Lushi la Jehowa laya suke
1 Akristo wekɔ lo kombola efula oyelo wa lushi la Jehowa. Lushi lɔsɔ kayondolanya dikongɛ nɛ dia akambo ko mbela andja w’oyoyo wa losembwe. (2 Pet. 3:12, 13) Lam’ele hateye shikaa etena kayoya lushi lɔsɔ, sho pombaka tetemala sungukala ndo kimanyiya akina dia vɔ sala woho akɔ wâmɛ. (Ezek. 33:7-9; Mat. 24:42-44) Kana yimba lo Ɔtɛkɛta wa Nzambi wa prɔfɛsiya ayokeketsha eshikikelo kaso k’ɔnɛ, “lushi la wuki la [Jehowa] laya suki.”—Zef. 1:14.
2 Wahɔnelo wa mandji yakayahemɛka andja w’otondo: Oko wofundamidiɔ lo Enyelo 17:9-11, ɔpɔstɔlɔ Joani akatɛkɛta dia “khumi ya dikanga esambeli,” yele didjidji dia wahɔnelo wa mandji esambele yakayahemɛka andja w’otondo. Joani akatɛkɛta nto dia “khum’ekanga k’enanei,” kalembetshiya nshi nyɛ Nations unies. Onde sho pombaka nongamɛ nto mandji nkina yayahemɛ andja w’otondo? Ndoko, nɛ dia prɔfɛsiya mbutaka dia nkumekanga ka enanɛi kɛsɔ “kayutsho l’elanyelu,” ko l’ɔkɔngɔ atɔ ndoko nkumi ya dikanga nkina ya la nkɛtɛ yɔtɛkɛtshiwɔ dikambo diayɔ. Onde prɔfɛsiya kɛnɛ kokimanyiyaka dia wɛ shihodia lɛnɛ ayaso lo kɛnɛ kendana la tena?
3 Danyele 2:31-45 tokimanyiyaka dia sho shihodia oyelo wa lushi la Jehowa. Lo prɔfɛsiya kɛsɔ, lohingu la woke lakɛnyi Nɛbukadinɛza lo dɔ nembetshiyaka wahɔnelo wa mandji yakayahemɛka andja w’otondo. Mandji shɔ tshɛ yamboshilaka mbahemɛ andja. Ko l’etena ka lowandji lakɔna lasɛnaso ɛlɔ kɛnɛ? Lo etena ka lowandji lele didjidji dia ekolo wa lohingu lɔsɔ. Prɔfɛsiya nembetshiyaka dimɛna kɛnɛ kayotomba l’ɔkɔngɔ. Mandji tshɛ ya ana w’anto yayolanyema ko “diulelu diahalanaki pundju” diayolɛ. Shi wɛ ambokoka nembetɛ woho wɛnya dikambo sɔ dia lushi la Jehowa laya suke?
4 Tolembetelo tokina: Shoamɛ tekɔ ɛmɛnyi wa tolembetelo tokina tɛnya dia lushi la Jehowa laya suke. Tekɔ lo mɛna okotshamelo wa kɛnɛ kakatatshi ɔpɔstɔlɔ Paulo kendana la nkɛwɔ y’anto “lu nshi y’ekumelu.” (2 Tim. 3:1-5) Ndo tekɔ lo kamba olimu wa esambishelo ka l’andja w’otondo wahombama salema la ntondo ka ekomelo ndja. (Mat. 24:14) Olimu aso w’esambishelo watetemale mɛnya ohomba w’efula wa losango la ondjelo lata ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka.”—Eny. 14:6, 7.