Ambola w’oma le ambadi

Ɔpɔstɔlɔ Paulo akate dia ‘Isariyɛlɛ tshɛ wayoshimbamɛ.’ (Romo 11:26) Onde lâsɔ nde akalange mbuta ɔnɛ ase Juda wakahombe koma Akristo?

Ndoko, aha kɛsɔ mbakalange Paulo mbuta. Oko wodja, tokanula ta lôtɔ taki Abarahama wakatone dia mbɔsa Yeso oko Mɛsiya. Ndo l’ɔnɔnyi wakayelana la nyɔi ka Yeso, akɛnama hwe diaha ase Juda lo tshɛ mbakakoke koma Akristo. Koko ɛtɛkɛta waki Paulo w’ɔnɛ ‘Isariyɛlɛ tshɛ wayoshimbamɛ’ waki mɛtɛ. Lo woho akɔna?

Yeso akatɛ ewandji w’ɛtɛmwɛlɔ wa lo nshi yande ate: “Wayunyokosola diulelu dia [Nzambi], ku wayudisha wudja watotokaka elua adio.” (Mat. 21:43) Lam’ele wodja w’Isariyɛlɛ w’otondo wakatone Yeso, Jehowa akahombe kotola yambalo yande otsha le wodja w’oyoyo, mbuta ate wodja ɔmɔtshi wa lo nyuma. Paulo akelɛ wodja ɔsɔ ɔnɛ ‘Isariyɛlɛ waki Nzambi.’​—Ngal. 6:16.

Avɛsa akina wa l’Afundelo w’Akristo wa lo Grɛkɛ mɛnyaka dia ‘Isariyɛlɛ waki Nzambi’ kengama l’Akristo w’akitami 144 000. (Romo 8:15-17; Eny. 7:4) Enyelo 5:9, 10 shikikɛka ɔnɛ ndo ase Wedja mbatanema l’olui ɔsɔ. Ndo divɛsa sɔ mɛnyaka ɔnɛ Akristo w’akitami ndja ‘oma lo waoho tshɛ ndo ɛtɛkɛta tshɛ ndo oma lo weho tshɛ.’ Anto wa l’Isariyɛlɛ wa lo nyuma ɔsɔ wakasɔnama lo yoho ya lânde dia monga “diulelu la elombedi; . . . vo wayulela la kete.” Kânga mbele Jehowa akakadja Isariyɛlɛ oko wodja wakasɔnama, anto amɔtshi wakakokaka mbetawɔma le nde. Ngasɔ mbakidiɔ lo dikambo di’apɔstɔlɔ ndo di’Akristo efula wa lo ntambe ka ntondo. Lo mɛtɛ, lo ɛnyɛlɔ k’anto akina tshɛ, ase Juda asɔ wakahombe sombama la dikila diaki Yeso Kristo.​—1 Tim. 2:5, 6; Heb. 2:9; 1 Pet. 1:17-19.

Woho wakashisha efula k’ase Juda wa lo demba wa lo ntambe ka ntondo diɛsɛ dia tolɛ kâmɛ la Yeso Kristo koshimba dia sangwelo diaki Nzambi kotshama. Dikambo sɔ kokoka salema pondjo, nɛ dia Jehowa akate lo tshimbo y’omvutshi ande ate: “Osoku mbatuyalaka diui diatutumbaka uma l’unyo ami: dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”​—Is. 55:11.

Dikambo sɔ diekɔ mɛtɛ lo kɛnɛ kendana la sangwelo diaki Nzambi dia mbahenya anto 144 000 l’okudi kâmɛ l’Ɔnande la l’olongo. Bible nembetshiyaka hwe dia Nzambi ayɔsɔna lofulo la tshɛ l’anto 144 000. Ndoko ɔtɔi wa l’atei awɔ lahodɛ l’olongo!​—Eny. 14:1-5.

Ɔnkɔnɛ, etena kakafunde Paulo ɔnɛ ‘Isariyɛlɛ wayoshimbamɛ,’ nde konangaka mbuta ɔnɛ ase Juda tshɛ wayokoma Akristo. Koko nde akalange mbuta ɔnɛ sangwelo diaki Nzambi di’ɔnɛ ase Isariyɛlɛ wa lo nyuma anto 144 000 wayolɛ kâmɛ la Yeso Kristo y’Ɔnande l’olongo diayokotshama. Lo etena kakashikikɛ Nzambi, lofulo la tshɛ, mbuta ate “Isariyele tshe” wayoshimbamɛ ko wayolɛ oko nkumi ya dikanga ndo ɛlɔmbɛdi lo Diolelo diaki Mɛsiya.​—Ef. 2:8.

[Esato wa lo lɛkɛ 28]

Akitami ndja ‘oma lo waoho tshɛ ndo ɛtɛkɛta tshɛ ndo oma lo weho tshɛ’