WEKELO 23
Batisimu kekɔ oyango ɔmɔtshi wa dimɛna wa ndjadjɛ!
Yeso aketsha di’Akristo pombaka batizama. (Adia Mateo 28:19, 20.) Ko batisimu kɛdikɛdi na? Ndo kakɔna kahomba onto nsala dia nkotsha oyango ɔsɔ?
1. Batisimu kɛdikɛdi na?
Tshɛkɛta “batiza” ndja oma lo tshɛkɛta ya lo Grɛkɛ yalembetshiya “dindja” onto l’ashi. Lam’akabatizama Yeso, nde akadindjama tshɛ l’Ɔkɛdi wa Jɔrdana, ndo oma laasɔ nde ‘akatombe oma l’ashi.’ (Makɔ 1:9, 10) Woho akɔ waamɛ mbele, Akristo wa mɛtɛ batizamaka lo dindjama tshɛ l’ashi.
2. Kakɔna kɛnya onto etena kabatizamande?
Etena kabatizama onto, nde mɛnyaka dia nde amboyakimɔ le Jehowa Nzambi. Ko ngande wayakimɔ onto? La ntondo ka batisimu, lo dɔmbɛlɔ diasala onto ndamɛ, nde mbutɛka Jehowa dia nde nangaka mbokambɛ pondjo pondjo. Nde ndakaka dia ntɛmɔla paka Jehowa ndo nsala lolango la Nzambi mbele dikambo dioleki ohomba lo lɔsɛnɔ lande. Nde mbɔsaka yɛdikɔ ya ‘ndjasɛka ndo ya ntetemala ndjela’ wetshelo ndo ɛnyɛlɔ ka Yeso. (Mateo 16:24) Ndjakimɔ ndo batisimu kande mboshaka diaaso dia monga la diɔtɔnganelo dia ma ma la Jehowa ndo l’asekande atɛmɔdi.
3. Ngande wakoka onto mpama polo lo batisimu?
Wɛ koka ndjalɔngɔsɔla dia batizama lo mbeka awui wendana la Jehowa ndo lo monga la mbetawɔ ka nge le nde. (Adia Hɛbɛru 11:6.) Naka ewo ndo mbetawɔ kayɛ mpama, kete ndo ngandji kokayɛ Jehowa kayohama. Ndo aha la taamu, wɛ ayolanga nsambisha akambo wendana la nde ndo nsɛna lo yoho yɔtɔnɛ l’ɛlɛmbɛ ande. (2 Timɔte 4:2; 1 Joani 5:3) Etena kasɛna onto “lo yoho yalanga Jehowa dia mbɔngɛnyangɛnya lo akambo tshɛ,” nde mbeyaka mbɔsa yɛdikɔ ya nkimɔ lɔsɛnɔ lande le Nzambi ndo ya batizama.—Kɔlɔsayi 1:9, 10.a
NYOMOTSHIMOLA
Enda kɛnɛ kakokaso mbeka oma lo batisimu ka Yeso ndo woho wakoka onto ndjalɔngɔsɔla dia ntakola nna di’ohomba sɔ.
4. Sho koka mbeka akambo efula oma lo batisimu ka Yeso
Nyadia Mateo 3:13-17 dia mbeya akambo efula wendana la batisimu ka Yeso. Ndo oma laasɔ, nyɔkɛtshanya ambola anɛ:
Onde Yeso akabatizama lam’akinde eke ɔn’ashashi?
Ngande wakandabatizama? Onde wakawotɛ tsho yema y’ashi l’ɔtɛ?
Yeso akatatɛ nkamba olimu wa laande wakawosha Nzambi etena kakandabatizama. Nyadia Luka 3:21-23 ndo Joani 6:38, ndo oma laasɔ, nyɔkɛtshanya dimbola nɛ:
L’ɔkɔngɔ wa Yeso batizama, naa olimu wakandetsha lo dihole dia ntondo lo lɔsɛnɔ lande?
5. Batisimu kekɔ oyango ɔmɔtshi wakokayɛ nkotsha
L’etatelo, kanyi ya ndjakimɔ ndo ya batizama mbeyaka kokiya wɔma. Koko wɛ koka mpama polo l’etena kayoyaoka dia wɛ ambokoka mbɔsa yɛdikɔ y’ohomba shɔ. Dia mɛna anto amɔtshi wakasale dui sɔ, nyende VIDƐO.
Nyadia Joani 17:3 ndo Jakɔba 1:5, ndo oma laasɔ, nyɔkɛtshanya dimbola nɛ:
Kakɔna kakoka nkimanyiya onto dia nde monga suke dia batizama?
Sho ndjakimɔka lo mbutɛ Jehowa dia sho nangaka mbokambɛka pondjo pondjo
Lo batisimu kaso, sho mɛnyaka wanɛ tshɛ wenda dikambo sɔ dia tamboyakimɔka le Nzambi
6. Etena kabatizamaso, sho komaka ase nkumbo ka Jehowa
Etena kabatizamaso, sho mbɔtɔka lo nkumbo ka l’andja w’otondo kele kaamɛ. Oyadi dihole diakɔna dioyeso kana weho akɔna w’anto weso, sho tshɛ tekɔ la dietawɔ diamɛ ndo sɛnaka lo ndjela ɛlɛmbɛ waamɛ wendana la lɔkɛwɔ. Nyadia Osambo 25:14 ndo 1 Petero 2:17, ndo oma laasɔ, nyɔkɛtshanya dimbola nɛ:
Shɛngiya yakɔna yele la batisimu lo diɔtɔnganelo diasa onto la Jehowa ndo l’asekande atɛmɔdi akina?
ANTO AMƆTSHI MBUTAKA ƆNƐ: “Dimi bu suke dia batizama.”
Naka ngasɔ mbayaokayɛ, onde wɛ fɔnyaka dia batisimu keke oyango wa dimɛna wa ndjadjɛ?
LO TSHENA PE
Yeso aketsha di’Akristo pombaka batizama. Dia nkotsha oyango ɔsɔ, onto pombaka monga la mbetawɔ ka nge le Jehowa, nsɛna lo yoho yɔtɔnɛ l’ɛlɛmbɛ Ande ndo ndjakimɔ ndamɛ le Nde.
Ovuswelo
Batisimu kɛdikɛdi na ndo lande na ketɔ ohomba?
Diɔtɔnganelo diakɔna diele lam’asa ndjakimɔ la batisimu?
Wanya akɔna wakonya onto dia ndjakimɔ ndo dia batizama?
SALA EYANGELO
Eka kɛnɛ kalembetshiya batisimu ndo kɛnɛ ketɔ halembetshiya.
Nyovusole toho takoka onto mpama polo lo batisimu.
Adia woho wele yɛdikɔ yakɔshi pami kɛmɔtshi dia batizama komonga yɛdikɔ ya la esasesase.
“Wakalange dia dimɛ mbeya kɛnɛ ketsha Bible mɛtɛ” (Tshoto y’Etangelo, Ngɔndɔ ka hende 1, 2013)
Tɔsɛdingole lande na kele batisimu kekɔ oyango ɔmɔtshi wa dimɛna wa ndjadjɛ ndo woho wakokayɛ ndjalɔngɔsɔla lo dikambo diatɔ.
a Naka onto ambotabatizamaki l’ɔtɛmwɛlɔ okina, onde nde pombaka nyomobatizama nto? Lande na? Dikambo ɔtɛmwɛlɔ ɔsɔ hawetsha akambo wa mɛtɛ w’oma lo Bible.—Enda Etsha 19:1-5 ndo Wekelo 13.