Lefitiko

14 Jehofa o ne a tswelela a bua le Moshe a re: 2 “Molao ono ke o o tshwanetseng go latelwa fa molepero a tlisiwa kwa moperesiting+ ka letsatsi la fa go tlhomamisiwa gore a o itshekile. 3 Moperesiti o tla tswela kwa ntle ga kampa a bo a mo tlhatlhoba. Fa molepero a fodile, 4 moperesiti o tla mo laela gore a tlise dinonyane tse pedi tse di tshelang tse di itshekileng, logong lwa mosedara, letsela le lehibidu le setlhatshana sa mosiama gore a itshekisiwe.+ 5 Moperesiti o tla laela gore nonyane e nngwe e bolaelwe mo sejaneng sa letsopa se se nang le metsi a motswedi. 6 Mme a tseye nonyane e e tshelang mmogo le logong lwa mosedara, letsela le lehibidu le setlhatshana sa mosiama mme a di ine mmogo mo mading a nonyane e e bolaetsweng mo metsing a motswedi. 7 Go tswa foo, o tla kgatšha madi ao gasupa mo mothong yo o iitshekisang lepero a bo a bolela gore o itshekile, mme o tla tlogela nonyane e e tshelang gore e fofele kwa nageng.+

8 “Motho yo o iitshekisang o tshwanetse go tlhatswa diaparo tsa gagwe a bo a beola moriri otlhe wa gagwe, a tlhape ka metsi mme o tla itsheka. Morago ga moo, a ka nna a tsena mo kampeng mme o tla nna kwa ntle ga tente ya gagwe malatsi a le supa. 9 Mo letsatsing la bosupa, a beole moriri otlhe mo tlhogong le mo seledung le mo dintshing tsa gagwe. Fa a sena go beola moriri otlhe wa gagwe, o tla tlhatswa diaparo tsa gagwe a bo a tlhapa ka metsi mme o tla itsheka.

10 “Mo letsatsing la borobedi, o tla tsaya diphelefu tse pedi tse dipotlana tse di itekanetseng sentle, kwanyana e le nngwe e namagadi e e itekanetseng sentle+ e e nang le ngwaga o le mongwe, dikilogerama di ka nna tharo le halofo* tsa bupi jo bo boleta jo bo tlhakantsweng le leokwane e le setlhabelo sa dijo tsa ditlhaka+ le leokwane la selekanyo sa kopi;*+ 11 mme moperesiti yo o bolelang gore motho yoo o itshekile o tla isa motho yo o iitshekisang mmogo le ditlhabelo tseo, fa pele ga ga Jehofa kwa kgorong ya tente ya bokopanelo. 12 Moperesiti o tla tsaya phelefu e le nngwe e potlana mme a e ise e le setlhabelo sa molato+ mmogo le leokwane la selekanyo sa kopi mme o tla di fokisetsa kwa morago le kwa pele e le setlhabelo se se fokwang fa pele ga ga Jehofa.+ 13 Go tswa foo, o tla tlhabela phelefu e potlana mo lefelong le ka metlha go tlhabelwang phologolo ya setlhabelo sa boleo le ya setlhabelo se se fisiwang mo go lone,+ mo lefelong le le boitshepo, ka gonne fela jaaka setlhabelo sa boleo, setlhabelo sa molato le sone ke sa moperesiti.+ Ke selo se se boitshepotshepo.+

14 “Morago ga moo, moperesiti o tla tsaya madi mangwe a setlhabelo sa molato a bo a a tshasa mo loretong lwa tsebe ya moja ya motho yo o iitshekisang le mo monwaneng wa kgonotswe wa seatla sa gagwe sa moja le mo monwaneng o mogolo wa lonao lwa gagwe lwa moja. 15 Mme moperesiti o tla tsaya bontlhanngwe jwa leokwane la selekanyo sa kopi+ a bo a bo tshela mo seatleng sa gagwe sa molema. 16 Go tswa foo, moperesiti o tla ina monwana wa gagwe wa moja mo leokwaneng le le mo seatleng sa gagwe sa molema a bo a kgatšha lengwe la leokwane leo ka monwana wa gagwe gasupa fa pele ga ga Jehofa. 17 Morago ga moo, moperesiti o tla tsaya lengwe la leokwane le le setseng mo seatleng sa gagwe a bo a le tshasa mo loretong lwa tsebe ya moja ya motho yo o iitshekisang le mo monwaneng wa kgonotswe wa seatla sa gagwe sa moja le mo monwaneng o mogolo wa lonao lwa gagwe lwa moja mo godimo ga madi a setlhabelo sa molato. 18 Moperesiti o tla tshela leokwane le le setseng mo seatleng sa gagwe mo tlhogong ya motho yo o iitshekisang. Moperesiti o tla dira jalo gore Jehofa a kgone go itshwarela motho yoo.+

19 “Moperesiti o tla isa setlhabelo sa boleo+ a bo a ntshetsa motho yo o iitshekisang setlhabelo sa gore a itshwarelwe, mme morago ga moo o tla tlhaba phologolo ya setlhabelo se se fisiwang. 20 Moperesiti o tla isa setlhabelo se se fisiwang le setlhabelo sa dijo tsa ditlhaka+ mo sebesong, gore motho yoo a kgone go itshwarelwa+ mme o tla itsheka.+

21 “Le fa go ntse jalo, fa a humanegile e bile a se na mo go lekaneng, o tla tsaya phelefu e potlana e le nngwe e le setlhabelo sa molato a bo a e fokisetsa kwa morago le kwa pele gore a kgone go itshwarelwa, mmogo le kilogerama e ka nna nngwe* ya bupi jo bo boleta jo bo tlhakantsweng le leokwane e le setlhabelo sa dijo tsa ditlhaka, leokwane la selekanyo sa kopi 22 le maeba a mabedi kgotsa maphoi a mannye a le mabedi, go ya kafa a kgonang ka gone. Le lengwe e tla nna la setlhabelo sa boleo mme le lengwe e tla nna la setlhabelo se se fisiwang.+ 23 Mo letsatsing la borobedi,+ o tla di tlisa kwa moperesiting kwa kgorong ya tente ya bokopanelo fa pele ga ga Jehofa gore a mo tlhomamisetse gore o itshekile.+

24 “Moperesiti o tla tsaya phelefu e potlana ya setlhabelo sa molato+ le leokwane la selekanyo sa kopi, mme moperesiti o tla di fokisetsa kwa morago le kwa pele e le setlhabelo se se fokwang fa pele ga ga Jehofa.+ 25 Go tswa foo, o tla tlhaba phelefu e potlana ya setlhabelo sa molato, mme o tla tsaya madi mangwe a setlhabelo seo a bo a a tshasa mo loretong lwa tsebe ya moja ya motho yo o iitshekisang le mo monwaneng wa kgonotswe wa seatla sa gagwe sa moja le mo monwaneng o mogolo wa lonao lwa gagwe lwa moja.+ 26 Moperesiti o tla tshela leokwane mo seatleng sa gagwe sa molema,+ 27 go tswa foo, o tla kgatšha leokwane le le mo seatleng sa gagwe sa molema ka monwana wa gagwe wa moja gasupa fa pele ga ga Jehofa. 28 Mme moperesiti o tla tshasa leokwane le le mo seatleng sa gagwe mo loretong lwa tsebe ya moja ya motho yo o iitshekisang le mo monwaneng wa kgonotswe wa seatla sa gagwe sa moja le mo monwaneng o mogolo wa lonao lwa gagwe lwa moja mo a neng a tshasitse madi a setlhabelo sa molato gone. 29 Morago ga moo, moperesiti o tla tshela leokwane le le setseng mo seatleng sa gagwe mo tlhogong ya motho yo o iitshekisang, gore Jehofa a kgone go itshwarela motho yoo.

30 “O tla ntsha maeba kgotsa maphoi a mannye go ya kafa a kgonang ka gone,+ 31 le lengwe e le setlhabelo sa boleo mme le lengwe e le setlhabelo se se fisiwang+ mmogo le setlhabelo sa dijo tsa ditlhaka; mme moperesiti o tla ntshetsa motho yo o iitshekisang setlhabelo sa gore Jehofa a mo itshwarele.+

32 “Ono ke molao o o tshwanetseng go latelwa fa motho a tshwerwe ke bolwetse jwa lepero mme a sa kgone go ntsha dilo tse di tlhokegang gore a tlhomamisediwe gore o itshekile.”

33 Gape Jehofa o ne a raya Moshe le Arone a re: 34 “Fa lo tsena mo lefatsheng la Kanana,+ le ke le lo nayang gore lo nne mo go lone+ ke bo ke dira gore ntlo nngwe mo lefatsheng la lona e nne le bolwetse jwa lepero,+ 35 mong wa ntlo eo a ye kwa moperesiting mme a mo reye a re, ‘Go na le sengwe se e keteng bolwetse jwa lepero mo ntlong ya me.’ 36 Moperesiti o tla laela gore dilo tse di mo ntlong eo di ntshiwe pele ga a tla go tlhatlhoba karolo e e kgotletsweng, gore a se ka a bolela sengwe le sengwe se se mo ntlong e le se se itshekologileng; mme morago ga moo, moperesiti o tla tsena mo ntlong gore a e tlhatlhobe. 37 O tla tlhatlhoba karolo e e kgotletsweng mme fa dipota tsa ntlo di na le dikhutinyana tse di botala jo boserolwana kgotsa tse dikhibitswana e bile di lebega di le boteng go feta lobota, 38 foo moperesiti o tla tswa mo ntlong eo a ye kwa kgorong ya yone a bo a tswala ntlo eo malatsi a le supa.+

39 “Mo letsatsing la bosupa, moperesiti o tla boa mme a e tlhatlhobe. Fa karolo e e kgotletsweng e anametse mo dipoteng tsa ntlo, 40 moperesiti o tla ntsha ditaelo mme maje a karolo e e kgotletsweng a tshwanetse go ntshiwa a bo a latlhelwa kwa ntle ga motse kwa lefelong le le itshekologileng. 41 Go tswa foo, o tla laela gore ntlo eo e falwe thata ka fa teng mme mmu o o neng o dirisitswe go dila ntlo o ba o fadileng, ba o tshololele kwa ntle ga motse mo lefelong le le itshekologileng. 42 Morago ga moo, ba tla tsenya maje a mangwe mo go neng go na le maje a ba a ntshitseng mme a dirise seretse se sengwe a bo a laela gore ntlo e dilwe.

43 “Le fa go ntse jalo, fa karolo e e kgotletsweng e boa e nna teng gape mo ntlong fa maje a sena go ntshiwa le fa ntlo e sena go falwa e bo e dilwa gape, 44 moperesiti o tla tsena mo ntlong a bo a e tlhatlhoba. Fa karolo eo e anametse mo ntlong, ke lepero le le kotsi+ mo ntlong. Ntlo eo e itshekologile. 45 Foo o tla laela gore ntlo eo e thubiwe, e leng maje a yone, dikota tsa yone le mmu otlhe o go neng ga dilwa ntlo ka one, mme di isiwe kwa ntle ga motse kwa lefelong le le itshekologileng.+ 46 Mme ope fela yo o tsenang mo ntlong eo mo malatsing a e tswetsweng ka one,+ o tla itshekologa go fitlha maitseboa;+ 47 e bile ope fela yo o lalang mo ntlong eo a tlhatswe diaparo tsa gagwe le ope fela yo o jelang mo ntlong eo a tlhatswe diaparo tsa gagwe.

48 “Le fa go ntse jalo, fa moperesiti a tla a bo a bona gore karolo e e kgotletsweng ga e a anamela mo ntlong fa ntlo eo e sena go dilwa gape, moperesiti o tla itsise gore ntlo eo e itshekile ka gonne karolo eo e fodile. 49 E le gore a itshekise ntlo eo go ya ka molao, o tla tsaya dinonyane tse pedi, logong lwa mosedara, letsela le lehibidu le setlhatshana sa mosiama.+ 50 A bolaele nonyane e le nngwe mo sejaneng sa letsopa se se nang le metsi a motswedi. 51 Go tswa foo, o tla tsaya logong lwa mosedara, mosiama, letsela le lehibidu le nonyane e e tshelang a bo a di ina mo mading a nonyane e e bolailweng le mo metsing a motswedi mme o tshwanetse go a kgatšha gasupa mo ntlong eo.+ 52 Mme o tla itshekisa ntlo eo ka madi a nonyane, metsi a motswedi, nonyane e e tshelang, logong lwa mosedara, mosiama le letsela le lehibidu. 53 Go tswa foo, o tla tlogela nonyane e e tshelang gore e fofele kwa nageng kwa ntle ga motse. Fa a dira jalo, o tla bo a ntsha boitshekologo* jo bo mo ntlong eo mme e tla nna phepa.

54 “Ono ke molao o o amanang le lepero lepe fela, go tshwaetsega ga letlalo la tlhogo kgotsa ditedu,+ 55 lepero la seaparo+ kgotsa la ntlo,+ 56 le o o amanang le go ruruga, go tswa magogo le go tswa dibata,+ 57 gore go tlhomamisiwe fa sengwe se itshekologile le fa se itshekile.+ Ono ke molao o o amanang le lepero.”+