Ambola w’oma le ambadi
Etena kakahɔhɔla Yeso Dambo dia dikɔlɔ dia Nkumadiɔndjɔ, lende aki ambeki 70 wakandatome ntondo dia tosambisha? Onde vɔ wakawoke ɔkɔngɔ?
Sho bu l’ɔkɔkɔ wa nkanyiya ngasɔ l’ɔtɛ w’ɔnɛ lam’ele ambeki 70 komonga laawɔ etena kakahɔhɔla Yeso Dambo dia dikɔlɔ dia Nkumadiɔndjɔ, kete laasɔ vɔ kombetawɔma oma le Yeso kana wakawoke ɔkɔngɔ. Yeso akalange tsho monga kaamɛ l’apɔstɔlɔ ande l’etena kɛsɔ.
Oyadi ambeki 12 kana 70 asɔ, vɔ tshɛ waki ambeki wa Yeso. Yeso akasɔnɛ ntondo oma l’atei w’ambeki ande, ambeki 12 wakandelɛ apɔstɔlɔ. (Luka 6:12-16) Nde aki la Ngalileya etena ‘kakandelɛ apɔstɔlɔ ande 12’ ndo “akaatome dia tosambisha Diolelo dia Nzambi ndo tɔkɔnɔla anto.” (Luka 9:1-6) L’ɔkɔngɔ diko etena kakinde la Judeya, Yeso “akasɔnɛ ambeki akina 70 ndo akaatome ahende ahende.” (Luka 9:51; 10:1) Ɔnkɔnɛ, Yeso aki l’ambeki l’ahole wotshikitanyi wakasambishaka awui wendana la nde.
Ase Juda wakakome ambeki wa Yeso wakahombe nsala fɛtɛ k’Elekanelo ɔnɔnyi tshɛ kaamɛ la nkumbo yawɔ. (Eto. 12:6-11, 17-20) Yema tshitshɛ la ntondo ka nyɔi kande, Yeso nde l’apɔstɔlɔ ande wakatshu la Jɛrusalɛma. Nde kombelɛ ambeki ande tshɛ w’oma la Judeya, Ngalileya ndo w’oma la Pereya dia ndjosala fɛtɛ k’Elekanelo kaamɛ la nde. Mbokɛmaka dia Yeso akalange monga kaamɛ l’apɔstɔlɔ ande lo diaaso sɔ. Nde akawatɛ ate: “Lakakombolaka efula dia ndɛ dambo di’Elekanelo nɛ kaamɛ la nyu la ntondo ka dimi soyama.”—Luka 22:15.
Nde aki l’ɔkɔkɔ w’oshika wa nsala dui sɔ. Yeso aki suke la mvɔ oko “Ɔna Ɔkɔkɔ wa Nzambi ɔnɛ lanya pɛkato ya l’andja.” (Jni. 1:29) Dui sɔ diakahombe salema la Jɛrusalɛma lɛnɛ akawalambolaka Nzambi elambo. Ɔna ɔkɔkɔ wakalɛmaka lo dambo di’Elekanelo wakoholaka ase Isariyɛlɛ dia Jehowa akaatshungola oma l’Edjibito, koko oma l’olambo ande, Yeso akahombe nsala kɛnɛ koleki kɛsɔ ndo akahombe ntshungola anto tshɛ oma lo pɛkato la nyɔi. (1 Kɔr. 5:7, 8) L’ɔtɛ w’olambo wa Yeso, apɔstɔlɔ wa Yeso dikumi l’ahende wakahombe nkoma etshina k’etshumanelo k’Akristo. (Ɛf. 2:20-22) Jɛrusalɛma, osomba w’ekila wekɔ “la ave wa weke 12” wofundami “nkombo 12 ya apɔstɔlɔ 12 wa Ɔna Ɔkɔkɔ.” (Ɛny. 21:10-14) Eelo, apɔstɔlɔ wa kɔlamelo wakahombe mbisha lonya l’okotshamelo wa sangwelo diaki Nzambi. Sho koka mboka lande na kakalange Yeso dia monga kaamɛ la wɔ lo fɛtɛ k’Elekanelo k’ekomelo ndo lo dambo diakayelana, mbuta ate Dambo dia dikɔlɔ dia Nkumadiɔndjɔ.
Ambeki 70 ndo akina komonga lo dambo sɔ kaamɛ la Yeso. Koko ambeki ande tshɛ wa kɔlamelo wakakondja wahɔ oma lo dambo diakahɔhɔla Yeso, mbuta ate Dambo dia dikɔlɔ dia Nkumadiɔndjɔ. Ambeki tshɛ waki l’etena kɛsɔ wakakome Akristo w’akitami, wakahombe mbɔtɔ lo sheke ya diolelo yakatɛ Yeso apɔstɔlɔ ande la dikɔlɔ sɔ.—Luka 22:29, 30.