Bible tshikitanyaka nsɛnɔ y’anto
KAKƆNA kakatshutshuya osekaseka ɔmɔtshi wakatshike dia nsɛna lo yoho yɔtɔnɛ l’awui w’ɔtɛmwɛlɔ wakandetshama oma ko dikɛnda diande dia ndjɔsɛna lo yoho yɔtɔnɛ la wetshelo akɔ? Adia kɛnɛ katande.
“Kakianɛ laya l’oyango wa shikaa lo lɔsɛnɔ.”—LISA ANDRÉ
ƆNƆNYI WA LÔTƆ: 1986
WODJA WA LÔTƆ: LUXEMBOURG
ƆKƆNDƆ: ƆNA LA LOTSHITO
NSHI YAMI YAKETE: Lakole la Bertrange, osomba wa tshitshɛ wa pudipudi, waki la lotui tshitshi ndo w’ɔngɔnyi wele suke l’osomba wa Luxembourg. Dimi mbaki kose l’ana atanu wakatotɔ. Ambutshi ami wekɔ Ɛmɛnyi wa Jehowa ndo vɔ wakasale la wolo tshɛ dia tetsha ɛlɛmbɛ w’Akristo dimi la nondo diami di’apami ndo dia wamato.
Etena kakimi kodikotshaka ɛnɔnyi dikumi l’ɛmɔtshi, lakatatɛ mbidja tâmu efula lo kɛnɛ ketsha Ɛmɛnyi wa Jehowa. L’etatelo, dimi kombidja tâmu tɔsɔ yimba, koko yema yema mbetawɔ kami kakayɔla. Ambutshi ami wakasale kɛnɛ tshɛ kakawakoke nsala dia nɔmbɔlami lo mboka kosembwe, koko lakatone ekimanyiyelo kawɔ. Aha la vɔ mbeya, laketshaka wenya kâmɛ l’ɛlɔngɔlɔngɔ l’esekaseka waki kɔnɛmiyaka lowandji. Lakakombolaka monga la lotshungɔ lakɛnamaka oma lo yoho yawɔ ya lɔsɛnɔ. Takasalaka waa fɛtɛ, dieyanelo dia mindo ndo takanɔka dinɔnɔ dia wolo la wanu efula. L’etatelo, lakangɛnangɛnaka dia monga kâmɛ l’anto wakɛnamaka oko wekɔ l’ɔlɔ w’efula lo nsɛnɔ yawɔ.
Koko lo mɛtɛ, ɔsɔ komonga ɔngɛnɔngɛnɔ w’oshika. Lɔsɛnɔ la l’angɛnyi asɔ komonga l’oyango; ndoko onto lakayashaka dia kana yimba. Otshikitanyi la wɔ, lakayambolaka efula lo kɛnɛ kendana la woho wambofulanɛ akambo wele kema la losembwe l’andja. L’edjedja ka wonya, lakayodiɛnɛka l’ɔkɔmwɛlɔ w’efula.
WOHO WAKATSHIKITANYA BIBLE LƆSƐNƆ LAMI: Lushi lɔmɔtshi lam’akimi l’ɛnɔnyi 17, lakakɔmɔ efula. Lo menda lonyangu l’efula laki la mi, mama akambutɛ dia dimi nyomeka Bible nto. Nde akakeketsha dia dimi nsɛdingola kɛnɛ ketsha Bible ndo oma lâsɔ ko dimɛ ndjɔsa yɛdikɔ ya kana dimi nangaka nsɛna lo yoho yɔtɔnɛ la wetshelo wa lɔkɔ kana bu. Sawo sɔ diakananda otema ami ndo diakatshikitanya lɔsɛnɔ lami. Laketawɔ dia mbeka Bible dimi l’enondo ami la womoto Caroline nde l’omɛnde Akif. Nde kombodiama oko Ɔmɛnyi wa Jehowa koko akayokomaka Ɔmɛnyi wa Jehowa etena kakandakome opalanga. L’ɔtɛ w’akambo wakasale Akif la ntondo, lakɛnyi dia dimi kokaka mbohonwɛ akambo tshɛ, ndo dui sɔ diakakimanyiya mɛtɛ.
Lakeyaka dia yoho yami ya lɔsɛnɔ kɔmbɔtɔnɛka la l’Ɛmɛnyi wa Jehowa, koko l’etatelo lakɔsaka dia kɛnɛ kakamasalaka hendana ndoko l’onto. Koko, oma lo wekelo ami wa Bible, lakashihodia dia dionga diami diakanyangiyaka Jehowa. (Osambu 78:40, 41; Tukedi 27:11) Lakayoshihodiaka nto dia yoho yami ya lɔsɛnɔ yekɔ lo nyangiya ndo anto akina.
Etena kakamatetemala mbeka Bible, lakayɛnaka dia ekɔ ɛkɔkɔ wa shikaa ndo wetawɔma wa mbetawɔ ɔnɛ Bible ekɔ Ɔtɛkɛta wa Nzambi. Ɛnyɛlɔ, lakeke prɔfɛsiya efula ya lo Bible yakakotshama l’eshikikelo tshɛ. Ewo ka ngasɔ kakakimanyiya dia dimi minya tâmu tshɛ taki la mi.
Suke l’ɔnɔnyi ɔtɔi l’ɔkɔngɔ wa dimi ntatɛ mbeka Bible, lakatshu l’ambutshi ami dia tenda enondo ami la pami lakakambaka lo Bɛtɛlɛ k’Ɛmɛnyi wa Jehowa ka lo wodja wa Allemagne. Etena kakamɛnyi ɔngɛnɔngɛnɔ waki l’enondo ami la pami, dui sɔ diakananda otema ami wolo. Ɔngɛnɔngɛnɔ ɔsɔ mbaki mɛtɛ kɛnɛ kakamatayangaka. Lakanandema efula nto lo mɛna Ɛmɛnyi wa Jehowa ekina wakayakimɔ la lolango wakakambaka lɛkɔ. Vɔ wakatshikitana etale efula l’anto wele kema la losembwe wakekesanɛka la mi. Yema tshitshɛ l’ɔkɔngɔ diko, lakalɔmbɛ Jehowa oma k’ɛse otema, lo mbolaka dia layowokambɛ olimu lo nshi tshɛ ya lɔsɛnɔ lami yambotshikala. Etena kakimi l’ɛnɔnyi 19, lakayakimɔ le Jehowa lo nongola batismu.
WAHƆ WAMBOMOKONDJA: Kakianɛ laya l’oyango wa shikaa lo lɔsɛnɔ. Dimi mongaka l’ɔngɛnɔngɛnɔ etena ketshami anto akina Bible, lo mbâkimanyiya dia vɔ mbeka akambo wendana la Jehowa ndo l’alaka ande wa lo nshi yayaye. Nkumbo kami vɔ lawɔ wambokondja wahɔ nɛ dia waya bu nto la lonyangu lo dikambo diami.
Dimi mbohɔka kɔlɔ yakamasale, koko lekɔ lo nsala la wolo diaha ndeka mbidja yimba lɔkɔ. Dimi mbidjaka yimba efula lo edimanyielo ka Jehowa ndo lo woho wayashande la ngandji tshɛ le mi. Dimi mbetawɔka l’otema ɔtɔi ɛtɛkɛta wele lo Tukedi 10:22, wata ɔnɛ: “Otshoko wa [Jehowa] mbatongonyaka. Ndi hataheka lunyangu ladiku diawo.”
[Efundelo wa l’etei w’odingɔ wa lo lɛkɛ 10]
“Takasalaka waa fɛtɛ, dieyanelo dia mindo ndo takanɔka dinɔnɔ dia wolo la wanu efula”
[Efundelo wa l’etei w’odingɔ wa lo lɛkɛ 11]
“Dimi mbohɔka kɔlɔ yakamasale, koko lekɔ lo nsala la wolo diaha ndeka mbidja yimba lɔkɔ”