Ambola w’oma le ambadi
Kakɔna kakalange ɔpɔstɔlɔ Pɔɔlɔ mbuta etena kakandayaelɛ ɔnɛ “ɔna lambotɔ osondjo”? (1 Kɔrɛtɔ 15:8)
Lo ndjela 1 Kɔrɛtɔ 15:8, Pɔɔlɔ akate ate: “L’ekomelo, nde akayɛnamaka ndo le mi wate kana oko le ɔna lambotɔ osondjo.” Lo nshi y’edjedja, takalembetshiyaka dia Pɔɔlɔ akatɛkɛtaka dikambo diande ndamɛ etena kakandɛnyi ɛnɛlɔ ka Yeso ele lo lotombo l’olongo. Aki oko nde akakondja kɛnɛmɔ ka mbotɔ kana mbolɔ lo lɔsɛnɔ la lo nyuma, la ntondo k’etena kakɔ nkoka, mbuta ate ntambe efula la ntondo ka woho wa eolwelo kɛsɔ salema. Koko, wekelo wa lotshimola wa divɛsa nɛ mɛnyaka dia sho pombaka ntshikitanya elembetshiyelo wa divɛsa nɛ.
Ɛkɔ mɛtɛ dia lanɛ Pɔɔlɔ ekɔ lo ntɛkɛta lo kɛnɛ kendana la kɛnɛ kakasalema etena kakandakome Okristo. Ko kakɔna kakandalange mbuta etena kakandate dia nde aki oko “ɔna lambotɔ osondjo”? Tokanyi efula koka mbishama lo dikambo sɔ.
Nde akonge ombetawudi la shashimoya ndo lo yoho yasha okiyanu. Mbala efula ɔna l’osondjo mbotɔka la shashimoya. Etena kakatatshɔka Saolo (lakayelamɛka l’ɔkɔngɔ Pɔɔlɔ) otsha la Damasɛkɛ dia tɔhɛnyahɛnya Akristo wa lɛkɔ, nde konongamɛka dia nde ayɛna ɛnɛlɔ ka Yeso lakolwama. Woho wakakome Pɔɔlɔ Okristo aki dui dia shashimoya aha tsho le nde, koko ndo le Akristo wa l’osomba ɔsɔ wakandakongɛ dia tosoya. Laadiko dia laasɔ, dui sɔ diakawela ekiyanu lo woho wakandayokoma ko hayɛna lo tshanda mɔtshi.—Ets. 9:1-9, 17-19.
Nde akakome Okristo lo “etena ka kɔlɔ.” Tshɛkɛta ya lo Grɛkɛ yakakadimɔma ɔnɛ “ɔna lambotɔ osondjo” koka kadimɔma nto ɔnɛ “ɔna lambotɔ l’etena ka kɔlɔ.” Bible de Jérusalem mbutaka dui sɔ lo yoho nyɛ: “Aki oko dimi lakotɔ etena kaki ndooko onto lakalongamɛka dui sɔ.” L’etena kakakome Pɔɔlɔ ombetawudi, ko Yeso amboshilaka nkalola l’olongo. Otshikitanyi la wanɛ wele Pɔɔlɔ akatɛkɛta dikambo diawɔ l’avɛsa wa la diko lo tshapita nyɛ, nde kɔmɛna Yeso lakolwama ntondo ka nde mbidɛ otsha l’olongo. (1 Kɔr. 15:4-8) Woho wakɛnama Yeso la shashimoya le Pɔɔlɔ akawosha diaaso sɔ, kaanga kele mɛnamaka dia dui sɔ diakasalema lo “etena ka kɔlɔ.”
Nde akatɛkɛtaka dikambo diande lo yoho yele l’okitshakitsha. Lo ndjela wa nomb’ewo mɔtshi, etelo kakakambe la Pɔɔlɔ lanɛ koka mbokɛma oko nde aki la diɔnyɔ. Naka kɛsɔ mbaki la Pɔɔlɔ lo yimba, kete nde akeyaka dia nde kosungana nongola diɛsɛ diakandalongola. Lo mɛtɛ, nde akakome polo lo mbuta ɔnɛ: “Nɛ dia dimi kele ɔpɔstɔlɔ woleki tshitshɛ ndo dimi haasungana mbelamɛ ɔpɔstɔlɔ, nɛ dia lakahɛnyahɛnyaka etshumanelo ka Nzambi. Koko, oma lo ɔlɔlɔ waheyama mbɛdika waki Nzambi mbemi kɛnɛ kemi.”—1 Kɔr. 15:9, 10.
Ɔnkɔnɛ, mɛnamaka dia Pɔɔlɔ akatɛkɛtaka dia woho wakɛnama Yeso le nde aha la nongamɛ ndo la shashimoya, mbuta ate etena kakinde konongamɛ dia nde ayonga Okristo, kana woho wakinde kosungana dia nkondja ɛnɛlɔ ka diambo kɛsɔ. Oyadi kɛnɛ tshɛ kakandalange mbuta, mbokɛmaka hwe dia Pɔɔlɔ akɔsaka diɛsɛ sɔ la nɛmɔ di’efula. Aha la taamu, dui sɔ diakoshikikɛ dia mɛtɛ Yeso akolɔ oma lo nyɔi. Diakɔ diele, mbala efula nde akatɛkɛtaka dikambo di’etena kɛsɔ kakinde konongamɛ etena kakandasambishaka anto akina akambo wendana la eolwelo ka Yeso.—Ets. 22:6-11; 26:13-18.