Onde wɛ kokaka nsambisha lo nshi ya mingu?

1. Wetshelo akɔna wakondjaso oma l’akambo wakasale Paulo nde l’asekande la Filipi?

¹ Lushi la Sabato aki lushi lakomuyaka efula k’ase Juda la Filipi. Paulo nde l’asekande wakembola osomba ɔsɔ lo lɔkɛndɔ lawɔ lɔmɔtshi la misiɔnɛrɛ. Ndoko onto lakakoke mbaɔnyɔla l’etena kakawakoke momuya l’ɔkɔngɔ wa nshi y’esambishelo shɔ. Koko, vɔ wakeyaka di’ase Juda wakatshumanaka l’andja w’osomba dia tosala alɔmbɛlɔ. Diakɔ diele vɔ wakakambaka la diaaso sɔ dia mbasambisha. Ande ɔngɛnɔngɛnɔ wakonge la Paulo nde l’asekande etena kakawɛnyi Ludiya ambahokamɛ ndo ase luudu lande l’otondo wambobatizama! (Etsha 16:13-15) Lam’ele ɛlɔ kɛnɛ anto efula momuyaka Lushi la lomingu, shi wɛ kokaka mbasambisha lushi lɔsɔ?

2. Naa ekakatanu wakatondoya ekambi waki Jehowa dia sambishaka Lushi la lomingu aha la mundama?

² Welo wakadjama dia esambishelo ka Lushi la lomingu: Lo 1927, Ɛmɛnyi wa Jehowa wakakeketshama dia nsambishaka la ntondo kana l’ɔkɔngɔ wa midi Lushi la lomingu tshɛ. Vɔ wakatatɛ ndɔshama mbala kakɔ ɔtɔi l’ɔtɛ wa dui sɔ. Efula ka l’atei awɔ wakadjama lo lokanu la l’États-Unis l’ɔtɛ w’ɔnɛ vɔ hawɔlɛmiya Lushi la lomingu la Sabato, vɔ mbidjaka ofukutanu ndo vɔ sondjaka aha la monga la mikanda wawasha lotshungɔ la nsala dui sɔ. Koko ekambi waki Jehowa kopekɔ. L’ɛnɔnyi 1930, vɔ wakakongɛ “elui wa weke” wakakengama l’apandjudi wa lo tshumanelo diaki suke la lokanu lɔsɔ dia vɔ nsambisha l’ɛtshi ka nkɛtɛ kɛsɔ lo yoho ya lânde. Etena kakandamaka apandjudi lo waaso amɔtshi, ewandji wa lɛɛta wakatshimbaka wɔɔngɔ lo menda lofulo laki apandjudi akɔ. Onde wɛ mɛnyaka lowando lo kɛnɛ kakasale anangɛso asɔ dia sho ntana waaso wa ntatɛ nsambisha lo nshi ya mingu aha la mundama?

3. Kakɔna ketɛ Lushi la lomingu lushi la dimɛna di’olimu w’esambishelo?

³ Lushi la dimɛna la nsambisha: Anto efula tanemaka la ngelo Lushi la lomingu. Lushi lɔsɔ mongaka lushi la diomuyelo le wɔ. Ase ɛtɛmwɛlɔ amɔtshi koka monga suke dia nsawola akambo wendana la Nzambi lushi lɔsɔ. Naka sho salaka nsanganya Lushi la lomingu, kete weho akɔ tshɛ tayɔlɔta ahɔndɔ oko watotɔlɔtaka otsha l’olimu w’esambishelo. Shi wɛ kokaka sambishaka la ntondo kana l’ɔkɔngɔ wa nsanganya? Naka kokaka wɛ mbeyaka mɛmba yangɔ ya ndɛ y’osadi.

4. Ɔngɛnɔngɛnɔ akɔna wakokaso nkondja naka sho nsambisha la ntondo kana lɔkɔngɔ wa midi Lushi la lomingu?

⁴ Naka sho nsambisha Lushi la lomingu la ntondo kana lɔkɔngɔ wa midi kete tayonga la wenya efula wa mumuya. Ndo diomuyelo diaso diayonga etena k’ɔngɛnɔngɛnɔ lam’ele takikɔ oma la nkamba olimu w’ekila. (Tuk. 19:23) Sho kokaka monga l’ɔngɛnɔngɛnɔ dia ntana onto ɔmɔtshi lele oko Ludiya!