Akambo wahombaso ndawɔ
“Nyu ana w’akhuha! Akanyewula dia ndawo kele kayayi?”—MAT. 3:7.
1. Naa bɛnyɛlɔ dimɔtshi di’oma lo Bible di’anto wakalawɔ?
KAKƆNA kakoyɛ lo yimba etena kokayɛ tshɛkɛta “ndawɔ”? Amɔtshi mbeyaka mbohɔ ɔlɔngɔlɔngɔ ɔmɔtshi w’olangala wakawelɛka Yɔsɛfu wakalawɔ wadi aki Pɔtifara lam’akandawotɛ dia vɔ sala dieyanelo dia mindo. (Etat. 39:7-12) Akina mbeyaka mbohɔ Akristo wakalawɔ oma la Jerusalɛma l’ɔnɔnyi 66 T.D. dia kitanyiya ɔhɛmwɛlɔ wa Yeso wata ɔnɛ: “Lam’ayunyena elui w’alimbi wambudinga Jerusalema, . . . wane wele la Judiya, kawulawo l’ekungu; wane weli l’atei a ngelu, kawumo.”—Luka 21:20, 21.
2, 3. a) Ɛtɛkɛta wakamia Joani Obatizanyi ewandji w’ɛtɛmwɛlɔ akawalembetshiyaka mɛtɛ? b) Ngande wakakeketsha Yeso ɔhɛmwɛlɔ wa ntondo waki Joani?
2 Bɛnyɛlɔ dioshidiso la diko ndo mendanaka la ndawɔ lo yoho ya mɛtɛ mɛtɛ. Ɛlɔ kɛnɛ, le Akristo wa mɛtɛ wele lo wedja suke la tshɛ wa l’andja, ekɔ ohomba efula dia vɔ ndawɔ lo yoho ya didjidji. Joani Obatizanyi akakambe la tshɛkɛta “ndawɔ” lo yoho shɔ. L’atei w’anto wakaye ndjenda Joani mbaki ndo ewandji w’ɛtɛmwɛlɔ w’ase Juda wakayaɔsaka vɔamɛ oko anto w’ɔlɔlɔ ndo waki kɔmɛnaka ohomba wa vɔ ndjatshumoya. Vɔ wakɔnyɔlaka anto k’anto wakabatizamaka dia mɛnya ndjatshumoya kawɔ. La dihonga tshɛ, Joani akɛnya anto dia ewandji w’ɛtɛmwɛlɔ waki la lɔkɛwɔ la dungi pende lo mbuta ate: “Nyu ana w’akhuha! Akanyewula dia ndawo kele kayayi? Nyoto elua uku ukadimudinyu etema.”—Mat. 3:7, 8.
3 Joani kɔtɛkɛtaka dia ndawɔ lo yoho ya mɛtɛ mɛtɛ. Nde akahɛmɔlaka anto lo dikambo dia elombwelo kayaye, mbuta ate lushi la nkɛlɛ, ndo nde akatɛ ewandji w’ɛtɛmwɛlɔ ɔnɛ dia vɔ pandɔ lo lushi lɔsɔ, vɔ wakahombe ntɔ elowa wakɛnyaka ndjâtshumoya kawɔ. L’ɔkɔngɔ diko, la dihonga tshɛ Yeso akânya ewandji w’ɛtɛmwɛlɔ wele lɔkɛwɔ lawɔ l’andjakanyi lakɛnya dia Diabolo mbaki shɛwɔ ka mɛtɛ. (Joa. 8:44) Lam’akandakeketshaka ɔhɛmwɛlɔ wa ntondo waki Joani, Yeso akawaelɛ “diuhu dia akhuha” ndo akawambola ɔnɛ: “Ukundi ayunyuhanda elumbwelu ka [Ngɛhɛna]?” (Mat. 23:33) Yeso akandalange mbuta lo kamba la tshɛkɛta “Ngɛhɛna”?
4. Kakɔna kakalange Yeso mbuta lo tɛkɛta dia ‘Ngɛhɛna’?
4 Ngɛhɛna aki lowenga lakikɔ l’andja wa mpele dia Jerusalɛma lɛnɛ akawatshumbaka diangɔ dia mindo ndo edo wa nyama. Yeso akakambe la Ngɛhɛna oko didjidji dia nyɔi ka pondjo. (Enda lɛkɛ 27.) Dimbola diakandoke lo dikambo dia ohandwelo w’oma lo Ngɛhɛna diakɛnyaka dia olui w’ewandji w’ɛtɛmwɛlɔ ɛsɔ wakakokaka ndjanyema pondjo.—Mat. 5:22, 29.
5. Lo ndjela ɔkɔndɔ w’ana w’anto, ngande wakakotshama ɔhɛmwɛlɔ wakasha Joani nde la Yeso?
5 Ewandji w’ɛtɛmwɛlɔ w’ase Juda wakanyomosala pɛkato nkina lo nsoya Yeso nde l’ambeki ande. L’ɔkɔngɔ diko, oko wakatadiɛnyisha Joani nde la Yeso, lushi la nkɛlɛ laki Nzambi lakaye. Lo yoho shɔ “kele kayayi” kakendanaka lo yoho ya lânde la ɛtshi ka nkɛtɛ ɔtɔi, mbuta ate Jerusalɛma la Judeya, lo yoho shɔ anto wakakokaka ndawɔ lo yoho ya mɛtɛ mɛtɛ. Nkɛlɛ kakaye etena kakalanyema Jerusalɛma la tɛmpɛlɔ kayɔ oma le alembe w’ase Rɔma lo 70 T.D. “Fono” kɛsɔ kakaleke asui tshɛ wakakomɛ Jerusalɛma ntondo. Anto efula wakadiakema kana wakatɔlama lo lɔhɔmbɔ. Dui sɔ mɛnyaka elanyelo koleki woke kakongɛ Akristo efula wa l’ɛlɔmɔ ndo anto wa l’ɛtɛmwɛlɔ ekina.—Mat. 24:21.
Nkɛlɛ kayaye kahombaso ndawɔ
6. Kakɔna kakatatɛ salema l’etshumanelo k’Akristo wa ntondo?
6 Amɔtshi l’atei w’Akristo wa ntondo wakakome waa apɔsta ndo wakakotola anto efula l’ɔkɔngɔ awɔ. (Etsha 20:29, 30) Etena kaki apɔstɔlɔ waki Yeso weke la lɔsɛnɔ, vɔ ‘wakashimbaka’ dia wetshelo wa waa apɔsta mbɔtɔ l’ɔtɛmwɛlɔ wa mɛtɛ, koko l’ɔkɔngɔ wa nyɔi kawɔ, tato t’ɛtɛmwɛlɔ efula takayala. Ɛlɔ kɛnɛ, nkama y’ɛtɛmwɛlɔ walɔshana lam’asawɔ wekɔ lo Lokristokristo. Bible kakatewoyisha wɛnamelo w’ewandji w’ɛtɛmwɛlɔ wa lo Lokristokristo lo mbaelɛ vɔ tshɛ ɔnɛ: ‘Ɔmɔnyɔdi w’ɛlɛmbɛ’ ndo ‘ɔna l’elanyelo layolanyema oma le Nkumadiɔndjɔ Yeso ndo layoshilama oshiki lo wôngelo ande.’—2 Tes. 2:3, 6-8.
7. Lande na kele kokaka mɛtɛ dia ewandji w’ɛtɛmwɛlɔ wa lo Lokristokristo mbelamɛ ɔnɛ ‘ɔmɔnyɔdi w’ɛlɛmbɛ’?
7 Ewandji w’ɛtɛmwɛlɔ wa lo Lokristokristo wekɔ ɔmɔnyɔdi w’ɛlɛmbɛ lo yoho yambowonganyiya miliyɔ y’anto lo keketsha wetshelo, nshi ya fɛtɛ y’ɛtɛmwɛlɔ ndo lɔkɛwɔ lahɔtɔnɛ la Bible. L’ɛnyɛlɔ k’ewandji w’ɛtɛmwɛlɔ wakânyema oma le Yeso, atɛmɔdi wa nshi nyɛ wele etenyi kɛmɔtshi ka ‘ɔna l’elanyelo’ wekɔ lo kongɛ nyɔi kele kema l’elongamelo ka eolwelo. (2 Tes. 1:6-9) Ko lâsɔ, kakɔna kakongɛ anto wambonganyiyama oma le ewandji w’ɛtɛmwɛlɔ wa lo Lokristokristo ndo w’ɛtɛmwɛlɔ ekina wa kashi? Dia kadimola dimbola sɔ, nyɛsɔ tɔsɛdingole akambo wakasalema l’ɔkɔngɔ w’elanyelo ka ntondo ka Jerusalɛma lo 607 N.T.D.
“Nyulawo uma la Babilona”
8, 9. a) Losango la prɔfɛsiya lakɔna laki la Jeremiya otsha le ase Juda waki lo lɔhɔmbɔ la Babilɔna? b) L’ɔkɔngɔ w’ase Mediya l’ase Pɛrɛsiya nɛndja Babilɔna, lo woho akɔna wakakoke anto ndawɔ?
8 Ɔprɔfɛta Jeremiya akatewoyisha elanyelo ka Jerusalɛma kakayala lo 607 N.T.D. Nde akate ɔnɛ ekambi waki Nzambi wayɔtɔlama lo lɔhɔmbɔ ndo wayoyokalola lo nkɛtɛ yawɔ ya lôtɔ l’ɔkɔngɔ wa “deku akumi esambeli.” (Jer. 29:4, 10) Jeremiya aki la losango l’ohomba efula la mbewoya ase Juda waki la Babilɔna, mbuta ate takawahombe ndjadja mindo la ɛtɛmwɛlɔ wa kashi wa la Babilɔna. Lo yoho shɔ mbakawahombe monga suke dia kalola la Jerusalɛma dia tolola ɔtɛmwɛlɔ wa pudipudi lo etena kakasɔnɔla Jehowa. Dui sɔ diakasalema yema tshitshɛ l’ɔkɔngɔ w’ase Mediya ndo ase Pɛrɛsiya nɛndja Babilɔna lo 539 N.T.D. Kurɔ II laki nkumekanga k’ase Pɛrɛsiya, akadjangɛ ase Juda dia vɔ kalola dia nyomotohika tɛmpɛlɔ ka la Jerusalɛma.—Ez. 1:1-4.
9 Nunu di’ase Juda wakakambe la diaaso sɔ ko wakakalola. (Ez. 2:64-67) Lo sala ngasɔ, vɔ wakakotsha didjango dia prɔfɛsiya diaki Jeremiya diakâlɔmbaka dia ndawɔ lo yoho mɔtshi lo ntshɔ otsha lo lɛkɛ lokina. (Adia Jeremiya 51:6, 45, 50.) Awui amɔtshi kombisha ase Juda tshɛ diaaso dia vɔ munda lɔkɛndɔ l’otale dia kalola otsha la Jerusalɛma ndo la Juda. Wanɛ wakatshikala la Babilɔna, ɛnyɛlɔ oko ɔprɔfɛta w’osombe Danyɛlɛ, wakakokaka tshɔkwama oma le Nzambi naka vɔ sukɛ ɔtɛmwɛlɔ wa mɛtɛ waki la Jerusalɛma l’otema ɔtɔi ndo ndjâkakitola la ɔtɛmwɛlɔ wa kashi wa la Babilɔna.
10. “Akambu wa ndjetete” akɔna wele “Babilona ka Wuki” l’onongo awɔ?
10 Ɛlɔ kɛnɛ, miliyara y’anto wekɔ lo weho efula w’ɛtɛmwɛlɔ wa kashi wakatatɛ la Babilɔna k’edjedja. (Etat. 11:6-9) Lo tshɛ kawɔ, ɛtɛmwɛlɔ ɛsɔ mbelamɛka ɔnɛ “Babilona ka Wuki, nyangu amantu wa luseka la akambu wa ndjetete wa la kete.” (Eny. 17:5) Ɛtɛmwɛlɔ wa kashi wekɔ lo sukɛ ewandji wa pɔlitikɛ wa l’andja ɔnɛ lo edja tshɛ k’ɔkɔndɔ w’ana w’anto. L’atei “w’akambu wa ndjetete” wetɔ l’onongo mbatanema ndo ata efula wakayokonyaka dia miliyɔ nkama y’anto ‘ndjakema la nkɛtɛ.’ (Eny. 18:4) “Akambu wa ndjetete” akina mendanaka la dieyanelo dia la wolo diasala epalanga l’ana w’akɛnda ndo weho ekina wa dieyanelo dia mindo diasala ewandji w’ɛtɛmwɛlɔ ndo dietawɔma oma le ewandji akɔ. Ndoko tâmu dia Jehowa ayanga mbɛdia nkɛtɛ kɛnɛ lo minya ɛtɛmwɛlɔ wa kashi tshɛ.—Eny. 18:8.
11. Ɔkɛndɛ akɔna wele l’Akristo wa mɛtɛ edja ndo lam’ayolanyema Babilɔna?
11 Akristo wa mɛtɛ weya dikambo sɔ pombaka mbewola anto wele l’atei wa Babilɔna ka Woke. Yoho mɔtshi yakokawɔ sala dikambo sɔ ele lo kahanya Bible ndo abuku wakilembetshiya watondja ‘ɔhɔmbɔ wa kɔlamelo ndo wa kɛsɔ,’ wakasɔnama oma le Yeso dia mbisha ‘mbo ya ndɛ ya lo nyuma lo tena diayɔ.’ (Mat. 24:45) Etena kayasha anto lo losango la lo Bible, tɛdikɔ mbɔsamaka dia ndjâkimanyiya oma lo wekelo wa Bible. Diɛsɛ ko, vɔ wayɛna ohomba wa ‘ndawɔ oma l’atei wa Babilɔna’ kam’eke etena.—Eny. 18:4.
Tolawɔ ɔtɛmwɛlɔ wa dikishi
12. Ngande wɔsa Nzambi ɔtɛmwɛlɔ w’esato ndo wa dikishi?
12 Etshelo kekina ka nyɛtɛtɛ kambekɔnɛ l’atei wa Babilɔna ka Woke ele ɔtɛmwɛlɔ w’esato ndo wa dikishi. Nzambi mbelɛka ɔtɛmwɛlɔ ɔsɔ ɔnɛ “akambu wa wononyi” ndo “dikishi.” (Euh. 29:17) Wanɛ tshɛ walanga ngɛnyangɛnya Nzambi pombaka mbewɔ ɔtɛmwɛlɔ wa dikishi, lo ndjela kɛnɛ kata Nzambi ɔnɛ: “Dimi keli [Jehowa]. Oso keli lukumbu lami. Dimi halakimo lutumbu lami le ukina, kana nemo diami le dikishi.”—Is. 42:8.
13. Naa weho w’ɔkɔmiya woshɛmi wahombaso ndawɔ?
13 Ɔtɛkɛta waki Nzambi mɛnyaka weho ekina woshɛmi w’ɔtɛmwɛlɔ wa dikishi. Ɛnyɛlɔ, vɔ mbelɛka ɔkɔmiya ɔnɛ “otemwelo wa dikishi.” (Kol. 3:5) Nkɔmiya nembetshiyaka monga la nsaki k’ɛngɔ kosekɛmi, ɛnyɛlɔ diangɔ diaki onto okina. (Etum. 20:17) Ondjelo wakayokomaka Satana Diabolo akatshike dia nsaki k’ɔkɔmiya ka monga oko Nkum’Olongo ndo tɛmɔma pama l’otema ande. (Luka 4:5-7) Dui sɔ diakokonya dia tɔmbɔkwɛ Jehowa ndo dia konya Eva dia kɔmiya ɛngɔ kɛmɔtshi kakasekɛ Nzambi. Lo yoho mɔtshi, Adama nde lawɔ akakɔ l’ɔtɛmwɛlɔ wa dikishi lo mbetawɔ dia lɔngɛnyi lasande la wadɛnde mbeta lo dihole dia ntondo lo dihole dia nde kitanyiya She ka ngandji kele l’olongo. Koko wanɛ tshɛ walanga ndawɔ lushi la nkɛlɛ laki Nzambi pombaka mbômamema paka ndamɛ oto ndo shika ekolo la ntondo ka weho ɛsɔ tshɛ w’ɔkɔmiya.
“Nyulawo munanyi”
14-16. a) Lande na kaki Yɔsɛfu ɛnyɛlɔ k’ɔlɔlɔ l’awui wendana la lɔkɛwɔ? b) Ahombaso sala naka tamboka nsaki ya dieyanelo ya mindo? c) Ngande wakokaso tondoya dia ndawɔ monanyi?
14 Adia 1 Koreto 6:18. Etena kakahembe wadi aki Pɔtifara dia kɔsha Yɔsɛfu, nde akalawɔ lo yoho ya mɛtɛ mɛtɛ. Ande ɛnyɛlɔ ka dimɛna kakandatshikɛ Akristo w’enyemba ndo wambotshukana lee! Mbokɛmaka hwe dia nkum’otema kaki Yɔsɛfu kakekiyama ntondo la tokanyi taki Nzambi lo dikambo dia dieyanelo dia mindo. Naka sho nangaka kitanyiya didjango dia ‘ndawɔ monanyi,’ kete tayewɔ akambo wakoka memula nsaki ya dieyanelo otsha le onto tshɛ lele bu olonganyi aso. Bible totɛka ɔnɛ: “Nyudiaki akambu wa kolo wa la kete; munanyi, akambu wa mindu, saki ka dimba, lulangu la kolo, okomiya, weli otemwelo wa dikishi. Dia akambu ane, kele ka [Nzambi] atuyakaka le akanga w’uhedia.”—Kol. 3:5, 6.
15 Teye dia ‘nkɛlɛ ka Nzambi kekɔ lo ndjaye.’ Anto efula wa l’andja ɔnɛ mongaka la nsaki ya mindo ya dieyanelo ndo vɔ ndjɔkɔka lo nsaki yakɔ. Diakɔ diahombaso sho Akristo nɔmbaka Nzambi ekimanyielo ndo nyuma kande k’ekila diaha nsaki ya mindo ya dieyanelo tahemɛ. Ndo nto, naka sho mbekaka Bible, mbɔtɔka lo nsanganya y’Akristo ndo sambishaka asekaso anto lokumu l’ɔlɔlɔ, kete dui sɔ diayotokimanyiya dia ‘tetemala kɛndakɛnda la nyuma.’ Lo sala ngasɔ ‘mbahatatɔkɔ lo nsaki ya demba.’—Ngal. 5:16.
16 Lo mɛtɛ, naka sho menda esato wɛnyawɔ anto etakataka, kete ‘hatotɔkɛndakɛnda la nyuma.’ Woho akɔ wâmɛ mbele, Okristo tshɛ pombaka ndjalama diaha mbadia, menda kana mpokamɛ akambo tshɛ wemula nsaki ya dieyanelo. Ndo nto, ekɔ kɔlɔ dia “ekilami” waki Nzambi sala shɛkɛsɛkɛ l’akambo asɔ kana mbasawolaka lam’asawɔ. (Ef. 5:3, 4) Lo yoho shɔ mbayotɛnya Shɛso ka ngandji ɔnɛ sho nangaka pandɔ lo nkɛlɛ kande kayaye ndo nsɛna l’andja w’oyoyo wa losembwe.
Tolawɔ “saki ka ukundji”
17, 18. Lande na kahombaso ndawɔ “saki ka ukundji”?
17 Lo mukanda wa ntondo wakandafundɛ Timɔtɛ, Paulo akatɔtɔmiya atɔndɔ wahomba nɔmbɔla ɛhɔmbɔ w’Akristo, wele ondo amɔtshi l’atei awɔ wakalongamɛka dia kondja wahɔ wa l’emunyi l’ɔtɛ wele ewandji awɔ wakikɔ Akristo. Ondo akina wakahembe dia kamba la diangɔ di’ekila dikambo dia wahɔ awɔ wa lokaki. Paulo akawaewola diaha vɔ ‘kanyiya ɔnɛ omamemelo wa Nzambi wekɔ dikambo dia wahɔ wa l’emunyi.’ Kiɔkɔ ya dikambo sɔ mbeyaka monga “saki ka ukundji” kakoka monga la shɛngiya ya kɔlɔ le anto tshɛ, oyadi akanga w’ɛngɔnyi kana ase wola.—1 Tim. 6:1, 2, 5, 9, 10.
18 Onde wɛ kokaka kanyiya bɛnyɛlɔ dia lo Bible di’anto wele diɔtɔnganelo diasawɔ la Nzambi diakalana oma lo “saki ka ukundji” kana ngandji ka diangɔ diele bu ohomba diakawakokaka somba la falanga? (Jas. 7:11, 21; 2 Khum. 5:20, 25-27) Paulo akakeketsha Timɔtɛ ate: ‘Kele wɛ, onto a Nzambi, olawɔ akambo anɛ. Oyele losembwe, omamemelo wa Nzambi, mbetawɔ, ngandji, ekikelo la memakana.’ (1 Tim. 6:11) Ekɔ ohomba dia wanɛ tshɛ walanga ndjohandɔ lo lushi la nkɛlɛ layaye kitanyiya dako sɔ.
“Ulawo saki ya kolo y’elongo w’apami”
19. Ɛlɔngɔlɔngɔ la esekaseka tshɛ wekɔ l’ohomba wa na?
19 Adia Tukedi 22:15. Akambo w’enginya wele l’otema waki ɔlɔngɔlɔngɔ kana osekaseka kokaka mbotakoya mboka esadi eto. Dui diakoka mbakimanyiya dia ndɔshana la wɔ ele ohokwelo w’oma lo Bible. Ɛlɔngɔlɔngɔ la esekaseka efula w’Akristo wele ambutshi awɔ bu Ɛmɛnyi wa Jehowa nyangaka ndo kambaka la atɔndɔ wa lo Bible. Akina kondjaka wahɔ oma lo alako wa lomba w’Akristo wambotshunda lo nyuma wele l’etshumanelo. Oyadi onto akɔna tshɛ lanyosha alako wotombi oma lo Bible, naka nyu mbaetawɔ, kete nyayokondja ɔngɛnɔngɛnɔ oma ko kakianɛ ndo lo nshi yayaye.—Heb. 12:8-11.
20. Ngande wakoka ɛlɔngɔlɔngɔ la esekaseka kondja ekimanyielo dia ndawɔ nsaki ya kɔlɔ?
20 Adia 2 Timote 2:20-22. Ɛlɔngɔlɔngɔ la esekaseka efula wakiwɔ kompokola dimɛna wakakɔ l’akambo efula wa kɔlɔ, ɛnyɛlɔ oko lo yimba ya shɛmanedi, ɔkɔmiya, monanyi, ngandji ka falanga ndo l’oweso w’ɛngɛnɔngɛnɔ. Vɔ kɛnɛmɔlaka “saki ya kolo y’elongo w’apami” yatokeketsha Bible dia ndawɔ. Dia ɔlɔngɔlɔngɔ kana osekaseka w’Okristo ndawɔ akambo asɔ, nde pombaka ndjalama oma lo tɔsɛngiya ta kɔlɔ, oyadi dihole diakokande pomana la tɔ. Kɛnɛ koleki ohomba ele dako diaki Nzambi dialɔmba dia ndjela waonga waki Nzambi “kame l’antu weta lukumbu la Khumadiondjo uma l’utema wa pudipudi.”
21. Daka dia diambo diakɔna diakasha Yeso Kristo lo kɛnɛ kendana l’ambeki ande wafɔna l’ɛkɔkɔ?
21 Oyadi tekɔ ɛlɔngɔlɔngɔ, esekaseka kana epalanga, tona dia mpokamɛ anto wahemba dia tonganyiya mɛnyaka dia sho nangaka mbadiema l’atei w’ambeki waki Yeso wafɔna la ɛkɔkɔ ‘walawɔ dui dia anto akina.’ (Joa. 10:5) Koko, dia sho pandɔ lushi la nkɛlɛ laki Nzambi, sho pombaka sala akambo akina lâdiko dia ndawɔ akambo wa kɔlɔ. Sho pombaka nto ndjela waonga w’ɛlɔlɔ. Sawo diayela diayɔsɛdingola waonga esambele wa l’atei awɔ. Tekɔ l’ɛkɔkɔ w’eshika watotshutshuya dia nyomoleka mbasɛdingola nɛ dia Yeso ekɔ lo mbisha daka dia diambo nɛ lo mbuta ate: “Dimi mbashaka [ɛkɔkɔ ami] lumu la pundju. Vo hawuvo pundju. Nduku untu ayuwahotola uma lu lunya lami.”—Joa. 10:28.
Ngande wayoyokadimola?
• Ɔhɛmwɛlɔ akɔna wakasha Yeso ewandji w’ɛtɛmwɛlɔ?
• Wâle akɔna wele la ntondo ka miliyɔ y’anto ɛlɔ kɛnɛ?
• Weho akɔna w’ɛtɛmwɛlɔ wa dikishi woshɛmi wahombaso ndawɔ?
[Esato wa lo lɛkɛ 8, 9]
Kakɔna kakoyɛ lo yimba etena kokayɛ tshɛkɛta “ndawɔ”?