Ambosala dihindo diande dia ntondo

Aya lushi la sato ntatɛ lam’akakome Natanayɛlɛ ombeki ɔmɔtshi l’atei w’ambeki wa ntondo wa Yeso. Yeso nde la ambeki amɔtshi wa ntondo asɔ wambotshɔ otsha lo nɔrdɛ lo distrikɛ dia Ngalileya, ɛtshi kawɔ ka nkɛtɛ. Vɔ wakatatshɔka l’osomba wa Kana, lɛnɛ akotɔ Natanayɛlɛ. Osomba wa Kana tanemaka lo lɛkɛ l’akona lo nɔrdɛ ka Nazarɛtɛ, lɛnɛ akole Yeso. Vɔ wakelamɛ lo fɛtɛ ka diwala kakasalemaka la Kana.

Nyango aki Yeso akelamɛ ndo nde lawɔ lo fɛtɛ kɛsɔ. Oko wakinde ɔngɛnyi wa nkumbo ka wanɛ wakatshukanaka, ondo Mariya akashaka lonya lo kɛnɛ kendana l’olongwelo w’angɛndangɛnda efula. Ɔnkɔnɛ nde akɛnyi esadi eto dia wanu wamboshila, ko akatotɛ Yeso ate: “Vɔ bu la wanu.”​—Joani 2:3.

Lo mbuta ngasɔ, Mariya akalange dia Yeso nsala dui dimɔtshi lam’ele wanu wamboshila. Lo nkamba la ɔkɛla wɛnya dia nde ambotona dui sɔ, Yeso akakadimola ate: “Womoto, dikambo sɔ atendadiɔ dimi la yɛ?” (Joani 2:4) Oko wakinde Nkumekanga kakasɔnama oma le Nzambi, She lele l’olongo mbakahombaka nɔmbɔla elimu ande, koko aha nkumbo kande kana angɛnyi ande. La lomba tshɛ Mariya akatshike dui sɔ l’anya w’ɔnande, lo mbutɛ tsho wanɛ wakakambaka ɔnɛ: “Kanyosale kɛnɛ tshɛ kayondonyotɛ.”​—Joani 2:5.

Mbaka shamalo y’ave yakawadjaka ashi yaki lawɔ, mbaka la mbaka akakokaka mbɔtɔ litrɛ ndekana 40. Yeso akatɛ wanɛ wakakambaka elimu lo fɛtɛ kɛsɔ ɔnɛ: “Nyolodia ashi lo mbaka yakɔ.” Ko Yeso akate ate: “Nyɔshi yema, nyɔtɔlɛ ɔnɔmbɔdi wa fɛtɛ.”​—Joani 2:7, 8.

Ɔnɔmbɔdi wa fɛtɛ akambe lo kɛnɛ kendana la wanu wa dimɛna wakinde kombeya dia wakasalema lo dihindo. Ko nde akelɛ otshuki a wadi ndo akawotɛ ate: “Anto tshɛ toshaka anto wanu woleki amɛna ntondo, ko vɔ ndjowasha wanu wele bu amɛna naka wamboshila mbidjɔ. Wɛ akalami wanu woleki amɛna polo ndo wonya ɔnɛ.”​—Joani 2:10.

Ɔsɔ mbaki dihindo dia ntondo diakasale Yeso. Lam’akɛnyi ambeki ande wa ntondo dihindo sɔ, mbetawɔ kawɔ le nde kakakeketala. L’ɔkɔngɔ wa laasɔ, Yeso, nyango ndo akosɛnde wakande lɔkɛndɔ otsha l’osomba wa Kapɛrnauma lo nɔrdɛ owɛstɛ l’omamu wa Ndjale ka Ngalileya.