Keketsha ampokami dia kamba la Bible

OYANGO aso ele wa kotola yambalo y’onto tshɛ oya l’Ɔtɛkɛta wa Nzambi, Bible. Oma lo dibuku di’ekila sɔ mbotumbi losango lasambishaso, ndo sho nangaka di’anto mbeya ɔnɛ kɛnɛ kataso, bu ɛtɛkɛta aso hita koko tɔ ndja oma le Nzambi. Anto pombaka monga la mbetawɔ lo Bible.

L’Olimu w’Esambishelo. Lam’ayalɔngɔsɔlayɛ otsha l’esambishelo, sɔnaka mbala tshɛ divɛsa kana avɛsa wa wɛ mbadiɛ anto wayolanga kohokamɛ. Oyadi kânga wɛ ekɔ lo sala mbɔtwɛlɔ ka mondo dia mbisha onto okanda ɔmɔtshi walembetshiya awui wa lo Bible, ekɔ ohomba mbala efula dia mbadia divɛsa dimɔtshi diasungana. Bible ekɔ la nkudu k’efula ka nɔmbɔla anto wele oko ɛkɔkɔ oleki kɛnɛ tshɛ kokokiso mbuta shamɛ. Lanɛ wɛnayɛ dia hasungana mbadia kânga divɛsa ɔtɔi, wɛ koka mbuta awui amɔtshi w’oma lɔkɔ. Lo ntambe ka ntondo, wɛɔmbɔ w’Afundelo kotanemaka l’anya w’anto efula. Koko Yeso nde l’ambeki ande wakavusolaka awui efula w’oma l’Afundelo. Sho lawɔ pombaka sala la wolo dia kimɛ avɛsa l’ɔtɛ ndo kamba la wɔ lo yoho yasungana l’esambishelo, kana mbala mɔtshi mbuta tsho awui w’oma lɔkɔ.

Naka wɛ ambokondja diaaso dia mbadia awui w’oma lo Bible, kete kimɛtɔ woho wakoka onto latɛkɛta la yɛ ndjela wadielo. Naka onto latɛkɛta la yɛ ayoyela lo Bible kande, kete nde ayokoka ndeka mbetawɔ awui wadiema.

Koko, wɛ la dia mbeya dia akadimudi amɔtshi wa Bible wakayasha lotshungɔ la sala kɛnɛ kalangawɔ la Ɔtɛkɛta wa Nzambi. Aha mbala tshɛ mbɔtɔnɛ dikadimwelo diawɔ l’awui wa l’ɛtɛkɛta wa ntondo wakafundama Bible. Dikadimwelo efula dia Bible dia nshi nyɛ diakanya lokombo laki Nzambi, diakadinyadinya kɛnɛ kata avɛsa wa l’ɔtɛkɛta wa ntondo wakafundama Bible lo kɛnɛ kendana la woho wele anto wavɔ, ndo diakashɛ anto kɛnɛ kata Bible lo dikambo dia sangwelo diaki Nzambi lo kɛnɛ kendana la nkɛtɛ. Lâsɔ, dia mɛnya onto kɛnɛ kakasalema, wɛ koka mɛna ohomba dia mbɛdika avɛsa w’ohomba efula w’oma lo dikadimwelo diotshikitanyi dia Bible kana oma lo dikadimwelo di’edjedja di’oma l’ɔtɛkɛta akɔ wamɛ. Lo asawo efula, dibuku Comment raisonner à partir des Écritures toshaka toho tɔmbɔla dikadimwelo diotshikitanyi dia Bible tɔtɛkɛta tɔmɔtshi t’ohomba tele l’avɛsa wakamba laso mbala efula. Onto tshɛ lalanga akambo wa mɛtɛ ayɔngɛnangɛna efula dia mbeya awui asɔ.

Lo Nsanganya ya l’Etshamanelo. Anto tshɛ pombaka keketshama dia kamba la Bible yawɔ lo nsanganya ya l’etshumanelo. Dui sɔ kimanyiyaka l’akambo efula. Diɔ kimanyiyaka ampokami dia tetemala mbidja yimba lo kɛnɛ katama. Diɔ salaka nto di’onto mɛna wetshelo washa ɔtɛkɛtshi la washo ande. Ndo diɔ kimanyiyaka eyoyo dia mɛna ɔnɛ dietawɔ diaso tomba mɛtɛ oma lo Bible.

Di’ampokami ayɛ ndjela wadielo ayɛ w’avɛsa lo Bible yawɔ kana bu, dui sɔ nemanɛka mbala efula la woho wâkeketshayɛ dia vɔ sala dikambo sɔ. Yoho mɔtshi l’atei wa toho toleki amɛna ele mbalɔmba mbala kakɔ ɔtɔi dia mbifola Bible yawɔ.

Wɛ ɔtɛkɛtshi mbahomba sɔna avɛsa walangayɛ mbika epole ɔsɛkɛ ko nɔmba ampokami dia mbayanga. Ndeka dimɛna mbadia avɛsa wayokokimanyiya dia mɔmbɔla awui woleki ohomba. Oma lâsɔ, naka wonya wekekɔ ko wɛ kotsha avɛsa amɔtshi angana wasukɛ tokanyi tayɛ.

Lo mɛtɛ, tena efula wɛ hahombe tsho komɛ lo shila divɛsa kana nɔmba ampokami dia vɔ diyanga. Naka wɛ mbadia divɛsa dimɔtshi ko mbeta lo dikina la ntondo k’ampokami tana divɛsa diakayashidi ntondo, kete vɔ wayɔkɔmɔ otema ndo hawotoyela nto wadielo lo Bible yawɔ. Endaka ampokami ayɛ. Naka efula l’atei awɔ wambotana divɛsa diakɔ ko wɛ diada.

Takanyi yimba la ntondo. Shila divɛsa la ntondo ka wɛ diada. Dui sɔ hatoketshɛ wenya wa konga di’ampokami ayɛ tana divɛsa diakɔ lo Bible yawɔ. Kânga mbele hanyoteka awui efula naka wɛ kongaka di’ampokami nyanga avɛsa, etombelo wayotomba wayɛnya dia wɛ pombaka salaka ngasɔ.