WEKELO 37
Kɛnɛ kata Bible lo dikambo di’olimu ndo dia falanga
Onde wɛ atayakiyanyaka ndooko lushi lo dikambo di’olimu ndo dia falanga? Koka monga tshondo y’okakatanu dia nkotsha ehomba aso ko l’etena kakɔ kaamɛ tatɛmɔla Jehowa lo yoho yahombama. Bible toshaka alako w’eshika wakoka tokimanyiya.
1. Kakɔna kata Bible lo dikambo di’olimu?
Nzambi nangaka dia sho ngɛnangɛna la olimu aso. Bible mbutaka dia “ndooko kɛnɛ kele dimɛna le onto oleki . . . ngɛnangɛna lo olimu ande wa wolo.” (Ondaki 2:24) Jehowa ekɔ lo nkamba olimu wa wolo. Etena kawokoyaso lo monga l’etete l’olimu, sho mbɔngɛnyangɛnyaka ndo sho mongaka l’ɔngɛnɔngɛnɔ.
Olimu wekɔ ohomba. Koko hatohombe pondjo mbetawɔ di’olimu monga dui dioleki ɔtɛmwɛlɔ aso le Jehowa ohomba. (Joani 6:27) Nde ndakaka dia naka sho mbeetsha lo dihole dia ntondo, kete nde ayotokotshiyɛ ehomba aso wa l’emunyi.
2. Monga la wɛdimo lo dikambo dia falanga kɛdikɛdi na?
Kaanga mbata Bible dia ‘falanga kokɛka,’ tɔ tɔhɛmɔlaka dia falanga tsho hakoke tosha ɔngɛnɔngɛnɔ. (Ondaki 7:12) Ɔnkɔnɛ, sho keketshamaka diaha nanga falanga, koko dia ‘ngɛnangɛnaka la kɛnɛ kele la so.’ (Adia Hɛbɛru 13:5.) Naka sho ntetemala ngɛnangɛna la kɛnɛ kele la so, kete hatotoyakiyanya l’ɔtɛ weso bu la lomombo efula. Tayewɔ abasa w’anyanya. (Tokedi 22:7) Ndo tayewɔ waale waya oma lo tɔkɛnyɔ ta falanga ndo wa nyanga dia ngɔna esadi esadi.
3. Ngande wakokaso nkamba la falanga yaso la lokaho tshɛ?
Jehowa ekɔ Nzambi ka lokaho ndo sho mbookoyaka etena kongaso la lokaho ndo “suke dia nkahana l’anto akina.” (1 Timɔte 6:18) Sho koka nkamba la falanga yaso la lokaho tshɛ lo nsukɛ etshumanelo ndo lo nkimanyiya anto akina wele lo dihombo, djekoleko asekaso atɛmɔdi. Jehowa ndekaka ngɛnangɛna, aha lofulo lakimɔso, koko eyango watotshutshuya dia nkimɔ kɛnɛ kakimɔso. Naka sho nkimɔ la lokaho tshɛ, kete tayonga l’ɔngɛnɔngɛnɔ ndo tayɔngɛnyangɛnya Jehowa.—Adia Etsha 20:35.
NYOMOTSHIMOLA
Tende wahɔ wayotokondja naka sho ntetemala nkitsha olimu lo dihole diawɔ ndo ntetemala ngɛnangɛna la kɛnɛ kele la so.
4. Tombola Jehowa lo yoho yakambayɛ olimu
Lɔngɛnyi lasaso la Jehowa pombaka monga la shɛngiya lo woho wɔsaso olimu. Nyende VIDƐO, ndo oma laasɔ, nyɔkɛtshanya ambola wayela anɛ:
Lo vidɛo yɛnyiso, kakɔna kakambiya lo kɛnɛ kendana la dionga ndo lɔkɛwɔ lele la Jason lo dihole diande di’olimu?
Akandasale dia nkitsha olimu lo dihole diawɔ?
Nyadia Kɔlɔsayi 3:23, 24, ndo oma laasɔ, nyɔkɛtshanya dimbola nɛ:
Lande na kele dionga diaso lo kɛnɛ kendana l’olimu diekɔ ohomba?
Olimu wekɔ ohomba. Koko hatohombe mbetawɔ dia vɔ ndeka woho watɛmɔlaso Jehowa ohomba
5. Sho kondjaka wahɔ lo ngɛnangɛna la kɛnɛ kele la so
Anto efula salaka la wolo dia ndjamɔtshɛ falanga. Koko Bible hatokeketsha dia sho nsala dui sɔ. Nyadia 1 Timɔte 6:6-8, ndo oma laasɔ, nyɔkɛtshanya dimbola nɛ:
Kakɔna katokeketsha Bible dia nsala?
Sho koka monga l’ɔngɛnɔngɛnɔ oyadi sho bu la diangɔ efula. Nyende VIDƐO, ndo oma laasɔ, nyɔkɛtshanya dimbola diayela nɛ.
Kaanga mbakiyɔ komonga la falanga efula, kakɔna kakasha nkumbo nyɛ ɔngɛnɔngɛnɔ?
Ko kayotota naka tekɔ la falanga efula, koko tokombola nyomoleka monga la yɔ? Yeso akakambe la wɛɛla wɛnya waale wele la dui sɔ. Nyadia Luka 12:15-21, ndo oma laasɔ, nyɔkɛtshanya dimbola nɛ:
Wetshelo akɔna wamboyokondja oma lo wɛɛla waki Yeso?—Enda divɛsa 15.
Nyadia ndo nyɛdike Tokedi 10:22 ndo 1 Timɔte 6:10. Ndo oma laasɔ, nyɔkɛtshanya ambola anɛ:
Oko le yɛ, kakɔna koleki ohomba? Monga ɔngɛnyi wa Jehowa ko kana monga la falanga efula? Lande na?
Ekakatanu akɔna wele l’oweso wa falanga?
6. Jehowa ayokotsha ehomba aso
Ekakatanu wendana l’olimu ndo la falanga koka mbidja mbetawɔ kaso le Jehowa l’ohemba. Nyende VIDƐO dia mɛna woho wakokaso ndɔshana l’ekakatanu ɛsɔ wadja mbetawɔ kaso l’ohemba, ndo oma laasɔ, nyɔkɛtshanya ambola wayela anɛ:
Lo vidɛo yɛnyiso, ekakatanu akɔna wakahomana l’ɔnangɛso ongo?
Kakɔna kakandasale dia ndɔshana dimɛna l’ekakatanu ande?
Nyadia Mateo 6:25-34, ndo oma laasɔ, nyɔkɛtshanya dimbola nɛ:
Jehowa alakande dia salɛ wanɛ wawetsha lo dihole dia ntondo?
ANTO AMƆTSHI MBUTAKA ƆNƐ: “Dimi pombaka nkamba la wolo dia nkotsha ehomba wa nkumbo kami. Halokoke tshɔɔka lo nsanganya ya l’etshumanelo lomingu tshɛ.”
Divɛsa diakɔna diaketawoya dia mbetsha ɔtɛmwɛlɔ wa Jehowa lo dihole dia ntondo mongaka nshi tshɛ yɛdikɔ yoleki dimɛna?
LO TSHENA PE
Olimu wa l’emunyi ndo falanga wekɔ ohomba, koko vɔ hawohombe pondjo mbekola yimba yaso oma l’olimu wa Jehowa.
Ovuswelo
Kakɔna kakoka kokimanyiya dia monga la kanyi yele la wɛdimo lo kɛnɛ kendana l’olimu?
Wahɔ akɔna wakokayɛ nkondja lo ngɛnangɛnaka la kɛnɛ kele la yɛ?
Ngande wakokayɛ mɛnya dia wɛ ndjaɛkɛka lo daka diaki Jehowa diata dia nde ayokotshɛka ekambi ande ehomba awɔ?
SALA EYANGELO
Enda kana Bible mbutaka ɔnɛ monga la falanga ekɔ kɔlɔ.
“Onde falanga ekɔ odio wa weho tshɛ w’akambo wa kɔlɔ?” (Sawo dia l’Ɛtɛrnɛtɛ)
Eka woho wakokaso nkamba la falanga yaso dia ngɛnyangɛnya Nzambi.
“Kakɔna kata Bible lo dikambo dia lokaho?” (Sawo dia l’Ɛtɛrnɛtɛ)
Onde tɔkɛnyɔ ta falanga bu la waale?
“Kanyi ya Bible lo dikambo dia tɔkɛnyɔ ta falanga” (Emɔ!, Ngɔndɔ ka sato 2015)
Enda kɛnɛ kakatshutshuya pami kɛmɔtshi dia ntshika tɔkɛnyɔ ta falanga ndo wovi.