Sala la wolo dia munanda otema

LÂDIKO wa sambisha anto, wɛ pombaka nto sala la wolo dia minanda etema awɔ. Lo Bible, otema mbɔsamaka mbala efula lo yoho yotshikitanyi la ɛnamelo ka l’andja wa demba. Otema wa didjidji nembetshiyaka lonto la l’etei k’otema, mbut’ate woho wayaokande, tokanyi tande tshɛ lo kɛnɛ kendana la dikambo dimɔtshi, bonde kakanyiyande dikambo diakɔ, ndo woho wele tokanyi tɔsɔ la shɛngiya l’etsha ande. L’otema wa didjidji ɔsɔ mbonɛma lɔtɔngɔ l’akambo wa mɛtɛ. (Mat. 13:19) Ndo oma l’etei k’otema mbahomba onto mɛnya okitanyiya ande otsha le Nzambi.​—Tuk. 3:1; Romo 6:17.

Dia wetshelo ayɛ mbeya munanda etema w’ampokami ayɛ, dja yimba l’eyango ɛnɛ: (1) Sɛdingola kɛnɛ kokongaka la shɛngiya l’otema w’ompokami ayɛ. (2) Ka epole ɔsɛkɛ lo waonga w’ɔlɔlɔ wahomba monga la nde, ɛnyɛlɔ ngandji ndo wɔma wa Nzambi. (3) Keketsha ompokami ayɛ dia nde sɛdingola nsaki yande ya l’etei k’otema woho wakokande nyomoleka ngɛnyangɛnya Jehowa.

Onga la shɛnɔdi. Ɛkɔkɔ wele anto amɔtshi watetawɔ akambo wa mɛtɛ tshikitana. Etena kekayɛ l’onto Bible, wɛ kokaka minya dikanyiyakanyiya diele lande ndo mbɛnya awui wayowokimanyiya dia nde minya tokanyi ta kɔlɔ, kana wɛ mbosha paka tolembetelo tɔmɔtshi. Yambola wate: ‘L’ɛnyɛlɔ k’anto tshɛ, onde onto ɔnɛ mbeyaka dia nde ekɔ l’ehomba wa lo nyuma? Akambo akɔna wamondoshilaka mbetawɔ? Awui akɔna wahandetawɔ? Bonde kakandayokoma lo mbetawɔ kana tona awui akɔ? Onde nde ekɔ l’ohomba w’ekimanyielo dia minya nsaki yakoka mboshimba dia mbetawɔ ɛkɛndɛ wahomba onto lambeya akambo wa mɛtɛ mɛmba?’

Aha mbala tshɛ mbatondongaka wɔdu dia mbeya bonde ketawɔ anto akambo amɔtshi. Tukedi 20:​5, mbutaka ɔnɛ: “Esangweyu l’utema w’untu eli uku ashi wa dingunda. Keli kanga [“shɛnɔdi,”NW] ayukiduwula.” Shɛnɔdi ekɔ dikoka diele l’onto dia shihodia kɛnɛ kahaleke tomba sɛkɛ. Kɛsɔ nɔmbaka dia sɛdingola akambo dimɛna ndo mbeya ndjasha lo dikambo.

Aha paka l’ɛtɛkɛta mbewoyanya anto akambo tshɛ. Dikambo dimɔtshi koka tshutshuya ombeki dia tshikitanya elungi kana wondjo ande wa dui. Naka wɛ ekɔ ombutshi, kete wonya watshikitanya ɔnayɛ lɔkɛwɔ lande, wɛ mbeyaka aha la tâmu dia dikambo dimɔtshi di’oyoyo diaya la shɛngiya lo lɔsɛnɔ lande. Tonyake yimba l’awui wakɛnya di’ɔnayɛ ambotshikitanya lɔkɛwɔ lande. Awui asɔ mɛnyaka kɛnɛ kele l’etei k’otema ande.

Wembola wɔsɔnami dimɛna koka kokimanyiya dia mbeya kɛnɛ kele l’etei k’otema w’onto. Wɛ koka mombola wate: “Afɔnyayɛ lo dikambo dia. . . ?” “Kakɔna kaketawoya dia . . . ?” “Ayoyosala naka . . . ?” Koko ewɔ dia pɔpa onto wembola wamboleka. La yewo tshɛ, ɔtshiya wembola ayɛ lo yoho nyɛ: “Onde dimi koka kombola ɔnɛ . . . ?” Mbeya kɛnɛ kele l’otema w’onto ekɔ dikambo dia wolo diele hakoke tshɔ lowango lowango. Mbala efula, di’onto ndjokosholɛ kɛnɛ kele l’etei k’otema ande paka nde ambotakeyi dimɛna ndo dikambo sɔ mbɔsaka tushi. Oyadi nde ambokeya dimɛna, paka wɛ menda ɔlɔlɔ di’aha nde ndjɔfɔnya ɔnɛ wɛ owombola akambo wahendana layɛ.​—1 Pet. 4:15.

Yoho yasalayɛ etena kokayɛ okadimwelo w’onto nɔmbaka nto dia monga la shɛnɔdi. Ohɔ di’oyango ayɛ ele wa mbeya kɛnɛ kele l’otema w’onto dia wɛ mbeya awui akɔna w’oma l’atei wa Bible wakoka mbokeketsha. Tonake dia mɛnya esadi eto ɔnɛ tokanyi toshande tekɔ kɔlɔ. Koko, onga suke dia mbeya kɛnɛ kele ledia ka kɛnɛ kata onto. Oma lâsɔ, wɛ ayeya woho wa kadimola; ndo naka ombeki ambɛna dia wɛ ekɔ lo mboka kɛnɛ kele l’otema ande, kete nde ayoleka mbidja yimba dimɛna lo kɛnɛ kawotɛyɛ.​—Tuk. 16:23.

Kânga lam’atɛkɛtayɛ la ntondo k’anto efula, wɛ koka lo yɛdikɔ mɔtshi mbakeketsha dia mbɔsa yɛdikɔ mɔtshi. Naka wɛ ayendaka ampokami dimɛna ndo sɛdingolaka kɛnɛ kele lo dungi diawɔ, ndo naka wɛ ayokamba la wembola watshutshuya anto dia kana yimba, kete ondo wɛ ayeya woho wɔsa ampokami ayɛ awui wawatɛyɛ. Naka wɛ mbeyaka ampokami ayɛ dimɛna, kete ɛnya dia wɛ mbeyaka awui wele lawɔ. Dja yimba lo dionga diele l’etshumanelo k’otondo etena kakanayɛ la wɔ yimba l’ekimanyielo k’Ɔtɛkɛta wa Nzambi.​—Ngal. 6:18.

Lomialomia nsaki y’amɛna. L’ɔkɔngɔ wa wɛ mbeya yema awui amɔtshi wetawɔ onto ndo wahandetawɔ, ndo bonde kawaetawɔnde kana kahandawaetawɔ, wɛ ayeya kɛnɛ ka sala. L’ɔkɔngɔ wa eolwelo kande, Yeso akananda etema w’ambeki ande lo ‘mbamanya Afundelo fundo’ lo kɛnɛ kendana l’awui waki mala tomba. (Luka 24:32) Wɛ la dia sala la wolo dia mɛnya diɔtɔnganelo diele lam’asa kɛnɛ kakakomɛ onto, kɛnɛ kakombolande, ndo kɛnɛ kamondoshola l’Ɔtɛkɛta wa Nzambi. Otema w’ombeki wayonandema lo yoho ya dimɛna naka nde mɛna hwe ɔnɛ: “Ɔnɛ ekɔ AKAMBO WA MƐTƐ.”

Etena kakayɛ epole ɔsɛkɛ l’ɔlɔlɔ waki Jehowa, ngandji kande, ɔlɔlɔ ande w’otema w’otamanya, ndo lo mboka yande yosembwe, wɛ kimanyiyaka wanɛ wetshayɛ dia vɔ mboka Nzambi ngandji k’efula. Lam’atshungolayɛ etena dia mɛnya ampokami ayɛ waonga w’ɔlɔlɔ wɛna Jehowa le wɔ, wɛ mbashaka ɔkɔkɔ wa vɔ mbetawɔ ɔnɛ onto koka monga la diɔtɔnganelo di’ɔlɔlɔ la nde. Wɛ koka sala ngasɔ lo kana la wɔ yimba l’avɛsa wele oko Osambu 139:1-3, Luka 21:1-4, ndo Joani 6:44 ndo lo kimanyiya ampokami ayɛ dia shihodia ngandji k’efula kele la Jehowa otsha le ekambi ande wa kɔlamelo. (Romo 8:38, 39) Lembetshiya dia Jehowa hadje washo paka lo munga yaso tsho, koko nde mɛnaka yoho yaso ya lɔsɛnɔ tshɛ, ohetoheto aso l’ɔtɛmwɛlɔ wa pudipudi, ndo ngandji kokaso lokombo lande. (2 Ek. 19:2, 3; Heb. 6:10) Nde mbeyaka dimɛna woho wakatatongama, ndo lo yoho yɛnama, nde ayolola ‘wanɛ tshɛ wele lo waombo wohɔma,’ oya lo lɔsɛnɔ. (Joa. 5:28, 29; Luka 12:6, 7) Lam’ele anto wakatongama l’efanelo ndo lo didjidji diaki Nzambi, sawo diendana la waonga ande koka munanda otema w’onto dia nde mbetawɔ kɛnɛ katayɛ.​—Etat. 1:27.

Otema w’onto koka nto munandema etena kekande dia mbɔsa anto akina woho wawaɔsa Jehowa. Ekɔ ɔlɔlɔ kana l’onto yimba ɔnɛ, naka Nzambi kaso ndjashaka le so l’onto ndo l’onto, kete nde ndjashaka woho akɔ wamɛ ndo le anto akina, oyadi diewo diele lawɔ, wodja awɔ, kana lokoho lawɔ. (Etsha 10:34, 35) Naka onto aya la eokelo ka ngasɔ, kete nde ayonga l’ɔkɔkɔ ɔmɔtshi w’oshika w’oma l’Afundelo wotshutshuya dia minya lohetsho ndo tokanyi ta kɔlɔ otsha le anto akina oma l’otema ande. Kɛsɔ ayowokimanyiya dia sɛna l’anto akina lo wɔladi etena kayondeka dia salaka lolango laki Nzambi.

Wɛ la dia kimanyiya anto akina dia monga nto la wɔma wa Nzambi. (Osam. 111:10; Eny. 14:6, 7) Dilɛmiyɛlɔ di’efula dia ngasɔ, kana wɔma wa Nzambi, koka kimanyiya onto dia kotsha kɛnɛ kele totondokoka sala la wolo ande hita. Lo nembetshiya anto akina elimu wa diambo waki Jehowa, ndo dia ngandji kande ka mamba, wɛ koka mbakimanyiya dia monga la wɔma wa dimɛna wayowatshutshuyaka di’aha mbonyangiya.​—Osam. 66:5; Jer. 32:40.

Yashikikɛ di’ampokami ayɛ shihodiaka dia lɔkɛwɔ lawɔ lekɔ ohomba le Jehowa. Nde ekɔ la nsaki, ndo yoho yasalaso lam’alongolaso alako ande koka mbonyangiya kana mbɔngɛnyangɛnya. (Osam. 78:40-42) Ɛnya anto bonde kele lɔkɛwɔ lawɔ hita koka mbela okadimwelo lo tɔfwɛfwɛ takadje Satana Nzambi.​—Tuk. 27:11.

Kimanyiya ampokami ayɛ dia mbeya ɔnɛ wayokondja wahɔ lo kitanyiya kɛnɛ kâlɔmba Nzambi. (Is. 48:17) Yoho mɔtshi yakokayɛ mbakimanyiya ele mbaɛnya etombelo wakoka mbakomɛ lo demba ndo lo yimba naka vɔ mboka lomba laki Nzambi ɔkɔngɔ kânga lo tshanda mɔtshi tsho. Lembetshiyawɔ dia pɛkato tânganyaka la Nzambi, shimbaka anto akina dia mbeka akambo wa mɛtɛ oma le so, ndo mɔnyɔlaka lotshungɔ lawɔ. (1 Tes. 4:6) Kimanyiya ampokami ayɛ dia vɔ mbɔsa la nɛmɔ ɛtshɔkɔ wakondjawɔ nshi nyɛ lo kitanyiya adjango wa Nzambi. Keketshawɔ dia monga la lowando l’efula lo woho wakokamɛso oma l’ekakatanu efula etena kakɛndakɛndaso lo mboka yosembwe yaki Jehowa. Naka onto monga la mbetawɔ lo mboka ya lomba yaki Nzambi, kete nde ayotona yoho ya lɔkɛwɔ tshɛ yahɔtɔnɛ la mboka shɔ. (Osam. 119:104) Nde ayɛna di’okitanyiya kema dikambo dia wotsho, koko ekɔ yoho y’onto mɛnya nganɛ wayakimɔnde la ngandji tshɛ otsha le Jehowa.

Kimanyiya ampokami ayɛ dia vɔ ndjasɛdingola. Di’onto tetemala pama lo nyuma, nde la dia mbetawɔ kɛnɛ kele l’etei k’etema ande. Lembetshiyande nganɛ wakoka Bible mbokimanyiya lo dikambo sɔ.

Kimanyiya ampokami ayɛ dia mɛna dia Bible bu tsho dibuku dia wadjango, di’alako, di’ɛkɔndɔ w’awui wakete, kana dia prɔfɛsiya, koko tɔ kɛnɛmɔlaka nto tokanyi taki Nzambi. Lo Jakoba 1:22-25, vɔ mbɛdikaka Ɔtɛkɛta wa Nzambi la talatala. Losango la lo Bible mɛnyaka kɛnɛ kele l’etema aso oma lo yoho yasalaso lam’okaso kɛnɛ katatɔ ndo yoho yakotsha Jehowa asangwelo ande. Lâsɔ, tɔ mɛnyaka woho watɔsa Nzambi ɔnɛ ‘lasɛdingola etema.’ (Tuk. 17:3) Keketsha ampokami ayɛ dia vɔ mbohɔka dikambo sɔ. Keketshawɔ dia kana yimba la kɛnɛ kakatolamɛ Nzambi lo Bible ndo etshikitanu wahombawɔ sala lo nsɛnɔ yawɔ dia nyomoleka mbɔngɛnyangɛnya. Kimanyiyawɔ dia mbɔsa wadielo wa Bible oko yoho mɔtshi ya mbeya woho wɔsa Jehowa ‘tokanyi ndo nsaki ya l’otema’ dia vɔ mbeya kamba kamɛ la Nzambi dia sala etshikitanu wahombama.​—Heb. 4:12; Romo 15:4.

Ambeki amɔtshi wa Bible mbeyaka nanga kamba la kɛnɛ kekawɔ; koko vɔ mbokaka wɔma lo kɛnɛ kayota anto akina lo dikambo diawɔ. Ondo vɔ wekɔ lo ndɔshana la nsaki mɔtshi ya wolo ya demba. Kana vɔ koka kambɛ Nzambi aha la tshika ditshelo dimɔtshi di’ase andja ɔnɛ. Ɛnyawɔ wâle wakoka mbakomɛ naka haweye woho wa mbɔsa yɛdikɔ. (1 Khum. 18:21) Keketshawɔ dia vɔ nɔmba Nzambi dia nde sɛdingola ndo mbɛdia etema awɔ.​—Osam. 26:2; 139:23, 24.

Ɛnyawɔ dia Jehowa mɛnaka welo wadjawɔ ndo ɔnɛ Bible nembetshiyaka kɛnɛ kasalawɔ kɛsɔ. (Romo 7:22, 23) Kimanyiyawɔ dia monga la yewo di’aha tokanyi t’oma l’etema awɔ wele kema kokele mbawahemɛ.​—Tuk. 3:5, 6; 28:26; Jer. 17:9, 10.

Keketsha onto tshɛ dia nde sɛdingola kɛnɛ kotshutshuya dia sala awui asɔ. Tɛnde dia ndjambola ɔnɛ: ‘Bonde kasalami dui nɛ? Onde diɔ diayɛnya Jehowa dia dimi ngɛnangɛnaka kɛnɛ tshɛ kamondosalɛ?’ Keketsha dietawɔ di’ɔnɛ mbetawɔma le Jehowa mbele dikambo dioleki nɛmɔ le onto.

Kimanyiya ampokami ayɛ dia shihodia elɛwɔ kambɛ Jehowa ‘l’otema awɔ tshɛ.’ (Luka 10:27) Kɛsɔ mɛnyaka dia tokanyi, nsaki, ndo eyango awɔ tshɛ la dia mbɔtɔnɛ la mboka yaki Jehowa. Ɔnkɔnɛ, etsha ampokami ayɛ dia vɔ sɛdingola aha tsho kɛnɛ kasalawɔ koko ndo woho wayaokawɔ lo kɛnɛ kendana l’awui walɔmba Nzambi ndo la eyango wâtshutshuya dia mbokambɛ. (Osam. 37:4) Naka ambeki ayɛ wambɛna ahole wahombawɔ ndjalowanya, kete keketshawɔ dia nɔmba Jehowa oko omembi w’esambo ɔnɛ: “Olongosole utema ami dia dimi mbuka lukumbu laye woma.”​—Osam. 86:11.

Naka ombeki monga la diɔtɔnganelo di’ɔlɔlɔ la Jehowa, kete nde ayokitanyiya Nzambi oma lo mbetawɔ kele lande le nde koko aha nɛ dia wɛ ekɔ lo mbokeketsha dia sala ngasɔ. Ndamɛ ‘ayotetemala ndjashikikɛ kɛnɛ kangɛnyangɛnya Nkumadiɔndjɔ.’ (Ef. 5:10; Fil. 2:12) Jehowa ngɛnangɛnaka okitanyiya wa l’otema ɔtɔi wa woho ɔsɔ.​—Tuk. 23:15.

Ohɔ dia Jehowa mbasɛdingola etema ndo mbakotola anto oya le nde. (Tuk. 21:2; Joa. 6:44) Ɔkɛndɛ aso ele wa kamba kamɛ la nde. (1 Kor. 3:9) Ekɔ oko ‘Nzambi sɛngasɛngaka anto oma lo tshimbo yaso.’ (2 Kor. 5:20; Etsha 16:14) Jehowa hatshutshuya ndoko onto dia mbetawɔ akambo wa mɛtɛ la wolo, koko naka sho kamba l’Afundelo, kete nde koka sala di’ampokami aso mɛna dia kɛnɛ kewɔ lo mboka ekɔ ekadimwelo lo wembola awɔ, kana l’alɔmbɛlɔ awɔ. Ongaka la kanyi l’ɔtɛ etena ketshayɛ, ndo lɔmba Jehowa ɛlɔmbwɛlɔ ndo ekimanyielo kande l’otema ɔtɔi.​—1 Ek. 29:18, 19; Ef. 1:16-18.