Randevu ɔmɔtshi w’ohomba efula

LEKƆ la randevu ɔmɔtshi w’ohomba efula. Dimi lekɔ mama kɛmɔtshi keke osekaseka kasɛna lo wodja w’Espagne. Layanga nyotɛ kɛnɛ kakakonya dia ndjɔsa randevu ɔsɔ.

Lakole lo nkumbo kaki ki ndo diokanelo kondjala lɔkɔ. Nkumbo kaso kakatshatshema la lonyangu etena kakavu kosɛmi ka pami lo aksida ɔmɔtshi wa kandji ele la ɛnɔnyi ɛnɛi. Ndo nto, lɔkɛwɔ la kɔlɔ laki la papa kombishaka mama diaaso dia monga la ɔngɛnɔngɛnɔ lo diwala. Koko okakatanu ɔsɔ komboshimba dia nde kakatshiya ɛlɛmbɛ wendana la lɔkɛwɔ lo yimba yami ndo y’enondo ami la pami.

La edjedja ka wonya, enondo ami la pami akatshuke wadi, ndo dimi lawɔ lakayotshukama. Yema tshitshɛ oma lâsɔ, wakashola mama la hemɔ ka kansɛrɛ kakokonya polo lo nyɔi. Koko la ntondo ka nde mvɔ, nde akatotshikɛ ɛngɔ kɛmɔtshi k’oshinga wolo.

Osekande ɔmɔtshi la womoto akasawola la nde lo kɛnɛ kendana la elongamelo ka eolwelo k’oma lo Afundelo ndo mama aketawɔ dia mbeka Bible. Oya lo ekomelo ka lɔsɛnɔ lande, losango l’elongamelo l’oma lo Bible lakokimanyiya dia nde monga la oyango lo lɔsɛnɔ ndo la ɔngɛnɔngɛnɔ.

Lam’akatɛnyi etombelo w’ɛlɔlɔ waki la losango l’oma lo Bible le nde, enondo ami la pami takamɛ mbeka Ɔtɛkɛta wa Nzambi. Lakabatizama oko Ɔmɛnyi wa Jehowa ngɔndɔ ɔtɔi la ntondo ka ɔnami la hende la womoto l’olangala efula lakatɔlɛ Lucía mbotɔ.

Lushi lakamabatizama laki ohomba efula le mi. Ɔkɔkɔ ɔmɔtshi ele oma ko etena kɛsɔ lakakome okambi wa Jehowa lo woho wakamayakimɔ le nde dia mbokambɛ olimu pondjo pondjo. Ɔkɔkɔ okina ele lakakoke mbewoya anami wa ngandji awui wendana la mbetawɔ kami, mbuta ate ɔnami la pami ndo la womoto.

Koko yema tshitshɛ oma lâsɔ, lakayoshisha ɔngɛnɔngɛnɔ ami wa mbewoyaka anami wa ngandji awui wendana la mbetawɔ kami. Etena kaki Lucía la ɛnɔnyi ɛnɛi, nde akamɛ monga la kandji efula lo dikundju. L’ɔkɔngɔ wa vɔ mbosala ɛgzamɛ efula, dɔkɔtɛlɛ akate dia nde aki la dina dimɔtshi diaki la woke w’olowa wa ɔranjɛ lo ovɔ. Dɔkɔtɛlɛ akate dia Lucía aki la dina dia kansɛrɛ (tumeur cancéreuse) diakayanunaka esadi esadi. Etena kɛsɔ mbakamɛ ta dia ɛnɔnyi esambele diakalɔ Lucía la hemɔ ka kansɛrɛ ndo tɔ kakokonya dia tshikalaka lo lopitadi nshi efula.

Yimba ya ndjahombia

Lo ɛnɔnyi wa pâ ɛsɔ, Lucía akakeketsha mbala efula oma lo woho wakandakumbatɛka ndo wakandambikaka ɛlɔmɔ la ngandji tshɛ. Woho wakandalɔshanaka la hemɔ kɛsɔ akambiya ndo wanɛ tshɛ wakakambaka lo lopitadi. Nde akalomɔlomɔka nshi tshɛ dia kamba dihɛka lo dihɛka la ɛfɛlɛmɛ, lo mbakimanyiyaka dia vɔ mbisha ana waki lo toshambrɛ tosukanyi yawuru, ashi w’elowa ndo diangɔ dikina. Ɛfɛlɛmɛ wakasha Lucía okutu wa wɛma ndo tshapa yakɛnyaka dia nde aki okimanyedi awɔ.

Onto ɔmɔtshi lakakambaka lo lopitadi lakɔ ekɔ lo mbuta ate: “Lucía akananda otema ami. Nde aki ɔna l’osalosalo, aki la tokanyi t’eyoyo l’ɔtɛ, ndo nde akalangaka sanga asango efula. Nde komonga la ɔsɔnyi ndo aki kanga tshundju mɛtɛ.”

Lucía akakondja wolo ndo wɔladi oma lo Ɔtɛkɛta wa Nzambi. (Heb. 4:12) Nde aki la eshikikelo ɔnɛ lo andja w’oyoyo, “nyoi ha[t]uyala ntu, delu hadiuyala ntu, kuyanga ndjawi, kuyanga kandji,” oko wadilaka Ɔtɛkɛta wa Nzambi. (Eny. 21:4) Oko wakandayashaka le anto akina nde akakambaka la diaaso tshɛ dia mbewoya anto losango l’oma lo Bible. Elongamelo ka nge kaki la Lucía lo eolwelo kakokimanyiya dia nde mbikikɛ ndo nama ɔngɛnɔngɛnɔ ande kânga mbakinde konongamɛka efula dia tshikala la lɔsɛnɔ nto. (Is. 25:8) Ngasɔ mbakandongaka edja ndo lushi lakandavu la hemɔ ka kansɛrɛ.

Lushi lakɔ lɔsɔ mbakamɔshi randevu w’ohomba efula wakamatɛkɛtshi la diko. Lucía kokokaka mbifola washo ande nto. She akakimɛ lonya lande lɔmɔtshi ko dimi lokina. Lakawotɛ lo hiɔtɛhɔtɛ nte: “Toyakiyanyake efula, halokotshika. Hɛnga ɔkɔkɛ ɔkɔkɛ. Etena kayoyolɔ, wɛ ayɔkɔlɔngana. Wɛ hatonga la kandji nto ndo dimi layonga kâmɛ la yɛ.”

Kakianɛ dimi la dia nɛmiya randevu ɔsɔ. Dimi mbeyaka nte bu yana ya dikambo dia dimi tetemala konga eolwelo kande. Koko dimi mbeyaka nto nte naka dimi ndjaɛkɛ la solo dia lotutsha tshɛ le Jehowa ndo nama olowanyi ami le nde, kete layonga lawɔ etena kayondolɔ.

Sango diakatotshɛ Lucía

Ɛnyɛlɔ ka dihonga ka Lucía ndo osukɔ wa diambo wa etshumanelo wakambiya omɛmi laki komonga Ɔmɛnyi wa Jehowa efula. Lushi lakavu Lucía, nde akambitɛ ɔnɛ nde akahombe nyomokana yimba nto. Mingu ngana l’ɔkɔngɔ, nde akasɛngɔla ekumanyi kɛmɔtshi ka lo etshumanelo dia mbêtsha Bible. Kombeta edja, omɛmi akamɛ mbɔtɔ lo nsanganya tshɛ. Kânga mbakinde komonga la akoka wa tshika nnɔ mfɔka ntondo, nde akayotsha dikambo sɔ oma lo ekimanyielo ka Jehowa.

Lɔkɔnyɔ lemi lalɔ l’ɔtɛ wa nyɔi ka Lucía latashile tshɛ, koko lekɔ la lowando le Jehowa l’ɔtɛ wa sango diakandatotshikɛ. Dimi la omɛmi keketshanaka diɛsɛ oma lo elongamelo ka diambo ka eolwelo. Eelo, sho kanyiyaka etena kayotɛna Lucía nto, la washo ande w’ebolonga waha la ɔsɔnyi ndo la elungi kande k’ɔmɔnɔmɔnɔ.

Nyɔi ka kandji k’ɔnami kakatshutshumadja ndo osukanyi ami ɔmɔtshi lo yoho ya lânde. La pindju ka Lushi la samalo lɔmɔtshi, etena kakalɔka mvula, womoto ɔmɔtshi laki la ɔna pami lakɔtɔka kalasa ɔtɔi la Lucía akaye lakaso. Nde lawɔ akavusha ɔnande la pami laki la ɛnɔnyi 11 la hemɔ kakɔ kâmɛ. Etena kakandoke kɛnɛ kakakomɛ Lucía, womoto ɔsɔ akayange lɛnɛ adjasɛso ndo akaye ndjotenda. Nde akalange mbeya woho wakamalɔshanaka la kandji ka nyɔi ka Lucía ndo akamimbola ɔnɛ kana dimi kokaka kimanɛ la nde dia kimanyiya wamato akina waki la ntondo ka ekakatanu wa woho akɔ wâmɛ.

Lakolembetshiya ɔnɛ dimɛmɛ lakakondja ekeketshelo k’oshika lo daka dimɔtshi dia lo Bible dioleki alaka w’ana w’anto la fwa. Nde akayoyala la elongamelo l’ɔkɔngɔ wa dimi mbowadiɛ ɛtɛkɛta wa Yeso wele lo Joani 5:28, 29. Nde aketawɔ dia mbeka Bible ndo akamɛ monga la “ki ka [Nzambi], kuleki yimba tshe.” (Fil. 4:7) Mbala efula etena kekaso Bible kâmɛ, sho memalaka yema ko ndjaɛnaka oko anto wele lo andja w’oyoyo, talongola wakiso wa ngandji lo eolwelo.

Lɔsɛnɔ la mondo laki Lucía lakatotshikɛ sango dia pondjo mɛtɛ. Mbetawɔ kande kakasale dia nkumbo kaso kambɛ Nzambi kâmɛ ndo kakakeketsha yɛdikɔ yami ya tshikala nge lo mbetawɔ. Aha la tâmu, sho wanɛ tshɛ wakashisha wakiso wa ngandji wakoka mbolwama tekɔ mɛtɛ la randevu w’ohomba efula.

[Osato wa lo lɛkɛ 20]

Paradiso kakasange Lucía