Nyetsha ananyu
Etena kahombaso nsungukala
AHA la tâmu, wɛ mbetawɔka ɔnɛ ekɔ ohomba nsungukala etena keyɛ la kalasa. Anto efula tolalaka djɔ la kalasa, koko wɛ pombaka nsungukala dia wɛ mbeka. Ondo ndo wɛ lawɔ mbatotshɔka lo nsanganya dia teka Bible.
Kakɔna kafɔnyayɛ kakoka kokimanyiya dia wɛ nsungukala?—a Dui dimɔtshi ele ndalaka esadi. Ndalaka yema l’ɔkɔngɔ wa midi ayokokimanyiya nto. Nyɛsɔ tênde wetshelo wakokaso nkondja oma lo kɛnɛ kakakomɛ ɔlɔngɔlɔngɔ ɔmɔtshi wakakɔ la djɔ etena kakashaka ɔpɔstɔlɔ Paulo sawo dimɔtshi polo la kati k’otsho. Adia lo Bible lo Etsha wa Atumami tshapita 20, divɛsa 7 polo 12, kele enda kɛnɛ kakatombe.
Paulo akatshu dia tembola etshumanelo kaki l’osomba wa Tɔrɔa suke la dibongo. Bible mbutaka ɔnɛ: “Paulu akasanguya munela lam’ayuhuto unya” lo mashuwa. Ɔnkɔnɛ, “ndi akatetemala nteketa edja ndu l’asa ndeki.” Sho mbadiaka ɔnɛ: “Olongo a pami omotshi, lukumbu landi Eutuko, akadjashi lu didishi, anyingonyingo la djo ya wulu. Lam’akatetemala Paulu nteketa.” Kakɔna kakatombe l’ɔkɔngɔ wa lâsɔ?—
Etukɔ akadjasɛ lo didishi ko “akako uma lu luudu la satu la ladiku.” Paulo nde l’anto akina wakalawɔ esadi esadi otsha lɛnɛ akandakɔ. Etukɔ akakɔ la nkɛtɛ ko akavu. Onde wɛ kokaka kanyiya lonyangu laki lawɔ vɔ tshɛ?— Bible mbutaka dia Paulo akɛmbɛ Etukɔ l’anya ande ndo akokumbatɛ. Kem’edja Paulo akade kioko y’ɔngɛnɔngɛnɔ ate: “Tanyudjaki lufungusu, ndi eki la lumu.” Nzambi akolola Etukɔ.
Wetshelo akɔna wakokaso nkondja oma lo kɛnɛ kakasalɛ Nzambi Etukɔ?— Wetshelo ɔmɔtshi ele Jehowa, Shɛso lele l’olongo kokaka mbolola anto wakavu mbidja ndo ɛlɔngɔlɔngɔ l’esekaseka. Jehowa keyaka dimɛna ndo kôkaka ngandji koleki kɛnɛ kakoka ambutshi ayɛ. Etena kaki Yeso lanɛ la nkɛtɛ, nde akɛnya woho wele She lo mɛmba ana w’akɛnda l’anya ande ko mbatshɔkɔla. Ndo nto nde akolola ɛlɔngɔlɔngɔ, mbidja ndo dikɛnda dia womoto diaki l’ɛnɔnyi 12.
Ngande wayaokayɛ lo mbeya dia Shɔ lele l’olongo kôkaka ngandji?— Dui sɔ totshutshuyaka dia sho lawɔ mboka Jehowa ngandji ndo nkitanyiya kɛnɛ katande. Onde wɛ mbeyaka kɛnɛ kakokaso nsala dia sho mɛnya ɔnɛ sho mbôkaka ngandji?— Yoho mɔtshi ele lo mbuta ɔnɛ sho mbolangaka. Yeso akate ate: “Dimi latulangaka Papa.” Koko Yeso akasale akambo efula lâdiko dia mbuta ɔnɛ nde nangaka Nzambi. Nde akɛnya dikambo sɔ oma lo kɛnɛ kakandasale.
Yeso akakitanyiya Nzambi. Nde akate ate: “Dimi latutshaka akambu watôngenyangenyaka nshi tshe.” Naka sho lawɔ nsala woho akɔ wâmɛ dia ngɛnyangɛnya Jehowa nde l’Ɔnande Yeso, kete tayosala la wolo dia nsungukala etena kahombaso nsala dui sɔ.
Adia lo Bible kayɛ
[Nɔte ka l’ɛse ka dikatshi]
a Naka wɛ ekɔ lo mbadiyɛ ɔna, kete shidi ndjo yayokokimanyiya dia wɛ memala yema ndo nkeketsha ɔna dia nde mbisha kanyi yande.