Wetshelo wakondjaso oma le Yeso
Lo kɛnɛ kendana la woho wa salɛ anto akina akambo
Lande na kahombaso monga la ngandji?
Onde wɛ mbokaka ngandji kânga etena kahakoke anto akina ngandji? Naka sho nangaka mbokoya Yeso, kete sho pombaka mboka ndo anto watohetsha ngandji. Yeso akate ate: “Naka nyu nyatukaka wane watunyukaka ngandji ngandji nyu la lusaka lakona? Ndu antu wa kolo watutshaka wuhu ako. . . . Nyuki atunyi anyu ngandji . . . , nyayuyala ana wa Khum’ulungu; ne dia ndi eko la memakana le wane wahuki lusaka ndu le antu wa kolo.”—Luka 6:32-36; 10:25-37.
Lande na kahombaso dimanyiyanaka?
Etena kasalaso munga, sho nangaka dia Nzambi todimanyiya. Yeso aketsha dia ekɔ dimɛna dia sho nɔmbaka Nzambi dia nde todimanyiya. (Mateu 6:12) Koko, Yeso akate nto dia Nzambi ayotodimanyiya paka naka sho dimanyiyaka anto akina. Nde akate ate: “Naka nyu nyambudimanyia antu kolo yawo, ndu Shenyu leli l’ulungu ayunyudimanyia. Keli naka nyu hanyudimanyia antu kolo yawo, keti ndu Shenyu leli l’ulungu hunyudimanyia kolo yanyu.”—Mateu 6:14, 15.
Ngande wakoka nkumbo monga l’ɔngɛnɔngɛnɔ?
Kânga mbaki Yeso kotshuka, sho kokaka kondja wetshelo efula oma le nde dia nkumbo monga l’ɔngɛnɔngɛnɔ. Oma lo ɛtɛkɛta ndo lo etsha ande, nde akatotshikɛ ɛnyɛlɔ ka sho mbokoya. Tɔsɛdingole akambo asato wayela anɛ:
1. Omi pombaka nanga wadiɛnde oko wayalangande. Yeso akatshikɛ waomi ɛnyɛlɔ. Nde akatɛ ambeki ande ate: “Olembe w’uyuyu mbamumunyusha, dia nyu mbukana ngandji.” Polo lo yɛdikɔ yakɔna? Nde akate ate: “Uku akamanyuki ngandji.” (Joani 13:34) Lo kamba la tɔndɔ sɔ le waomi, Bible mbutaka ɔnɛ: “Nyu waumi, nyulangi wadienyu, uku akalangi Kristu ekelizia, akandayakimo dikambu diato. Okone ntu, dieli la waumi mbuka wadiewo ngandji uku wukawo alimba awo. Untu luka wadendi ngandji, ambuyauka ndame. Nduku untu lahetsha dimba diandi, keli ndi atudileshaka, atudilamaka, uku Kristu la ekelizia.”—Efeso 5:25, 28, 29.
2. Atshukanyi pombaka monga la kɔlamelo lam’asawɔ. Dieyanelo dia l’andja wa diwala ekɔ pɛkato otsha le Nzambi ndo ndanyaka nkumbo. Yeso akate ate: “Nyu nyatali nyati: . . . Dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi? Okone vo kema antu ahendi ntu, wambuyala untu otoi. Untu tamamitulaki kene kakamamanya [Nzambi]. . . . Dimi lambunyutela nti: Untu tshe layukimo wadendi, naka aha lu dikambu dia luseka, ku ndi ntshuka ukina, ndi ambunana.”—Mateu 19:4-9.
3. Ana pombaka kitanyiya ambutshi awɔ. Kânga mbaki Yeso onto la kokele ndo ambutshi ande komonga anto wa kokele, nde akâkitanyiyaka etena kakinde ɔna. Bible mbutaka dia etena kaki Yeso l’ɛnɔnyi 12, “ndi akatshu la wo [ambutshi ande], akakumi la Nazareta; akakitanyiaka aui awo.”—Luka 2:51; Efeso 6:1-3.
Lande na kahombaso kamba la atɔndɔ asɔ?
Lo kɛnɛ kendana la wetshelo wakandasha ambeki ande, Yeso akate ate: “Naka nyu mbeyaka akambu ane, nyu nyayuyala la otshoko lam’ayunyuwatsha.” (Joani 13:17) Dia monga Akristo wa mɛtɛ, sho pombaka kamba la dako diakatosha Yeso lo kɛnɛ kendana la woho wa salɛ anto akina akambo. Nde akate ate: “Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.”—Joani 13:35.
Dia mbeya awui akina efula, enda tshapita 14 ya dibuku Bible etshatɔ mɛtɛ?a
[Nɔte ka l’ɛse ka dikatshi]
a Diakatondjama oma le Ɛmɛnyi wa Jehowa.
[Osato wa lo lɛkɛ 16, 17]
Wɛɛla waki Yeso wa ɔna kanga lotshito tetshaka ohomba wa monga la lɔsɛngɔ ndo dimanyiyanaka.—Luka 15:11-32
[Osato wa lo lɛkɛ 17]
Atshukanyi pombaka monga la kɔlamelo lam’asawɔ