latukolombolaka lu mbuka kahumbaye ntsho. Utunduyala we akalungi elembe ami, tshiki ki kaye kutuyala utamanya, la sambu kaye k’ololo kutuluwana otekoya.”​—Isaya 48:17, 18.

14. Ngande wakoka atɔndɔ wa lo Bible kokimanyiya dia wɛ mbewɔ pâ kaya oma l’abasa?

¹⁴ Kitanyiya atɔndɔ wa lo Bible ayokokimanyiya dia wɛ mbewɔ lonyangu ndo ekiyanu. Ɛnyɛlɔ, Bible mbutaka dia wanɛ wakonge la ngandji ka falanga “wakayatshatsha la nyangu ya wulu efula.” (1 Timote 6:9, 10) Onde osekayɛ ɔmɔtshi ambohomɔka akambo wɛnya mɛtɛ k’avɛsa anɛ? Ɛlɔngɔlɔngɔ l’esekaseka ɛmɔtshi wakakama abasa efula l’ɔtɛ wakawayange dia paka somba dihɔndɔ di’oshinga wolo kana ɛngɔ kekina kele lo modɛ nshi nyɛ dia vɔ monga anto wa lokumu. Mbɔsa abasa w’efula, wayofutama la wahɔ l’etena k’otale dia somba diangɔ dieyɛ mɛtɛ bu l’akoka wa disomba ekɔ yoho mɔtshi ya lɔhɔmbɔ ya kɔlɔ efula!​—Tukedi 22:7.

15. Lo woho akɔna wakoka atɔndɔ wa lo Bible kokokɛ oma lo pâ kaya oma l’etombelo wa kɔlɔ w’oma l’awui wa dieyanelo?

¹⁵ Tende nto dikambo di’awui wa mindo wa dieyanelo. L’andja w’otondo, lofulo laheyama mbadia l’esekaseka wahatatshukama weke l’ɛnɔnyi dikumi l’ɛmɔtshi wekɔ lo ntshɔ waemi ɔnɔnyi tshɛ. Amɔtshi mbotaka ana wele vɔ bu oyadi la saki kana l’akoka wa mbaodia. Akina tondjaka waemi ndo ndjongaka la nkum’otema kele bu ki. Ndo ekɔ ɛlɔngɔlɔngɔ l’esekaseka wakondja hemɔ yasambiyama oma l’awui wa dieyanelo, ɛnyɛlɔ oko SIDA. Le onto leya Jehowa, kɛnɛ koleki tshɛ kɔlɔ, ele olanelo wa diɔtɔnganelo diele lam’asande la Jehowa.b (Ngalatiya 5:19-21) Diakɔ diele mɛtɛ Bible mbutaka ɔnɛ: “Nyulawo munanyi.”​—1 Koreto 6:18.

Kambɛ ‘Nzambi k’ɔngɛnɔngɛnɔ’

16. (a) Ngande weyaso dia Jehowa nangaka dia wɛ ngɛnangɛna la nshi yayɛ y’ɔlɔngɔlɔngɔ kana y’osekaseka na? (b) Lande na kakɛnya Jehowa mboka kahombayɛ ndjela?

¹⁶ Bible mbutaka dia Jehowa ekɔ ‘Nzambi k’ɔngɛnɔngɛnɔ.’ (1 Timote 1:11) Nde nangaka dia wɛ lawɔ monga l’ɔngɛnɔngɛnɔ. Ɔtɛkɛta ande mbutaka ɔnɛ: “Olongo a pami [kana osekaseka] li, ongenangenaki lu nshi yaye y’olongolongo [kana y’osekaseka].” (Undaki 11:9) Koko Jehowa mɛnaka etale ndo mbeyaka mɛna la ntondo etombelo wa lɔkɛwɔ la dimɛna kana la kɔlɔ. Diakɔ diakolakande ate: “Uhoki utungi aye lu nshi yaye y’olongo a pami, ntundu nshi ya kolo yatakuki, ndu deku diatasukana diayuyuta wati: Dimi halongenangena ladio.”​—Undaki 12:1.

17, 18. Ngande wakɛnya osekaseka ɔmɔtshi w’Okristo ɔngɛnɔngɛnɔ wele lande lo woho wakambɛnde Jehowa, ndo ngande wakokayɛ tana woho akɔ w’ɔngɛnɔngɛnɔ?

¹⁷ Ɛlɔ kɛnɛ ɛlɔngɔlɔngɔ l’esekaseka efula wekɔ l’ɔngɛnɔngɛnɔ efula lam’akambɛwɔ Jehowa. Ɛnyɛlɔ, osekaseka ɔmɔtshi w’ɛnɔnyi 15 welɛwɔ Lina akate ate: “Lekɔ lo ndjaoka dimɛna efula ndo lekɔ lo ndjalɛnya. Lekɔ la demba dia dimɛna nɛ dia dimi hanɔ mfɔka kana nɔnɔ dia wolo. Lekɔ lo kondja ɛlɔmbwɛlɔ ka dimɛna l’etshumanelo, ɛlɔmbwɛlɔ kakimanyiya dia ndɔshanya la tɔsɛngiya ta kɔlɔ taki Satana. Dimi lekɔ wonya tshɛ l’elungi k’ɔngɛnɔngɛnɔ diɛsɛ oma lo lɔngɛnyi lakeketsha lele lo Mbalasa ka Diolelo. Kɛnɛ koleki ele lekɔ l’elongamelo koleki tshɛ dimɛna ka lɔsɛnɔ la pondjo.”

¹⁸ L’ɛnyɛlɔ kaki Lina, Akristo efula w’ɛlɔngɔlɔngɔ l’esekaseka wekɔ lo ndɔ tshondo ya ta dia nama mbetawɔ kawɔ, ndo dikambo sɔ mbashaka ɔngɛnɔngɛnɔ. Vɔ mbeyaka dia lɔsɛnɔ lawɔ, kânga mbakokalɔ ndola l’ekakatanu lo tena dimɔtshi, lekɔ l’oyango w’oshika ndo layonga dimɛna lo nshi yayaye. Tetemala la kambɛ Nzambi kayakiyanya mɛtɛ dikambo di’ɔlɔlɔ ayɛ. Ngɛnyangɛnya otema ande, ko nde ayotatɛ kɔngɛnyangɛnya tatɛ ɛlɔ kɛnɛ ndo pondjo pondjo!​—Osambu 5:11.

Ɛlɔngɔlɔngɔ l’esekaseka le, Jehowa hohɛ olimu anyu!

“[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.”​—HEBERU 6:10.

1. Ngande wɛnya mukanda wa Heberu ndo wa Malaki dia Jehowa mbɔsaka olimu ayɛ la nɛmɔ?

ONDE wɛ atasalɛka ɔngɛnyi ayɛ ɔmɔtshi dikambo di’ɔlɔlɔ, aha la nde kosha losaka? Mbeyaka monga pâ efula l’asolo etena kɛnayɛ di’onto losaleyɛ ɔlɔlɔ hɔshi dikambo diakɔ la nɛmɔ efula ndo pâ ndekaka etena kohɛnde ɔlɔlɔ wosaleyɛ. Koko, aha ngasɔ mbediɔ lo kɛnɛ kendana l’olimu wakambɛso Jehowa l’otema ɔtɔi! Bible mbutaka ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.” (Heberu 6:10) Ohokanyiya ohomba wa dikambo sɔ. Jehowa ayɔsa dikambo sɔ oko dikambo dia kɔlɔ, mbut’ate oko pɛkato kambondosala naka nde mbohɛ kɛnɛ kamboyosala ndo katetemalayɛ la sala l’olimu ande. Nde mɛtɛ ekɔ Nzambi kele la lowando!​—Malaki 3:10.