Ambola w’oma le ambadi

Onde ‘nembetɛ onto’ kɔtɛkɛtami lo 2 Tɛsalɔnika 3:14 kayosalema oma le dikumanyi dia l’etshumanelo ko kana oma le Okristo tshɛ?

Ɔpɔstɔlɔ Pɔɔlɔ akafundɛ Akristo wa la Tɛsalɔnika ate: “Naka onto ɔmɔtshi hakitanyiya ɛtɛkɛta aso wele lo mukanda ɔnɛ, nyolembete onto ɔsɔ.” (2 Tɛs. 3:14) Ntondo, takataka ɔnɛ ɛlɔmbwɛlɔ kɛsɔ mendanaka la dikumanyi. Naka opandjudi ɔmɔtshi ekɔ lo ntetemala minya atɔndɔ wa lo Bible yimba kaanga l’ɔkɔngɔ wa mbosha alako mbala la mbala, dikumanyi diakahombaka mbisha sawo di’ɔhɛmwɛlɔ l’etshumanelo. Oma laasɔ, apandjudi takawahombaka mbekesanɛ la nde.

Koko, nɔmbamaka nsala otshikitanu lo eokelo kɛsɔ. Tamboshihodia kakianɛ dia dako dia Pɔɔlɔ sɔ mendanaka la yɛdikɔ yahomba Okristo tshɛ mbɔsa lo menda akambo amɔtshi. Laasɔ, aya bu ohomba nto dia dikumanyi mbisha sawo di’ɔhɛmwɛlɔ. Lande na kambototshikitanya eokelo kaso ka divɛsa nɛ? Tɔsɛdingole kɛnɛ kakalange Pɔɔlɔ mbuta etena kakandashaka dako sɔ.

Pɔɔlɔ akɛnyi di’anto amɔtshi wa l’etshumanelo waki la “lɔsɛnɔ l’ofukutanu.” Nde akawasha alako wohikami l’Ɔtɛkɛta wa Nzambi, koko wakatone nkitanyiya. Lo wembwelo ande wakete, nde akadjanga ate: “Naka onto halange nkamba, kete atɔlɛke.” Koko, anto amɔtshi wakatonaka nkamba olimu dia ndjasɛnya kaanga mbakiwɔ l’akoka wa nsala dui sɔ. Ndo nto, vɔ wakayatambiyaka l’akambo akana. Ngande wakahombaka Akristo salɛ akanga w’ofukutanu asɔ akambo?—2 Tɛs. 3:​6, 10-12.

Pɔɔlɔ akate ate: “Nyolembete onto ɔsɔ.” Etelo ka lo Grɛkɛ kɛsɔ mbelaka kanyi ya mbeya onto ɔsɔ ko nsala la wolo diaha sɛngiyama oma le nde. Pɔɔlɔ akasha etshumanelo k’otondo dako sɔ, aha dikumanyi to. (2 Tɛs. 1:1; 3:6) Ɔnkɔnɛ, Okristo tshɛ wɛna di’osekande Okristo hakitanyiya alako w’oma l’Ɔtɛkɛta wa Nzambi, pombaka ‘ntshika mbɔtɔnganɛ’ la kanga ofukutanu ɔsɔ.

Onde dui sɔ nembetshiyaka di’onto ɔsɔ pombaka mbɔsama oko onto lambonyɛma oma l’etshumanelo? Ndooko, nɛ dia Pɔɔlɔ akakotsha ate: “Nyotetemale mbolaka oko ɔnangɛnyu.” Laasɔ, Okristo tshɛ pombaka ntetemala mbɔtɔnɛ la onto lakawalembetɛ ɔsɔ etena kewɔ lo nsanganya ndo l’esambishelo, koko vɔ hawohombe mbetsha wenya kaamɛ la nde lo waa fɛtɛ kana lo ɔkɔkwɛlɔ wa demba. Lande na? Pɔɔlɔ akate ate: “Dia nde mbotshama nsɔnyi.” Etena katshikaso dia mbɔtɔnɛ la Okristo wele l’ofukutanu, nde mbotshamaka nsɔnyi l’ɔtɛ wa lɔkɛwɔ lande ndo nde litshikitanyaka.—2 Tɛs. 3:​14, 15.

Ngande wakoka Akristo nkamba la dako sɔ ɛlɔ kɛnɛ? Ntondotondo, sho pombaka monga l’eshikikelo di’onto akɔ ekɔ mɛtɛ la lɔkɛwɔ “l’ofukutanu” oko wakate Pɔɔlɔ. Nde kɔtɛkɛta dikambo dia wanɛ wɔsa tɛdikɔ totshikitanyi la so l’ɔtɛ wa nkum’otema kawɔ kana wasala ɛsɔnwɛlɔ wotshikitanyi la so. Ndo nde konanga ntɛkɛta di’anto wakatonyangiya. Koko, Pɔɔlɔ akakanyiyaka dikambo di’anto watona nkitanyiya alako wokɛma hwe w’oma le Nzambi.

Ɛlɔ kɛnɛ, naka tambɛna osekaso Okristo wele la dionga dia ngasɔ,a kete shoamɛ kokaka mbɔsa yɛdikɔ diaha monga la diɔtɔnganelo la nde lo waa fɛtɛ kana lo ɔkɔkwɛlɔ wa demba. Lam’ele ɔsɔ ekɔ yɛdikɔ yaso shoamɛ, hatohombe nkɛtshanya dui sɔ l’anto akina wele bu lo nkumbo kaso. Tayotetemala monga kaamɛ l’onto ɔsɔ lo nsanganya yaso ndo l’olimu aso w’esambishelo. Naka nde ambosala etshikitanu, kete sho koka nkaloya diɔtɔnganelo dia dimɛna la nde.