Tahamaka otsha la ntondo

LAM’AKÂTATƐ kitanyiya atɔndɔ wa lo Bible, mbakatatɛ ondo la tshikitanya yema yema yoho yayɛ ya kana yimba, ya tɛkɛta, ndo ya ndjalɔmbɔla. Wɛ akasale etshikitanu ɛsɔ la ntondo ka kânga wɛ fundja lokombo lo Kalasa k’Olimu wa Teokrasi. Wɛ akahame polo ndo lo nambola lɔsɛnɔ layɛ le Jehowa. Onde kɛsɔ mɛnyaka dia wɛ koka memadja ohamelo ayɛ? Kema. Batismu kayɛ kekɔ tsho etatelo.

Ombeki Timɔtɛ akashile la koma ekumanyi k’Okristo etena kakawotɛ Paulo dia nde ‘kanaka yimba’ la dako diakawawosha ndo la waɛsɛ ande w’olimu, woho wa nde mbeya ‘ndjakimɔ tshɛ’ l’akambo asɔ di’‘ohamelo ande mɛnama le anto tshɛ.’ (1 Tim. 4:12-15) Oyadi eke esadi wɔtwɛyɛ lo mboka k’akambo a mɛtɛ kana aya ɛnɔnyi efula wamboyokoma Okristo, wɛ pombaka sala la wolo dia pama.

Ewo la otshikitanelo

Lo Efeso 3:14-19, sho mbadiaka di’ɔpɔstɔlɔ Paulo akalɔmbɛ dia anyande Akristo monga “la wulu . . . nshihudia okone weli wekeki, utali, dungulungu la ohongo” w’akambo wa mɛtɛ. Diɔ diakɔ diakakimɔ Yeso apami wele oko weshasha dia mbetsha, mingola ndo keketsha etshumanelo. Kanaka yimba mbala la mbala l’Ɔtɛkɛta wa Nzambi wakasambiyama, ndo l’alako w’oma le embetsha wa tomanamana, koka tokimanyiya dia sho ‘pama’ lo nyuma.​—Ef. 4:11-15.

Pama nembetshiyaka nto ‘mpilwama lo wolo walɔmbɔla yimba yayɛ.’ Kɛsɔ nembetshiyaka monga l’ekanelo ka yimba kafɔna la kaki Nzambi nde la Kristo. Dui sɔ nɔmbaka dia wɛ mɛnaka akambo oko vɔ nshi tshɛ, woho wa wɛ mbeya ‘ndɔta lonto l’oyoyo.’ (Ef. 4:23, 24) Lam’ekayɛ Evanjiliɔ, onde wɛ mbɔsaka ɛkɔndɔ wakɔndɔla lɔsɛnɔ laki Kristo oko ɛnyɛlɔ kahombayɛ ndjela? Onde wɛ nyangaka dia mbishola waonga wa shikaa wakɛnya Yeso, ko oma lâsɔ wɛ sala la wolo dia monga la waonga asɔ lo lɔsɛnɔ layɛ?​—1 Pet. 2:21.

Asawo ayɛ kokaka mɛnya polo lo yɛdikɔ yakɔna yamboyohama. Akristo wambɔlɔta lonto l’oyoyo hawotondja ɛtɛkɛta wa kɔlɔ, wa tɛngɔ, wa sɔnyi, kana wa diɔnyɔ. Koko, ɛtɛkɛta awɔ mongaka ‘awui w’ɔlɔlɔ weya mbodia anto . . . ndo wakoka kimanyiya ampokami.’ (Ef. 4:25, 26, 29, 31; 5:3, 4; Jude 16) Awui watawɔ l’ahole wewɔ vamɛ kana lo nsanganya ya l’etshumanelo mɛnyaka dia vɔ wekɔ la shɛnɔdi ndo ɔnɛ akambo wa mɛtɛ wekɔ lo tshikitanya nsɛnɔ yawɔ.

Naka wɛ “[hayo]sutshasutshama la pepe tshe ya dietshelu, uma lu yewu y’antu, lu lukesu la munganyiya antu,” kete dui sɔ mɛnyaka nto dia wɛ ambohama lo nyuma. (Ef. 4:14) Ngande wasalayɛ, ɛnyɛlɔ etena kalodja andja ɔnɛ yimba yɛ la tokanyi, l’eyango ndo la tɔkɛnyɔ t’eyoyo na? Onde wɛ tohembamaka dia mbɔsa wenya wahombayɛ kotsha eyango ayɛ wa lo nyuma dia ndjakimɔ l’akambo asɔ? Sala ngasɔ koka koshimba wolo efula dia wɛ pama lo nyuma. Lâsɔ ekɔ dui dia lomba ndjatshungwɛ etena dikambo di’eyango wa lo nyuma!​—Ef. 5:15, 16.

Yoho yasɛnayɛ l’anto akina koka mɛnya nto dia wɛ ambohama lo nyuma. Onde yoho yayɛ ya sɛna l’ananyɔ ndo l’akadiyɛyɛ, mɛnyaka dia wɛ ekɔ la ‘kɛtshi . . . la memakana, ndo dimanyiyanaka’?​—Ef. 4:32.

Ohamelo ayɛ lo sala akambo oko Jehowa pombaka mɛnama aha tsho l’etshumanelo koko ndo la ngelo kayɛ. (Ef. 5:21–6:4) Dui sɔ pombaka mɛnama nto la kalasa, l’ahole w’anto tshɛ, ndo lo dihole diayɛ di’olimu. (Ef. 6:5-9) Naka wɛ ayɔkɛnɛmɔla waonga waki Nzambi lo yoho y’efula lo waaso asɔ tshɛ, kete ohamelo ayɛ wayɛnama lo sɛkɛ.

Kamba la woshasha ayɛ

Jehowa akatosha sho tshɛ akoka ndo waewo amɔtshi w’oshinga wolo. Nde nongamɛka dia sho kamba la wɔ lo wahɔ w’anto akina lo woho ɔnɛ wakokande mbaɛnya ngandji kande k’otamanya oma lo tshimbo yaso. Lo dikambo sɔ, ɔpɔstɔlɔ Petero akafunde ate: “Uku akalungula untu l’untu ushasha, nyuwushani, uku alami w’ololo wa wehu efula wa ngandji ka mamba ka [Nzambi].” (1 Pet. 4:10) Ngande wakotshayɛ ɔkɛndɛ ayɛ w’olami na?

Petero ambota nto ate: “Naka untu atutaka diui, ati uku atandi aui wa [Nzambi].” (1 Pet. 4:11) Divɛsa nɛ mbikaka epole ɔsɛkɛ l’ɔkɛndɛ wele laso wa tɛkɛta lo yoho yɔtɔnɛ l’Ɔtɛkɛta wa Nzambi wakasambiyama, woho wa Nzambi tombɔma. Yoho yatɛkɛtaso pombaka nto tombola Jehowa. Wetshelo washama lo Kalasa k’Olimu wa Teokrasi koka kokimanyiya dia wɛ kamba la woshasha ayɛ lo yoho yayotombola Nzambi oma l’ekimanyielo kashayɛ anto akina. Naka ɔsɔ mbele oyango ayɛ, ngande wahombayɛ mbeya dia wɛ ambohama lo kalasa kɛnɛ na?

Lo dihole dia mbidjaka yimba paka dia mbeya akambo angana wa lo dikatshi diayɛ di’alako wambokamba layɛ kana weho w’asawo wamboyosha, ekɔ ohomba kana yimba dia mbeya polo lo yɛdikɔ yakɔna yambokokimanyiya wetshelo ɔsɔ dia wɛ ndowanya olambo ayɛ wa lotombo walambolayɛ Nzambi. Kalasa tokimanyiyaka dia sho monga tomanamana l’olimu w’esambishelo. Lâsɔ, yambola wate: ‘Onde dimi mɛtɛ nɔngɔsɔlaka kɛnɛ kayangami tota l’esambishelo oko wakametshama lo kalasa? Onde dimi ndjashaka l’otema ɔtɔi le onto lasambishami? Onde dimi nɔngɔsɔlaka wendelo w’oyoyo lo tshika onto la wombola w’oshika wayotoyɔkɛtshanya mbala kayaye? Naka lekɔ lo mbeka Bible l’onto, onde lekɔ lo sala la wolo dia koma ombetsha weya munanda otema w’ombeki?’

Aha waɛsɛ w’olimu wamboyokondja ato mbahomba mɛnya dia wɛ ambohama. Ohamelo ayɛ mɛnamaka aha oma l’ɔkɛndɛ wokoshawɔ, koko lo woho wakotshayɛ ɔkɛndɛ akɔ. Naka wambokosha sawo diendana la wetshelo, kete yambola wate: ‘Onde dimi mɛtɛ lakakambi la diewo dia mbetsha? Onde dimi lakasha sawo diami lo yoho yakimanyiya ampokami dia tshikitanya nsɛnɔ yawɔ?’

Dako diakɔlɔmba dia kamba la woshasha ayɛ kɔlɔmbaka nto dia mbɔsa yɛdikɔ. Onde wɛ mbɔsaka yɛdikɔ ya sambisha anto akina? Onde wɛ nyangaka waaso wa kimanyiya as’etshumanelo kanyu weke eyoyo, akɛnda, kana wanɛ wele la dikɔmɔ? Onde wɛ ndjakimɔka la lolango layɛ dia mɔmba Mbalasa ka Diolelo kana mbisha ekimanyielo lo toho totshikitanyi lo nsanganya ya totshitshɛ kana ya weke? Onde wɛ kambaka tena la tena oko ombatshi mboka wa tshanda? Onde wɛ ekɔ l’akoka wa kamba oko ombatshi mboka wa pondjo kana tokimanyiya etshumanelo kɛmɔtshi kele lo dihombo di’efula? Naka wɛ ekɔ ɔnangɛso, onde wɛ salaka la wolo dia kotsha kɛnɛ kalɔmbama dia koma okambi w’olimu kana ekumanyi? Woho wetawɔyɛ la lolango dia mbisha ekimanyielo kayɛ ndo mbetawɔ ɛkɛndɛ ekɔ djembetelo yɛnya ohamelo ayɛ.

Ohomba wa mpokɔ akambo

Naka wɛ mbokaka dia wɛ bu l’akoka nɛ dia wɛ atahokɔ akambo wendana la lɔsɛnɔ l’Okristo, kete tɔkɔmɔke. Ɔtɛkɛta wa Nzambi koka ‘mbisha onto lele atahokɔ akambo lomba.’ (Osam. 19:7; 119:130; Tuk. 1:1-4) Kamba l’alako wa lo Bible tokimanyiyaka dia kondja wahɔ oma lo lomba laki Jehowa la kokele. Lɔ ndeka wetshelo tshɛ wakokaso kondja oma lo diewo diaso di’akambo dɔamɛ. Ɔnkɔnɛ, lam’atatahame l’olimu wakambɛso Jehowa, sho kondjaka diewo di’oshika. Ngande wakokaso kamba ladiɔ lo wahɔ aso na?

Naka onto ambohomanaka la weho w’akambo wotshikitanyi lo lɔsɛnɔ, kete nde koka ndjokoma lo kanyiya ɔnɛ: ‘Lam’ele dimi lambohomanaka la dikambo nɛ, ka dimi mbeyaka kɛnɛ kahombami sala.’ Onde ɔsɔ ekɔ dui dia lomba? Tukedi 3:7 tewolaka ɔnɛ: “Tuyalaki kanga yimba lu ashu aye weme.” Diewo pombaka mɛtɛ tokimanyiya dia sɛdingola awui wahombaso mbidja yimba etena keso l’atei w’akambo amɔtshi wa lo lɔsɛnɔ. Koko, naka tambohama lo nyuma, kete diewo diaso di’akambo diayonga la shɛngiya lo yimba ndo l’otema aso dia tɛnya ɔnɛ tekɔ l’ohomba w’ɛtshɔkɔ waki Jehowa dia sho tondoya. Aha lo woho watokomɛso okakatanu ɔmɔtshi l’eshikikelo tshɛ mbɛnyaso dia tambohama, koko lo ndjaɛkɛ le Jehowa dia nde nɔmbɔla lɔsɛnɔ laso. Sho mɛnyaka dikambo sɔ nto lo mbeya dia ndoko kakoka tokomɛ aha la lotshungɔ la Nzambi ndo lo monga la diɔtɔnganelo diɛnya wɛkamu ndo ngandji kaso otsha le Shɛso lele l’olongo.

Tetemala la kɔlamɛ otsha la ntondo

Kânga mbakinde Okristo w’okitami w’esɔ wambotshunda lo nyuma, ɔpɔstɔlɔ Paulo aketawɔ dia nde pombaka ‘kɔlamela otsha la ntondo’ dia kondja difuto dia lɔsɛnɔ. (Fil. 3:13-16) Onde ndo wɛ mbɛna akambo woho ɔsɔ?

Polo lo yɛdikɔ yakɔna yamboyohama? Ɛdika ohamelo ayɛ lo menda polo lo yɛdikɔ yamboyɔlɔta lonto l’oyoyo, yakitanyiyayɛ lowandji laki Jehowa, ndo woho wakambayɛ l’etete la weshasha ayɛ dia tombola Jehowa. Naka wɛ kondja wahɔ oma lo Kalasa k’Olimu wa Teokrasi, kete waonga wɔkɛnɛmɔmi l’Ɔtɛkɛta wa Nzambi pombaka ndjɛnamaka yema yema lo yoho yayɛ ya tɛkɛta ndo ya mbetsha. Djaka yimba l’akambo asɔ wendana l’ohamelo ayɛ. Eelo, dui sɔ diayokɔngɛnyangɛnya ndo ohamelo ayɛ wayɛnama le anto tshɛ.