Woho wa nsamba Okristo wele diwala diambovɔ

Ondo wɛ mbeyaka onto ɔtɔi kana efula wele awala awɔ wambovɔ. Ngasɔ mbediɔ nɛ dia awala efula wekɔ lo mpandjɔ l’ahole efula. Ɛnyɛlɔ, eyangelo wakasalema la Pologne mɛnyaka dia mbala efula atshukanyi wele l’ɛnɔnyi 30 wambotshukana lam’asa ɛnɔnyi esato la esamalo ndjodiakaka awala. Koko aha paka atshukanyi wele l’ɛnɔnyi 30 ato mbadiaka awala.

Tshunda dimɔtshi dia l’Espagne (The Institute for Family Policy) mbutaka dia “eyangelo wakasalema [l’Erɔpɛ] mɛnyaka dia k’ahende ɔtɔi k’awala wasalema ndjohandjɔka.” Dui sɔ salemaka kaanga lo wedja wamboshidimikɔ.

WOHO WAYAOKA ONTO L’ƆKƆNGƆ WA DIWALA MVƆ

Kakɔna kakonya atshukanyi dia ndjaka awala lo yɛdikɔ ya ngasɔ? Manyi mɔtshi y’akambo wa l’awala yele lo Erɔpɛ wa lo ehotwelo ka wonya akate ate: “Atshukanyi tashilaki ndjaka diwala lam’asawɔ ko l’ɔkɔngɔ vɔ ndjotshɔ dia todidiaka lo washo wa lɛɛta ndo dui sɔ mbashaka paa efula l’asolo.” Nde akakotsha ate: “L’ɔkɔngɔ w’odiakelo wa diwala, anto efula ndjomalaka, ndjonyangaka, ndjaɔsaka dia wambosombɔ, ndjoshishaka elongamelo ndo ndjongaka la nsɔnyi.” Mbala efula, anto ndjongaka la tokanyi ta ndjadiaka. Nde kotshaka nto ate: “Etena kadiaka lɛɛta diwala, dui sɔ ndjongaka l’etombelo wa kɔlɔ le wanɛ wodidiaki. Etena kayowoyaokaka opoko ndo ekalema, wanɛ wakasɛkana koka ndjoyambola ɔnɛ: ‘Kaanga mbakamadiake diwala, kakɔna kamomokondja? Lande na kaakamasɛnɛ nto?’”

Ewa mbutaka ate: “L’ɔkɔngɔ wa diwala diami mvɔ, laki la nsɔnyi ndo la nkɛlɛ k’efula l’ɔtɛ wakansɔkaka asukanyi ndo asekami wa l’olimu. Lakatatɛ mbodia anami ahende dimɛ.”a Adam lakakambe oko ekumanyi l’edja k’ɛnɔnyi 12 mbutaka ate: “Lamboshisha nɛmɔ diami, tena dimɔtshi dimi momalaka ndo mongaka la nsaki ka ndjaanganya l’anto tshɛ.”

SALA LA WOLO DIA MƐNA AKAMBO LA SSO DI’ƆLƆLƆ

Lam’ele anto amɔtshi ndjɛnaka wonya oko lɛɛdi l’ɔkɔngɔ wa ndjaka diwala, vɔ ndjosalaka edja efula dia ndjɛna akambo la sso di’ɔlɔlɔ. Vɔ mbeyaka ndjɔfɔnya ɔnɛ anto akina hawoyakiyanya dikambo diawɔ. Jurnalistɛ mɔtshi mbutaka ɔnɛ anto wele diwala diambovɔ, pombaka “ntshikitanya mbekelo yawɔ ndo mbeka woho wa nkandolaka ekakatanu awɔ vɔamɛ.”

Stanisław mbutaka ate: “L’ɔkɔngɔ wa diwala diaso mvɔ, wadɛmi konangaka dimi mɛnana l’anaso ahende wa wamato. Kɛsɔ akankonya dia dimi mfɔnya ɔnɛ ndooko onto layakiyanya dikambo diami ndo ɔnɛ Jehowa ambɔnsɛka. Lakatatɛ nkombola nyɔi, koko lakayɛna dia ekanelo kami kaki kɔlɔ.” Womoto lelɛwɔ Wanda lele diwala diande diakavu, aki la lɔkɔnyɔ efula nɛ dia nde kombeyaka woho wayonga lɔsɛnɔ lande otsha la ntondo. Nde mbutaka ate: “Lakafɔnyaka ɔnɛ l’ɔkɔngɔ wa tshanda mɔtshi, anto wambeya ndo asekami Akristo wayotshika ndjasha le mi ndo le anami. Koko, anangɛso l’akadiyɛso wakansukɛ lo welo wakamadjaka dia mbodia anami lo wetshelo wa Jehowa.”

Kɛnɛ kakate anto asɔ mɛnyaka dia efula mongaka la tokanyi ta kɔlɔ l’ɔkɔngɔ wa diwala mvɔ. Vɔ mbeyaka ndjaɔsa oko anto w’anyanya ndo mfɔnya ɔnɛ hawoyosungana mbɔsama la nɛmɔ. Ekanelo kɛsɔ koka mbakonya dia monga la mbekelo ka mɔnyɔla anto akina. Kɛsɔ mbeyaka mbakonya dia vɔ mfɔnya di’ase etshumanelo tshɛ wekɔ etshitshitshitshi ndo hawowaoke kɛtshi. Koko kɛnɛ kakakomɛ Stanisław nde la Wanda mɛnyaka di’Akristo wele awala awɔ wambovɔ koka ndjɛna di’anangɛso l’akadiyɛso mbakimanyiyaka. Aha la taamu, Akristo nkimanyiyaka asekawɔ wele awala awɔ wambovɔ oyadi anto akina ndjɛnaka ekimanyielo kawɔ paka l’ɔkɔngɔ.

NAKA ONTO OYAOKA OPOKO NDO OKALEMA

Teye dia oyadi sho kodjaka welo dia nkimanyiya asekaso Akristo wele awala awɔ wambovɔ, dui sɔ howashimba dia vɔ ndjaoka opoko lo tena dimɔtshi. Lo yoho ya laande, akadiyɛso wele awala awɔ wambovɔ mbɔsaka dia anto yema tshitshɛ tsho mbayasha le wɔ. Alicja mbutaka ate: “Kaanga mbele aya ɛnɔnyi enanɛi wambovɔ diwala diami, dimi toyaɔsaka oko onto l’anyanya lo tena dimɔtshi. Lo tena dia ngasɔ, dimi tongaka la nsaki ka ndjaanganya l’anto akina, ndela ndo monga ɔkɛtshi.”

Kaanga mbele anto efula wele awala awɔ wambovɔ mongaka la nsaki ka ndjanganya l’anto akina, Bible tokeketshaka diaha sho nsala ngasɔ. Ntona dako sɔ koka nkonya onto dia mbikasha “yimba tshe.” (Tuk. 18:1) Bu dimɛna di’onto layaoka opoko nyangaka alako le onto lele bu pami kana womoto oko nde, nɛ dia dui sɔ koka ndjemula nsaki yawɔ ya demba.

Asekaso Akristo wele awala awɔ wambovɔ mbeyaka monga la ekiyanu efula lo yimba, ɛnyɛlɔ woho wayonga lɔsɛnɔ lawɔ lo nshi yayaye, woho wayaokawɔ opoko kana ekalema. Oko weyaso di’Akristo efula wele awala awɔ wambovɔ mongaka l’ekiyanu wa ngasɔ ndo ɔnɛ ekɔ wolo mbatondoya, sho pombaka mbokoya Jehowa lo mbasukɛ la kɔlamelo tshɛ. (Osam. 55:22; 1 Pet. 5:6, 7) Sho koka monga l’eshikikelo ɔnɛ vɔ wayɔngɛnangɛna oseka ekimanyielo tshɛ kawashaso. Aha la taamu, vɔ wayokondja ekimanyielo oma le angɛnyi w’eshika wa l’etshumanelo.—Tuk. 17:17; 18:24.