WEKELO 18

Woho wa mbeya Akristo wa mɛtɛ

Okanda wa l'akatshi

Miliyara y’anto mbutaka dia vɔ wekɔ Akristo. Koko vɔ bu la dietawɔ diamɛ, ndo vɔ hawoyele ɛlɛmbɛ akɔ waamɛ. Ko ngande wakokaso mbeya Akristo wa mɛtɛ?

1. Okristo kɛdikɛdi na?

Akristo wekɔ ambeki wa Yeso Kristo. (Adia Etsha 11:26.) Ko ngande wɛnyawɔ dia vɔ wekɔ ambeki wa Yeso? Nde akate ate: “Naka nyu ntshikala lo wetshelo ami, kete nyu nyekɔ mɛtɛ ambeki ami.” (Joani 8:31) Dui sɔ nembetshiyaka di’Akristo wa mɛtɛ pombaka nkitanyiya wetshelo wa Yeso. Ndo oko wakayaɛkɛka Yeso l’Afundelo dia nsukɛ wetshelo ande, Akristo wa mɛtɛ mbetshaka nshi tshɛ kɛnɛ kata Bible.—Adia Luka 24:27.

2. Ngande wɛnya Akristo wa mɛtɛ ngandji kawɔ?

Yeso akatɛ ambeki ande ate: ‘Nyokane ngandji oko wakamanyoke ngandji.’ (Joani 15:12) Ngande wakɛnya Yeso dia nde mbokaka ambeki ande ngandji? Nde aketshaka wenya kaamɛ la wɔ, akaakeketshaka ndo akaakimanyiyaka. Nde akakome polo ndo lo nkimɔ lɔsɛnɔ lande lo dikambo diawɔ. (1 Joani 3:16) Woho akɔ waamɛ mbele, Akristo wa mɛtɛ hawokomɛ tsho lo ntɛkɛta dikambo dia ngandji. Vɔ mɛnyaka ngandji kokanawɔ oma l’ɛtɛkɛta ndo oma l’etsha awɔ.

3. Akristo wa mɛtɛ ndjashaka l’olimu akɔna?

Yeso akasha ambeki ande olimu wa vɔ nkamba. “Nde akaatome dia tosambisha Diolelo dia Nzambi.” (Luka 9:2) Akristo wa ntondo wakasambisha, aha tsho l’ahole awɔ w’ɔtɛmwɛlɔ, koko ndo l’ahole akina wa lo sɛkɛ ndo lo mvudu y’anto. (Adia Etsha 5:42; 17:17.) Ɛlɔ kɛnɛ, Akristo wa mɛtɛ vɔ lawɔ sambishaka akambo wa mɛtɛ w’oma lo Bible dihole tshɛ diele anto. Vɔ nangaka wanyawɔ anto, diakɔ diangɛnangɛnawɔ nkamba la wenya awɔ ndo la wolo awɔ dia mbaasambisha losango l’oma lo Bible lasha anto elongamelo ndo ekeketshelo.—Makɔ 12:31.

NYOMOTSHIMOLA

Sɛdingola woho wakokayɛ ntshikitanya Akristo wa mɛtɛ l’anto wahayele wetshelo ndo ɛnyɛlɔ ka Yeso.

4. Vɔ nyangaka akambo wa mɛtɛ wa lo BIble

Akristo ahende wa lo ntambe ka ntondo wayanga akambo wa mɛtɛ wa lo Bible lo nsɛdingola wɔɔmbɔ ɔmɔtshi. — Akristo wa ntondo wakɔsaka Ɔtɛkɛta wa Nzambi la nɛmɔ

Aha anto tshɛ wayaelɛ Akristo mbɔɔsa akambo wa mɛtɛ wa lo Bible la nɛmɔ. Nyende VIDƐO, ndo oma laasɔ, nyɔkɛtshanya dimbola diayela nɛ:

VIDƐO: Woho wakalana Lokristo (5:11)

Ngande wambokita ɛtɛmwɛlɔ ɛmɔtshi wayata dia w’Akristo mbewɔ tatala dia mbetsha anto kɛnɛ kaketsha Yeso?

Yeso aketsha anto akambo wa mɛtɛ w’oma l’Ɔtɛkɛta wa Nzambi. Nyadia Joani 18:37, ndo oma laasɔ, nyɔkɛtshanya dimbola nɛ:

Lo ndjela Yeso, ngande wakokaso mbeya Akristo wele lo “wedi w’akambo wa mɛtɛ”?

5. Vɔ sambishaka akambo wa mɛtɛ wa lo Bible

Akristo wa lo ntambe ka ntondo wasambisha anto lo mvudu yawɔ. — Akristo wa ntondo wakasambishaka anto akina

La ntondo ka Yeso mbidɛ l’olongo, nde akasha ambeki ande olimu watetemala kambema polo ndo ɛlɔ kɛnɛ. Nyadia Mateo 28:19, 20 ndo Etsha 1:8, ndo oma laasɔ, nyɔkɛtshanya dimbola nɛ:

Polo lo yɛdikɔ yakɔna yayokambema olimu w’esambishelo?

6. Vɔ kambaka la kɛnɛ kasambishawɔ

Kakɔna kaketawoya pami kɛmɔtshi kelɛwɔ Tom dia nde amboshola Lokristo la mɛtɛ? Nyende VIDƐO, ndo oma laasɔ, nyɔkɛtshanya ambola wayela anɛ:

VIDƐO: Dimi kondjasha nto l’awui w’ɔtɛmwɛlɔ (5:20)

Lo vidɛo yɛnyiso, kakɔna kakakonya Tom diaha nde ndjasha nto l’awui w’ɔtɛmwɛlɔ?
Lande na kamondosuya dia nde amboshola akambo wa mɛtɛ?

Etsha ndeka ɛtɛkɛta wotsho. Nyadia Mateo 7:21, ndo oma laasɔ, nyɔkɛtshanya dimbola nɛ:

Kakɔna koleki ohomba le Yeso, kɛnɛ kataso dia sho kietawɔka, ko kana kɛnɛ kɛnyaso oma l’etsha aso?

7. Vɔ mbokanaka ngandji lam’asawɔ

Nkumbo kɛmɔtshi k’Akristo ka lo ntambe ka ntondo wayɛmbɛ asekawɔ ambetawudi disaka dia mbo ya ndɛ. — Akristo wa ntondo wakokanaka ngandji lam’asawɔ

Onde mɛtɛ Akristo wakadje nsɛnɔ yawɔ lo waale lo dikambo di’asekawɔ Akristo? Nyende VIDƐO, ndo oma laasɔ, nyɔkɛtshanya ambola wayela anɛ:

VIDƐO: Nde aketawɔ nkimɔ lɔsɛnɔ lande (2:55)

Lo vidɛo yɛnyiso, kakɔna kakatshutshuya ɔnangɛso Lloyd dia mbidja lɔsɛnɔ lande lo waale lo dikambo di’ɔnangɛso Johansson?
Onde wɛ fɔnyaka dia nde akasale akambo oko Okristo wa mɛtɛ?

Nyadia Joani 13:34, 35, ndo oma laasɔ, nyɔkɛtshanya ambola anɛ:

Ngande wahomba ambeki wa Yeso (mbuta ate Akristo wa mɛtɛ) salɛ anto wa lo dioho dikina kana wa lo wodja okina akambo?
Ngande wayowosala dui sɔ l’etena kalɔɔma ta?

ANTO AMƆTSHI MBUTAKA ƆNƐ: “Akristo wakasale akambo wa kɔlɔ efula, laasɔ ngande wakokawɔ monga la ɔtɛmwɛlɔ wa mɛtɛ?”

Divɛsa diakɔna diakokayɛ mbadiɛ onto ɔmɔtshi diɛnya woho wakokaso mbeya Akristo wa mɛtɛ?

LO TSHENA PE

Akristo wa mɛtɛ ndjelaka wetshelo wa lo Bible, kɛnɛmɔlaka ngandji ka ndjahombia ndo sambishaka akambo wa mɛtɛ wa lo Bible.

Ovuswelo

Lende ohikami dietawɔ di’Akristo wa mɛtɛ?
Oma lo dionga diakɔna dieyama Akristo wa mɛtɛ?
Olimu akɔna wakamba Akristo wa mɛtɛ?

Datɛ diamboshila wekelo:

Oyango

Naka kokaka, tshɔka teembole Bɛtɛlɛ kɛmɔtshi k’Ɛmɛnyi wa Jehowa kele suke la yɛ.

Oyango okina:

Your other goal

SALA EYANGELO

Eka akambo akina wendana la djui y’anto yasala la wolo dia ndjela ɛnyɛlɔ ndo wetshelo wa Yeso Kristo.

Ɛmɛnyi wa Jehowa—Waa na weso? (1:13)

Enda kɛnɛ kakakonya womoto ɔmɔtshi laki lo masɛlɛ dia ntana nkumbo ka mɛtɛ ka lo nyuma.

“Vɔ wakakambe la Bible dia nkadimola ambola ami tshɛ!” (Tshoto y’Etangelo, Ngɔndɔ ka nɛi 1, 2014)

Eka woho wɛnya Akristo wa mɛtɛ ngandji kokawɔ asekawɔ atɛmɔdi wele l’ohomba w’ekimanyielo.

Woho wa nkimanyiya anangɛso etena katomba mpokoso—Etenyi (3:57)

Tɔsɛdingole woho wele Akristo wa ntondo ndo Akristo wa mɛtɛ wa nshi nyɛ salaka akambo wakate Yeso dia vɔ mbayowaeyanya oko ambeki ande.

“Akambo weyama Lokristo la mɛtɛ?” enda ndo lɛkɛ 4, 5, 6, 7 ndo lɛkɛ 8 (Tshoto y’Etangelo, Ngɔndɔ ka sato 1, 2012 lo Falase)