Esambishelo ka laande kayosalema lo Ngɔndɔ ka divwa dia mbutɛ anto akambo wendana la Diolelo dia Nzambi!

Lo ngɔndɔ ka divwa, tayodja welo wa laande dia mɛnya anto dia Diolelo dia Nzambi di’ekɔ tshɔyi y’elongamelo l’ekakatanu wele l’anto. (Mat 24:14) Ngande wakokayɛ mbisha lonya lo kapanyɛ kɛsɔ? L’edja ka ngɔndɔ k’otondo, kahana l’anto efula divɛsa dimɔtshi diatɛkɛta dikambo dia Diolelo dia Nzambi. Naka ompokami ambɛnya nsaki, shande kɔpi kɛmɔtshi ka Tshoto y’Etangelo ya No. 2 2020. Oma laasɔ, lomialomia nsaki k’ompokami aha la ntshimbatshimba ndo yanga dia ntatɛ mbeka la nde Bible lo nkamba la biukubuku Ngɛnangɛnaka la lɔsɛnɔ pondjo pondjo. Wanɛ tshɛ wakamba oko ambatshi mboka wa tshanda mbeyaka nsɔna dia nkimɔ wenya 15 kana 30 walɔmbama lo ngɔndɔ kɛnɛ ka divwa.

Keema edja, Diolelo dia Nzambi diayominola waolelo tshɛ wadilɔsha. (Dan 2:44; 1Kɔ 15:24, 25) Nyɛsɔ toyasha tshɛ lo diaaso dia laande sɔ dia mɛnya woho wasukɛso Jehowa ndo Diolelo diande!