Onde wɛ koka ndjaɛkɛ l’ɔtɛmwɛlɔ lo kɛnɛ kendana la falanga?

Estellea akatshɔka l’ɔtɛmwɛlɔ l’anande mbala la mbala. Nde mbutaka ate: “Lakatɛ pastɛrɛ ɔnɛ dimi nangaka mbeka Bible.” Koko ndooko lushi lakandawetshatɔ. L’ekomelo, nde akayotshikaka ntshɔ l’ɔtɛmwɛlɔ. Nde kotshaka ate: “Waa pastɛrɛ wakatomɛ mukanda ɔnɛ naka dimi handjolanga ndjaaka l’ɔtɛmwɛlɔ, kete dimi koka mbatomɛka kaanga falanga. Laasɔ mbakamɛnyi nte vɔ kondjakiyanyaka diami, koko paka dia falanga.”

Angelina lokotshɔka l’ɔtɛmwɛlɔ mbutaka ate: “L’ɔtɛmwɛlɔ aso, waketshetshaka asaka mbala shato y’etondo di’onto tshɛ mbidjaka falanga. Wakalɔmbaka falanga wonya tshɛ. L’ekomelo, lakayotaka nte: ‘Yaa! Wanɛ mɛtɛ bu la nyuma ka Nzambi.’”

Onde ɛtɛmwɛlɔ wa lo ngelo kayɛ nɔmbaka falanga lo toho tokɛma hwe kana ta lo mayɛlɛ? Ko naka ngasɔ, onde kɛsɔ mɛtɛ mbɔtɔnɛka la kɛnɛ ketsha Bible?

BIBLE ETSHATƆ?

Yeso lele Ɔhɔhɔdi wa Lokristo akate ate: “Nyakalongola olongolalongola, nyotokimɔ okimɔkimɔ.” (Mateo 10:8) Losango la lo Bible halohombe sondjama ndo anto tshɛ walanga likondja pombaka likondja okondjakondja.

Ngande wakasalaka Akristo wa ntondo dia nkondja falanga ya nkotsha ehomba w’etshumanelo?

Onto l’onto akakimɔka “oko wakandashikikɛ l’otema ande, aha la lonyangu kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.” (2 Kɔrɛtɔ 9:7) Ɔpɔstɔlɔ Pɔɔlɔ akate ate: “Takakambaka otsho la yanyi diaha sho monga wotsho wamboleka le nyu etena kakatanyosambishaka lokumu l’ɔlɔlɔ.” (1 Tɛsalɔnika 2:9) Pɔɔlɔ akakambaka olimu wa takanɛka mvudu y’apɛma dia nde kotshaka ehomba ande etena kakandasambishaka.—Etsha 18:2, 3.

ONDE ƐMƐNYI WA JEHOWA SALAKA NGASƆ?

Ɛmɛnyi wa Jehowa sanganaka lo mvudu yaha kawotake yelamɛ ɔnɛ Mbalasa ya Diolelo. Oma lende akondjawɔ falanga yakotshawɔ ehomba wa l’etshumanelo? Vɔ hawetshetsha tɔsɛndji ndo hawotomanɛ avɔlɔpɛ dia nyanga falanga. Lo dihole dia nsala ngasɔ, onto tshɛ lalanga mbidjaka dikuta diele la nde lo tɔshɛtɛshɛtɛ ta lo Mbalasa ka Diolelo tokitshami lo dihole diahakotola yambalo y’anto.

Periodikɛ kele la yɛ l’anya kɛnɛ kakatombe ndo kakatomama diɛsɛ la falanga shɔ. Koko wɛ hakoke mɛna pondjo lo Mbalasa ka Diolelo, anto watetshetsha tɔsɛndji dia nyanga falanga. Etena kewɔ lo Mbalasa yawɔ, Ɛmɛnyi wa Jehowa ndekaka ntɛkɛta di’akambo wa mɛtɛ wa lo Bible.

Oko le yɛ, shi kɛsɔ mbakɛnya Yeso di’anto salaka lo ndjela ɛnyɛlɔ k’Akristo wa lo ntambe ka ntondo?