Tolame lonto laso l’Okristo
“Emenyi ami mbenyu, mbata [Jehowa].”—ISAYA 43:10.
1. Weho akɔna w’anto wakotola Jehowa oya le nde?
ETENA keyɛ lo Mbalasa ka Diolelo, shishima dimɛna wanɛ wokodingi. Waa na wɛnayɛ lo dihole di’ɔtɛmwɛlɔ sɔ na? Wɛ mbeyaka mɛna ɛlɔngɔlɔngɔ l’esekaseka wayasha l’otema ɔtɔi wahokamɛ awui wa lomba l’oma l’Afundelo la yambalo tshɛ. (Osambu 148:12, 13) Woho akɔ wâmɛ mbele wɛ mbeyaka mɛna nto ndo ewandji wa nkumbo wasala la wolo dia ngɛnyangɛnya Nzambi kânga mbasɛnawɔ lo andja walanya lɔsɛnɔ la lo kumbo. Ondo wɛ mbeyaka mɛna nto esombe w’anto wasɛna lo yoho yɔtɔnganɛ la ndjakimɔ kawɔ le Jehowa kânga mbewɔ la waa hemɔ y’oma lo lotshundu. (Tukedi 16:31) Vɔ tshɛ mbokaka Jehowa ngandji efula. Ndo nde akɛnyi dimɛna mbakotola dia vɔ monga la diɔtɔnganelo la nde. Ɔnaki Nzambi akasuya ate: “Nduku untu leya ndja le mi, tshikima Papa lakantumi kûkutudi.”—Joani 6:37, 44, 65.
2, 3. Bonde kele kokaka monga tshondo y’okakatanu tetemala nama lonto l’Okristo?
2 Kema tekɔ la ɔngɛnɔngɛnɔ lo woho weso l’atei wa anto wetawɔma ndo watshɔkwama oma le Jehowa? Koko, tetemala nama lonto laso la Okristo lo ‘tena nɛ dia wolo’ ekɔ tshondo y’okakatanu. (2 Timote 3:1) Dikambo sɔ diekɔ mɛtɛ djekoleko le ɛlɔngɔlɔngɔ la esekaseka wôdiama lo nkumbo y’Akristo. Ɔlɔngɔlɔngɔ ɔmɔtshi akasuya ate: “Kânga mbakamɔtɔka lo nsanganya y’Akristo, lo mɛtɛ dimi komonga la eyango wa lo nyuma w’eshika ndo la mposa ka kambɛ Jehowa.”
3 Kânga mbele amɔtshi ngɛnangɛnaka kambɛ Jehowa l’otema ɔtɔi, vɔ mbeyaka mbekɔ timba l’ɔtɛ wa tɔsɛngiya ta wolo taki asekawɔ, ta lo andja ɔnɛ ndo tokanyi ta kɔlɔ. Naka tambohinama wolo, kete sho koka ndjoshisha lonto laso l’Okristo. Ɛnyɛlɔ, anto efula lo andja ɔnɛ mbɔsaka ɛlɛmbɛ wa lo Bible wendana la lɔkɛwɔ l’ɔlɔlɔ oko wambetaka loowe kana hawɔtɔnɛ l’anto wa lo nshi yaso nyɛ. (1 Petero 4:4) Amɔtshi fɔnyaka ɔnɛ kema ohomba tɛmɔla Nzambi lo yoho yalɔmbande. (Joani 4:24) Lo mukanda wakandafundɛ ase Ɛfɛsɔ, Paulo akatɛkɛta dikambo dia andja ɔnɛ oko wekɔ la “nyuma” kɛmɔtshi kana yimba mɔtshi yaheme lâdiko. (Efeso 2:2) Yimba shɔ sɛngiyaka anto dia vɔ ndjaɔtɔnganyiya la tokanyi taki anto waheye Jehowa.
4. Ngande wakɛnya Yeso ohomba wa sho nama lonto laso l’Okristo dimɛna?
4 Koko, oko weso ekambi waki Jehowa wambôyakimɔka le nde, sho mbeyaka dia onto tshɛ la l’atei aso oyadi dikɛnda kana opalanga ayonga la etombelo wa kɔlɔ efula naka nde shisha lonto laso l’Okristo. Ewo k’ɔlɔlɔ ka lonto laso l’Okristo pombaka tomba paka oma lo ɛlɛmbɛ waki Jehowa ndo oma lo kɛnɛ kalongamɛnde le so. Dikambo sɔ kokaka nɛ dia takatongama lo ɛfanelo kande. (Etatelu 1:26; Mika 6:8) Bible mbɛdikaka lonto laso l’Okristo la ahɔndɔ wa lâdiko wakoka anto tshɛ mɛna. Yeso akahɛmɔla lo dikambo dia tena diaso nɛ ate: “Nyulungi dimi layuya uku atuyakaka uvi. Untu lasena, latulamaka ahondo andi [“wa lâdiko,” NW], ne dia atukokendakenda utakataka ne dia watukena sonyi kandi, eko la otshoko!”a (Enyelo 16:15) Hatolange shisha waonga ndo tokanyi taso ta Akristo tendana la lɔkɛwɔ ko mbetawɔ dia andja waki Satana tɔlɔmbɔla. Naka dikambo sɔ salema, kete tayoshisha ‘ahɔndɔ wa lâdiko’ asɔ. Dikambo sɔ diayonga lonyangu ndo sɔnyi.
5, 6. Lande na kele ekɔ ohomba monga shikaa lo nyuma?
5 Mbeya lonto laso l’Okristo dimɛna ekɔ la shɛngiya y’efula lo woho walɔmbɔla onto lɔsɛnɔ lande. Lande na? Nɛ dia naka ɔtɛmɔdi wa Jehowa ɔmɔtshi hayeya lonto lande dimɛna, kete nde kokaka mbekekɔ aha la monga la ɛlɔmbwɛlɔ kana eyango wa shikaa. Bible tewolaka mbala la mbala diaha sho mbahahɔka la akambo ngasɔ. Ombeki Jakɔba akate ate: “Untu ladja tamu, eko uku sukhu di’ashi a wuki, diasukuyama la dia sutshasutshama la loheledi. Untu uku takanaki ati: Layulungula engo uma li Khumadiondjo; untu uku eko la etema ehendi, atahahoka lu akambu andi tshe.”—Jakoba 1:6-8; Efeso 4:14; Heberu 13:9.
6 Ngande wakokaso nama lonto laso l’Okristo? Kakɔna kakoka tokimanyiya dia pamia ewo kaso ka diɛsɛ dia woke diele laso dia monga atɛmɔdi wa Nkumolongo? Lam’alangɛ yela awui wele l’ɛse anɛ.
Shikikɛ lonto layɛ l’Okristo
7. Lande na kele ekɔ ohomba nɔmba Jehowa dia nde tɔsɛdingola?
7 Tetemala la keketsha diɔtɔnganelo diasayɛ la Jehowa. Ɛngɔ koleki nɛmɔ le Okristo ele diɔtɔnganelo diasande la Nzambi. (Osambu 25:14; Tukedi 3:32) Naka tambotatɛ monga la okandokando lo dikambo dia lonto laso l’Okristo, kete ɔnɛ ekɔ etena ka ndeka sɛdingola wolo ndo woke woke wa diɔtɔnganelo sɔ. Diakɔ diakalɔmbɛ omembi w’esambo ate: “Ombediki, we [Jehowa], umpimbi! Ushishimi utema ami la wongo ami.” (Osambu 26:2) Bonde kele ɔsɛdingwelo wa ngasɔ ohomba? Nɛ dia sho shoamɛmɛ hatokoke sɛdingola eyango ndo tokanyi taso t’oma k’ɛse otema dimɛna. Paka Jehowa ndamɛ mbakoka shihodia lonto laso la letei k’otema, mbut’ate nsaki ndo tokanyi taso.—Jeremiya 17:9, 10.
8. a) Ngande wakokaso kondja wahɔ lo mbɛdikama oma le Jehowa? b) Ngande wakayakimanyiyama dia pama oko Okristo?
8 Lam’alɔmbaso Jehowa dia nde tɔsɛdingola, sho mbɔlɔmbaka dia nde tɛdika. Nde mbeyaka mbetawɔ di’awui amɔtshi tokomɛ dia kɛnɛmɔla nsaki yaso ya mɛtɛ ndo kɛnɛ kele l’etema aso. (Heberu 4:12, 13; Jakoba 1:22-25) Sho pombaka mbetawɔ wɛdikelo ɔsɔ nɛ dia vɔ toshaka diaaso dia mɛnya woke woke wa kɔlamelo yaso otsha le Jehowa. Wɛdikelo wa ngasɔ kokaka mɛnya dia kana “[tambolowana] la nkukiama, uku wane wahahumbi engo.” (Jakoba 1:2-4) Ndo etena kɛdikamaso sho kokaka pama lo nyuma.—Efeso 4:22-24.
9. Onde shoamɛ shikikɛka dia awui wa lo Bible wekɔ mɛtɛ ohomba? Lembetshiya.
9 Yashikikɛ dia awui wele lo Bible wekɔ mɛtɛ. Lonto laso oko ekambi wa Jehowa kokaka ndana naka sho bu la ewo k’oshika ka lo Afundelo. (Filipi 1:9, 10) Akristo tshɛ, oyadi akɛnda kana epalanga, pombaka ndjashikikɛ dia kɛnɛ ketawɔwɔ kekɔ mɛtɛ, mɛtɛ katanema l’atei wa Bible. Paulo akakeketsha asekande ambetawudi ate: “Nyedikaki akambu tshe: nyukimeli weli ololo.” (1 Tesalonika 5:21) Akristo w’ɛlɔngɔlɔngɔ l’esekaseka wele lo nkumbo yoka Nzambi wɔma pombaka mbeya dia vɔ hawokoke monga Akristo wa mɛtɛ l’ɔtɛ wa mbetawɔ ka ambutshi awɔ. Davidi akakeketsha Sɔlɔmɔna k’ɔnande dia ‘mbeya Nzambi ka she ndo mbôkambɛ olimu l’otema ɔtɔi.’ (1 Ekondo 28:9) Kopombamaka tsho dia Sɔlɔmɔna mendaka woho wakongaka she la mbetawɔ le Jehowa. Nde ndamɛ akahombe mbeya Jehowa ndo kɛsɔ mbakandasale. Nde akalɔmbɛ Nzambi ate: “Okone umbisha yimba la ewu dia dimi mbeya nombola wudja one.”—2 Ekondo 1:10.
10. Bonde kele kema kɔlɔ mboka ambola w’oma k’ɛse otema la eyango w’ɛlɔlɔ?
10 Mbetawɔ ka nge ndjaka oma lo ewo. Paulo akate ate: “Mbetawo katuyakaka lu diukelu.” (Romo 10:17) Akandalange nembetshiya? Nde akalange nembetshiya dia etena kaleshamaso lo Ɔtɛkɛta waki Nzambi, sho keketshaka mbetawɔ ndo wɛkamu aso le Jehowa, l’alaka ande ndo lo ɔlɔngɔswamelo ande. Ndjaoka ambola w’oma k’ɛse otema wendana la Bible kokaka konya lo ekadimwelo w’eshika. Ndo nto, lo Romo 12:2, sho tanaka dako nɛ diaki Paulo diata ɔnɛ: “Kanyeyi okone weli lulangu la [Nzambi], l’ololo latôngenyangenyaka, ndu l’uluwanyi.” Ngande wakokaso kotsha dikambo sɔ? Lo kondja ‘ewo k’oshika k’akambo wa mɛtɛ.’ (Tito 1:1) Nyuma ka Jehowa kokaka tokimanyiya dia shihodia kânga awui wa wolo. (1 Koreto 2:11, 12) Sho pombaka nɔmba ekimanyielo ka Jehowa etena keso la ekakatanu dia shihodia dikambo dimɔtshi. (Osambu 119:10, 11, 27) Jehowa nangaka dia sho shihodia, mbetawɔ, ndo kitanyiya Ɔtɛkɛta ande. Nde mbetawɔka ambola wokami la eyango w’ɛlɔlɔ.
Yashikikɛ dia ngɛnyangɛnya Nzambi
11. a) Nsaki kakɔna ka lôtɔ kakoka totadja lo djonga? b) Ngande wakokaso monga la dihonga dia tondoya tɔsɛngiya ta kɔlɔ t’oma le asekaso?
11 Yanga dia ngɛnyangɛnya Nzambi koko aha anto. Ekɔ dimɛna keketsha lonto laso lo monga l’atei w’olui ɔmɔtshi w’anto. Onto tshɛ ekɔ l’ohomba wa angɛnyi ndo sho ngɛnangɛnaka etena katodjawɔ lo demba. Lo nshi y’ɔlɔngɔlɔngɔ kana lo tena dionga onto opalanga, tɔsɛngiya t’oma le asekaso koka monga wolo efula polo lo tɔ totshutshuya dia mbokoya kana ngɛnyangɛnya anto akina. Koko angɛnyi kana asekaso hawotoyakiyanyaka nshi tshɛ dikambo di’ɔlɔlɔ aso. Mbala mɔtshi vɔ kombolaka tsho di’onto monga lawɔ kâmɛ dia salaka kɛnɛ kele kɔlɔ. (Tukedi 1:11-19) Etena kakɔ Okristo lo tɔsɛngiya ta kɔlɔ taki asekande, nde toyangaka mbala efula dia mbishɛ lonto lande. (Osambu 26:4) Ɔpɔstɔlɔ Paulo akewola ate: “Tanyuyafanyaki la akambu wa la kete nye.” (Romo 12:2) Jehowa mbishaka ekeketshelo ka letei kele laso ohomba dia ndɔshana la oseka okiyanu tshɛ w’oma l’andja dia ndjela ɛlɛmbɛ.—Heberu 13:6.
12. Tɔndɔ diakɔna ndo ɛnyɛlɔ kaki na kakoka tokeketsha dia tshikala nge lo mbetawɔ etena kendana dikambo sɔ la wɛkamu aso le Nzambi?
12 Etena kafukutanya tɔsɛngiya t’oma l’andja lonto laso l’Okristo, sho pombaka mbohɔ dia kɔlamelo yaso le Nzambi ndeka kɛnɛ kakoka anto tshɛ kana anto efula mbuta. Ɛtɛkɛta wa lo Etumbelu 23:2 mbele oko tɔndɔ dia ekokelo, diata ɔnɛ: “Tuyelaki ului w’antu dia ntsha kolo.” Etena kakadje anto efula wa l’Isariyɛlɛ tâmu lo dikoka dia Jehowa dia kotsha alaka Ande, Kalɛba akatone la wolo tshɛ dia ndjela kanyi yawɔ. Nde aki la eshikikelo dia alaka waki Jehowa kokaka mbetawɔma, ndo nde akatshɔkwama efula l’ɔtɛ wa dikambo sɔ. (Walelu 13:30; Jashua 14:6-11) Onde wɛ nangaka shika tanga woho akɔ wâmɛ dia nama diɔtɔnganelo diayɛ la Nzambi la ntondo ka tɔsɛngiya ta kɛnɛ kata anto efula?
13. Bonde kele ekɔ lomba dia mbewɔnya lonto laso l’Okristo?
13 Ewɔnya lonto layɛ l’Okristo. Etelo k’ɔnɛ dia ndɔsha dimɛna paka ndjakokɛ ekɔ mɛtɛ etena kakokɛso lonto laso l’Okristo. Etena kakawahomana l’ɔlɔshamelo lo welo wakawadjaka dia sala lolango la Jehowa ase Isariyɛlɛ waki la kɔlamelo lo nshi ya Ɛzɛra wakate vate: ‘Sho tekɔ ekambi wa Nzambi kanga olongo ndo nkɛtɛ.’ (Ezera 5:11) Naka etsha ndo diɔnyɔ di’anto watohetsha monga la shɛngiya le so, kete sho kokaka ndjɔla yɔɔ la wɔma. Naka sho nyangaka dia ngɛnyangɛnya anto tshɛ, kete dikambo sɔ diayotɔlɛndja. Ɔnkɔnɛ, aha mboka wɔma. Tôngaka nshi tshɛ dimɛna dia wɛ mbewɔnya anto akina hwe ɔnɛ wɛ ekɔ Ɔmɛnyi wa Jehowa. La dilɛmiɛlɔ ndo la eshikikelo tshɛ wɛ koka nembetshiya akina ɛlɛmbɛ wayelayɛ, dietawɔ diayɛ ndo kongamu yayɛ y’Okristo. Anto akina weye dia wɛ ambɔsaka yɛdikɔ ya ndjelaka ɛlɛmbɛ wa Jehowa wa lâdiko wendana la lɔkɛwɔ l’ɔlɔlɔ. Ewoya hwe dia wɛ hakokaki tshika kɔlamelo yayɛ y’Okristo pondjo. Ɛnya dia wɛ ngɛnangɛnaka ɛlɛmbɛ ayɛ wendana la lɔkɛwɔ la dimɛna. (Osambu 64:10) Mbeyama oko Okristo wa nge kokaka kokeketsha, kokokɛ, ndo kânga tshutshuya amɔtshi dia mboka ambola wendana la Jehowa ndo ekambi ande.
14. Onde diɔnyɔ kana ɔlɔshamelo pombaka tɔkɔmɔla otema? Lembetshiya.
14 Eelo, amɔtshi mbeyaka kɔnyɔla kana kɔlɔsha. (Jude 18) Naka amɔtshi hawodje yimba lo welo wadjayɛ dia mbalembetshiya ɛlɛmbɛ wayelayɛ, kete tɔkɔmɔke otema. (Ezekiyele 3:7, 8) Oyadi wɛ kodjaka welo wa woho akɔna tshɛ, wɛ hakokaki mbetawoya anto wele bu la mposa ka mbetawɔ. Ohɔ Farawɔ. Ndoko sui kana dihindo koyanga oshishelo w’ɔnande la enondo kombêtawoya dia Mɔsɛ akatɛkɛtaka oko otomami w’oma le Jehowa. Ɔnkɔnɛ, tetawɔke dia wɔma wa anto kɔladia yɔɔ. Wɛkamu ndo mbetawɔ le Nzambi kokaka tokimanyiya dia tondoya wɔma.—Tukedi 3:5, 6; 29:25.
Ɛwɔ l’ɔkɔngɔ dia nɔngɔsɔla nshi yayaye
15, 16. a) Ele sango diaso dia lo nyuma? b) Ngande wakokaso kondja wahɔ oma lo sango diaso dia lo nyuma lo kamba la Ɔtɛkɛta wa Nzambi?
15 Ɔsa sango diayɛ dia lo nyuma la nɛmɔ. Etena kakambawɔ la Ɔtɛkɛta wa Nzambi, Akristo kondjaka wahɔ lo kana yimba la sango diawɔ dia lo nyuma. Sango sɔ mendanaka la akambo wa mɛtɛ wa lo Ɔtɛkɛta wa Jehowa, elongamelo ka lɔsɛnɔ la pondjo, ndo nɛmɔ dia monga enyimpala wa Nzambi oko apandjudi wa lokumu l’ɔlɔlɔ. Onde wɛ kokaka shihodia dihole diele layɛ l’atei w’Ɛmɛnyi ande, mbuta ate l’atei wa olui w’anto wakalongola ɔkɛndɛ wa kamba olimu watsha nsɛnɔ wa esambishelo ka Diolelo? Ohɔ dia Jehowa ndamɛ kata ate: “Emenyi ami mbenyu.”—Isaya 43:10.
16 Wɛ kokaka ndjaoka ambola anɛ: ‘Nɛmɔ dia ngande diele la sango sɔ dia lo nyuma le mi na? Onde lekɔ lo mbɔsa sango diakɔ la nɛmɔ di’efula polo lo sala dia lolango la Nzambi mbɔsa dihole dia ntondo lo lɔsɛnɔ lami? Onde nɛmɔ diele la sango sɔ le mi diekɔ efula polo lo yoho yakokadiɔ keketshami dia shika tanga la ntondo ka shɛngiya tshɛ yakoka shishɛmi sango diakɔ?’ Sango diaso dia lo nyuma kokaka nto tosha ekokelo ka lo nyuma kakokaso kondja paka l’atei w’ɔlɔngɔswamelo wa Jehowa. (Osambu 91:1, 2) Ovuswelo w’awui w’ohomba wendana l’ɔkɔndɔ wa nshi nyɛ w’ɔlɔngɔswamelo waki Jehowa kokaka toshikikɛ dia ndoko onto kana ɛngɔ kakoka shidiya ekambi wa Jehowa tshɛ oma la nkɛtɛ.—Isaya 54:17; Jeremiya 1:19.
17. Kakɔna kahombama nto lo dihole dia mendɛka tsho lo sango diaso dia lo nyuma?
17 Lo mɛtɛ, hatokoke mendɛka tsho lo sango diaso dia lo nyuma. Onto tshɛ la l’atei aso pombaka nyomoleka keketsha diɔtɔnganelo diasande la Nzambi. L’ɔkɔngɔ wa Paulo kamba wolo efula dia keketsha mbetawɔ k’Akristo wa la Filipi, nde akafundɛ ate: “Okone, elangimi wa ngandji, uku akanyakitanyiaka diui tena tshe, aha paka lam’atumuyalaka la nyu, keli kakiane nyu nyambuleka nkitanyia efula lam’emi kema la nyu. Nyutshaki ulimu a panda kanyu la woma la lukumba.” (Filipi 2:12) Hatokoke ndjaɛkɛ le onto okina dia kondja panda.
18. Ngande wakoka elimu w’Okristo keketsha lonto laso l’Okristo?
18 Yasha efula l’elimu w’Okristo. Vɔ mbutaka ɔnɛ “olimu mongaka la shɛngiya y’efula lo lonto laki onto.” Ɛlɔ kɛnɛ Akristo wakalongola ɔkɛndɛ wa kamba olimu w’ohomba wa sambisha lokumu l’ɔlɔlɔ la Diolelo dia Nzambi diamboshikikɛmaka. Paulo akate ate: “Utumami mbemi le asi wedja. Dimi latutumbulaka ulimu ami w’usambisha.” (Romo 11:13) Olimu aso w’esambishelo totshikitanyaka l’ase andja ɔnɛ ndo woho wayashaso lɔkɔ keketshaka lonto laso l’Okristo. Etena kayashaso efula l’elimu wa teokrasi wele oko, nsanganya ya l’etshumanelo, ekongelo ka wokelo wa ahole wa ɔtɛmwɛlɔ, welo wadjama dia kimanyiya wanɛ wele lo dihombo, ndo akambo akina wa ngasɔ, sho kokaka keketsha lonto laso l’Okristo.—Ngalatiya 6:9, 10; Heberu 10:23, 24.
Lonto l’oshika mbelaka ɛtshɔkɔ wa mɛtɛ
19, 20. a) Wahɔ akɔna wamboyokondja lo monga Okristo? b) Kakɔna kele kiɔkɔ ya lonto laso la mɛtɛ?
19 Ohokanyiya yema dia menda wahɔ ndo ɛtshɔkɔ efula wele laso l’ɔtɛ weso Akristo wa mɛtɛ. Tekɔ la diɛsɛ dia mbeyama le Jehowa. Ɔprɔfɛta Malaki akate ate: “Ku wane wakuki [Jehowa] woma, wakatanela; [Jehowa] akahukama, akuki. Ku buku di’euhwelu diakafundama la ntundu kandi lu dikambu dia wane wakuki [Jehowa] woma, ndu waketawo lukumbu landi.” (Malaki 3:16) Nzambi kokaka tɔsa oko angɛnyi ande. (Jakoba 2:23) Nsɛnɔ yaso mongaka l’oyango wa shikaa, la kitshimudi y’oshika ndo la eyango wele la etombelo w’amɛna. Ndo takalongola elongamelo ka lɔsɛnɔ la pondjo.—Osambu 37:9.
20 Ohɔ dia lonto layɛ la mɛtɛ ndo nɛmɔ diele layɛ nemanɛka la nɛmɔ diakosha Nzambi koko aha la nɛmɔ diakosha anto. Akina mbeyaka tosha nɛmɔ lo ndjela tokanyi ta kɔlɔ taki anto. Koko ngandji ka Nzambi ndo wahɔ wele lande le so mbele kiɔkɔ ya nɛmɔ diele laso, mbuta ate sho tekɔ anto ande. (Mateu 10:29-31) Ngandji kokaso Nzambi kokaka tosha ewo k’efula ka lonto laso ndo ɛlɔmbwɛlɔ k’oshika lo nsɛnɔ yaso. “Untu lalanga [Nzambi] untu oso ambeyama uma le ndi.”—1 Koreto 8:3.
[Nɔtɛ ka l’ɛse ka dikatshi]
a Ɛtɛkɛta ɛsɔ mbeyaka mendana lo yoho mɔtshi la elimu waki owandji wa l’okongo wa tɛmpɛlɔ ka la Jerusalɛma. L’otsho nde akatetetaka lo tɛmpɛlɔ dia menda kana ase Lɛwi wakasalaka djamu l’ahole awɔ waki lo djɔ kana bu. Djamu tshɛ yakatanemaka oladi djɔ akakɔmamaka fimbo, ndo ahɔndɔ ande wa lâdiko wakahombaka tshumbama oko dilanya diakawoshaka sɔnyi.
Onde wɛ akohɔ?
• Bonde kele ekɔ ohomba le Akristo dia nama lonto lawɔ la lo nyuma?
• Ngande wakokaso keketsha lonto laso l’Okristo?
• Etena kahomanaso la dimbola dia mbeya onto lahombaso ngɛnyangɛnya, awui akɔna wayotokimanyiya dia mbɔsa yɛdikɔ y’ɔlɔlɔ?
• Ngande wakoka ewo k’oshika ka lonto laso nɔngɔsɔla nshi yaso yayaye oko Akristo?
[Esato wa lo lɛkɛ 21]
Ndjasha efula l’elimu w’Okristo koka keketsha lonto laso l’Okristo