ASAWO WƆTƆNƐ L’ƆTƐ A DUI WA LO LOHOSO | WAA NA WELE ƐMƐNYI WA JEHOWA?
Dietawɔ diakɔna diele la Ɛmɛnyi wa Jehowa?
Ɛmɛnyi wa Jehowa mbetawɔka dia “Afundelo tshɛ wakafundama l’ɛlɔmbwɛlɔ ka nyuma kaki Nzambi ndo wekɔ ohomba.” (2 Timɔte 3:16) Sho kambaka la Bible oko ehomɔ katɔlɔmbɔla dia mbeka akambo wendana la Otungi ndo nsɛna lɔsɛnɔ lele l’oyango.
Bible mbutaka ɔnɛ: ‘Anto weye dia wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.’ (Osambu 83:18) Ɔnkɔnɛ, sho tɛmɔlaka paka Jehowa Nzambi oto, ndo oko weso Ɛmɛnyi ande, sho salaka la wolo dia mbeyanya lokombo lande l’oshika.—Isaya 43:10-12.
Oko weso Akristo, sho mbetawɔka dia Yeso, “Ɔna Nzambi,”a akaye la nkɛtɛ ndo akakome Mɛsiya. (Joani 1:34, 41; 4:25, 26) L’ɔkɔngɔ wa nde mvɔ, Yeso akolɔ otsha l’olongo. (1 Kɔrɛtɔ 15:3, 4) L’ɔkɔngɔ diko, nde akayokoma Nkumekanga ka Diolelo diaki Nzambi. (Ɛnyɛlɔ 11:15) Diolelo sɔ diekɔ lowandji la mɛtɛ layokadimola nkɛtɛ Paradiso. (Danyele 2:44) Bible mbutaka ɔnɛ: ‘Anto w’ɛlɔlɔ wayokita nkɛtɛ, ndo wayɔngɛnangɛnaka la wɔladi w’efula.’—Osambu 37:11, 29.
“Etena kadiawɔ lo Bible vɔ mbɔsaka dia Nzambi ekɔ lo ntɛkɛta la wɔ. Etena tshɛ kahomanawɔ l’ekakatanu lo nsɛnɔ yawɔ, vɔ mbɔsaka Ɔtɛkɛta wa Nzambi ndo vɔ nyangaka lɔkɔ dia nkandola ekakatanu akɔ. . . . Le wɔ, Ɔtɛkɛta wa Nzambi wekekɔ la lɔsɛnɔ.”—Benjamin Cherayath ondjashi Nzambi w’oseka Mupɛ, jurnalɛ ya Münsterländische Volkszeitung, Allemagne
Ɛmɛnyi wa Jehowa mbetawɔka dia anto koka nkondja wahɔ oma lo atɔndɔ wa lo Bible kaanga ɛlɔ. (Isaya 48:17, 18) Diakɔ diele, sho ndjelaka atɔndɔ akɔ nna lo nna. Ɛnyɛlɔ, lam’ele Bible tɔhɛmɔlaka dia sho mbewɔ mbekelo yalanya wɛɔngɔ ndo alemba aso, sho hatɔnɔ mfɔka kana didjoyadjoya. (2 Kɔrɛtɔ 7:1) Sho mbewɔka nto mbekelo yatona Bible, ɛnyɛlɔ oko wodjwelo wa wanu, awui wa mindo wa dieyanelo ndo wovi —1 Kɔrɛtɔ 6:9-11.
a Ndo nto, Bible mbelɛka Yeso ɔnɛ: “Ɔna ɛtɔi laki Nzambi,” nɛ dia nde mbaki etongami ka ntondo ndo ndamɛ oto mbakatongama oma le Nzambi.—Joani 3:18; Kɔlɔsayi 1:13-15.