Tokimanyiya ambeki wa Bible dia vɔ koma apandjudi wa lokumu l’ɔlɔlɔ la Diolelo
1 Ɔkɛndɛ wakasha Yeso ambeki ande wele lo Mateu 28:19, 20 waki woke efula. Ambeki waki Kristo waketshama dia mbetɛ anto efula ambeki wele, vɔ lawɔ wakahombe ndjokamba olimu wa mbetɛ anto ambeki. Ehikamelo kakahombe shikikɛma dikambo dia esambishelo ka l’andja w’otondo ka lokumu l’ɔlɔlɔ la Diolelo diaki Nzambi l’etena k’ohomba efula k’ekomelo kasɛnaso kɛnɛ.—Mat. 24:14.
2 Ambeki aso wa Bible mbeyaka monga anaso kana anto akina walanga mbeka Bible laso. Sho nangaka mɛtɛ kimanyiya anto asɔ dia vɔ mbeya ndo kotsha ɔkɛndɛ awɔ wa kimanyiya anto akina dia vɔ koma ambeki wa Yeso Kristo.—Luka 6:40.
3 Talɔngɔsɔlɛ dia vɔ sambisha: Keketsha wanɛ weka layɛ dia vɔ mbewoya anto akina akambo wekawɔ. Kɔndɔlɛwɔ akambo wakeketsha wakahomana la yɛ l’esambishelo. Etsha anayɛ oma ko tɔkɛndakɛnda tawɔ dia vɔ mbeya sambisha dimɛna lo ndjela akoka awɔ. (Osam. 148:12, 13) Ɛnyawɔ oma lo ɛtɛkɛta ndo oma lo ɛnyɛlɔ dia esambishelo ekɔ dui di’ohomba efula le yɛ.—1 Tim. 1:12.
4 Jehowa kambaka paka la wanɛ wetawɔ ndo wakitanyiya atɔndɔ ande wosembwe. Lo mɛtɛ, apandjudi w’eyoyo haweye akambo efula oko weya apandjudi wa Diolelo wambohokɔ akambo, wakayakimɔ ndo wambobatizamaka, koko eyoyo pombaka mbetawɔ ndo monga la akoka wa nembetshiya wetshelo w’etatelo wa lo Bible. (Enda Tamboyakongɛ, lɛkɛ 79-82.) Vɔ pombaka tomba tshɛ lo tshɛ oma lo “Babilona ka Wuki,” hawohombe ndjatambiya l’akambo wa pɔlitikɛ ndo vɔ pombaka mbɔtɔka lo nsanganya ya l’etshumanelo mbala la mbala.—Eny. 18:2, 4; Joa. 17:16; Heb. 10:24, 25.
5 Kam’ayashikikɛyɛ dia ombeki ayɛ ɔmɔtshi wa Bible ambokotsha kɛnɛ kalɔmbama dia monga opandjudi wahatabatizama, wɛ pombaka mbewoya omendji walɔmbɔla dui sɔ. Nde ayokongɛ dia dikumanyi pende sawola layɛ kâmɛ la ombeki ayɛ wa Bible dia shikikɛ kana nde ambokotsha kɛnɛ kalɔmbama dia monga opandjudi wahatabatizama wa lokumu l’ɔlɔlɔ la Diolelo kâmɛ la etshumanelo. Etena kɛsɔ wɛ ayonga la diɛsɛ dia lânde dia tetemala mbetsha ombeki ayɛ wa Bible etena kayondokotshindɛka l’esambishelo.