Sawo di’oyoyo diendana la woho wa ntatɛ mbeka l’anto Bible

1. Naa sawo di’oyoyo diayotombaka lo Tshoto y’Etangelo y’anto tshɛ ndo oyango akɔna wele la sawo sɔ?

¹ Ntatɛ oma lo ngɔndɔ kayaye, sawo di’oyoyo diayotatɛ ntomba lo Tshoto y’Etangelo y’anto tshɛ dia tokimanyiya dia sho ntatɛ mbeka l’anto Bible. Diɔ diekɔ l’ɔtɛ a dui ɔnɛ: “Etshama oma lo Ɔtɛkɛta wa Nzambi.” Kânga mbele anto amɔtshi wa lo ɛtshi kaso ka nkɛtɛ hawotɔngɛnangɛna mbadia sawo tshɛ dia lo asawo asɔ, asawo akɔ wekɔ l’oyango wa sho nkɛtshanya l’anto awui wa lɔkɔ.

2. Naa awui amɔtshi wele la sawo sɔ?

² Awui wayongaka lo sawo diakɔ: Ɔtɛ a dui ndo ɛtɛ w’awui wahɔnyi mfundama oko ambola wahombaso mboka etena kakɛtshanyaso l’ampokami. Avɛsa woleki ohomba shilama tsho woho w’ampokami aso ngɛnangɛna dia mbetshama mbala kakɔ ɔtɔi oma l’Ɔtɛkɛta wa Nzambi. Edingɔ wa lɔkɔ wekɔ tomondo l’oyango wa tokimanyiya dia sho nsawola l’onto lo tshena pe kânga wemema. Sawo tshɛ totomaka lo dibuku Bible etshatɔ dia tokimanyiya dia mbɔtshiya wekelo wa Bible l’ekimanyiyelo ka dibuku sɔ naka kokaka.

3. Etena katshɔso l’esambishelo ka luudu la luudu, ngande wakokaso nkamba la sawo nɛ dia ntatɛ mbeka l’onto Bible lo tshena pe kânga wemema?

³ Woho wa nkamba la diɔ: Etena kashayɛ onto periodikɛ wɛ kokaka mbôka dimbola diakoka nkotola yambalo yande oya lo ɔtɛ wa sawo dimɔtshi diendana l’anto tshɛ. Ɛnyɛlɔ, Tshoto y’Etangelo ya Ngɔndɔ ka ntondo 1 tɛkɛtaka dia nɛmɔ diele la Bible. Wɛ kokaka mbombola ɔnɛ: “Onde wɛ mbɔsaka Bible oko Ɔtɛkɛta wa Nzambi kana oko tsho dibuku dimɔtshi dia dimɛna? [Tshikande akadimole.] Lekɔ la dikambo dimɔtshi di’ohomba efula diendana la dui sɔ.” Ɛnyande dimbola dia ntondo, adia odingɔ wa ntondo ndo nyadia divɛsa dimɔtshi dioshilami. Adia dimbola nto ndo lɔmba ompokami ayɛ dia nde dilembetshiya. Nyɔsɛdingole yɛdikɔ y’awui yakoka lo nkamba la ambola wele lo sawo diakɔ dia nyu nkɛtshanya. Ntondo ka wɛ mbotshika, kotola yambalo yande lo dimbola dikina diayonyoyɔsɛdingola mbala kayaye ndo okana la nde lushi lahombayɛ nkalola dia ndjodisɛdingola. Kokalolake dia towenda lomingu tshɛ dia tɔsɛdingolaka akambo efula wa lo sawo diakɔ edja ndo lam’ayoyowela numɛlɔ kekina. Yoho kina yakokaso nkamba la tɔ ele mɛnya ompokami aso mbala kakɔ ɔtɔi ndo lo yoho ya wɔdu woho wekaso l’anto Bible. Oma lâsɔ, kamba la sawo dimɔtshi diele lo periodikɛ dia mbɛnya woho wekaso l’anto Bible.

4. Ngande wakokaso nkamba la sawo nɛ etena kasalaso waendelo w’eyoyo?

⁴ Wɛ koka nto nkamba la sawo di’oyoyo sɔ dimɛna lo ntshɔ dia tosha anto wokoyoshaka periodikɛ mbala la mbala ndo lo waendelo w’eyoyo ekina. Wɛ kokaka mbuta tsho ɔnɛ: “Ɔnɛ ekɔ sawo di’oyoyo diambotomba lo Tshoto y’Etangelo. Layanga kɛnya woho wa nkamba la diɔ.” Tekɔ lo nɔmba dia sawo di’oyoyo nɛ ndeka nkimanyiya anto efula dia vɔ “nkuma lu ewu ka mete.”—1 Tim. 2:4.