Ambola w’oma le ambadi

Lande na kakɔsaka atunyi wa Yeso osolelo w’anya oko dikambo dia woke?

Ɔsɔ aki dikambo dimɔtshi l’atei w’akambo efula wele atunyi wa Yeso wakawɔnyɔlaka nde la ambeki ande. Ɛlɛmbɛ wa Mɔsɛ wakɛnyaka kɛnɛ kakahombaka mbidja onto mindo, ɛnyɛlɔ ɛkɛlɛlɔ ka lo demba, sudi, munanda odo w’onto kana wa nyama. Ndo nto Ɛlɛmbɛ akɔ wakashaka ɛlɔmbwɛlɔ lo woho wakakokaka onto monga pudipudi nto. Dui sɔ diakakokaka salema lo nkimɔ olambo, nsola kana mɔnga.​—Akambu w’Asi Lewi, tshapita 11-15; Walelu, tshapita 19.

Embetsha w’ase Juda, wakeyamaka vɔ lawɔ oko waa rabi, wakayokotsha ɛlɛmbɛ awɔ hita lo ɛlɛmbɛ ɛsɔ. Alapɔlɔ ɔmɔtshi mbutaka ɔnɛ waa rabi wakayokotsha ɛlɛmbɛ kana awui efula wendana la kɛnɛ kakakokaka mbetɛ onto mindo ndo woho wakandakokaka mbidja anto akina mindo. Waa rabi wakadje nto ɛlɛmbɛ wendana la woho w’ɛngɔ kana ehomɔ kakakokaka mbɔtɔ mindo kana kaki kokokaka mbɔtɔ mindo ndo sɛlɛmɔnyi yakahombaka anto nsala dia monga pudipudi nto.

Atunyi wa Yeso wakawombola ɔnɛ: “Lande na kahayele ambeki ayɛ mbekelo y’ashidi, ko vɔ ndɛka la anya mindo?” (Makɔ 7:5) Afarisɛ asɔ kɔtɛkɛtaka dikambo dia pudipudi ka dimɛna, mbuta ate nsola anya ntondo ka ndɛ. Afarisɛ asɔ wakadje ɔlɛmbɛ ɔnɛ ntondo ka onto ndɛ, ashi pombaka mbutamɛ l’anya ande oko etenyi kɛmɔtshi ka sɛlɛmɔnyi. Alapɔlɔ wakatatshi la diko kotshaka ɔnɛ waa rabi “wakashikikɛ nto ɛngɔ kahomba onto nkamba la tɔ dia mbutɛ ashi, woho w’ashi wahombama, onto akɔna lahomba mbutɛ ashi ndo lofulo l’anya lahomba solama l’ashi.”

Kakɔna kakasale Yeso la ɛlɛmbɛ ɛsɔ tshɛ wakayokotsha anto? Nde akatɛ ewandji w’ɛtɛmwɛlɔ w’ase Juda ate: “Diakɔ diakate omvutshi Izaya lo dikambo dianyu, nyu akanga wa dungi pende oko wofundamidiɔ ɔnɛ: ‘Anto anɛ watɔnɛmiyaka lo ɛlɔmɔ, koko etema awɔ wekɔ etale oma le mi [Jehowa]. Ɔtɛmɔlatɛmɔla mbatowɔntɛmɔlaka, nɛ dia vɔ tetshaka ɛlɛmbɛ w’anto.’ Nyu tshikaka ɛlɛmbɛ waki Nzambi, ko ndjelaka mbekelo y’anto.”​—Makɔ 7:6-8.