Yeso ekɔ la wolo laadiko di’ɛdiɛngɛ

Etena kakakalola ambeki lo dibongo l’ɔkɔngɔ wa vɔ pomana l’ekambokambo lo ndjale, vɔ wakahomana la dikambo dikina dia wɔma. Apami ahende wa ngala waki l’ɛdiɛngɛ wakatombe oma la waombo waki suke ndo wakayalawɔka oya le Yeso! Pami kɛmɔtshi l’atei awɔ akaleke nkotola yambalo, ondo nde kakaleke ngala ndo nde kakaleke monga l’ɛdiɛngɛ edja.

Pami ka kɔlɔ kɛsɔ aketetaka otakataka. Oyadi l’otsho kana la yanyi, nde “akatetemalaka mpangɔhangɔ la waombo ndo l’akona ndo nde akayahomuyaka la ave.” (Makɔ 5:5) Nde aki oko nyama ka l’okonda, diakɔ diele anto waki la wɔma wa mbeta letenyi k’otadimbo kɛsɔ. Anto amɔtshi wakahembaka mbokeleka, koko nde akahembolaka mɔlɔla ndo akalanyaka lowete lakawadjaka ekolo ande. Ndooko onto laki la wolo wa mbowɔladia.

Etena kakasukana pami kɛsɔ la Yeso ndo kakandakusama l’ekolo ande, ɛdiɛngɛ wakɔlɔmbɔlaka wakotshutshuya dia pangɔhangɔ ɔnɛ: “Kasami la yɛ na, wɛ Yeso, Ɔna Nzambi Kaheme-Tshɛ? Lambokotshibia lo lokombo la Nzambi nte, tonsoyake.” Yeso akɛnya dia nde ekɔ la lowandji le ɛdiɛngɛ lo mbidjanga ɔnɛ: “Wɛ ɔdiɛngɛ, tomba oma le pami kɛnɛ.”​—Makɔ 5:7, 8.

Lo mɛtɛ, pami kɛsɔ aki l’ɛdiɛngɛ efula. Etena kakawombola Yeso ate: “Lokombo layɛ?” Nde akakadimola ate: “Lokombo lami Leemba, nɛ dia tekɔ efula.” (Makɔ 5:9) Leemba l’asɔlayi w’ase Rɔmɔ lakongaka la nunu di’asɔlayi; laasɔ ɛdiɛngɛ efula wakatshumana le pami kɛsɔ ndo wakangɛnangɛnaka mbosoya. Vɔ wakalɔmbɛ Yeso “diaha nde mbatoma lo difuku diaha l’ekomelo.” Ondo vɔ wakeyaka kɛnɛ kawakongɛ ndo vɔ ndo Satana ɔnɔmbɔdi awɔ.​—Luka 8:31.

Olui wa nsombo oko 2 000 wakalɛka suke la lawɔ, nsombo ekɔ nyama kakɔsamaka oko mindo lo ndjela Ɛlɛmbɛ ndo ase Juda takawahombaka monga layɔ. Ɛdiɛngɛ wakate ɔnɛ: “Ototome le nsombo kele totɔtɔ le yɔ.” (Makɔ 5:12) Yeso akatɛ ɛdiɛngɛ ɛsɔ dia ntshɔ ndo ntɔtɔ le nsombo. Ko nsombo yakɔ 2 000 tshɛ yakakungusɔ oma lo dikona ko yakatambɛ lo ndjale.

Etena kakɛnyi wanɛ wakalamaka nsombo dui sɔ, vɔ wakalawɔ dia ntota losango lɔsɔ l’osomba ndo lo tongelongelo. Anto wakaye ndjenda kɛnɛ kakatombe. Etena kakawakome, vɔ wakɛnyi dia pami kaki l’ɛdiɛngɛ aya dimɛna ndo aya ki. Nde ambɔlɔta ahɔndɔ ndo ambodjasɛ l’ekolo wa Yeso!

Anto wakoke dui sɔ kana wakɛnyi pami kɛsɔ wakandama la wɔma w’efula, vɔ kombeya kitshimudi ya dikambo sɔ le wɔ. Vɔ wakasɛngasɛnga Yeso dia nde mimɔ oma lo ɛtshi kawɔ ka nkɛtɛ. Etena kakɔtɔ Yeso lo waato dia nde ntshɔ, pami kaki l’ɛdiɛngɛ akɔsɛngasɛnga dia nde ntshɔ la nde. Koko Yeso akatɛ pami kɛsɔ ate: “Tshɔka la ngelo le ewotɔ ayɛ ndo towate akambo tshɛ wambokosalɛ Jehowa ndo woho wamondokooka kɛtshi.”​—Makɔ 5:19.

Mbala la mbala Yeso akatɛka anto wakandakɔnɔlaka diaha vɔ mbutɛ kaanga onto, nɛ dia nde konanga dia anto mbeya awui wendana la nde oma l’ɛkɔndɔ wa l’esasesase. Lo diaaso nɛ, pami kaki l’ɔdiɛngɛ ekɔ djembetelo yasɛna ya wolo wele la Yeso ndo nde koka mbutɛ anto wele ondo Yeso kokoka nkoma lewɔ. Ɛtɛkɛta ande wakakokaka nto mɛnya kashi kakakoke anto mbuta lo kɛnɛ kendana la oshishwelo wa nsombo. Ɔnkɔnɛ, pami kɛsɔ akatshu ndo akatatɛ nsanya lo Dekapɔli di’otondo kɛnɛ kakosalɛ Yeso.