Kambɛ Nzambi ekɔ tshondo y’esakelo le nde
Etena kakawatɛ ambatshi mboka ahende dia vɔ mbɔtɔ lo luudu lɔmɔtshi lo wodja wa Kenya, vɔ wakambe dia mɛna pami kaki la demba dia tshitshɛ oladi la mbeto. Nde aki la ntolo ka tshitshɛ ndo anya wa tomondo. Etena kakawoosambisha ɔnɛ “akanga a tshumbi wayulimbolimbo uku peli” l’andja w’oyoyo watolakiya Nzambi, pami kɛsɔ akamɔnamɔna.—Is. 35:6.
Wakatɛ ambatshi mboka asɔ ɔnɛ Onesmus laki aya suke l’ɛnɔnyi 40 akotɔ la ostéogenèse imparfaite kana hemɔ ka weka wɔdu wɔdu. Lam’ele weka ande waki wɔdu efula, takandakokaka sutshasutsha demba diande efula diaha weka ande mbɔkɔkɔ. Onesmus akalongamɛka dia nde ayosowa lɔsɛnɔ lande l’otondo ndo ayodjasɛka tsho lo nkɔsa k’etshimbi dikambo hemɔ kɛsɔ bu l’okanga.
Diɛsɛ ko Onesmus aketawɔ dia vɔ ndjowetshaka Bible. Koko nyango akatone dia nde ntshɔ lo nsanganya y’Akristo lo mfɔnya dia ɔnande ayotokala waale lo woho wakinde la hemɔ kɛsɔ. Ɔnkɔnɛ, anangɛso wakoosangwɛka awui wakatamaka lo nsanganya dia nde ndjohokamɛka la ngelo. L’ɔkɔngɔ wa nde mbeka Bible l’edja ka ngɔndɔ tshanu, Onesmus akayɔsa yɛdikɔ ya ntatɛ ntshɔ lo nsanganya oyadi kɛnɛ tshɛ kakakoke tookomɛ.
Ko onde hemɔ kande kakooheke l’ɔtɛ wakandatatɛ ntsho lo nsanganya? Keema. Nde mbutaka ɔnɛ: “Kandji kakamokaka lo demba kakakitakitaka wonya tshɛ wakimi lo nsanganya.” Nde kotshaka dia elongamelo kaya la nde mbawokimanyiya dia nde ndjaoka dimɛna. Etena kakɛnyi nyango aki Onesmus etshikitanu wakonge lo yoonge y’ɔnande, nde lawɔ akɔshi yɛdikɔ ya ntatɛ mbeka Bible. Nde akate ɔnɛ: “Kambɛ Nzambi ekɔ tshondo y’esakelo le ɔnami.”
Kombeta edja oma laasɔ, Onesmus akayokomaka opandjudi wahatabatizama. L’ɔkɔngɔ diko, nde akayobatizamaka ndo nde aya okambi wakimanyiya l’etshumanelo. Kaanga mbele ekolo ande ndo lonya lande lɔmɔtshi bu la wolo, Onesmus aki la nsaki ka ndeka ndjasha l’olimu wa Jehowa. Nde akalange nkamba olimu w’ombatshi mboka wa tshanda, koko akengengaka. Lande na? Nɛ dia nde akeyaka ɔnɛ dia mbeteta l’esambishelo, ayohombama di’onto ɔmɔtshi tawopusaka lo nkɔsa kande k’etshimbi. Etena kakandatɛ anangɛso okakatanu ɔsɔ, vɔ wakawotɛ dia wayowokimanyiya. Kɛsɔ mbakookimanyiya dia nde mbɔsa olimu w’ombatshi mboka wa tshanda.
Onesmus akayongaka la nsaki ka nkamba olimu w’ombatshi mboka wa pondjo, koko nde akayakiyanyaka paka dia dui diakɔ diaamɛ. Lushi lɔmɔtshi, nde akakeketshama efula la divɛsa dia lushi la lushi. Divɛsa diakɔ aki Osambu 34:8 diata ɔnɛ: “Nyunganeli, nyeyi nyati: [Jehowa] eli ololo.” L’ɔkɔngɔ wa nde nkana yimba la divɛsa sɔ, Onesmus akɔshi yɛdikɔ ya nkoma ombatshi mboka wa pondjo. Ɛlɔ kɛnɛ, nde osambisha nshi nyɛi lo lomingu ndo aya l’ambeki wa Bible efula watahame lo nyuma. Lo 2010, nde akɔtɔ lo Kalasa k’ambatshi mboka. Nde aki l’ɔngɛnɔngɛnɔ efula dia mɛna dia ɔnangɛso ɔmɔtshi l’atei w’anangɛso ahende wakoosambisha mbala ka ntondo aki ombetsha ande lo Kalasa k’ambatshi mboka.
Kaanga mbakavu ambutshi waki Onesmus, anangɛso l’akadiyɛso wa l’etshumanelo kande wekɔ lo mbokimanyiya l’ehomba ande wa lushi la lushi. Nde ekɔ la lowando lo ɛtshɔkɔ tshɛ wakondjande ndo ekɔ lo nkonga l’asolo walomɔlomɔ etena kele “nduku untu ludjashi la Jerusalema ayuta ati: Dimi la kandji.”—Is. 33:24.