Onde wɛ aakohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
Ngande wakokaso mbewɔ ɛtɛkɛta wotondjatondja?
Ele lo nsɛdingola otema aso. Lo dihole dia sho mɔnyɔla anangɛso l’akadiyɛso, lande na kahatayange dia mbeya kɛnɛ katotshutshuya dia nsala ngasɔ? Onde tekɔ lo mbaɔnyɔla di’anto akina mbɔsa dia sho mbaleka ndo dia vɔ tɔsa dia sho mbele anto w’ɛlɔlɔ? Lo mɛtɛ, mɔnyɔla anto akina kokaka ndeka nkonya dikambo lo kɔlɔ.—8/15, lɛkɛ 21.
Akambo akɔna wayosalema yema tshitshɛ la ntondo k’ekomelo ndja?
Dui dimɔtshi ele, anto wayota ɔnɛ “wɔladi ndo lotui tshitshi” lamboyala. Wedja wayɔlɔsha ndo wayolanya Babilɔna ka Woke. Vɔ wayɔlɔsha ndo ekambi waki Nzambi. Oma laasɔ mbayotatɛ ta di’Aramangɛdɔna diayokonya dia Satana nde l’ɛdiɛngɛ ande mbidjama lo difuku diaha l’ekomelo.—9/15, lɛkɛ 4.
Wahɔ akɔna wakondjaso lo woho wahateye etena kayoya ekomelo?
Woho wahateye lushi kana wonya shikaa wayoya ekomelo tokimanyiyaka dia mbeya kɛnɛ kele l’etema aso. Kɛsɔ toshaka nto diaaso dia ngɛnyangɛnya otema waki Nzambi, tokeketshaka dia sho monga la yimba ya ndjahombia ndo ndeka ndjaɛkɛ le Nzambi ndo l’Ɔtɛkɛta ande Bible. Laadiko dia laasɔ, dui sɔ tokimanyiyaka dia sho mbetawɔ dia ekakatanu wa nshi nyɛ tolowanya.—9/15, lɛkɛ 24-25.
Ngande wayonya Nzambi akambo wa kɔlɔ wasoya anto?
Kem’edja, Nzambi ayanga mbela andja wa losembwe wele paka wanɛ woka asekawɔ anto la Nzambi ngandji mbayodjasɛ lɔkɔ (2 Pet. 3:13) Oko wende Nkumekanga ka lo Diolelo diaki Nzambi, Yeso ayonya akambo tshɛ wa kɔlɔ wasoya anto. (Iza. 33:24; Ɛny. 21:4)—10/1, lɛkɛ 7 (lo Falase).
Naa atɔndɔ amɔtshi wa lo Bible wakoka tokimanyiya dia mbeya kanyi yaki lo dikambo di’ɔnwɛlɔ a mfɔka?
Nzambi nangaka dia sho mbɔsa lɔsɛnɔ la nɛmɔ. (Eoh. 5:17) Nde nongamɛka dia sho mbooka ngandji ndo nanga wonyaso onto. (Makɔ 12:28-31) Nde tɔlɔmbaka dia sho mbewɔ mbekelo yadja onto mindo. (2 Kɔr. 7:1)—10/1, lɛkɛ 15.
Wahɔ akɔna wakondjaso lo monga la lɔsɛngɔ?
Lo salɛ asekaso anto akambo la lɔsɛngɔ, sho mɛnyaka dia sho mbeyaka Nzambi dimɛna, ndo dui sɔ toshaka ɔngɛnɔngɛnɔ efula. (1 Jni. 4:7; Mat. 5:7, 8.) Laadiko dia laasɔ, Jehowa ngɛnangɛnaka etena kɛnande tasalɛ anto akina akambo la lɔsɛngɔ. (Tok. 19:17)—10/1, lɛkɛ 20.
Ngande wadimanyiya ndo wohɛ Nzambi pɛkato y’anto wamboyatshumoya?
Jehowa mbutaka ɛtɛkɛta ɛnɛ lo dikambo diawɔ ate: “Handjuho kolo [y]awo ntu.” (Jɛr. 31:34) Nde kokaka mbadimanyiya oma lo tshimbo y’olambo wa tshungo waki Yeso. Etena kadimanyiyande, Nzambi mbohɛka pɛkato yakɔ lo woho ɔnɛ wele nde howasha dilanya nto l’ɔtɛ wa pɛkato yakɔ.—10/1, lɛkɛ 32.
Waa na wele didjidji dia “tɔɔtɔ esambele” tele lo lonya l’omi la Yeso tatɛkɛtama lo Ɛnyɛlɔ 1:16, 20?
Vɔ wekɔ didjidji di’emendji w’akitami wa lo tshumanelo ndo lo yoho kina dikumanyi tshɛ dia lo tshumanelo.—10/15, lɛkɛ 14.
Ngande wakonge Yeso l’okitshakitsha oko wɔtɛkɛtamidiɔ lo Izaya 50:4, 5?
Avɛsa anɛ mbutaka di’onto lakakondja “lulimi l’uluwanyi” ndo laki kokoka “nkalula ekongokongo.” Yeso akɛnya dia nde aki l’okitshakitsha etena kakandahokamɛka la yambalo tshɛ kɛnɛ kakawetshaka She. Nde akalomɔlomɔka ndo aki la nsaki ka mbeka akambo oma le Jehowa, asɛdingola okitshakitsha waki Nzambi lo woho wokande atshi wa pɛkato kɛtshi.—11/15, lɛkɛ 11.