukadinɛza lo dɔ nembetshiyaka wahɔnelo wa mandji yakayahemɛka andja w’otondo. Mandji shɔ tshɛ yamboshilaka mbahemɛ andja. Ko l’etena ka lowandji lakɔna lasɛnaso ɛlɔ kɛnɛ? Lo etena ka lowandji lele didjidji dia ekolo wa lohingu lɔsɔ. Prɔfɛsiya nembetshiyaka dimɛna kɛnɛ kayotomba l’ɔkɔngɔ. Mandji tshɛ ya ana w’anto yayolanyema ko “diulelu diahalanaki pundju” diayolɛ. Shi wɛ ambokoka nembetɛ woho wɛnya dikambo sɔ dia lushi la Jehowa laya suke?

⁴ Tolembetelo tokina: Shoamɛ tekɔ ɛmɛnyi wa tolembetelo tokina tɛnya dia lushi la Jehowa laya suke. Tekɔ lo mɛna okotshamelo wa kɛnɛ kakatatshi ɔpɔstɔlɔ Paulo kendana la nkɛwɔ y’anto “lu nshi y’ekumelu.” (2 Tim. 3:​1-5) Ndo tekɔ lo kamba olimu wa esambishelo ka l’andja w’otondo wahombama salema la ntondo ka ekomelo ndja. (Mat. 24:14) Olimu aso w’esambishelo watetemale mɛnya ohomba w’efula wa losango la ondjelo lata ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka.”​—⁠Eny. 14:​6, 7.

Tɔlɔmbɔlɛ wekelo wa Bible watahame

Etenyi 9: Tɔlɔngɔsɔlake ambeki dia vɔ sambisha lo tshakitudi

¹ Etena kakashihodia Andɛlɛ nde la Filipɛ dia Yeso kaki Mɛsiya wakalakema, vɔ kokoka ndjakimɛ dia mbutɛ akina losango lɔsɔ l’ɔngɛnɔngɛnɔ. (Joa. 1:​40-45) Popo ndo ɛlɔ kɛnɛ, etena katatɛ ambeki wa Bible monga la mbetawɔ lo kɛnɛ kekawɔ, vɔ tshutshuyamaka dia mbewoya akina awui akɔ. (2 Kor. 4:13) Ngande wakokaso mbakeketsha dia vɔ sambisha lo tshakitudi ndo mbalɔngɔsɔla dia vɔ sala dikambo sɔ lo yoho ya dimɛna efula?

² Wɛ mbeyaka mimbola tsho ombeki dia kana nde ambosawolaka la anto akina awui wamondeka oma lo Bible. Ondo angɛnyi kana ase nkumbo amɔtshi wekɔ wakokande mbelɛ dia ndjoyela awui wekande. Mbolande dia kana osekande ɔmɔtshi la l’olimu, la la kalasa, kana anto akina wakɛnya nsaki. Lo yoho shɔ nde kokaka tatɛ sambisha. Kimanyiyande dia nde shihodia ohomba wa monga la shɛnɔdi, la dilɛmiɛlɔ ndo la lɔsɛngɔ etena katɛkɛtande la akina dikambo dia Jehowa Nzambi ndo dia asangwelo ande.​—⁠Kol. 4:6; 2 Tim. 2:​24, 25.

³ Dia vɔ mbewoya dietawɔ diawɔ: Ekɔ ohomba efula mbetsha ambeki wa Bible dia vɔ kamba la Ɔtɛkɛta wa Nzambi dia vɔ mbewoya dietawɔ diawɔ. Sɔna awui amɔtshi etena kekanyu, ndo mbola ombeki ɔnɛ: “Ngande wakokayɛ kamba la Bible dia nembetshiya nkumbo kayɛ dikambo dia mɛtɛ nɛ?” kana “Divɛsa diakɔna dia lo Bible diayokamba layɛ dia nembetshiya ɔngɛnyi ayɛ ɔmɔtshi dikambo nɛ?” Lembetɛ woho wakadimolande, ndo ɛnyande woho wa nde mpikaka wetshelo ande lo Afundelo. (2 Tim. 2:15) Lo sala ngasɔ, wɛ ekɔ lo nɔngɔsɔla ombeki dia nde sambisha lo tshakitudi ndo lo etena kayondonga la akoka, nde ayoyosambisha kâmɛ la etshumanelo lo ekongelo katɔ ka esambishelo.

⁴ Ekɔ ɔlɔlɔ nɔngɔsɔla ambeki wa Bible lo kɛnɛ kendana la ɔlɔshamelo. (Mat. 10:36; Luka 8:13; 2 Tim. 3:12) Etena koka akina ambola ndo katɛkɛtawɔ dikambo dia Ɛmɛnyi wa Jehowa, kɛsɔ mbeyaka mbisha ambeki diaaso dia vɔ sambisha. Biukubuku Les Témoins de Jéhovah ​—⁠ Qui sont-ils ? Quelles sont leurs croyances ? kokaka mbakimanyiya dia vɔ ‘monga suke dia ndjatɛkɛtɛ.’ (1 Pet. 3:15) Yɔ yekɔ la awui w’eshika wakoka eyoyo kamba lawɔ dia kimanyiya angɛnyi ndo ase nkumbo yawɔ wele la tokanyi t’ɔlɔlɔ dia vɔ shihodia dietawɔ diaso diohikami lo Bible ndo elimu aso.