Onde wɛ âkohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka kadimola lo ambola wayela anɛ:
• Lande na kele ekɔ ohomba efula sho nama olowanyi aso w’Okristo?
Nama olowanyi aso mɛnyaka dia sho mbetawɔka lowandji laki Jehowa oma lo ngandji kawokaso ndo dui sɔ tokimanyiyaka dia sho mɛnya ɔnɛ Satana ekɔ kanga kashi. Ndo nto, oma lo olowanyi aso mbayotokoka nomboshama oma le Nzambi ndo vɔ wekɔ ohomba efula lo kɛnɛ kendana la elongamelo kaso ka nshi yayaye.—12/15, lɛkɛ 4-6.
• Naa titrɛ mɔtshi yɛnya ɔkɛndɛ wa lânde wele la Yeso lo sangwelo diaki Nzambi?
Ɔna ɛtɔi lakotama. Dui. Amen. Ompakemi wa sheke y’oyoyo. Ɔlɔmbɛdi a Lâdiko. Kanula yakalakema.—12/15, lɛkɛ 15.
• Lande na kakalɔmbɛ Elidja okambi ande dia nde mendaka otsha lo ndjale ka woke etena kakandalɔmbaka dia mvula ndɔ? (1 Khum. 18:43-45)
Elidja akeyaka kɛnɛ kakasalemaka dia mvula ndɔ. Nde akeyaka ɔnɛ wange wakakokaka kengama lâdiko dia ndjale ya wake ko lɔpɛpɛ mbatɔla lɛnɛ akawakokaka tɔlɔsha mvula.—4/1, lɛkɛ 23-24.
• Ngande wakokaso fudia ɔngɛnɔngɛnɔ wonga la so l’olimu aso w’esambishelo?
Sho kokaka nɔngɔsɔla etema aso lo ndjasha lo woho wakokaso kimanyiya anto akina. Sho kokaka sambisha la oyango wa tatɛ mbeka la anto Bible. Naka tambohomana la anto wele la wendjodi, sho kokaka tshikitanya mbɔtwɛlɔ kaso ndo mbuta dikambo dimɔtshi diayɔngɛnyangɛnya anto wa lo ɛtshi kaso ka nkɛtɛ.—1/15, lɛkɛ 8-10.
• Lande na kahomba pudipudi monga ohomba lo nsɛnɔ y’Akristo wa mɛtɛ tshɛ?
Ɔprɔfɛta Isaya akafunde dia ɛnɛlɔ kakandɛnyi andjelo wata lo dikambo dia Otungi ɔnɛ: “Ekila, ekila, ekila.” (Is. 6:3) Ɛtɛkɛta ɛsɔ mbikaka epole ɔsɛkɛ lo woho wele Nzambi pudipudi lo yoho yoleki tshɛ. Oko wediɔ ngasɔ, Nzambi nɔmbaka dia ekambi ande tshɛ monga ekila ndo pudipudi. Nde mbatɛka ate: “Nyuyali ekila, ne dia dimi leko ekila.” (1 Pet. 1:16)—1/1, lɛkɛ 26.
• Shɛngiya yakɔna yahomba monga la wetshelo wa lo Bible lo dionga di’Okristo ndo lo mbekelo yendana la okundelo?
Kânga mbakoka Okristo ndela wakinde wambovɔ, nde mbeyaka dia wanɛ wambovɔ haweye ndoko dikambo. Oyadi anto wele kema ambetawudi wayowɔnyɔla, nde mbewɔka mbekelo yɔtɔnɛ la dietawɔ di’ɔnɛ onto lambovɔ kokaka monga la shɛngiya le wanɛ wakasɛnɛ. Dia mbewɔ ekakatanu, Akristo amɔtshi fundaka lofunda kɛnɛ kalangawɔ anto ndjosala lo kɛnɛ kendana la okundelo awɔ naka vɔ wambovɔ.—2/15, lɛkɛ 29-31.
• Ngande walongola Jehowa wolo oma le atɛmɔdi ande?
Oko wakatatongama lo efanelo ka Nzambi, tekɔ la waonga amɔtshi waki Nzambi, ɛnyɛlɔ oko nkudu. (Etat. 1:27) Naka sho mandolaka kɛnɛ kambotosalɛ Otungi aso, kete tayotshutshuyama dia kamba la wolo aso dia mbɔlɛmiya ndo mbotombola. Lo dihole dia kamba la wolo aso dia tɔla wahɔ aso hita otsha la ntondo, sho mɛnaka dia Jehowa Nzambi mbakoka dia nongola nkudu tshɛ kele la so etena kokambɛso.—Mako 12:30.—1/1, lɛkɛ 27.
• Onde “buku dia Jashara” ndo “buku di’Ata wa [Jehowa]” wekɔ abuku wa lo Bible wakayoshishɔka? (Jas. 10:13; Wal. 21:14)
Kema. Mɛnamaka dia vɔ waki abuku waki kosambiyama wakikɔ lo nshi yakafundamaka Bible ndo afundji wa Bible wakakambaka la wɔ.—3/15, lɛkɛ 32.
• Ombutshi wa pami w’ɔlɔlɔ mbeyaka dia anande wekɔ la ehomba akɔna?
Ana wekɔ l’ohomba wa: 1) shɛwɔ mbaoka ngandji, 2) ɛnyɛlɔ k’ɔlɔlɔ, 3) dihole di’ɔngɛnɔngɛnɔ, 4) mbetshama awui wa lo nyuma, 5) ohokwelo ndo 6) ekokelo.—1/1, lɛkɛ 11-13.