Etshumba wambodja Diolelo​—Wekɔ lo nshikikɛ lokumu l’ɔlɔlɔ laka lɛɛta

OHƆSA dia nyekɔ lo tasambisha lo luudu la luudu, ko nyamboka losiba la mutuka w’apulushi ndo lɔ lekɔ lo ndjaleke nsukana la nyu. Etena kamonyotatɛ nsawola l’onto ɔmɔtshi, osekayɛ lakatombi la yɛ l’esambishelo ambokadimɔ, ko ambɛna mutuka w’apulushi wambemala suke la nyu. Kɔmanda k’apulushi ambotomba ndo ambonyombola ate: “Onde nyu ahende mbateteta lo luudu la luudu dia tasawolaka l’anto akambo w’oma lo Bible? Wambotonyofunda.” Nyambowotɛ la loshilambo tshɛ dia nyekɔ Ɛmɛnyi wa Jehowa. Kakɔna kayowonyosalɛ oma laasɔ?

Lo yoho mɔtshi, dui sɔ diayolemanɛ la kɛnɛ kakanyasadi. L’edja k’ɛnɔnyi efula, ngande wasalɛ ewandji wa lɛɛta wa lo wodja anyu Ɛmɛnyi wa Jehowa akambo? Onde vɔ mbashaka lotshungɔ la ntɛmɔla? Naka ngasɔ mbediɔ, kete lo yɛdikɔ mɔtshi, diɛsɛ l’anangɛso l’akadiyɛso wa lo nyuma wakalɔsha dia “mamɛ ndo . . . nshikikɛ lokumu l’ɔlɔlɔ laka lɛɛta.” (Flpɛ. 1:7) Oyadi lɛnɛ tshɛ odjashiyɛ, mbadia ɛkɔndɔ wendana l’etshumba wambodja Ɛmɛnyi wa Jehowa laka lɛɛta ayokeketsha mbetawɔ kayɛ. L’etenyi kɛnɛ, tayɔsɛdingola ɛkɔndɔ ɛmɔtshi wa diambo wendana la dui sɔ. Tayɛna woho wɛnya etshumba wambotodja dia Diolelo ekɔ dui dia mɛtɛ ndo ɔnɛ aha oma lo wolo aso hita kambotowadja.