Dipesalema
Pina ya go kgakola ntlo. Pesalema ya ga Dafide.
30 Jehofa, ke tla go tlotlomatsa ka gonne o ne wa ntsholetsa;*
Ga o a letla baba ba me gore ba itumele ka ntlha ya masetlapelo a me.+
2 Ke ne ka goela kwa go wena ke kopa thuso Jehofa, Modimo wa me, mme o ne wa mphodisa.+
3 Jehofa, o ne wa ntsholetsa wa nketsha* mo Lebitleng.*+
O ne wa mpoloka ke tshela; o ne wa dira gore ke se ka ka wela mo lebitleng.+
4 Opelelang* Jehofa dipako, lona batho ba gagwe ba ba ikanyegang,+
Ntshetsang leina* la gagwe le le boitshepo ditebogo;+
5 Gonne Modimo o galefela motho ka nakwana fela,+
Mme fa Modimo a amogela motho o mo amogela botshelo jotlhe.+
Maitseboa go ka nna le selelo, mme mo mosong go nna le boitumelo jo bogolo.+
6 Fa ke ne ke se na mathata, ke ne ka re:
“Ga nkitla ke tshikinngwa.”*
7 Ka ntlha ya bopelonomi jwa gago Jehofa, o ne wa dira gore ke nne thata jaaka thaba.+
Mme fa o ne o fitlha sefatlhego sa gago, ke ne ka tshoga thata.+
8 Jehofa, ke ne ka nna ka biletsa kwa go wena;+
Ke ne ka nna ka kopa gore o nkutlwele botlhoko, tlhe Jehofa.
9 O tla boelwa ke eng fa ke swa, fa ke fologela mo lebitleng?+
A lerole le tla go baka?+ A le tla bua gore o a ikanyega?+
10 Utlwa tlhe Jehofa, mme o nkutlwele botlhoko.+
Nna mothusi wa me tlhe Jehofa.+
11 O fetotse khutsafalo ya me gore e nne go bina ka boitumelo;
O tlositse letsela la me la kgetsi, mme o nkapesa boitumelo,
12 Gore ke* go opelele pako mme ke se ka ka didimala.
Jehofa Modimo wa me, ke tla go baka ka bosakhutleng.