Ewo katokotola le Nzambi
Otungi aso bu tsho la wolo w’efula, nde ekɔ ndo la waonga w’amɛna ndo nde kombolaka dia sho mbeka awui wendana la nde ndo ndjasukanya la nde. (Joani 17:3; Jakɔba 4:8) Diakɔ diatosholɛnde awui efula wendana la nde ndamɛ.
Otungi aso ekɔ la lokombo l’oshika
“Anto weye dia wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.”—OSAMBO 83:18.
Bible mbetshaka dia Jehowa mbele Nzambi ɔtɔi ka mɛtɛ. Nde mbele Otungi w’andja w’otondo ndo wa diangɔ tshɛ diele la lɔsɛnɔ. Ndamɛ oto mbasungana sho tɛmɔlaka.—Ɛnyɛlɔ 4:11.
Jehowa ekɔ Nzambi ka ngandji
“Nzambi ekɔ ngandji.”—1 JOANI 4:8.
Jehowa kambaka la Bible ndo la diangɔ diakandatonge dia tetsha woho w’onto wende. Ngandji mbele dionga diande dioleki tshɛ ohomba. Awui tshɛ wasalande tshutshuyamaka oma lo ngandji. Etena tshɛ kayototalekaka mbeka awui efula wendana la Jehowa, mbayototalekaka mbooka ngandji.
Jehowa ekɔ Nzambi ka dimanyiya
“Wɛ ekɔ Nzambi kele suke dia dimanyiya.”—NƐHƐMIYA 9:17.
Jehowa mbeyaka dia sho keema kokele. Diakɔ diende ‘suke dia todimanyiya.’ Etena kawɔlɔmbaso edimanyielo naka tambosala dui dimɔtshi dia kɔlɔ ndo kasalaso la wolo dia ntshika nsala awui wa kɔlɔ, nde todimanyiyaka ndo nde hohɔ pɛkato yakatasale lo nshi yakete.—Osambo 103:12, 13.
Jehowa kombolaka dia sho mbɔlɔmba
“Jehowa ekɔ suke la wanɛ tshɛ wawelɛ . . . Nde mbokaka delo diawɔ dialɔmbawɔ ekimanyielo.”—OSAMBO 145:18, 19.
Sho bu l’ohomba wa nsala sɛlɛmɔnyi mɔtshi ya laande kana nkamba l’esato kana la diangɔ dia ntɛmɔla Jehowa. Nde pokamɛka alɔmbɛlɔ aso paka oko woho watohokamɛka ombutshi wa ngandji anande wa ngandji.