Toyasha la otema ɔtɔi le anto akina: lo monga ɔlɔlɔ
1 Lo mbohɔ mbala ka ntondo kakandahomana la Ɔmɛnyi ɔmɔtshi wa Jehowa, womoto ɔmɔtshi laki ntondo la tokanyi ta kɔlɔ lo dikambo dia Ɛmɛnyi akate ate: “Handjohɔ dimɛna kɛnɛ kakatatɛkɛta, koko kɛnɛ kohɔmi ele woho wakinde ɔlɔlɔ oya le mi, wakandalongɔnaka ndo wakinde la okitshakitsha. Dimi lakakotwama la lonto lande.” Awui asɔ tɔtɔmiyaka ohomba wa ndjasha la otema ɔtɔi le wanɛ wasambishaso.—Fil. 2:4.
2 Ngandji ekɔ ɔlɔlɔ: Yoho mɔtshi yakokaso mɛnya ngandji kaso le anto akina ele lo monga ɔlɔlɔ. (1 Kor. 13:4) Onto la ɔlɔlɔ ndjakiyanyaka dikambo di’ɔlɔlɔ w’anto akina lo nyanga dia mbasalɛ awui wele ohomba efula le wɔ. Mɛtɛ, olimu w’esambishelo vɔamɛ wekɔ tshelo ya lɔsɛngɔ. Koko woho wayakiyanyaso la otema ɔtɔi le anto pombaka kɛnɛmɔma lo toho efula, koko aha tsho lo mbasambisha. Yoho tshɛ yasɛnaso la anto, mbuta ate lɔngɛnyi laso, lɔkɛwɔ laso la dimɛna, yoho yahokamɛso, awui wataso, woho wataso awui akɔ ndo kânga yoho yendaso anto akina ayɛnya dia sho ndjakiyanyaka mɛtɛ dikambo diawɔ.—Mat. 8:2, 3.
3 Ndjakiyanya la ngandji tshɛ dikambo di’anto ayototshutshuya nto dia sho mbakimanyiya lo toho ta shikaa. Etena kakandatasambishaka lo luudu la luudu, ɔnangɛso ɔmɔtshi lele ombatshi mboka akatshanyema esadi eto oma le osombe ɔmɔtshi wa wadi aki odo etena kakandeye dia nde aki Ɔmɛnyi wa Jehowa. Mama kɛsɔ akate dia etena kakakɔkɔlaka ɔnangɛso ɔsɔ lo lokuke, nde aki lo kibandola lo kuku dia pemba nɔngɔsɔla tala. Ɔnangɛso ɔsɔ akate ɔnɛ: “Kema dimɛna wɛ sala olimu ɔsɔ wɛmɛ.” Mama kɛsɔ akɔlɔmbɛ dia nde mbɔtɔ lo luudu. Ɔnangɛso akotshikitanyɛ tala diakalana oma lâsɔ nde akatetemala la esambishelo kande. Yema tshitshɛ l’ɔkɔngɔ wa lâsɔ, etena kakaye ɔnaki mama kɛsɔ la pami dia ndjowenda, mama kakɔ akawotɛ kɛnɛ kakatombe. Ɔnɔsɔ akambe heyama polo ndo lo nde nyanga dia mɛnana la ɔnangɛso ɔsɔ dia mbokaloya losaka. Dui sɔ diakakonya lo sawo dia dimɛna, ndo etombelo waki la dui diakɔ ele ɔnɔsɔ aketawɔ mbeka Bible.
4 Lo monga ɔlɔlɔ, sho kɛnɛmɔlaka ngandji koka Jehowa anto ndo nɛngaka losango la Diolelo. Ɔnkɔnɛ, nyɛsɔ ‘toyaɛnyake mbala tshɛ dia tekɔ ekambi wa Nzambi oma lo lɔsɛngɔ laso.’—2 Kor. 6:4, 6.