Rɛferansɛ wa lo Dikatshi dia losanganya la Lɔsɛnɔ ndo olimu aso
NGƆNDƆ KA DIKUMI L’ƆTƆI 1-7
AKAMBO W’OHOMBA W’OMA L’ƆTƐKƐTA WA NZAMBI | JASHUA 18-19
“Jehowa akakahanya bɛtshi dia nkɛtɛ la lomba tshɛ”
it-1-F 933 od. 5
Olelo
Mɛnamaka dia wakakahanyaka waoho bɛtshi dia nkɛtɛ lo ndjela awui ahende anɛ: etombelo wakayaka oma lo wokelo w’owale ndo woke woke wa dioho. Ondo owale wakɛnyaka tsho dihole kana ɛtshi ka nkɛtɛ kakahombaka dioho la dioho nkondja oko etenyi k’okitɔ, vɔ wakɛnyaka nto etenyi kokitɔ ka lo dihole dimɔtshi kana ka lo dihole dikina dia lo wodja akɔ, ɛnyɛlɔ, lo Nɔrdɛ, kana lo Sidɛ, lo Ɛstɛ kana lo Owɛstɛ, ɛtshi ka nkɛtɛ ka l’omamu w’ashi kana ka l’akona. Etombelo w’oma l’owale wakayaka oma le Jehowa ndo dui sɔ diakakimanyiyaka dia mbewɔ kandjema kana ewanu wa lam’asa waoho. (Tok 16:33) Nzambi akasale akambo asɔ lo yoho shɔ nto di’awui wa lo dioho la di’oho mbɔtɔnɛ la ɛtɛkɛta wa lo prɔfɛsiya wakasambiyama wakatatshi Jakɔbɔ la ntondo ka nde mvɔ wɔtɛkɛtami lo Etatelo 49:1-33.
it-1-F 1107 od. 6
Etenyi k’okitɔ
Bɛtshi dia nkɛtɛ di’okitɔ. Jehowa akasha ana w’apami w’ase Isariyɛlɛ tenyi diawɔ di’okitɔ ndo nde akɛnya Mɔsɛ elelo wa wodja akɔ. (Wal 34:1-12; Jas 1:4) Mɔsɛ mbakatakahanyisha ana w’apami wa Nganda, ana w’apami wa Rubɛna bɛtshi diawɔ dia nkɛtɛ, mbidja ndo k’ahende ɔtɔi ka dioho dia Manase. (Wal 32:33; Jas 14:3) Waoho akina wakalongola tenyi diawɔ di’okitɔ lo wokelo w’owale, oma lo ɛlɔmbwɛlɔ kaki Jashua nde la Eleazara. (Jas 14:1, 2) Lo mbɔtɔnganyiya la prɔfɛsiya kakatatshi Jakɔbɔ katanema lo Etatelo 49:5, 7, Simɛyɔna nde la Lɛwi konongola bɛtshi dia nkɛtɛ di’okitɔ diokakitɔnyi. Ɔnkɔnɛ, wakasha Simɛyɔna bɛtshi dia nkɛtɛ (kaamɛ la esomba waki l’etei k’okitɔ k’anto akina) l’etei ka ɛtshi ka nkɛtɛ ka Juda (Jas 19:1-9), etena kele wakasha ase Lɛwi esomba 48 lo Isariyɛlɛ w’otondo. Lam’ele ase Lɛwi wakalongola ɔkɛndɛ wa kambaka olimu wa laande lo tɛmpɛlɔ, Jehowa akate dia nde mbele etenyi kawɔ k’okitɔ. Vɔ wakalongolaka tenyi dia dikumi oko teema tawɔ kana etenyi kawɔ k’okitɔ lo ndjela olimu wakawakambaka. (Wal 18:20, 21; 35:6, 7) Wakashaka nkumbo bɛtshi dia nkɛtɛ lo ɛtshi ka lo dioho diawɔ. L’edja tshɛ kakatahamaka waa nkumbo ndo kakakitaka ana bɛtshi dia nkɛtɛ dia washɛwɔ, nkɛtɛ yakatalekaka susama nɛ dia wakahombe tatikahanyaka bɛtshi bɛshi ndo tɛtshi tɛtshi ta nkombo.
it-1-F 933 od. 6
Olelo
L’ɔkɔngɔ w’owale nshikikɛ dihole diahomba dioho dimɔtshi ntshɔ, aki ohomba nto mbeya woke woke wa ɛtshi ka nkɛtɛ kakahombe dioho la dioho mbɔsa. “Nyu pombaka nkahana bɛtshi dia nkɛtɛ lo eokelo k’owale lo ndjela nkumbo yanyu. Wanɛ wele efula, nyu pombaka mbafudiyɛ etenyi kawɔ k’okitɔ ndo wanɛ wele yema tshitshɛ, nyu pombaka mbakitshɛkitshɛ etenyi kawɔ k’okitɔ. Onto tshɛ ayokondja etenyi kande k’okitɔ lɛnɛ akɔ owale ande.” (Wal 33:54) Kɛnɛ kakashikikɛka owale lo kɛnɛ kendana la dihole diaki suke suke kotshikitanyemaka, koko wakakokaka ntshikitanya woke woke wa etenyi k’okitɔ. Etena kakɛnama dia ɛtshi ka nkɛtɛ kakawasha ase Juda kakaleke woke, wakɔshi etenyi kɛmɔtshi ko kikotshɛ dioho dia Simɛyɔna.—Jas 19:9.
Diangɔ di’oshinga wolo dia lo nyuma
it-1-F 934 od. 1
Olelo
Lo ndjela ɔkɔndɔ w’okahanyelo wa bɛtshi dia nkɛtɛ dia lo Owɛstɛ wa Jɔrdana, akɛnama dia wakoke owale ntondotondo lo dikambo dia Juda (Jas 15:1-63), Yɔsɛfu (Efrayimɛ) (Jas 16:1-10), ndo k’ahende ɔtɔi ka dioho dia Manase dia vɔ mbidjasɛ lo Owɛstɛ wa Jɔrdana (Jas 17:1-13) ntondo, nɛ dia elelo awɔ ndo esomba awɔ mbakadiema. L’ɔkɔngɔ wa laasɔ, mɛnamaka dia wakayemadiaka okahanyelo wa bɛtshi dia nkɛtɛ, nɛ dia mpango y’ase Isariyɛlɛ yakayomɔka oma la Ngilingalɛ kokakayɔsɛkɔmaka otsha la Shilo. (Jas 14:6; 18:1) Hawoshikike etena k’otale ka ngande kakete, koko l’ekomelo, Jashua akayohangwɛka waoho esambele l’ɔtɛ wakawatshimbatshimba dia mbɔsa ɛtshi ka wodja kakatshikala. (Jas 18:2, 3) Elembetshielo efula wakashama wɛnya ɔkɔkɔ wakayongaka waoho esambele asɔ l’otshimbotshimbo dia tɔsa ɛtshi ka nkɛtɛ ka mbidjasɛ kɛsɔ, anto amɔtshi fɔnyaka ɔnɛ l’ɔtɛ wa lokema la diangɔ lakawakondja etena kakawatalɔshaka ata ndo l’ɔtɛ wa wɔladi wa lo tshanda mɔtshi wakawonge la wɔ nɛ dia ase Kanana kombalɔsha, ondo kɛsɔ mbakayokonyaka waoho asɔ dia monga l’otshimbotshimbo wa tɔsa etenyi kawɔ k’okitɔ lo ɛtshi ka nkɛtɛ kakatshikala. Ondo waoho asɔ kɔmɛna ohomba wa ntshɔ dia tɔlɔ l’atunyi awɔ wakɛnamaka diele oko vɔ bu l’akoka wa nshika ekolo la ntondo ka wɔ, ndo ondo kɛsɔ mbakaatshindjatshindja dia mbɔsa ɛtshi ka nkɛtɛ kɛsɔ. (Jas 13:1-7) Ndo nto, ondo vɔ kondekaka mbeya awui efula lo kɛnɛ kendana l’ɛtshi ka nkɛtɛ ka lo Nkɛtɛ ya Daka kɛsɔ oleki woho wakaweyaka bɛtshi dia nkɛtɛ diakawashile nkondja.
NGƆNDƆ KA DIKUMI L’ƆTƆI 8-14
AKAMBO W’OHOMBA W’OMA L’ƆTƐKƐTA WA NZAMBI | JASHUA 20-22
“Wetshelo wakondjaso oma lo eokelo kɛmɔtshi ka kɔlɔ”
Awui wakoka kokimanyiya dia sawolaka la olonganyi ayɛ
Sawola dimɛna mbeyaka kimanyiya dia mbewɔ kananɛ kɔlɔ kana fɔnya awui lɔfɔnya. L’etatelo ka ɔkɔndɔ w’Isariyɛlɛ, dioho dia Rubɛna, dia Ngada ndo etenyi ka dioho dia Manase, wanɛ wakadjasɛka lo ɛstɛ k’ɔkɛdi wa Jɔrɔdana wakahike ‘ediakelo ka woke’ suke la Jɔrɔdana. Waoho akina komboka dimɛna lande na kakawasale dikambo sɔ. Lo fɔnya dia anangɛwɔ asɔ wambɔtɔmbɔkwɛ Jehowa, waoho wakadjasɛka lo owɛstɛ wakayalɔngɔsɔla dia ndɔsha anangɛwɔ wakawɔshi lo ndjela tokanyi tawɔ ɔnɛ wambɔtɔmbɔkɔ. Koko, la ntondo ka vɔ mbalɔsha, wakatome anto dia tosawola la wɔ. Ɔsɔ mɛtɛ aki dui dia lomba! Vɔ wakatɛnaka dia ediakelo kɛsɔ kosalema dia tshumbaka kana nambolaka elambo waki kombetawɔmaka lo ɛlɛmbɛ. Koko, waoho waki lo ɛstɛ wakoke wɔma dia lo nshi yayaye waoho akina mbeyaka ndjowatɛ vate: “Lusambi lakona lenyu la [Jehowa].” Ediakelo kɛsɔ kakahombe mɛnya dia ndo vɔ mbaki atɛmɔdi wa Jehowa. (Jashua 22:10-29) Vɔ wakɔlɛ ediakelo kɛsɔ lokombo ɔnɛ: “Ede (kitshimudi ati: Omenyi), ne dia to keli omenyi l’asasu la nyu ati: [Jehowa] keli [Nzambi ka mɛtɛ].”—Jashua 22:34, nɔtɛ.
“Tuyeli akambu watutungaka ki”
Ondo ase Isariyɛlɛ amɔtshi wakafɔnya dia waki la tolembetelo t’eshika tɛnya dia wambosala kɔlɔ ndo naka vɔ mbalɔsha aha la vɔ mbeya, kete anto awɔ totowovɔ efula. Koko lo dihole dia vɔ sala akambo esadi esadi, waoho akina wa lo lɛkɛ la owɛstɛ ka Jɔrɔdana wakatome anto dia tɔkɛtshanya la anangɛwɔ dikambo sɔ. Vɔ wakambola ɔnɛ: “Na wuhu w’uhendudi one wambunyuhendwela [Nzambi k]’Isariyele? Okoko wana wambunyukadimo kakiane uma le [Jehowa] lu ndjahikela ediakelu ka nyu mbotombokwela elo?” Lo mɛtɛ, waoho wakasale ediakelo kɛsɔ waki la kɔlamelo le Jehowa. Ko ngande wakawakoke sala la ntondo ka ɔsɔngwɛlɔ ɔsɔ? Onde vɔ wakahombe ndɔshana la wanɛ wakasɔngwɛ kana tona dia mbatɛkɛtsha? Waoho wakawasɔngwɛ akambo wakakadimola la memakana ndo lo yoho yokɛma hwe lo mɛnya dia nsaki ka tɛmɔla Jehowa mbakatshutshuya dia sala dikambo sɔ. Okadimwelo awɔ wa la memakana tshɛ akakokɛ diɔtɔnganelo diakiwɔ la Nzambi ndo akashimbɛ nsɛnɔ y’anto. Kɛtshanya dikambo la ki tshɛ akakandola okakatanu ndo akadje wɔladi.—Jas. 22:13-34.
Diangɔ di’oshinga wolo dia lo nyuma
it-1-F 390 od. 4
Kanana
Kaanga mbele ase Kanana efula wakake lo ɔlɛndjɛlɔ wa woke ɔsɔ ndo mbakawatetemala mbidjasɛ la wɔ oko waa mfumbe, sho kokaka ntetemala mbuta ɔnɛ “Jehowa akasha ase Isariyɛlɛ wodja w’otondo wakandatshibe dia mbisha watshɛwɔ,” lo mbowasha “momuya lo wedi akɔ tshɛ,” ndo “ndooko kaanga daka 1 diakete pa lo alaka tshɛ w’amɛna wakalake Jehowa ase luudu l’Isariyɛlɛ. Vɔ tshɛ wakakotshama.” (Jas 21:43-45) Atunyi wakongaka la wɔma ndo vɔ ko mpemba manɛ ase Isariyɛlɛ etena tshɛ kakawadjasɛka kaamɛ lawɔ. Yema tshitshɛ la ntondo, Nzambi akate dia nde ayotshanya ase Kanana ‘yema yema’ diaha nyama ya mpango ndjofulanɛ lo wodja ko ndjosalɛ anto kɔlɔ. (Eto 23:29, 30; Eoh 7:22) Kaanga mbaki ase Kanana la dihomɔ dia ta dia wolo oleki nɛ diaki l’ase Isariyɛlɛ, mbuta ate pusupusu ya mbolo ya ata, hatokoke mbisha Jehowa onongo ɔnɛ nde kokotsha daka diande, l’ɔtɛ w’ɔnɛ ase Isariyɛlɛ kotondoya lo nshidiya nɛndja bɛtshi dimɔtshi dia nkɛtɛ. (Jas 17:16-18; Emb 4:13) Koko, ɔkɔndɔ wa lo Bible mɛnyaka di’ase Isariyɛlɛ wakalɛndjama tena dimɔtshi l’ɔtɛ wakiwɔ kotetemala ntshikala la kɔlamelo.—Wal 14:44, 45; Jas 7:1-12.
NGƆNDƆ KA DIKUMI L’ƆTƆI 15-21
AKAMBO W’OHOMBA W’OMA L’ƆTƐKƐTA WA NZAMBI | JASHUA 23-24
“Dako di’ekomelo diakasha Jashua wodja”
it-1-F 82 od. 2
Sheke
Awui wakatshikitna etena kakɔtɔ ase Isariayɛlɛ lo nkɛtɛ ya Kanana, mbuta ate lo Nkɛtɛ ya Daka. Nzambi Kanga-Wolo-Tshɛ akasha ase Isariyɛlɛ lotshungɔ la mbɔsa wodja ɔsɔ, dia nkotsha daka diakandalake watshɛwɔ. Diakɔ diele vɔ kɔmbɔtɔ lo wodja ɔsɔ dia todjasɛ oko angɛndangɛnda ndo Jehowa wakawatɛ diaha mbidja sheke la wedja wakadjasɛka lɛkɔ wakatɛmɔlaka tozambizambi t’apanganu. (Eto 23:31-33; 34:11-16) Ase Isariyɛlɛ wakahombe paka nkitanyiya Ɛlɛmbɛ ndo wadjango waki Nzambi, koko takawahombaka nkitanyiya wadjango wa wedja wakandalake dia mbitshanya. (Lɛw 18:3, 4; 20:22-24) Nde akaahɛmɔla mbala efula diaha vɔ mbidja sheke ya diwala kaamɛ la wedja ɛsɔ. Nɛ dia toseke tɔsɔ takakoke mbakonya dia vɔ monga la diɔtɔnganelo dia ma ma aha tsho la wamato w’apanganu ndo la ditshelo diawɔ ndo la mbekelo yawɔ yɔtɔnɛ la ɛtɛmwɛlɔ awɔ wakashi, koko ndo lo ndjaakonya lo apɔstazi ndo ndjowanda lo djonga.—Eoh 7:2-4; Eto 34:16; Jas 23:12, 13.
Ɔtɛkɛta wa Jehowa hawetaka pa
19 Aha la tâmu, oma lo kɛnɛ kambotɛna la washo aso hita, sho kokaka mbuta ɔnɛ: ‘Ndoko dui diakate Jehowa, Nzambi kaso, lo dikambo diaso diahatakotshama. Awui akɔ tshɛ wambokotshama lo dikambo diaso.’ (Jashua 23:14) Jehowa tshungolaka, kokɛka ndo kotshaka ehomba w’ekambi ande. Onde wɛ kokaka shila daka diande dimɔtshi diaki kokotshama lo etena kakandashikikɛ? Ndoko onto lakoka sala dui sɔ. La lomba tshɛ, sho ndjaɛkɛka lo Ɔtɛkɛta waki Nzambi wa mɛtɛ.
20 Ko kayotota dikambo dia nshi yayaye? Jehowa akatotɛ dia efula ka l’atei aso kokaka monga l’elongamelo ka nsɛna lo nkɛtɛ kayokadimɔ paradiso ka dimɛna efula. Tɔtɔi ta l’atei aso toto mbele l’elongamelo ka tôlɛ la Kristo l’olongo. Oyadi elongamelo kakɔna kele laso, tekɔ l’ɛkɔkɔ w’eshika wa tshikala la kɔlamelo oko wakasale Jashua. Elongamelo kaso kayokotshama lushi lɔmɔtshi. Etena kɛsɔ, tayoka washo l’ɔkɔngɔ lo alaka tshɛ wakalake Jehowa ndo sho lawɔ tayota ɔnɛ: ‘Vɔ tshɛ wakakotshama.’
Diangɔ di’oshinga wolo dia lo nyuma
Akambo w’ohomba w’oma lo dibuku dia Jashua
24:2—Onde Tɛra ka she Abarahama aki ɔtɛmɔdi wa dikishi? Ntondo, Tɛra komonga ɔtɛmɔdi waki Jehowa Nzambi. Ondo nde akatɛmɔlaka jambizambi ngɔndɔ yelɛwɔ Sinɛ; yɔ yaki jambizambi yakeyamaka efula l’osomba wa Ura. Lo ndjela awui w’ashidi w’ase Juda, Tɛra aki ɔsɛdi wa dikishi. Koko, etena kakamɔ Abarahama la Ura lo didjango diaki Nzambi, Tɛra akatshu la nde la Harana.—Eta 11:31.
NGƆNDƆ KA DIKUMI L’ƆTƆI 22-28
AKAMBO W’OHOMBA W’OMA L’ƆTƐKƐTA WA NZAMBI | EMBADI 1-3
“Ɔkɔndɔ wa dihonga ndo wa lokeso”
w04-F 15/3 31 od. 3
Ehudɛ akadje atunyi awɔ otshumba
Ehudɛ akatondoya lo lokeso lande la mayɛlɛ, aha l’ɔtɛ wa yimba yande kana l’ɔtɛ wa otunyi komonga la yewo. Okotshamelo wa sangwelo diaki Nzambi halemanɛ la kɛnɛ kasala onto. Ehudɛ akatondoya, ntondotondo nɛ dia Nzambi akosukɛ ndo l’ɔtɛ wakandasalaka akambo lo yoho yɔtɔnɛ la lolango la Nzambi la ntshungola ekambi Ande. Nzambi akatondja Ehudɛ, ndo “etena tshɛ kakaatondjɛka Jehowa toshushi [ekambi ande], Jehowa akongaka kaamɛ la shushi tshɛ.”—Emb 2:18; 3:15.
w04-F 15/3 30 od. 1-3
Ehudɛ akadje atunyi awɔ otshumba
Ehundɛ akatatɛ ‘ndjasɛlɛ lokuwa’ la mpɛmɔ wedi ehende laki mondo efula, dia nde monga l’akoka wa lishɛ l’ahɔndɔ ande. Nde akeyaka ɔnɛ asɔlayi wakalamaka wayowɔsɛnga dia mbeya kana nde aki la ehomɔ ka ta. Koko tena efula, wakɛmbaka tokuwa lo lo lonya la lɔmɔsɔ ko lonya l’omi monga l’akoka wa lisɔmɔla esadi eto. Lam’ele nde aki ɛmɔsɔ, Ehundɛ akashɛ lokuwa lɔsɔ “l’etei k’ahɔndɔ ande lo ɛhɛlɔhɛlɔ ka lokolo lande l’omi,” lɛnɛ aki alami wa nkumekanga komonga l’akoka wa lishola. Oma laasɔ, aha l’okakatanu, “nde akasha Ɛngɛlɔna nkumekanga ka Mɔaba olambo akɔ wakandahikaka.”—Emb 3:16, 17.
Ndooko dihole diɛnya kiambokiambo tshɛ yakasalema lo luudu la nkumekanga ka Ɛngɛlɔna. Bible mbutaka tsho ɔnɛ: “Lam’akashidiya Ehudɛ mbosha olambo wakandahikaka, nde akakɛndja wanɛ wakayɛmbaka olambo akɔ.” (Emb 3:18) Ehudɛ akawosha olambo, ko nde akakalola kaamɛ la wanɛ wakayɛmbaka olambo akɔ polo lam’akawakome etale mangana la luudu laki Ɛngɛlɔna, mbuta ate lo dihole diakiwɔ komonga l’akoka wa mbanda naka vɔ mbayela; l’ɔkɔngɔ wa nde nkakitɔna la wɔ, Ehudɛ akakalola nto otsha le Ɛngɛlɔna. Lande na? Onde nde akaye l’apami asɔ dia vɔ ndjawolamaka, dia nkumekanga ndjɛna lofulo l’anto lakatomama dia ndjokimɔ olambo, ko kana wakayɛmbaka tsho diangɔ diakawahombe tosha nkumekanga? Onde Ehudɛ akaakɛndja diaha vɔ ndjonga lo waale etena kayondokotshaka kɛnɛ kakandasangoya dia nsala? Oyadi kɛnɛ tshɛ kakakoke Ehudɛ nkanyiya, dui dia mɛtɛ ele, nde aki la dihonga ko nde akakalola ndamɛ.
“Nde [Ehudɛ] akakalola ndo akate ate: “Nkumekanga le, lekɔ la losango la kotɛ lo sheke.’” Afundelo hawolembetshiya woho wakandatondoya dia nyomɔtɔ nto dia tɛnana la Ɛngɛlɔna. Onde alami wa nkumekanga takawakoke mbokanɛ kɔlɔ? Kana onde vɔ wakafɔnyaka ɔnɛ ose Isariyɛlɛ ɔtɔi hakoke salɛ owandji awɔ kɔlɔ? Woho wakakalola Ehudɛ ndamɛ, onde dui sɔ diakakoke mbakonya dia vɔ mfɔnya ɔnɛ nde ambokalola dia ndjofunga wodja ande? Oyadi kɛnɛ tshɛ kakoka mbutama, Ehudɛ akalɔmbɛ dia nde sawola la nkumekanga ndamɛ, ko waketawɔ dia nde mbɔtɔ.—Emb 3:19.
Diangɔ di’oshinga wolo dia lo nyuma
Akambo w’ohomba w’oma lo dibuku di’Embadi
2:10-12. Sho pombaka monga la ekongelo ka mbala la mbala ka wekelo wa Bible ‘diaha mbohɛ etsha waki Jehowa.’ (Osambu 103:2) Ambutshi pombaka kɔkɔmiya akambo wa mɛtɛ wa l’Ɔtɛkɛta wa Nzambi l’etema w’anawɔ.—Eoh 6:6-9.
NGƆNDƆ KA DIKUMI L’ƆTƆI 29–NGƆNDƆ KA DIKUMI L’AHENDE 5
AKAMBO W’OHOMBA W’OMA L’ƆTƐKƐTA WA NZAMBI | EMBADI 4-5
“Jehowa akakambe la wamato ahende dia ntshungola ekambi ande”
‘Lakemala oko mama lo Isariyɛlɛ’
Lokombo Sisɛra akashaka ase Isariyɛlɛ wɔma ndo wakasakaka lokomba. Ɔtɛmwɛlɔ w’ase Kanana ndo mbekelo yawɔ yaki kɔlɔ efula, vɔ wakalambolaka anawɔ oko elambo ndo wakasalaka monanyi lo tɛmpɛlɔ. Ko lo woho akɔna wele owandji w’alembe w’ase Kanana ndo alembe ande wakolɛ l’ɛtshi ka nkɛtɛ kɛsɔ? Osambo waki Dɛbɔra mɛnyaka dia takawahombaka minda lɔkɛndɔ l’ɛtshi ka nkɛtɛ kɛsɔ nɛ dia ase ngelo komonga nto. (Emb 5:6, 7) Sho koka nkanyiya woho waki anto l’ekonda ndo l’akona, woho wakawokaka wɔma dia nkamba dikambɔ kana mbidjasɛ lo waa ngelo, ndo woho wakawokaka wɔma minda nkɛndɔ l’etadimbo l’ɔtɛ w’ɔnɛ wayoyalɔsha, woho wakawɔshi anawɔ, ndo woho wakaweyana la wadɛwɔ la wolo.
‘Lakemala oko mama lo Isariyɛlɛ’
Wɔma ɔsɔ wakayala l’edja k’ɛnɔnyi 20, polo lam’akɛnyi Jehowa dia anto ande w’ɛtɛ wolo asɔ wambonga suke dia ntshikitana. Kɛsɔ mbɛnya ɔkɔndɔ wakafundama l’ɛlɔmbwɛlɔ ka nyuma k’ekila l’osambo wakembe Dɛbɔra nde la Baraka ɔnɛ: ‘Polo lam’akamemala, dimi Dɛbɔra, polo lam’akamemala oko mama lo Isariyɛlɛ.’ Hateye kana Dɛbɔra ya wadi aki Lapidɔtɛ akikɔ mama lo yoho ya mɛtɛ mɛtɛ, koko etelo kɛnɛ mɛnyaka dia nde akataka lo yoho ya didjidji. Koko, Jehowa akasha Dɛbɔra ɔkɛndɛ wa nkokɛ wodja woho watokokɛka ombutshi wa womoto ɔnande. Nde akawosha ɔkɛndɛ wa Baraka ɔnɛ laki shushi ndo pami ka mbetawɔ ndja le nde ndo mbɔlɔmbɔla dia nde ndɔshana la Sisɛra.—Emb 4:3, 6, 7; 5:7.
‘Lakemala oko mama lo Isariyɛlɛ’
Jaɛlɛ akahombe ntondo nkana yimba. Nde akasha Sisɛra dihole dia mumuya. Sisɛra akatɛ Jaɛlɛ diaha nde mbitɛ onto tshɛ lakahombe mboyanga ɔnɛ nde ekɔ laanɛ. Jaɛlɛ akawofɛ dihɔndɔ etena kakandashama ndo lam’akɔlɔmbɛ Sisɛra ashi, Jaɛlɛ akawosha abɛlɛ. Kombeta edja, Sisɛra akalale djɔ ya baku. Jaɛlɛ akɔshi dihomɔ pende dia lo luudu diakakambaka tena dimɔtshi la wamato wakadjasɛka lo mvudu y’apɛma, mbuta ate wokɔ la maditɔ. Nde akawoke suke la ɔtɛ waki Sisɛra. Nde akahomana l’ɔkɛndɛ wa wolo dia nsala akambo oko otomami wa Jehowa dia ndjaka. Ondo nde akakoke monga bu l’eshikikelo kana wengengo. Onde nde akakane yimba lo dikambo di’ekambi waki Nzambi lo woho wakaasoya pami ka kɔlɔ kɛsɔ l’edja k’ɛnɔnyi akumi? Ko kana onde nde akakane yimba lo diɛsɛ diaki la nde dia nsala lolango la Jehowa? Ɔkɔndɔ hatotɛ. Kɛnɛ keyaso ele, akambo wakasalema esadi esadi ko Sisɛra akavu.—Emb 4:18-21; 5:24-27.
Diangɔ di’oshinga wolo dia lo nyuma
Akambo w’ohomba w’oma lo dibuku di’Embadi
5:20—Ngande wakalwɛlɛ tɔɔtɔ ta l’olongo Baraka ta? Bible hatɛkɛta dia kana andjelo wakakimanyiya lo ta sɔ, ondo diangɔ dimɔtshi dielɛwɔ waa météorites diakakɔ oma l’olongo diele ase tomba waki Sisɛra wakadiɔshi oko djembetelo ya mpokoso kana awui wakatɛ waa astrɔlɔgɛ Sisɛra waki kashi. Koko aha la tâmu, Nzambi akekɛ lonya lo yoho mɔtshi kana lo yoho kina
NGƆNDƆ KA DIKUMI L’AHENDE 6-12
AKAMBO W’OHOMBA W’OMA L’ƆTƐKƐTA WA NZAMBI | EMBADI 6-7
“Tshɔka la wolo wele la yɛ”
Atɔndɔ waki Nzambi koka kokondjiyɛ wahɔ
Ngidiyɔna laki shushi mɔtshi ya l’atei w’ase Hɛbɛru w’edjedja kondjakanaka efula kana ndjatombola ndamɛ. Nde konyanga dia monga ɔnɔmbɔdi w’Isariyɛlɛ. Lam’akawɔsɔnɛ dia nde mɛmba ɔkɛndɛ ɔsɔ, Ngidiyɔna akɛnya dia nde hasungana mbowɛmba. Nde akate ate: “Khumbu kami kuleki tshitshe l’atei a wudja a Manase, ndu dimi kuleki tshitshe lu luudu la Papa.”—Embadi 6:12-16.
w05-F 15/7 16 od. 3
“Lokuwa la ta laki Jehowa ndo laki Ngidiyɔna!”
Ande wɔma wakahombe mboka ase Midiyana l’etena kɛsɔ! Mbala kakɔ ɔtɔi, londjo lakɔtɔ etena kakole asɔlayi 300 mbaka yawɔ, kakawade amama awɔ ndo kakawade ekoko. Djekoleko etena kakawoke ekoko wakawadaka ɔnɛ: “Lokuwa la ta laki Jehowa ndo laki Ngidiyɔna!,” ase Midiyana wakakashimɔ, ko vɔ la wɔ wakatatɛ mbida ekoko; ko ekoko awɔ wakasangana la ekoko wakadaka apami waki Ngidiyɔna, ko londjo lakonge efula. Lam’ele l’etena kɛsɔ ko ase Midiyana wambondama la wɔma efula, aki wolo di’onto l’onto mbeya aaki otunyi. Apami 300 wakemala ki lo ahole awɔ ko Nzambi akasale dia atunyi vɔamɛ kɔtana tokuwa lam’asawɔ. Asɔlayi awɔ tshɛ wakavangana, vɔ kokoka monga nto la mboka ka ndawɔ, ko apami waki Ngidiyɔna wakayelana la wanɛ wakalawɔ ko wakaadiake efula; diakɔ diele, ase Isariyɛlɛ kokoka mboka ase Midiyana wɔma nto. Ɛhɛnyɔhɛnyɔ wakahɛnyahɛnyaka ase Midiyana ase Isariyɛlɛ wakakome l’ekomelo.—Emb 7:19-25; 8:10-12, 28.
Diangɔ di’oshinga wolo dia lo nyuma
Akambo w’ohomba w’oma lo dibuku di’Embadi
6:25-27. Ngidiyɔna akakambe la yewo diaha momadja atunyi ande tshanana. Etena kasambishaso lokumu l’ɔlɔlɔ, sho pombaka monga la yewo diaha momadja anto tshanana oma lo yoho yatɛkɛtaso.
NGƆNDƆ KA DIKUMI L’AHENDE 13-19
AKAMBO W’OHOMBA W’OMA L’ƆTƐKƐTA WA NZAMBI | EMBADI 8-9
“Okitshakitsha ndeka dimɛna lo dihole dia monga l’otako”
w00-F 15/8 25 od. 3
Ngande watoyosalaka dia nkandola ekakatanu?
Etena kakandalɔka ta dia wolo efula l’ase Midiyana, Ngidiyɔna akelɛ dioho dia Efrayimɛ dia vɔ ndja ndjowokimanyiya. Koko kam’akashile ta, ase Efrayimɛ wakakadimwɛ Ngidiyɔna ndo wakawane la nde lo mbowotɛ ɔnɛ lande na keyɛ kotelɛ etena kakatatɛ ta, ɔkɔndɔ mbutaka ɔnɛ: “Ko wakawane la nde wolo.” Ngidiyɔna akakadimola ate: “Amomosala lo mbɛdika la nyu? Onde olimu wa ɛkɔnɔdi wa Efrayimɛ hawoleki dinela di’elowa dia Abiɛzɛrɛ dimɛna? Shi Nzambi lo anya anyu kakandakimɔ Ɔrɛbɛ nde la Zɛbɛ ewandji w’ase Midiyana? Ko amomosala lo mbɛdika la nyu?” (Emb 8:1-3) La ɛtɛkɛta w’ekanelo ka yimba ndo wa lotutsha ɛsɔ, Ngidiyɔna akewɔ owanu wotoyotondja ata wa wolo wa lam’asa waoho. Mbokɛmaka laasɔ dia waoho wa Efrayimɛ waki lo dindja lo ndjaakana ndo la lotamanya. Koko, kɛsɔ koshimba Ngidiyɔna dia nde nkaloya wɔladi. Onde sho kokaka mbookoya?
Ɛkɔkɔ wɛnya dia mbeya elelo aso ekɔ ohomba
15 Ngidiyɔna ekɔ ɛnyɛlɔ ka dimɛna efula k’onto lakeyaka elelo ande. Etena kakawosha Jehowa ɔkɛndɛ wa nshimbɛ ase Isariyɛlɛ oma le ase Midiyana, Ngidiyɔna akate ate: “Nkumbo kami koleki tshitshɛ laka aseka Manase ndo dimi koleki onto l’anyanya lo luudu la papa.” (Emb. 6:15) Koko, Ngidiyɔna akayaɛkɛ le Jehowa ndo aketawɔ ɔkɛndɛ ɔsɔ. Oma laasɔ, Ngidiyɔna akasale la wolo dia nshihodia tshɛ lo tshɛ kɛnɛ kakalongamɛka Jehowa le nde ndo akalɔmbɛ ɛlɔmbwɛlɔ kande. (Emb. 6:36-40) Ngidiyɔna aki pami ka wolo ndo ka dihonga, koko nde aki nto la lomba ndo yewo. (Emb. 6:11, 27) L’ɔkɔngɔ diko, etena kakalange anto dia nde monga owandji awɔ, nde akatone. L’ɔkɔngɔ wa nde nsala kɛnɛ kakɔlɔmbɛ Jehowa dia nsala, nde akakalola otsha lakande.—Emb. 8:22, 23, 29.
Tɔkɛndɛkɛndɛ lo mboka yaki Jehowa
9 Dia monga angɛnyi wa Nzambi, sho pombaka monga ‘la yimba y’okitshakitsha.’ (1 Pet. 3:8; Osam. 138:6) Embadi tshapita 9 mɛnyaka ohomba wa monga la okitshakitsha. Jɔtama y’ɔnaki Ngidiyɔna akate ate: “Etamba wakatshu dia ntosonola khum’ekanga, dia mbaulela.” Tshapita shɔ shilaka otamba wa owele, wa fingo ndo wa vinyɔ. Etamba ɛsɔ waki didjidji di’anto w’ɛlɔlɔ waki konyanga dia mbolɛ asekawɔ ase Isariyɛlɛ. Koko otamba w’atɛndɛ waki ohomba paka dia mpɛtsha dja waki didjidji dia lowandji laki Abimelɛkɛ kanga lotamanya ndo ondjakanyi lakalomɔlomɔka dia mbolɛ anto akina. Kânga ‘mbakandolɛ Isariyɛlɛ l’edja k’ɛnɔnyi esato,’ nde akavu nyɔi k’osondjo. (Emb. 9:8-15, 22, 50-54) Ekɔ mɛtɛ ohomba efula monga la ‘yimba y’okitshakitsha’!
Diangɔ di’oshinga wolo dia lo nyuma
it-1-F 784 od. 5
Efodɛ, I
Kaanga mbakasale Ngidiyɔna efodɛ la nkanyi ya dimɛna ya mbisha Jehowa lotombo ndo mbohɔka otshumba wakandasha ase Isariyɛlɛ, Efodɛ ‘wakayoyala tshondo ya djonga le Ngidiyɔna ndo le ase luudu lande,’ nɛ dia ase Isariyɛlɛ wakasale kinumba ka lo nyuma lo ntɛmɔla Efodɛ wakandasale. (Emb 8:27) Koko, Bible hɛnya dia Ngidiyɔna ndamɛ akatɛmɔla Efodɛ ɔsɔ; dia mɛnya dia nde kosala dui sɔ; ɔpɔstɔlɔ Pɔɔlɔ akashile lokombo lande l’atei wa “olui a woke w’ɛmɛnyi” wa kɔlamelo wa Jehowa wa lo nshi y’edjedja.—Hɛb 11:32; 12:1.
NGƆNDƆ KA DIKUMI L’AHENDE 20-26
AKAMBO W’OHOMBA W’OMA L’ƆTƐKƐTA WA NZAMBI | EMBADI 10-12
“Jafɛta aki pami kaki la lonyuma la dimɛna”
Monga la kɔlamelo konyaka onto dia mbetawɔma le Nzambi
9 Ondo ɛnyɛlɔ kaki Yɔsɛfu mbakakimanyiya Jafɛta. Nde akakondja wetshelo lo woho wakoke Yɔsɛfu anango kɛtshi kaanga mbakawohetshaka. (Etatelu 37:4; 45:4, 5) Nkana yimba lo kɛnɛ kendana la ɛnyɛlɔ kɛsɔ akakoke nkimanyiya Jafɛta dia nsala akambo lo yoho yakangɛnyangɛnya Nzambi. Kɛnɛ kakasale anango kakanyangiya Jafɛta mɛtɛ. Koko, ndɔsha lo dikambo dia lokombo la Jehowa ndo di’ekambi ande mbaki dui di’ohomba efula oleki nsaki yaki Jafɛta. (Embadi 11:9) Nde akayashikikɛ dia monga la kɔlamelo le Jehowa. Jehowa akɔtshɔkɔla oma lo dionga diande sɔ ndo akatshɔkɔla ase Isariyɛlɛ.—Hɛbɛru 11:32, 33.
it-2-F 1202 od. 6
Jafɛta
Jafɛta pami kaki l’etsha w’ɛlɔlɔ, aha la tshimbatshimba nde akɔshi yɛdikɔ ya nsala dui dimɔtshi esadi esadi. Nde akatomɛ nkumekanga k’ase Amɔna dikɛndji lo mbuta ɔnɛ nde ekɔ lo mbosola, l’ɔtɛ walangande ndjɔlɔsha wodja w’Isariyɛlɛ dia mbɔsa nkɛtɛ yawɔ. Nkumekanga kakɔ akakadimola lo mbuta ɔnɛ ase Isariyɛlɛ wakɔshi ɛtshi ka nkɛtɛ k’ase Amɔna. (Emb 11:12, 13) Ndo nto, Jafɛta akɛnya dia nde komonga tsho ɔndɔshi w’ata wa kɔlɔ waki kombeyaka ndooko dikambo, koko nde akeke dimɛna dimɛna ɔkɔndɔ w’edjedja wa wodja ande ndo djekoleko diɔtɔnganelo diaki lam’asa Nzambi la ekambi ande. Nde akatone mbetawɔ awui wakataka nkum’ekanga k’ase Amɔna kɛsɔ, ndo akawaɛnya dia 1) ase Isariyɛlɛ kosola ase Amɔna, Mɔaba kana ase Ɛdɔmɛ (Emb 11:14-18; Eoh 2:9, 19, 37; 2Ɛk 20:10, 11); 2) ase Amɔna kombidjasɛ lo ɛtshi ka nkɛtɛ kakawasolanaka kɛsɔ nɛ dia l’etena kɛsɔ ko ase Isariyɛlɛ waakatalɔsha dia mbɔsa Nkɛtɛ ya Daka, nɛ dia yɔ yaki l’anya w’ase Amɔna wakadjasɛka la Kanana ndo Nzambi akakimɔ Sihɔna, nkumekanga kawɔ ndo wodja awɔ lo anya w’ase Isariyɛlɛ; 3) laasɔ ko ambeta ɛnɔnyi ndekana 300 ntatɛ etena kakadjasɛka ase Isariyɛlɛ laawɔ ndo ndooko lushi lakawane ase Isariyɛlɛ l’ase Amɔna lo dikambo dia ɛtshi ka nkɛtɛ kɛsɔ; ko laasɔ, lande na kele ase Amɔna konyanga dia mbɔsa ɛtshi ka nkɛtɛ kɛsɔ l’etena kɛsɔ?—Emb 11:19-27.
it-2-F 1202-1203 od. 7
Jafɛta
Jafɛta akate shikaa dikambo diakawakakatanaka, mbuta ate okakatanu ɔsɔ waki lo kɛnɛ kendana la ɔtɛmwɛlɔ. Nde akate dia Jehowa Nzambi akasha ase Isariyɛlɛ wodja ɔsɔ, diakɔ diele ase Isariyɛlɛ takawahombe tshikɛ wedja ekina wakatɛmɔlaka tozambizambi ta kashi kaanga y’ɛtshi ya nkɛtɛ yele oko etambe ka lonya. Nde akelɛ Kɛmɔshɛ ɔnɛ nzambi k’ase Amɔna. Anto amɔtshi fɔnyaka ɔnɛ nde akasale dindja. Koko, kaanga mbele mɛtɛ ase Amɔna wakatɛmɔlaka jambizambi ya Milikɔmɛ ndo ɔnɛ Kɛmɔshɛ aki jambizambi y’ase Mɔaba, kɛnɛ kele mɛtɛ ele wedja wakotɔka ɛsɔ wakatɛmɔlaka tozambizambi efula. Kaanga Sɔlɔmɔna akasale ndindja dia woke efula lo mbɔtshiya ɔtɛmwɛlɔ wa Kɛmɔshɛ lo Isariyɛlɛ l’ɔtɛ wa wamato w’apanganu wakandatshuke. (Emb 11:24; 1Ku 11:1, 7, 8, 33; 2Ku 23:13) Diakɔ diele lo ndjela waa nomb’ewo y’awui wa lo Bible, tshɛkɛta “kɛmɔshɛ” kokaka nembetshiya “ɔnɛ lalɛndja, ɔnɛ latahɔtwana bɛtshi dia nkɛtɛ,” (Enda Hebräisches und chaldäisches Handwörterbuch über das Alte Testament, par W. Gesenius, Leipzig, 1857, tome 5, vol. 1, p. 414.) Mɛnamaka ondo dia Jafɛta akakotola yambalo yande le jambizambi shɔ, nɛ dia ase Amɔna wakataka dia yɔ yaki la wolo wa ‘nɛndja’ kana ‘wa mpɔtɔla anto akina wedja’ ko mbowashawɔ.
Diangɔ di’oshinga wolo dia lo nyuma
it-2-F 1201
Jafɛta
Jafɛta komonga ɔna la lo loseka. Nyango Jafɛta mbaki ‘womoto la numba’, koko kɛsɔ halange mɛnya dia Jafɛta akotɔ oma lo loseka kana aki ɔna la lo loseka. Nyango aki womoto la numba la ntondo ka nde ndjotshukana la Ngiliyadɛ oko wadi la hende, paka oko waki Rahaba womoto la numba la ntondo ka nde ndjotshukana la Salamɔna. (Emb 11:1; Jas 2:1; Mat 1:5) Lam’ele Jafɛta komonga ɔna la lo loseka, diakɔ diele akosɛnde wanɛ wakotɔ oma le wadi l’otango laki Ngiliyadɛ wakawotshanya diaha nde ndjolongola etenyi k’okitɔ kaamɛ la wɔ. (Emb 11:2) Ndo nto l’ɔkɔngɔ wa laasɔ, Jafɛta akayokomaka owandji la Ngiliyadɛ wele ndooko onto lakahombe mbotshanya (dihole diakɛnamaka oko anango Jafɛta mbaki anto waki la lokumu efula lɛkɔ). (Emb 11:11) Ndo nto, nde akalambola Nzambi olambo lo tabɛrnakɛlɛ. (Emb 11:30, 31) Mbokɛmaka laasɔ dia ɔna lakotɔ oma lo loseka takandahombe nsala akambo asɔ tshɛ, nɛ dia Ɛlɛmbɛ wakataka ɔnɛ: “Ndooko ɔna la lo loseka lakoka mbɔtɔ lo etshumanelo ka Jehowa. Polo lo lɔlɔnga la la dikumi, ndooko kanula yande yakoka mbɔtɔ lo etshumanelo ka Jehowa.”—Eoh 23:2.
NGƆNDƆ KA DIKUMI L’AHENDE 27–NGƆNDƆ KA NTONDO 2
AKAMBO W’OHOMBA W’OMA L’ƆTƐKƐTA WA NZAMBI | EMBADI 13-14
“Wetshelo wakoka ambutshi nkondja oma le Manɔa nde la wadɛnde”
Ambutshi, nyetshake ananyu oma ko tɔkɛndakɛnda tawɔ
Tɔsɛdingole Ɛnyɛlɔ kaki Manɔa laki lo nkumbo ka Danɛ, ɔnɛ lakasɛnaka l’osomba wa Zora wa l’Isariyɛlɛ w’edjedja. Ondjelo wa Jehowa akatɛ wadi aki Manɔa laki ekomba ate nde ayota ɔna. (Emb. 13:2, 3) Manɔa pami ka kɔlamelo kɛsɔ nde la wadɛnde kombidja taamu ɔnɛ daka diaki Jehowa sɔ hadiotokotshama. Koko vɔ wakayakiyanyaka di’akambo amɔtshi. Manɔa akalɔmbɛ ate: “Khumemi li, etawo umvutshi aye ako lakayatumi nkalula le su, dia ntetsha akambu wayutuhumba ntshela ona layututa.” (Emb. 13:8) Manɔa nde la wadɛnde wakayakiyanyaka lo woho wakawahombe ndjodia ɔnɔsɔ. Aha la taamu, vɔ waketsha Samisɔna k’ɔnawɔ ɛlɛmbɛ waki Nzambi ndo wakakondja etombelo w’amɛna. Bible mbutaka ɔnɛ: ‘Nyuma kaki Jehowa kakahema Samisɔna.’ Etombelo waki la dui sɔ ele, Samisɔna akasale elimu wa wolo etena kakandakambaka oko shushi l’Isariyɛlɛ.—Emb. 13:25; 14:5, 6; 15:14, 15.
w05-F 15/3 25-26
Samisɔna akadje otshumba l’ekimanyielo ka wolo wa Jehowa!
‘Jehowa akatatshɔkɔlaka’ Samisɔna etena kakandatolaka. (Emb 13:24) Lushi lɔmɔtshi, Samisɔna akaye le she la nyango ndo akawatɛ ate: “Lam’akimi la Timina, washo ami wakakotɔmi le ɔna womoto ɔmɔtshi l’ose Filistiya ndo dimi nangaka nyu mbɔsɛminde wadi.” (Emb 14:2) Ohokanyiya woho wakahombe ambutshi mamba lo dikambo sɔ! Lo dihole dia ntshungola ase Isariyɛlɛ oma l’anya w’atunyi w’akaahɛnyahɛnyaka, ɔnawɔ olanga mbidja sheke ya diwala l’atunyi awɔ. Tshuka womoto oma l’atei wa wamato wakatɛmɔlaka tozambizambi t’apanganu kɔmbɔtɔnɛka la Ɛlɛmbɛ wa Nzambi. (Eto 34:11-16) Diakɔ diele, ambutshi ande wakatone lo mbotɛ ɔnɛ: “Wɛ hakoki ntana ɔna womoto ɔmɔtshi l’atei w’ewotɔ ayɛ ndo l’atei w’anto aso? Laasɔ wate ntshu totshuke wadi l’atei w’ase Filistiya wahanyɛma mpota?” Koko, Samisɔna akatetemala ntshininala lo nkanyi yande lo mbuta ate: “Ɔmbɔsɛnde, nɛ dia nde ekɔ dimɛna le mi.”—Emb 14:3.
Diangɔ di’oshinga wolo dia lo nyuma
w05-F 15/3 26 od. 1
Samisɔna akadje otshumba l’ekimanyielo ka wolo wa Jehowa!
Lo yoho yakɔna ya laande yele womoto l’ose Filistiya ɔsɔ “aki dimɛna” le Samisɔna? Dibuku dimɔtshi (Cyclopedia de McClintock et Strong) mbutaka ɔnɛ: “Aha l’ɔtɛ w’ɔnɛ womoto ɔsɔ aki olangala efula, nkɔmba, koko nde aki dimɛna lende dia nde nkotsha oyango ɔmɔtshi shikaa.” Oyango akɔna? Embadi 14:4 nembetshiyaka dia Samisɔna “akayangaka diaaso dia ndɔsha ase Filistiya.” La oyango ɔsɔ mbakayashaka Samisɔna le womoto ɔsɔ. Etena kakandayolaka, “nyuma ka Jehowa kakatatɛ nkamba olimu le nde,” kana kakawotshutshuyaka dia nde nsala akambo. (Emb 13:25) Ɔnkɔnɛ, nyuma ka Jehowa mbakatshutshuya Samisɔna dia nɔmba dia ntshuka wadi ɔsɔ, dui diahatosalemaka ndo tɔ kakɔlɔmbɔlaka etena tshɛ kakinde shushi l’Isariyɛlɛ. Onde Samisɔna akatane diaaso diakandatayangaka? Tende ntondotondo woho wakosukɛ Jehowa.