DUTERONOME

1 Ano ke mafoko a Moshe a neng a a bua le Iseraele yotlhe mo kgaolong ya Joredane mo nageng, mo sekakeng fa pele ga Sufe, fa gare ga Parana, Tofele, Labane, Haserothe le Disahabe. 2 Ke loeto lwa malatsi a le 11 go tswa kwa Horeba go ya kwa Kadeshe-barenea+ ka tsela ya Thaba ya Seire. 3 Mo ngwageng wa bo40,+ mo kgweding ya bo11, mo letsatsing la ntlha la kgwedi eo, Moshe o ne a bolelela Baiseraele* sotlhe se Jehofa a neng a mo laetse gore a se ba bolelele. 4 O ne a dira jalo fa a sena go fenya Sihone+ kgosi ya Baamore, yo o neng a nna kwa Heshebone, le Oge+ kgosi ya kwa Bashana, yo o neng a nna kwa Ashetarothe kwa Ederei.+ 5 Moshe o ne a simolola go tlhalosa Molao+ ono mo kgaolong ya Joredane mo lefatsheng la Moabe, a re:

6 “Jehofa, Modimo wa rona o ne a bua le rona kwa Horeba a re, ‘Lo ntse lobaka lo loleele thata mo kgaolong eno e e dithaba.+ 7 Boang mme lo ye kwa kgaolong e e dithaba ya Baamore+ le go ela kwa baagelaning botlhe ba bone kwa Araba,+ kgaolo e e dithaba, Shefela, Negebe le losi lwa lewatle,+ e leng lefatshe la Bakanana le Lebanona,*+ go ya go fitlha kwa nokeng e kgolo, noka ya Euferatese.+ 8 Bonang, ke beile lefatshe fa pele ga lona. Tsenang mme lo gape lefatshe le Jehofa a neng a ikanela borraalona, e bong Aborahame, Isake+ le Jakobe,+ gore o tla le ba naya le ditlogolwana* tse ba tla nnang le tsone.’+

9 “Mme mo nakong eo ke ne ka lo raya ka re, ‘Ga ke kgone go lo etelela pele ke le nosi.+ 10 Jehofa, Modimo wa lona o dirile gore lo nne bantsi, mme gompieno lo bantsi jaaka dinaledi tsa magodimo.+ 11 E kete Jehofa, Modimo wa borraalonamogolo a ka dira gore lo oketsege+ ka makgetlo a le sekete go feta kafa lo leng bantsi ka gone, mme e kete a ka lo segofatsa fela jaaka a lo solofeditse.+ 12 Nka kgona jang go rwala merwalo ya lona le go itshokela mathata otlhe a lona le go omana ga lona ke le nosi?+ 13 Tlhophang banna ba ba botlhale, ba ba nang le temogo le ba ba nang le maitemogelo mo ditsong tsa lona, mme ke tla ba tlhoma gore e nne ditlhogo tsa lona.’+ 14 Lo ne lwa nkaraba lwa re, ‘Se o rileng re se dire se molemo.’ 15 Ka jalo, ke ne ka tsaya ditlhogo tsa ditso tsa lona, banna ba ba botlhale le ba ba nang le maitemogelo mme ka ba tlhoma gore e nne ditlhogo tsa lona, baokamedi ba dikete, baokamedi ba makgolo, baokamedi ba ditlhopha tsa masome a matlhano, baokamedi ba masome le balaodi ba ditso tsa lona.+

16 “Ka nako eo ke ne ka laela baatlhodi ba lona ka re, ‘Fa lo reetsa kgang fa gare ga bomorwarraalona, lo atlhole ka tshiamo+ fa gare ga motho le morwarraagwe kgotsa motswakwa.+ 17 Ga lo a tshwanela go tlhaola fa lo atlhola.+ Lo utlwe yo monnye fela jaaka yo mogolo.+ Ga lo a tshwanela go tshosiwa ke batho,+ ka gonne katlholo ke ya Modimo;+ mme fa kgang e le thata mo go lona, lo e tlise kwa go nna, mme ke tla e utlwa.’+ 18 Ka nako eo, ke ne ka lo laela dilo tsotlhe tse lo tshwanetseng go di dira.

19 “Go tswa foo, re ne ra tswa kwa Horeba mme ra tsamaya re raletse naga eo yotlhe e kgolo le e e boitshegang+ e lo neng lwa e bona fa re ne re ya kwa kgaolong e e dithaba ya Baamore,+ fela jaaka Jehofa, Modimo wa rona a ne a re laetse, mme la bofelo re ne ra goroga kwa Kadeshe-barenea.+ 20 Foo ke ne ka lo raya ka re, ‘Lo gorogile mo kgaolong e e dithaba ya Baamore, e Jehofa Modimo wa rona a re e nayang. 21 Bonang, Jehofa Modimo wa lona o lo neile lefatshe leno. Tlhatlogang, lo le gape, fela jaaka Jehofa, Modimo wa borraalonamogolo, a lo boleletse.+ Lo se ka lwa boifa kgotsa lwa tshoga.’

22 “Le fa go ntse jalo, lotlhe lo ne lwa nkatamela mme lwa re, ‘Mma re romele banna kwa pele ga rona gore ba ye go re tlhatlhobela lefatshe mme ba tle go re bolelela gore ke tsela efe e re tshwanetseng go tlhatloga ka yone le gore metse e re tla yang kwa go yone e ntse jang.’+ 23 Ke ne ka utlwa kakantsho eo e le molemo, ka jalo ke ne ka tlhopha banna ba lona ba le 12, a le mongwe go tswa mo lotsong longwe le longwe.+ 24 Ba ne ba tsamaya mme ba tlhatlogela kwa kgaolong e e dithaba+ ba bo ba fitlha kwa Mokgatšheng* wa Eshekole mme ba ne ba le tlhola. 25 Ba ne ba tsaya mangwe a maungo a lefatshe leo mme ba a tlisa kwa go rona ba bo ba re raya ba re, ‘Lefatshe le Jehofa, Modimo wa rona a le re nayang le molemo.’+ 26 Mme lo ne lwa gana go tlhatloga mme lwa se ka lwa ikobela taelo ya ga Jehofa, Modimo wa lona.+ 27 Lo ne lwa nna lwa ngongorega mo ditenteng tsa lona mme lwa re, ‘Jehofa o ne a re ntsha kwa lefatsheng la Egepeto ka gonne a ne a re tlhoile gore a re tsenye mo seatleng sa Baamore gore ba re nyeletse. 28 Re ya kwa lefelong le le ntseng jang? Bomorwarraarona ba dirile gore re kgobege marapo*+ ka go bua ba re, “Batho ba lefatshe leo ba bagolo e bile ba baleele go re feta mme metse ya bone e megolo e bile e sireletsegile go fitlha kwa magodimong*+ mme re bone bomorwa Baanake+ koo.” ’

29 “Ka jalo, ke ne ka lo raya ka re, ‘Lo se ka lwa garoga pelo kgotsa lwa boifa ka ntlha ya bone.+ 30 Jehofa, Modimo wa lona o tla tsamaya fa pele ga lona mme o tla lo tlhabanela+ fela jaaka a dirile kwa Egepeto fa pele ga matlho a lona.+ 31 Mme fa lo le kwa nageng lo ne lwa bona kafa Jehofa, Modimo wa lona a neng a lo tsholetsa ka gone fela jaaka motho a tsholetsa morwawe, gongwe le gongwe kwa lo neng lo ya gone go fitlha lo goroga mo lefelong leno.’ 32 Le fa gone ke ile ka bua dilo tseno tsotlhe, ga lo a ka lwa nna le tumelo mo go Jehofa, Modimo wa lona,+ 33 yo o neng a tsamaya fa pele ga lona mo tseleng gore a lo batlele lefelo le lo tla nnang mo go lone. O ne a iponatsa ka molelo bosigo le ka leru motshegare gore lo bone tsela e lo tshwanetseng go tsamaya ka yone.+

34 “Mo nakong eno yotlhe, Jehofa o ne a utlwa se lo neng lo se bua mme o ne a galefa a bo a ikana+ a re, 35 ‘Ga go na ope wa batho bano ba kokomana e e bosula eno yo o tla bonang lefatshe le le molemo le ke neng ka ikana gore ke tla le naya borraalona,+ 36 kwantle ga ga Kalebe morwa Jefune. Ke ene a tla le bonang, mme ke tla mo naya lefatshe le a neng a tsamaya mo go lone, ene le bomorwawe ka gonne o setse Jehofa morago ka pelo yotlhe.*+ 37 (Tota le nna, Jehofa o ne a nkgalefela ka ntlha ya lona mme a re, “Le wena ga o kitla o tsena kwa go lone.+ 38 Joshua morwa Nune, yo o emeng fa pele ga gago,+ ke ene yo o tla tsenang mo lefatsheng leno.+ O mo nonotshe*+ ka gonne o tla dira gore Iseraele e age mo go lone.”) 39 Mo godimo ga moo, bana ba lona ba lo neng lwa re ba tla gapiwa+ le bomorwaalona ba gompieno ba sa itseng molemo kgotsa bosula, bano ba tla tsena mo go lone, mme ke tla le ba naya gore ba nne mo go lone.+ 40 Mme fa e le lona, boelang morago mme lo ye kwa nageng ka tsela ya Lewatle le Lehibidu.’+

41 “Foo lo ne lwa nthaya lwa re, ‘Re leofetse Jehofa. Jaanong re tla tlhatloga re ya go tlhabana, fela jaaka Jehofa, Modimo wa rona a re laetse!’ Ka jalo, mongwe le mongwe wa lona o ne a tsaya dibetsa tsa gagwe tsa ntwa mme lo ne lo akanya gore e tla nna selo se se motlhofo go tlhatlogela kwa thabeng.+ 42 Mme Jehofa o ne a nthaya a re, ‘Ba reye o re: “Ga lo a tshwanela go tlhatloga lo ya go tlhabana ka gonne ke tla bo ke se na le lona.+ Fa lo ka tlhatloga, baba ba lona ba tla lo fenya.” ’ 43 Ka jalo, ke ne ka bua le lona, mme lo ne lwa se ka lwa reetsa. Go na le moo, lo ne lwa se ka lwa ikobela taelo ya ga Jehofa mme ka boikgogomoso lwa leka go tlhatlogela kwa thabeng. 44 Foo Baamore ba ba neng ba nna mo thabeng eo ba ne ba tswa ba tla go lo kgatlhantsha mme ba lo leleka fela jaaka dinotshe di dira, mme ba ne ba lo gasamisa mo Seire go ya go fitlha kwa Horema. 45 Ka jalo, lo ne lwa boa mme lwa simolola go lela fa pele ga ga Jehofa, mme gone Jehofa o ne a se ka a lo reetsa kgotsa a lo sekegela tsebe. 46 Ke gone ka moo lo neng lwa tswelela lo nna kwa Kadeshe lobaka lo loleele.

2 “Go tswa foo, re ne ra fapoga mme ra ya kwa nageng ka tsela ya Lewatle le Lehibidu, fela jaaka Jehofa a ne a mpoleletse,+ mme re ne ra tsamaya malatsi a le mantsi go dikologa Thaba ya Seire. 2 La bofelo Jehofa o ne a nthaya a re, 3 ‘Lo dikologile thaba eno ka lobaka lo loleele. Jaanong yang kwa bokone. 4 Mme o neye batho taelo eno: “Lo fete gaufi le molelwane wa bomorwarraalona, ditlogolwana tsa ga Esau,+ ba ba nnang mo Seire+ mme ba tla boifa ka ntlha ya lona,+ mme lo tshwanetse go nna kelotlhoko thata. 5 Lo se ka lwa tlhabana le bone* ka gonne ga nkitla ke lo naya lefatshe lepe la bone, tota le fa e le karolo e e lekanang le motlhala wa lonao, ka gonne ke neile Esau Thaba ya Seire gore a nne mo go yone.+ 6 Lo ba neye madi a dijo tse lo tla di jang e bile lo duelele metsi a lo tla a nwang.+ 7 Gonne Jehofa, Modimo wa gago o go segofaditse mo go sotlhe se o se dirileng. Modimo o tlhaloganya sentle gore o ne wa tsamaya o raletse naga eno e kgolo. Jehofa, Modimo wa gago o ntse a na le wena dingwaga tseno tse 40 e bile ga o a tlhaela sepe.”’+ 8 Ka jalo, re ne ra feta gaufi le bomorwarraarona, ditlogolwana tsa ga Esau,+ ba ba nnang kwa Seire, re tsamaela kgakala le tsela ya Araba le Elatha le Esione-gebere.+

“Morago ga moo, re ne ra fapoga mme ra tsamaya ka tsela ya naga ya Moabe.+ 9 Foo Jehofa o ne a nthaya a re, ‘O se ka wa tlhabana le Moabe kgotsa wa mo lwantsha ka gonne ga nkitla ke go naya lefatshe lepe la gagwe gore o nne mo go lone, ka gonne ditlogolwana tsa ga Lote+ ke di neile Ara gore di nne mo go yone. 10 (Ke kwa Baemime+ ba neng ba nna gone pele, setšhaba se segolo le sa batho ba bantsi ba baleele jaaka Baanake. 11 Barefaime+ le bone ba ne ba tsewa jaaka Baanake,+ mme Bamoabe ba ne ba tle ba ba bitse Baemime. 12 Mo nakong e e fetileng, Bahore+ ba ne ba nna mo Seire, mme ditlogolwana tsa ga Esau di ne tsa gapa lefatshe leo, tsa ba nyeletsa di bo di nna mo go lone,+ fela jaaka Iseraele a tla dira ka lefatshe le a tla nnang mo go lone, le ruri Jehofa a tla le mo nayang.) 13 Jaanong tsamayang mme lo kgabaganye Mokgatšha* wa Serede.’ Ka jalo, re ne ra kgabaganya Mokgatšha* wa Serede.+ 14 Go ne ga re tsaya dingwaga di le 38 go tswa kwa Kadeshe-barenea go fitlha re kgabaganya Mokgatšha* wa Serede, go fitlha kokomana yotlhe ya banna ba ntwa e swa, fela jaaka Jehofa a ne a ba ikanetse.+ 15 Jehofa o ne a ba nyeletsa ka maatla* a gagwe go fitlha ba fela.+

16 “Fela fa banna botlhe ba ntwa ba sena go swa,+ 17 Jehofa o ne a bua le nna gape a re, 18 ‘Gompieno o tla feta fa karolong ya naga ya Moabe, e leng Ara. 19 Fa o feta gaufi le Baamone, o se ka wa ba tshwenya kgotsa wa ba rumola ka gonne ga nkitla ke go naya lefatshe lepe la Baamone gore o nne mo go lone ka gonne ke le neile ditlogolwana tsa ga Lote gore di nne mo go lone.+ 20 Lefatshe leno le lone le ne le tle le tsewe e le la Barefaime.+ (Ke kwa Barefaime ba neng ba nna gone pele, mme Baamone ba ne ba tle ba ba bitse Basamesumime. 21 E ne e le setšhaba se segolo sa batho ba bantsi e bile ba le baleele jaaka Baanake;+ mme Jehofa o ne a ba nyeletsa fa pele ga Baamone, mme ba ne ba ba leleka ba bo ba nna mo lefatsheng la bone. 22 Seo ke se a neng a se direla ditlogolwana tsa ga Esau, tse gone jaanong di nnang kwa Seire,+ fa a ne a nyeletsa Bahore+ fa pele ga bone gore ba ba leleke mo lefatsheng leo ba bo ba nna mo go lone go fitlha mo letsatsing leno. 23 Fa e le Baafime bone, ba ne ba nna mo metsaneng go ya go fitlha kwa Gasa+ go fitlha Bakafetorime,+ ba ba neng ba tswa kwa Kafetore,* ba ba nyeletsa ba bo ba nna mo lefatsheng la bone.)

24 “‘Tsamayang, mme lo kgabaganye Mokgatšha* wa Arenone.+ Bona, ke tsentse Sihone+ wa Moamore, kgosi ya Heshebone, mo seatleng sa gago. Ka jalo, simololang go gapa lefatshe la gagwe mme lo lwe le ene. 25 Mo letsatsing leno ke tla simolola go dira gore batho botlhe ba ba mo lefatsheng ba ba utlwang pego ka ga gago ba tshoge ba bo ba go boife. Ba tla fuduega e bile ba tla roroma* ka ntlha ya gago.’+

26 “Foo ke ne ka romela barongwa go tswa kwa nageng ya Kedemothe+ go ya kwa go Kgosi Sihone wa Heshebone, ba tshotse mafoko ano a kagiso,+ 27 ‘Mma ke kgabaganye mo lefatsheng la gago. Ke tla tsamaya fela mo tseleng mme ga nkitla ke fapogela ka fa mojeng kgotsa ka fa molemeng.+ 28 Ke tla ja fela dijo tse o tla di nthekisetsang e bile ke tla nwa fela metsi a o tla a nthekisetsang. Ntetle fela go kgabaganya ka dinao 29 go fitlha ke kgabaganya Joredane ke tsena mo lefatsheng le Jehofa, Modimo wa rona a le re nayang. Seno ke se ditlogolwana tsa ga Esau tse di nnang kwa Seire le Bamoabe ba ba nnang kwa Ara ba neng ba se ntirela.’ 30 Le fa go ntse jalo, Kgosi Sihone wa Heshebone o ne a se ka a re letla go kgabaganya ka gonne Jehofa, Modimo wa rona* o ne a mo letla gore a nne tlhogoethata+ le gore pelo ya gagwe e kgwaralale, e le gore a mo tsenye mo seatleng sa gago fela jaaka go diragetse gone jaanong.+

31 “Go tswa foo, Jehofa o ne a nthaya a re, ‘Bona, ke setse ke simolotse go go naya Sihone le lefatshe la gagwe. Simolola go gapa lefatshe la gagwe.’+ 32 E rile Sihone mmogo le batho botlhe ba gagwe ba tswa ba tla go re kgatlhantsha gore ba lwe le rona kwa Jahase,+ 33 Jehofa, Modimo wa rona o ne a re mo naya, mo re neng ra mo fenya le bomorwawe le batho botlhe ba gagwe. 34 Ka nako eo, re ne ra gapa metse yotlhe ya gagwe mme ra senya motse mongwe le mongwe, go akaretsa banna, basadi le bana. Ga re a ka ra tlogela mofalodi ope.+ 35 Ke leruo fela le re neng ra le ikgapela, mmogo le dilo tse re neng re di tsere mo metseng e re neng ra e gapa. 36 Go tswa kwa Aroere,+ e e fa losing lwa Mokgatšha* wa Arenone (go akaretsa le motse o o mo mokgatšheng), go ya go fitlha kwa Gileade, go ne go se na motse ope o re neng ra se ka ra o fitlhelela. Jehofa, Modimo wa rona o ne a re e naya yotlhe.+ 37 Le fa go ntse jalo, ga lo a ka lwa atamela lefatshe la Baamone,+ lotshitshi lotlhe lwa Mokgatšha* wa Jaboke+ le metse e e mo kgaolong e e dithaba kgotsa lefelo lepe fela le Jehofa, Modimo wa rona a neng a re thibetse go ya kwa go lone.

3 “Go tswa foo, re ne ra tsamaya ka Tsela ya Bashana. Mme Oge, kgosi ya kwa Bashana, o ne a tswa le batho botlhe ba gagwe go tla go re kgatlhantsha gore a tlhabane le rona kwa Ederei.+ 2 Ka jalo, Jehofa o ne a nthaya a re, ‘O se ka wa mmoifa ka gonne ke tla mo tsenya mo seatleng sa gago, ene le batho botlhe ba gagwe le lefatshe la gagwe, mme o tla mo dira fela jaaka o dirile Sihone kgosi ya Baamore, yo o neng a nna kwa Heshebone.’ 3 Ka jalo, gape Jehofa, Modimo wa rona o ne a tsenya Kgosi Oge wa kwa Bashana le batho botlhe ba gagwe mo seatleng sa rona, mme re ne ra nna ra mo kgemetha go fitlha go se na ope wa batho ba gagwe yo o falotseng. 4 Go tswa foo, re ne ra gapa metse yotlhe ya gagwe. Go ne go se na motse ope o re neng ra se ka ra o tsaya mo go bone. Re ne ra gapa metse e le 60, kgaolo yotlhe ya Aregobe, bogosi jwa ga Oge kwa Bashana.+ 5 Metse eno yotlhe e ne e sireleditswe ka dipota tse di kwa godimo, ditswalo le mephakalego. Gape re ne ra gapa metse ya selegae e le mentsi. 6 Le fa go ntse jalo, re ne ra e senya,+ fela jaaka re ne re dirile ka Kgosi Sihone wa Heshebone, fa re ne re senya motse mongwe le mongwe, go akaretsa banna, basadi le bana.+ 7 Mme re ne ra itseela leruo lotlhe le dilo tsotlhe tse re neng re di gapile mo metseng eo.

8 “Ka nako eo, re ne ra gapa lefatshe la dikgosi tse pedi tsa Baamore+ tse di neng di le mo kgaolong ya Joredane, go simologa kwa Mokgatšheng* wa Arenone go ya go fitlha kwa Thabeng ya Heremone+ 9 (thaba e Basidona ba neng ba tle ba e bitse Sirione, mme Baamore bone ba ne ba tle ba e bitse Senire), 10 metse yotlhe ya naga e e kwa godimo e e sephaphathi, Gileade yotlhe le Bashana yotlhe go ya go fitlha kwa Saleka le Ederei,+ metse e e neng e le ya bogosi jwa ga Oge kwa Bashana. 11 Gonne Kgosi Oge wa kwa Bashana e ne e le ene wa bofelo yo o neng a setse wa Barefaime. Lekese* la gagwe le ne le dirilwe ka tshipi* mme le sa ntse le le kwa Raba wa Baamone. Boleele jwa lone ke dimetara di le nnê* mme bophara jwa lone ke disentimetara di le 89, go ya ka selekanyo se se tlhomameng. 12 Ka nako eo, re ne ra gapa lefatshe leno. Le simologa kwa Aroere,+ e e fa Mokgatšheng* wa Arenone, mme le akaretsa halofo ya kgaolo e e dithaba ya Gileade. Metse e e koo, ke ne ka e naya Barubene le Bagada.+ 13 Mme kgaolo e e setseng ya Gileade le Bashana yotlhe ya bogosi jwa ga Oge, ke di abetse halofo ya lotso lwa ga Manase.+ Kgaolo yotlhe ya Aregobe, ya Bashana, e ne e itsege e le lefatshe la Barefaime.

14 “Jaire+ morwa Manase o ne a tsaya kgaolo yotlhe ya Aregobe+ go ya go fitlha kwa molelwaneng wa Bageshure le Bamaakathe,+ mme o ne a bitsa metsana eo ya kwa Bashana ka leina la gagwe e leng Hafotha-jaire,*+ go tla go fitlha mo letsatsing leno. 15 Mme Makire ke mo neile Gileade.+ 16 Mme Barubene le Bagada+ bone ke ba abetse go tswa kwa Gileade go ya kwa Mokgatšheng* wa Arenone, karolo e e fa gare ya mokgatšha e le molelwane wa bone, go ya go fitlha kwa Jaboke, mokgatšha o e leng molelwane wa Baamone, 17 le Araba le Joredane le lotshitshi lwa yone, go simologa kwa Kinerethe go ya kwa Lewatleng la Araba, e leng Lewatle la Letswai,* kwa tlase ga mekgokolosa ya Pisega go ela kwa ntlheng ya botlhaba.+

18 “Morago ga moo, ke ne ka lo naya taelo eno: ‘Jehofa, Modimo wa lona o lo neile lefatshe leno gore lo nne mo go lone. Banna botlhe ba lona ba ba pelokgale ba tla tsaya dibetsa ba bo ba kgabaganya fa pele ga bomorwarraalona, e bong Baiseraele.+ 19 Basadi ba lona le bana ba lona ke bone fela ba ba tla tswelelang ba nna mo metseng e ke lo e neileng, mmogo le leruo la lona (ke itse sentle gore lo na le leruo le lentsi thata), 20 go fitlha Jehofa a naya bomorwarraalona boikhutso, fela jaaka a dira ka lona, mme le bone ba setse ba gapile lefatshe le Jehofa, Modimo wa lona a tla le ba nayang ka kwa ga Joredane. Morago ga moo, lo tla boela morago, mongwe le mongwe kwa bosweng jwa gagwe jo ke lo bo neileng.’+

21 “Ka nako eo, ke ne ka laela Joshua+ jaana: ‘O iponetse ka matlho a gago se Jehofa, Modimo wa lona a se dirileng dikgosi tse pedi tseno. Jehofa o tla dira se se tshwanang ka magosi otlhe a o tla kgabaganyetsang kwa go one.+ 22 Ga lo a tshwanela go ba boifa ka gonne Jehofa, Modimo wa lona ke ene yo o lo tlhabanelang.’+

23 “Ka nako eo, ke ne ka rapela Jehofa ka re, 24 ‘Ao tlhe Morena Molaodimogolo Jehofa, o setse o simolotse go bontsha motlhanka wa gago bogolo jwa gago le lebogo la gago le le nonofileng,+ gonne ke modimo ofe kwa magodimong kgotsa mo lefatsheng yo o dirang ditiro tse dikgolo jaaka wena?+ 25 Tsweetswee, mma ke kgabaganye mme ke bone lefatshe le le molemo le le ka kwa ga Joredane, kgaolo eno e ntle e e dithaba le Lebanona.’+ 26 Mme gone, Jehofa o ne a sa ntse a nkgalefetse ka ntlha ya lona,+ mme ga a ka a ntheetsa. Go na le moo, Jehofa o ne a nthaya a re, ‘Go lekane! O se ka wa tlhola o bua le nna gape ka kgang eno. 27 Tlhatlogela kwa godimo ga Pisega+ mme o lebe kwa bophirima le kwa bokone le kwa borwa le kwa botlhaba, mme o lebe lefatshe leno ka gonne ga o kitla o kgabaganya Joredane eno.+ 28 Tlhoma Joshua,+ o mo kgothatse o bo o mo nonotshe ka gonne ke ene yo o tla kgabaganyang+ kwa pele ga setšhaba seno e bile ke ene yo o tla dirang gore se nne mo lefatsheng le o tla le bonang.’ 29 Seno sotlhe se ne sa direga fa re ne re nna mo mokgatšheng o o fa pele ga Bethe-peore.+

4 “Jaanong wena Iseraele, reetsa melao le ditshwetso tsa boatlhodi tse ke di lo rutang gore lo di ikobele, gore lo tshele+ mme lo tsene lo bo lo gape lefatshe le Jehofa, Modimo wa borraalonamogolo, a le lo nayang. 2 Ga lo a tshwanela go oketsa ditaelo tse ke lo di laelang, le gone ga lo a tshwanela go tlosa sepe mo go tsone,+ gore lo kgone go boloka ditaelo tsa ga Jehofa, Modimo wa lona tse ke di lo laelang.

3 “Matlho a lona a bone se Jehofa a neng a se dira mo kgannyeng ya ga Baale wa Peore; Jehofa, Modimo wa lona o ne a nyeletsa motho mongwe le mongwe yo o neng a sala Baale wa Peore+ morago. 4 Mme lona ba lo ngaparetseng Jehofa, Modimo wa lona, lotlhe lo a tshela gompieno. 5 Bonang, ke lo rutile melao le ditshwetso tsa boatlhodi,+ fela jaaka Jehofa, Modimo wa me a ntaetse, gore lo di ikobele kwa lefatsheng le lo tla nnang kwa go lone. 6 Lo tshwanetse go di latela ka kelotlhoko,+ ka gonne fa lo dira jalo, ditšhaba tse di tla utlwang ka melao eno yotlhe di tla bona gore lo botlhale+ e bile lo na le tlhaloganyo,+ mme di tla re, ‘Ruri setšhaba seno se segolo ke setšhaba se se botlhale le se se nang le tlhaloganyo.’+ 7 Gonne ke setšhaba sefe se segolo se se nang le medimo e e gaufi le sone jaaka Jehofa, Modimo wa rona a le gaufi le rona nako nngwe le nngwe fa re mmitsa?+ 8 E bile ke setšhaba sefe se segolo se se nang le melao e e siameng le ditshwetso tsa boatlhodi tse di tshwanang le Molao ono otlhe o ke o bayang fa pele ga lona gompieno?+

9 “Lo nne kelotlhoko lo bo lo itise thata, gore lo se ka lwa lebala dilo tse lo di boneng ka matlho le gore di se ka tsa tloga mo pelong ya lona malatsi otlhe a botshelo jwa lona. Gape lo tshwanetse go di itsise bomorwaalona le barwa ba bomorwaalona.+ 10 Ka letsatsi le lo neng lwa ema fa pele ga ga Jehofa, Modimo wa lona kwa Horeba, Jehofa o ne a nthaya a re, ‘Phuthela batho kwa go nna gore ba tle ba utlwe mafoko a me,+ gore ba ithute go mpoifa+ malatsi otlhe fa ba ntse ba tshela mo lefatsheng le gore ba a rute bomorwaabone.’+

11 “Ka jalo, lo ne lwa atamela mme lwa ema fa tlase ga thaba mme molelo o ne o tuka mo thabeng o tlhatlogela kwa magodimong;* go ne go le lefifi, go na le leru e bile go le letobo le lentshontsho.+ 12 Mme Jehofa o ne a simolola go bua le lona go tswa mo molelong.+ Lo ne lwa utlwa mafoko fela, mme lo ne lo sa bone ope yo o buang,+ go ne go utlwala lentswe fela.+ 13 Mme o ne a lo itsise kgolagano ya gagwe,+ e leng Melao e e Lesome* e a neng a lo laela gore lo e boloke.+ Morago ga moo, o ne a e kwala mo dikwalelong tse pedi tsa leje.+ 14 Ka nako eo, Jehofa o ne a ntaela gore ke lo rute melao le ditshwetso tsa boatlhodi tse lo tla di ikobelang kwa lefatsheng le lo tla tsenang kwa go lone gore e nne la lona.

15 “Mo letsatsing le Jehofa a neng a bua le lona ka lone kwa Horeba go tswa mo molelong lo ne lwa se ka lwa bona popego epe. Ka jalo, lo ikele tlhoko thata 16 e bile lo se ka lwa dira ka go sa ikanyege ka go itirela setshwantsho sepe se se betlilweng se se tshwanang le popego ya letshwao lepe, setshwantsho sa monna kgotsa mosadi,+ 17 setshwantsho sa phologolo epe e e mo lefatsheng kgotsa setshwantsho sa nonyane epe e e fofang mo loaping,+ 18 setshwantsho sa sepe se se gagabang fa fatshe kgotsa setshwantsho sa tlhapi epe e e mo metsing ka fa tlase ga lefatshe.+ 19 Mme fa lo tsholeletsa matlho a lona kwa magodimong lo bo lo bona letsatsi le ngwedi le dinaledi, e leng lesomo lotlhe la magodimo, lo se ka lwa raelesega mme lwa di ikobela le go di direla.+ Jehofa, Modimo wa lona o di abetse ditšhaba tsotlhe tse di mo lefatsheng. 20 Mme ke lona ba Jehofa a neng a lo tsaya a bo a lo ntsha kwa Egepeto, kwa lo neng lo boga botlhoko gone jaaka e kete lo mo molelong o mogolo o o nyerolosang tshipi. O ne a lo ntsha gore lo nne setšhaba se e leng thuo ya gagwe e e kgethegileng,*+ jaaka fa lo ntse gompieno.

21 “Jehofa o ne a nkgalefela ka ntlha ya lona+ mme o ne a ikana gore nka se kgabaganye Joredane kgotsa nka se tsene mo lefatsheng le le molemo le Jehofa, Modimo wa lona a le lo nayang gore e nne boswa.+ 22 Gonne ke tla swela mo lefatsheng leno; ga nkitla ke kgabaganya Joredane,+ mme lona lo tla kgabaganya lo bo lo nna mo lefatsheng leno le le molemo. 23 Lo nne kelotlhoko gore lo se ka lwa lebala kgolagano ya ga Jehofa, Modimo wa lona e a neng a e dira le lona,+ mme lo se ka lwa itirela setshwantsho se se betlilweng, popego ya sepe fela se Jehofa, Modimo wa lona a lo thibetseng go se dira.+ 24 Gonne Jehofa, Modimo wa lona o tshwana le molelo o o lailang,+ Modimo yo o batlang gore batho ba mo obamele a le esi.+

25 “Fa lo nna le bana ba basimane le barwa ba bomorwaalona mme lo setse lo ntse lobaka lo loleele mo lefatsheng lo bo lo dira ka go sa ikanyege mme lo dira setshwantsho se se betlilweng+ sa mofuta ope fela e bile lo dira se se bosula mo matlhong a ga Jehofa, Modimo wa lona gore lo mo kgopise,+ 26 ke tsaya magodimo le lefatshe e le basupi gompieno gore ruri lo tla nyelela ka bonako mo lefatsheng le lo kgabaganyang Joredane lo ya go le rua. Ga lo kitla lo nna lobaka mo go lone, mme lo tla nyelediwa setlhogo.+ 27 Jehofa o tla lo gasamisetsa mo ditšhabeng,+ mme go tla sala ba le mmalwa fela+ ba lona mo ditšhabeng tse Jehofa a tla bong a lo leleketse kwa go tsone. 28 Fa lo le koo lo tla tshwanelwa ke go direla medimo ya logong le leje e e dirilweng ka diatla tsa motho,+ medimo e e sa kgoneng go bona kgotsa go utlwa kgotsa go ja kgotsa go dupa.

29 “Fa lo batla Jehofa, Modimo wa lona lo le koo, ruri lo tla mmona+ fa e le gore lo mmatla ka pelo yotlhe ya lona le ka moya otlhe wa lona.+ 30 Fa lo le mo matshwenyegong a magolo mme dilo tseno tsotlhe di lo diragaletse mo dinakong tse di tla latelang, foo lo tla boela kwa go Jehofa, Modimo wa lona lo bo lo reetsa lentswe la gagwe.+ 31 Gonne Jehofa, Modimo wa lona ke Modimo yo o kutlwelobotlhoko.+ Ga a kitla a lo latlha kgotsa a lo senya kgotsa a lebala kgolagano e a neng a e ikanela borraalonamogolo.+

32 “Jaanong botsang ka malatsi a pele, a a nnileng teng pele ga nako ya lona, go simolola ka letsatsi le Modimo a neng a bopa motho ka lone mo lefatsheng; batlisisang go tswa kwa ntlheng e nngwe ya magodimo go ya kwa ntlheng e nngwe ya magodimo. A go na le sengwe se segolo thata se se kileng sa diragala kgotsa a go kile ga utlwiwa sengwe se se tshwanang le sone?+ 33 A go na le setšhaba sepe se sengwe se se kileng sa utlwa lentswe la Modimo le bua go tswa mo molelong ka tsela e lona lo le utlwileng ka yone mme lwa tswelela lo tshela?+ 34 Kgotsa a Modimo o kile a leka go itseela setšhaba go tswa mo setšhabeng se sengwe? A o kile a dirisa dikatlholo,* ditshupo, dikgakgamatso,+ ntwa,+ maatla a magolo,+ nonofo e kgolo le ditiro tse di boifisang?+ A Jehofa, Modimo wa lona o kile a dira se a neng a se lo direla kwa Egepeto fa pele ga matlho a lona? 35 Lona lo bontshitswe dilo tseno gore lo tle lo itse gore Jehofa ke Modimo wa boammaaruri;+ ga go na ope yo mongwe kwantle ga gagwe.+ 36 O ne a dira gore lo utlwe lentswe la gagwe go tswa kwa magodimong gore a lo tlhamalatse, mme o ne a dira gore lo bone molelo wa gagwe o mogolo mo lefatsheng e bile lo ne lwa utlwa mafoko a gagwe go tswa mo molelong.+

37 “E re ka a ile a rata borraalonamogolo e bile a ile a tlhopha losika lwa bone morago ga bone,+ o ne a lo ntsha kwa Egepeto ka maatla a gagwe a magolo a lo beile leitlho. 38 O ne a leleka fa pele ga lona ditšhaba tse dikgolo le tse di thata go lo feta, gore a lo tsenye mo lefatsheng la tsone mme a le lo neye gore e nne boswa, jaaka fa go ntse gompieno.+ 39 Ka jalo, lo itse mo letsatsing leno lo bo lo tsenye seno mo pelong gore Jehofa ke Modimo wa boammaaruri kwa magodimong kwa godimo le mo lefatsheng fa tlase.+ Ga go na ope yo mongwe.+ 40 Lo tshwanetse go boloka melao ya gagwe le ditaelo tsa gagwe tse ke di lo laelang gompieno gore dilo di lo tsamaele sentle le bomorwaalona morago ga lona, gore lo tle lo nne lobaka lo loleele mo lefatsheng le Jehofa, Modimo wa lona a le lo nayang.”+

41 Ka nako eo, Moshe o ne a tlhaola metse e le meraro ka fa botlhaba jwa Joredane.+ 42 Fa mmolai ope a bolaya motho yo mongwe e se ka boomo mme a ne a sa mo tlhoa,+ o tshwanetse go tshabela kwa motseng mongwe wa metse eno mme a tshele.+ 43 Metse eo ke Besere+ e e kwa nageng mo karolong e e kwa godimo e e sephaphathi e le ya Barubene, Ramothe+ e e kwa Gileade e le ya Bagada le Golane+ e e kwa Bashana e le ya Bamanase.+

44 Jaanong ono ke Molao+ o Moshe a neng a o baya fa pele ga batho ba Iseraele. 45 Tseno ke dikgakololo, melao le ditshwetso tsa boatlhodi tse Moshe a neng a di naya Baiseraele fa ba sena go tswa kwa Egepeto,+ 46 kwa kgaolong ya Joredane, mo mokgatšheng o o lebaganeng le Bethe-peore,+ kwa lefatsheng la ga Kgosi Sihone wa Baamore, yo o neng a nna kwa Heshebone,+ yo Moshe le Baiseraele ba neng ba mo fenya fa ba sena go tswa kwa Egepeto.+ 47 Mme ba ne ba gapa lefatshe la gagwe le lefatshe la ga Kgosi Oge+ wa kwa Bashana, dikgosi tse pedi tsa Baamore tse di neng di le mo kgaolong e e ka fa botlhaba jwa Joredane, 48 go simologa kwa Aroere,+ e e fa losing lwa Mokgatšha* wa Arenone, go ya go fitlha kwa Thabeng ya Sione, e leng Heremone,+ 49 le Araba yotlhe mo kgaolong e e ka fa botlhaba jwa Joredane, le go ya go fitlha kwa Lewatleng la Araba,* fa tlase ga mekgokolosa ya Pisega.+

5 Go tswa foo, Moshe o ne a bitsa Iseraele yotlhe mme a e raya a re: “Wena Iseraele, utlwang melao le ditshwetso tsa boatlhodi tse ke di lo itsiseng gompieno, mme lo tshwanetse go di ithuta lo bo lo di ikobele ka kelotlhoko. 2 Jehofa, Modimo wa rona o ne a dira kgolagano le rona kwa Horeba.+ 3 Jehofa ga a ka a dira kgolagano eno le borraaronamogolo, mme o e dirile le rona, rona rotlhe ba re leng fano gompieno. 4 Jehofa o ne a bua le lona lo lebane difatlhego le ene mo thabeng go tswa mo molelong.+ 5 Ka nako eo, ke ne ke eme fa gare ga ga Jehofa le lona+ gore ke lo bolelele lefoko la ga Jehofa ka gonne lo ne lo boifa ka ntlha ya molelo mme lo ne lwa se ka lwa tlhatlogela mo thabeng.+ O ne a re:

6 “‘Ke nna Jehofa, Modimo wa gago, yo o go ntshitseng kwa lefatsheng la Egepeto, kwa lefatsheng la bokgoba.+ 7 Ga o a tshwanela go nna le medimo epe e mengwe kwantle ga me.*+

8 “‘Ga o a tshwanela go itirela setshwantsho se se betlilweng+ kgotsa sengwe se se bopegileng jaaka* sepe fela se se kwa magodimong kwa godimo kgotsa mo lefatsheng fa fatshe kgotsa mo metsing ka fa tlase ga lefatshe. 9 Ga o a tshwanela go di ikobela kgotsa wa tlhotlhelediwa go di direla+ ka gonne nna Jehofa, Modimo wa gago, ke Modimo yo o batlang gore batho ba nkobamele ke le esi,+ yo o otlhaelang bana ba basimane molato wa borraabone mo kokomaneng ya boraro le mo kokomaneng ya bonê ya ba ba ntlhoileng,+ 10 mme ba ba nthatang e bile ba boloka ditaelo tsa me ke ba bontsha lorato lo lo sa kgaotseng* go ya dikokomaneng tsa bone di le diketekete.

11 “‘Ga o a tshwanela go dirisa leina la ga Jehofa, Modimo wa gago ka tsela e e se nang mosola+ ka gonne Jehofa o tla otlhaya yo o dirisang leina la gagwe ka tsela e e se nang mosola.+

12 “‘Gakologelwa letsatsi la Sabata gore o le boloke le le boitshepo, fela jaaka Jehofa, Modimo wa gago a go laetse.+ 13 O dire tiro yotlhe ya gago o bo o e wetse mo malatsing a le marataro,+ 14 mme letsatsi la bosupa ke sabata e e direlwang go tlotla Jehofa, Modimo wa gago.+ Ga o a tshwanela go dira tiro epe,+ e ka tswa e le wena kgotsa morwao kgotsa morwadio kgotsa motlhanka wa gago kgotsa lelata la gago kgotsa poo ya gago kgotsa tonki ya gago kgotsa seruiwa sepe fela sa gago kgotsa motswakwa yo o mo teng ga metse*+ ya gago, gore motlhanka wa gago le lelata la gago ba ikhutse fela jaaka wena.+ 15 Gakologelwa gore o ne wa nna lekgoba kwa lefatsheng la Egepeto le gore Jehofa, Modimo wa gago o ne a go ntsha koo ka seatla se se nonofileng le ka lebogo le le otlolotsweng.+ Ke gone ka moo Jehofa, Modimo wa gago a neng a go laela gore o boloke letsatsi la Sabata.

16 “‘Tlotla rrago le mmago,+ fela jaaka Jehofa, Modimo wa gago a go laetse, gore o tle o tshele lobaka lo loleele le gore o tle o atlege* mo lefatsheng le Jehofa, Modimo wa gago a le go nayang.+

17 “‘Ga o a tshwanela go bolaya motho.+

18 “‘Ga o a tshwanela go dira boaka.+

19 “‘Ga o a tshwanela go utswa.+

20 “‘Ga o a tshwanela go naya bosupi jwa maaka jo bo latofatsang motho yo mongwe.+

21 “‘Ga o a tshwanela go eletsa mosadi wa motho yo mongwe.+ E bile ga o a tshwanela go eletsa ntlo ya motho yo mongwe ka bopelotshetlha kgotsa tshimo ya gagwe kgotsa motlhanka wa gagwe kgotsa lelata la gagwe kgotsa poo ya gagwe kgotsa tonki ya gagwe kgotsa sepe fela sa motho yo mongwe.’+

22 “Jehofa o ne a bua ditaelo* tseno le lona lotlhe fa lo ne lo phuthegile mo thabeng, a bua ka lentswe le le kwa godimo go tswa mo molelong, mo lerung le mo lefifing le lentshontsho,+ mme o ne a se ka a oketsa ka sepe; morago ga moo o ne a di kwala mo dikwalelong tse pedi tsa leje a bo a di nnaya.+

23 “Mme fela fa lo ne lo sena go utlwa lentswe le tswa mo lefifing, fa molelo o ne o tuka mo thabeng,+ ditlhogo tsotlhe tsa ditso tsa lona le bagolwane ba ne ba nkatamela. 24 Foo lo ne lwa re, ‘Bona, Jehofa, Modimo wa rona o re bontshitse kgalalelo ya gagwe le bogolo jwa gagwe e bile re utlwile lentswe la gagwe le tswa mo molelong.+ Gompieno re bone gore Modimo o kgona go bua le motho mme motho yoo a bo a kgona go tswelela a tshela.+ 25 Jaanong, ke ka ntlha yang fa re tshwanetse go swa? Gonne molelo ono o mogolo o ka nna wa re laila. Fa re tswelela re utlwa lentswe la ga Jehofa, Modimo wa rona, ruri re tla swa. 26 Gonne ke mang mo bathong botlhe* yo o utlwileng lentswe la Modimo yo o tshelang le bua go tswa mo molelong jaaka re le utlwile mme a bo a tswelela a tshela? 27 A go atamele wena gore o utlwe sotlhe se Jehofa, Modimo wa rona a tla se buang, go tswa foo o bo o re bolelela sotlhe se Jehofa, Modimo wa rona a se buang le wena, mme re tla reetsa re bo re se dira.’+

28 “Ka jalo, Jehofa o ne a utlwa mafoko a lo neng lwa a bua le nna, mme Jehofa o ne a nthaya a re, ‘Ke utlwile mafoko a setšhaba seno se a buileng le wena. Sotlhe se ba se buileng se molemo.+ 29 Fa fela ba ne ba ka tswelela ba na le pelo e e ikemiseditseng go mpoifa+ le go boloka ditaelo tsotlhe tsa me;+ foo dilo di ne di tla ba tsamaela sentle ka bosakhutleng, bone le bomorwaabone!+ 30 Tsamaya o ba reye o re: “Boelang kwa ditenteng tsa lona.” 31 Le fa go ntse jalo, wena o nne fano le nna, mme mma ke go bolelele ditaelo tsotlhe, melao yotlhe le ditshwetso tsotlhe tsa boatlhodi tse o tshwanetseng go di ba ruta le tse ba tla tshwanelwang ke go di ikobela mo lefatsheng le ke le ba nayang gore ba le rue.’ 32 Jaanong lo tlhomamise gore lo dira fela jaaka Jehofa, Modimo wa lona a lo laetse.+ Ga lo a tshwanela go tsaya tsela e e phoso.+ 33 Lo tsamaye mo tseleng yotlhe e Jehofa, Modimo wa lona a e lo laetseng,+ e le gore lo tshele lo bo lo atlege le gore malatsi a lona a nne maleele mo lefatsheng le lo tla le ruang.+

6 “Jaanong tseno ke ditaelo, melao le ditshwetso tsa boatlhodi tse Jehofa, Modimo wa lona a di lo neileng gore lo di rutiwe, gore lo di ikobele fa lo kgabaganyetsa mo lefatsheng le lo yang go le rua, 2 e le gore o boife Jehofa, Modimo wa gago o bo o boloke melao yotlhe ya gagwe le ditaelo tsa gagwe tse ke di go laelang malatsi otlhe a botshelo jwa gago, gore o tle o tshele lobaka lo loleele,+ wena le morwao le morwa wa ga morwao.+ 3 Mme wena Iseraele, o tshwanetse go di reetsa le go di ikobela ka kelotlhoko, gore o tle o atlege o bo o nne montsi thata mo lefatsheng le le elelang mashi le tswina ya dinotshe, fela jaaka Jehofa, Modimo wa borragomogolo, a go solofeditse.

4 “Reetsa, wena Iseraele: Jehofa, Modimo wa rona ke Jehofa a le mongwe fela.+ 5 O tshwanetse go rata Jehofa, Modimo wa gago, ka pelo yotlhe ya gago le ka moya otlhe wa gago+ le ka nonofo* yotlhe ya gago.+ 6 Mafoko ano a ke go a laelang gompieno a tshwanetse go nna mo pelong ya gago, 7 mme o tshwanetse go a jalela kwa teng* mo go bomorwao+ o bo o bue ka one fa o ntse mo ntlong ya gago le fa o tsamaya mo tseleng le fa o rapama le fa o tsoga.+ 8 O a bofelele mo seatleng sa gago jaaka sengwe se se go gopotsang, mme a tshwanetse go nna jaaka lebanta la tlhogo mo phatleng ya gago.*+ 9 O a kwale mo foreiming* ya ntlo ya gago le mo dikgorong tsa gago.

10 “Fa Jehofa, Modimo wa gago a go tsenya mo lefatsheng le a neng a ikanela borragomogolo e bong Aborahame, Isake le Jakobe gore o tla le go naya,+ e leng metse e megolo le e mentle e o sa e agang,+ 11 matlo a a tletseng dilo tse di molemo tsa mefuta yotlhe tse o sa di berekelang, dikhuti tsa go bolokela metsi* tse o sa di epang le masimo a morara* le ditlhare tsa motlhware tse o sa di jalang, mme fa o setse o jele e bile o kgotsofetse,+ 12 o nne kelotlhoko gore o se ka wa lebala Jehofa,+ yo o go ntshitseng kwa lefatsheng la Egepeto, kwa lefatsheng la bokgoba. 13 O boife Jehofa, Modimo wa gago+ o bo o mo direle,+ mme o ikane ka leina la gagwe.+ 14 Ga lo a tshwanela go sala medimo e mengwe morago, medimo epe fela ya ditšhaba tse di lo dikologileng,+ 15 ka gonne Jehofa, Modimo wa gago yo o nang le wena ke Modimo yo o batlang gore batho ba mo obamele a le esi.+ Go seng jalo, bogale jwa ga Jehofa, Modimo wa gago bo tla go tukela+ mme o tla go nyeletsa a go tlosa mo godimo ga lefatshe.+

16 “Ga lo a tshwanela go leka Jehofa, Modimo wa lona+ ka tsela e lo neng lwa mo leka ka yone kwa Masa.+ 17 Lo boloke ka kelotlhoko ditaelo tsa ga Jehofa, Modimo wa lona le dikgakololo tsa gagwe le melao ya gagwe e a lo laetseng gore lo e boloke. 18 O tshwanetse go dira se se siameng le se se molemo mo matlhong a ga Jehofa, gore o tle o atlege le gore o tsene o bo o gape lefatshe le le molemo le Jehofa a neng a ikana gore o tla le naya borragomogolo,+ 19 ka go leleka baba ba gago botlhe fa pele ga gago, fela jaaka Jehofa a solofeditse.+

20 “Mo nakong e e tlang, fa morwao a go botsa gore, ‘Dikgakololo, melao le ditshwetso tsa boatlhodi tse Jehofa, Modimo wa rona a di lo laetseng di kaya eng?’ 21 foo o reye morwao o re, ‘Re ne ra nna makgoba a ga Faro kwa Egepeto, mme Jehofa o ne a re ntsha kwa Egepeto ka seatla se se nonofileng. 22 Ka jalo, re ne ra bona Jehofa a nna a romela ditshupo le dikgakgamatso tse dikgolo le tse di senyang, kwa Egepeto,+ mo go Faro le mo go botlhe ba ba mo ntlong ya gagwe.+ 23 Mme o ne a re ntsha koo gore a re tlise fano go tla go re naya lefatshe le a neng a le ikanela borraaronamogolo.+ 24 Go tswa foo, Jehofa o ne a re laela gore re diragatse melao eno yotlhe le gore re boife Jehofa, Modimo wa rona gore re solegelwe molemo ka bosakhutleng,+ gore re tswelele re tshela,+ fela jaaka re tshela gompieno. 25 Fa e le gore re boloka melao eno yotlhe ka kelotlhoko e le go bontsha gore re ikobela* Jehofa, Modimo wa rona, fela jaaka a re laetse, o tla re tsaya re le batho ba ba siameng.’+

7 “Fa Jehofa, Modimo wa gago a go tlisa mo lefatsheng le o tlogang o tsena mo go lone o bo o le rua,+ gape o tla nyeletsa ditšhaba tse di nang le batho ba bantsi fa pele ga gago:+ Bahite, Bagiregashe, Baamore,+ Bakanana, Baperise, Bahife le Bajebuse,+ ditšhaba di le supa tse di nang le batho ba bantsi thata le ba ba maatla go go feta.+ 2 Jehofa, Modimo wa gago o tla go ba naya, mme o tla ba fenya.+ O tshwanetse go ba senya.+ Ga o a tshwanela go dira kgolagano epe le bone e bile o se ka wa ba bontsha kutlwelobotlhoko epe.+ 3 Ga o a tshwanela go dira kgolagano epe ya lenyalo* le bone. O se ka wa tsaya bomorwadio wa ba nyadisa bomorwaabone kgotsa wa tsaya bomorwadiabone wa ba nyadisa bomorwao.+ 4 Gonne ba tla faposa bomorwao mo go ntshaleng morago gore ba direle medimo e mengwe;+ foo bogale jwa ga Jehofa bo tla lo tukela, mme o tla lo nyeletsa ka bonako.+

5 “Go na le moo, seno ke se lo tshwanetseng go se ba dira: Lo dige dibeso tsa bone, lo thube dipilara tsa bone tse di boitshepo,+ lo reme dikota tsa bone tse di boitshepo*+ lo bo lo fise ditshwantsho tsa bone tse di betlilweng.+ 6 Gonne o setšhaba se se boitshepo mo go Jehofa, Modimo wa gago, mme Jehofa, Modimo wa gago o tlhophile wena gore o nne setšhaba sa gagwe, batho ba gagwe ba ba kgethegileng,* go tswa mo ditšhabeng tsotlhe tse di mo godimo ga lefatshe.+

7 “E ne e se ka gonne lo ne lo le bantsi thata go feta ditšhaba tsotlhe go bo Jehofa a ile a lo rata a bo a lo tlhopha,+ gonne lo ne lo le babotlana thata mo ditšhabeng tsotlhe.+ 8 Go na le moo, e ne e le ka gonne Jehofa a ne a lo rata le ka gonne a ne a diragatsa maikano a a neng a a ikanela borraalonamogolo;+ ke gone ka moo Jehofa a neng a lo ntsha ka seatla se se nonofileng, gore a lo golole kwa lefatsheng la bokgoba,+ mo maatleng a* ga Faro kgosi ya Egepeto. 9 O itse sentle gore Jehofa, Modimo wa gago, ke Modimo wa boammaaruri, Modimo yo o ikanyegang, yo o bolokang kgolagano ya gagwe le lorato lo lo sa kgaotseng mo dikokomaneng di le sekete tsa ba ba mo ratang le ba ba bolokang ditaelo tsa gagwe.+ 10 Mme ba ba mo tlhoileng o tla ba senya.+ Ga a kitla a nna bonya go otlhaya ba ba mo tlhoileng; o tla ba senya. 11 Ka jalo, o tlhomamise gore o boloka ditaelo le melao le ditshwetso tsa boatlhodi tse ke di go laelang gompieno, ka go di ikobela.

12 “Fa lo tswelela lo reetsa ditshwetso tseno tsa boatlhodi lo bo lo di ikobela e bile lo di diragatsa, Jehofa, Modimo wa lona o tla diragatsa kgolagano ya gagwe e bile o tla lo bontsha lorato lo lo sa kgaotseng, fela jaaka a ile a ikanela borraalonamogolo. 13 O tla go rata e bile o tla go segofatsa a bo a go ntsifatsa. Eleruri, o tla go segofatsa ka bana ba le bantsi*+ e bile o tla segofatsa maungo a mmu wa gago, dijo tsa gago tsa ditlhaka, beine ya gago e ntšha, leokwane la gago,+ dinamane tsa metlhape ya gago le dikwanyana tsa matsomane a gago, mo lefatsheng le a neng a ikanela borragomogolo gore o tla le go naya.+ 14 O tla segofadiwa thata go gaisa ditšhaba tsotlhe;+ ga go monna kgotsa mosadi ope mo go wena yo o se kitlang a nna le bana e bile diruiwa tsa gago ga di kitla di tlhoka bana.+ 15 Jehofa o tla tlosa malwetse otlhe mo go wena e bile ga a kitla a go tlisetsa bolwetse bope mo malwetseng a a kotsi a o a boneng kwa Egepeto.+ Go na le moo, o tla a tlisetsa botlhe ba ba go tlhoileng. 16 O nyeletse* ditšhaba tsotlhe tse Jehofa, Modimo wa gago a di go nayang.+ Ga o* a tshwanela go di utlwela botlhoko+ e bile ga o a tshwanela go direla medimo ya tsone+ ka gonne seo e tla nna serai mo go wena.+

17 “Fa o ka bua mo pelong ya gago wa re, ‘Ditšhaba tseno di re feta ka palo. Nka kgona jang go di leleka?’+ 18 ga o a tshwanela go di boifa.+ O gopole se Jehofa, Modimo wa gago a neng a se dira Faro le Egepeto yotlhe,+ 19 dikatlholo* tse dikgolo tse o neng wa di bona le ditshupo le dikgakgamatso+ le seatla se se nonofileng le lebogo le le otlolotsweng le Jehofa, Modimo wa gago a neng a go ntsha ka lone.+ Ke sone se Jehofa, Modimo wa gago a tla se dirang ditšhaba tsotlhe tse o di boifang.+ 20 Jehofa, Modimo wa gago o tla dira gore ba kgobege marapo* go fitlha ba ba neng ba setse+ le ba ba neng ba go iphitlhetse ba nyelela. 21 O se ka wa tshoga ka ntlha ya bone ka gonne Jehofa, Modimo wa gago o na le wena,+ Modimo yo mogolo le yo o boitshegang.+

22 “Ruri Jehofa, Modimo wa gago o tla leleka ditšhaba tseno fa pele ga gago ka bonya ka bonya.+ Ga o kitla o letlelelwa go di fedisa ka bonako gore diphologolo tsa naga di se ka tsa oketsega mme tsa go gobatsa. 23 Jehofa, Modimo wa gago o tla di go naya a bo a di fenya kgato ka kgato go fitlha di nyelela.+ 24 Modimo o tla tsenya dikgosi tsa tsone mo seatleng sa gago,+ mme wena o tla phimola maina a tsone mo lefatsheng.+ Ga go ope yo o tla go fenyang,+ go fitlha o ba fedisa.+ 25 Lo fise ditshwantsho tse di betlilweng tsa medimo ya bone mo molelong.+ Lo se ka lwa eletsa selefera le gauta e e mo go tsone kgotsa lwa e itseela+ gore e se ka ya lo raela, ka gonne ke selo se se makgapha mo go Jehofa, Modimo wa lona.+ 26 Ga o a tshwanela go tlisa selo se se makgapha mo ntlong ya gago gore Modimo a se ka a go senya mmogo le selo seo. O se ile fela thata o bo o se tlhoe fela thata ka gonne se tshwanetse go senngwa.

8 “Lo tlhomamise gore lo boloka taelo nngwe le nngwe e ke e lo nayang gompieno, gore lo tswelele lo tshela+ lo bo lo oketsege mme lo tsene lo rue lefatshe le Jehofa a neng a le ikanela borraalonamogolo.+ 2 Gakologelwa tsela e telele e Jehofa, Modimo wa gago a neng a dira gore o tsamaye mo go yone mo nageng dingwaga tseno tse 40,+ gore a go kokobetse a bo a go leke+ e le gore a itse se se neng se le mo pelong ya gago,+ gore a o ne o tla boloka ditaelo tsa gagwe kgotsa nnyaa. 3 Ka jalo, o ne a go kokobetsa a bo a dira gore o tshwarwe ke tlala+ mme a go fepa ka mana,+ a o neng o sa a itse le a borrago ba neng ba sa a itse e le gore a go lemotshe gore motho ga a tshele ka senkgwe fela mme o tshela ka lefoko lengwe le lengwe le le tswang mo molomong wa ga Jehofa.+ 4 Diaparo tse o neng o di apara ga di a ka tsa onala e bile dinao tsa gago ga di a ka tsa ruruga mo dingwageng tseno tse 40.+ 5 O itse sentle mo pelong ya gago gore fela jaaka motho a otlhaya morwawe, Jehofa, Modimo wa gago o ne a go otlhaya.+

6 “Jaanong o tshwanetse go boloka ditaelo tsa ga Jehofa, Modimo wa gago ka go mo ikobela le ka go mmoifa. 7 Gonne Jehofa, Modimo wa gago o go tsenya mo lefatsheng le le molemo,+ lefatshe la dinokana tsa metsi,* metswedi le madiba* a a elelang mo lebaleng le mo kgaolong e e dithaba, 8 lefatshe la korong le barele,* la ditlhare tsa morara,* ditlhare tsa difeige le digaranata,+ lefatshe la leokwane la motlhware le tswina ya dinotshe,+ 9 lefatshe le mo go lone o se kitlang o tlhoka dijo e bile o se kitla o tlhoka sepe, lefatshe le maje a lone a nang le tshipi le le o tla epang kopore mo dithabeng tsa lone.

10 “Fa o jele e bile o kgotsofetse, o tshwanetse go baka Jehofa, Modimo wa gago ka ntlha ya lefatshe le le molemo le a le go neileng.+ 11 O nne kelotlhoko gore o se ka wa lebala Jehofa, Modimo wa gago mme wa palelwa ke go boloka ditaelo tsa gagwe, ditshwetso tsa gagwe tsa boatlhodi le melao ya gagwe e ke go e laelang gompieno. 12 Fa o ja o bo o kgotsofala, mme o aga matlo a mantle o bo o nna mo go one,+ 13 fa motlhape wa gago le matsomane a gago a nna mantsi e bile selefera le gauta ya gago e oketsega e bile sengwe le sengwe se o nang le sone se nna sentsi, 14 o se ka wa letla pelo ya gago gore e nne mabela+ mme ya dira gore o lebale Jehofa, Modimo wa gago yo o go ntshitseng kwa lefatsheng la Egepeto, kwa lefatsheng la bokgoba,+ 15 yo o neng a dira gore o tsamaye mo nageng e kgolo le e e boitshegang,+ e e nang le dinoga tse di botlhole le diphepheng le e e nang le mmu o o omeletseng o o se nang metsi. O ne a dira gore metsi a tswe mo lefikeng le le thata+ 16 a bo a go fepa ka mana+ mo nageng, a borrago ba neng ba sa a itse, e le gore a go kokobetse+ le gore a go leke gore o tle o solegelwe molemo mo nakong e e tlang.+ 17 Fa o ka bua mo pelong ya gago wa re, ‘Ke na le dikhumo tseno ka ntlha ya maatla a me le bokgoni jwa me,’+ 18 o gakologelwe gore Jehofa, Modimo wa gago, ke ene a go nayang maatla a gore o dire dikhumo,+ e le gore o diragatse kgolagano ya gagwe e a neng a e ikanela borragomogolo jaaka go ntse gompieno.+

19 “Fa o ka lebala Jehofa, Modimo wa gago ka tsela epe fela mme wa sala medimo e mengwe morago o bo o e direla le go e ikobela, ke a lo tlhagisa gompieno gore ruri lo tla nyelela.+ 20 Fela jaaka ditšhaba tse Jehofa a di nyeletsang fa pele ga lona, le lona lo tla nyelela jalo ka gonne lo tla bo lo sa utlwe lentswe la ga Jehofa, Modimo wa lona.+

9 “Utlwa wena Iseraele, gompieno o kgabaganya Joredane+ gore o tsene mme o gape thuo ya ditšhaba tse dikgolo le tse di thata go go feta,+ metse e megolo le e e sireletsegileng go fitlha kwa magodimong,*+ 2 setšhaba sa batho ba bagolo le ba baleele, barwa ba Baanake,+ ba o itseng ka bone e bile o utlwile go twe, ‘Ke mang yo o ka emang fa pele ga bomorwa Anake?’ 3 Ka jalo, o tshwanetse go itse mo letsatsing leno gore Jehofa, Modimo wa gago o tla kgabaganya kwa pele ga gago.+ O tshwana le molelo o o lailang+ mme o tla ba nyeletsa. Modimo o tla ba fenya fa pele ga gago gore o ba leleke ka bonako* o bo o ba senye, fela jaaka Jehofa a go solofeditse.+

4 “Fa Jehofa, Modimo wa gago a ba leleka fa pele ga gago, o se ka wa bua mo pelong ya gago wa re, ‘E ne e le ka ntlha ya go bo ke ne ke siame go bo Jehofa a ntlisitse go tla go rua lefatshe leno.’+ Go na le moo, ke ka ntlha ya go bo ditšhaba tseno di ne di le bosula+ go bo Jehofa a di leleka fa pele ga gago. 5 Ga se ka ntlha ya go bo o siame kgotsa ka ntlha ya go bo pelo ya gago e ikanyega go bo o tsena o ya go rua lefatshe la bone. Go na le moo, Jehofa, Modimo wa gago o leleka ditšhaba tseno fa pele ga gago ka go bo di le bosula+ le ka go bo Jehofa a diragatsa lefoko le a neng a le ikanela borragomogolo, e bong Aborahame,+ Isake+ le Jakobe.+ 6 Foo, o itse gore ga se ka ntlha ya go bo o siame go bo Jehofa, Modimo wa gago a go naya lefatshe leno le le molemo gore o le rue, ka gonne o setšhaba se se tlhogoethata.*+

7 “Gakologelwang, mme le ka motlha lo se ka lwa lebala tsela e lo neng lwa galefisa Jehofa, Modimo wa lona ka yone kwa nageng.+ Go simolola ka letsatsi le lo neng lwa tswa kwa lefatsheng la Egepeto ka lone go fitlha lo tla mo lefelong leno, lo ne lwa tlhanogela Jehofa.+ 8 Tota le kwa Horeba lo ne lwa kgopisa Jehofa, mme Jehofa o ne a lo galefela thata mo a neng a ipaakanyeditse go lo nyeletsa.+ 9 Fa ke ne ke tlhatlogela kwa thabeng ke ya go amogela dikwalelo tsa leje,+ dikwalelo tsa kgolagano e Jehofa a e dirileng le lona,+ ke ne ka nna mo thabeng malatsi a le 40 le masigo a le 40,+ ke sa je dijo e bile ke sa nwe metsi. 10 Go tswa foo, Jehofa o ne a nnaya dikwalelo tse pedi tsa leje tse di kwadilweng ka monwana wa gagwe, mme mo go tsone go ne go na le mafoko otlhe a Jehofa a neng a lo a boleletse mo thabeng go tswa mo molelong ka letsatsi la kokoano.*+ 11 Kwa bokhutlong jwa malatsi a le 40 le masigo a le 40, Jehofa o ne a nnaya dikwalelo tse pedi tsa leje, dikwalelo tsa kgolagano, 12 mme Jehofa o ne a nthaya a re, ‘Fologa ka bonako o tsamaye ka gonne batho ba gago ba o ba ntshitseng kwa Egepeto ba dirile bosula jo bogolo.+ Ba fapogile ka bonako mo tseleng e ke neng ka ba laela gore ba e latele. Ba itiretse setshwantsho* se se bopilweng.’+ 13 Go tswa foo, Jehofa o ne a nthaya a re, ‘Ke bone gore setšhaba seno, ke setšhaba se se tlhogoethata.*+ 14 O se ka wa nthibela, mma ke se nyeletse ke bo ke phimole leina la sone mo lefatsheng, mme mma ke go dire setšhaba se se thata le se se nang le batho ba bantsi go ba feta.’+

15 “Go tswa foo, ke ne ka retologa mme ka fologa mo thabeng fa thaba eo e ne e ntse e tuka molelo,+ mme dikwalelo tse pedi tsa kgolagano di ne di le mo diatleng tsa me.+ 16 Foo ke ne ka leba mme ka bona gore lo ne lo leofetse Jehofa, Modimo wa lona! Lo ne lo itiretse namane e e bopilweng. Lo ne lo fapogile ka bonako mo tseleng e Jehofa a neng a laetse gore lo e latele.+ 17 Ka jalo, ke ne ka tsholetsa dikwalelo tse pedi mme ka di latlhela fa fatshe ka di tšhwetlakanya fa pele ga matlho a lona.+ 18 Go tswa foo, ke ne ka ikoba fa pele ga ga Jehofa, jaaka la ntlha, malatsi a le 40 le masigo a le 40. Ga ke a ka ka ja dijo kgotsa ka nwa metsi,+ ka ntlha ya maleo otlhe a lo neng lo a dirile ka go dira se se bosula mo matlhong a ga Jehofa le go mo kgopisa. 19 Gonne ke ne ke tshogile ka ntlha ya go bo Jehofa a ne a lo galefetse fela thata+ mo a neng a ipaakanyeditse go lo nyeletsa. Le fa go ntse jalo, le ka nako eo Jehofa o ne a ntheetsa.+

20 “Jehofa o ne a galefetse Arone fela thata mo a neng a ipaakanyeditse go mo nyeletsa,+ mme gone le ka nako eo, ke ne ka rapelela Arone gore Modimo a se ka a mo nyeletsa. 21 Go tswa foo, ke ne ka tsaya namane e lo neng lo e dirile,+ e lo neng lwa leofa ka ntlha ya yone, mme ka e fisa mo molelong; ke ne ka e thubaganya ka bo ka e sila thata go fitlha e nna boleta jaaka lorole, mme ke ne ka latlhela lorole loo mo molapong o o neng o elela go tswa mo thabeng.+

22 “Mo godimo ga moo, gape lo ne lwa kgopisa Jehofa kwa Tabera,+ kwa Masa+ le kwa Kiberothe-hataafa+ gore a galefe. 23 Fa Jehofa a ne a lo ntsha kwa Kadeshe-barenea+ mme a re, ‘Tsamayang mme lo ye go gapa lefatshe le ruri ke tla le lo nayang!’ lo ne lwa se ka lwa ikobela taelo ya ga Jehofa, Modimo wa lona gape,+ mme ga lo a ka lwa nna le tumelo+ mo go ene e bile ga lo a ka lwa mo ikobela. 24 Fa e sa le ke lo itse, lo ntse lo tlhanogela Jehofa.

25 “Ka jalo, ke ne ka nna ka ikoba fa pele ga ga Jehofa malatsi a le 40 le masigo a le 40,+ ke ne ka ikoba ka tsela eno ka go bo Jehofa a ne a rile o tla lo nyeletsa. 26 Ke ne ka simolola go rapela Jehofa ka tlhoafalo mme ka re, ‘Ao tlhe Morena Molaodimogolo Jehofa, o se ka wa senya batho ba gago. Batho ba o neng wa ba golola ka maatla a gago wa bo wa ba ntsha kwa Egepeto ka seatla se se nonofileng,+ ke ba gago.*+ 27 Gakologelwa batlhanka ba gago e bong Aborahame, Isake le Jakobe.+ O se ka wa tlhoma mogopolo mo botlhogoethateng jwa batho bano, mo bosuleng jwa bone le mo boleong jwa bone.+ 28 Go seng jalo, batho ba lefatshe le o neng wa re ntsha kwa go lone ba ka nna ba re: “Jehofa o ne a sa kgone go ba tsenya kwa lefatsheng le a neng a le ba solofeditse e bile e re ka a ne a ba tlhoile, o ne a ba ntsha gore a tle go ba bolaela mo nageng.”+ 29 Gonne ke batho ba gago le thuo ya gago,*+ ba o neng wa ba ntsha kwa Egepeto ka maatla a gago a magolo le ka lebogo la gago le le otlolotsweng.’+

10 “Ka yone nako eo, Jehofa o ne a nthaya a re, ‘Itirele dikwalelo di le pedi tsa leje tse di tshwanang le tsa ntlha,+ mme o tle kwa go nna mo thabeng; gape o tshwanetse go itirela letlole* la logong. 2 Mme ke tla kwala mo dikwalelong tseno mafoko a a neng a le mo dikwalelong tsa ntlha, tse o di thubileng, mme o di tsenye mo letloleng.’ 3 Ka jalo, ke ne ka dira letlole ka logong lwa mokala mme ka dira dikwalelo tse pedi tsa leje tse di tshwanang le tsa ntlha ke bo ke tlhatlogela kwa thabeng ke tshotse dikwalelo tseo tse pedi.+ 4 Go tswa foo, Jehofa o ne a kwala mafoko a a neng a a kwadile pele mo dikwalelong tseno,+ Melao e e Lesome,*+ e a neng a e buile le lona mo thabeng go tswa mo molelong+ ka letsatsi la kokoano;*+ mme Jehofa o ne a di nnaya. 5 Morago ga moo, ke ne ka retologa mme ka fologa thaba+ ke bo ke tsenya dikwalelo tseno mo letloleng le ke neng ke le dirile, mo di sa ntseng di le gone, fela jaaka Jehofa a ne a ntaetse.

6 “Go tswa foo, Baiseraele ba ne ba fuduga mo Beerothe Bene-jaakane ba ya kwa Mosera. Ke kwa Arone a neng a swela gone a bo a fitlhelwa gone,+ mme morwawe e bong Eliasare o ne a simolola go direla e le moperesiti mo boemong jwa gagwe.+ 7 Fa ba tswa koo ba ne ba fudugela kwa Gudegoda, mme go tswa kwa Gudegoda ba ne ba ya kwa Jotebatha,+ lefatshe le le elelang dinokana tsa metsi.*

8 “Ka yone nako eo, Jehofa o ne a tlhopha lotso lwa ga Lefi+ gore lo tlhokomele letlole la kgolagano ya ga Jehofa,+ lo eme fa pele ga ga Jehofa gore lo mo direle lo bo lo segofatse batho mo leineng la gagwe,+ jaaka ba ntse ba dira go fitlha mo letsatsing leno. 9 Ke gone ka moo Lefi a sa newang kabelo kgotsa boswa le bomorwarraagwe. Jehofa ke boswa jwa gagwe, fela jaaka Jehofa, Modimo wa gago a ne a mmoleletse.+ 10 Nna ke ne ka nna mo thabeng malatsi a le 40 le masigo a le 40,+ fela jaaka ke ne ka dira la ntlha, mme Jehofa o ne a ntheetsa le mo lekgetlong leo.+ Jehofa o ne a sa batle go go senya. 11 Go tswa foo, Jehofa o ne a nthaya a re, ‘Etelela batho pele mme lo ipaakanyetse go fuduga, gore ba tsene mme ba rue lefatshe le ke neng ka ikanela borraabonemogolo gore ke tla le ba naya.’+

12 “Jaanong wena Iseraele, ke eng se Jehofa, Modimo wa gago a se kopang mo go wena?+ O kopa seno: gore o boife Jehofa, Modimo wa gago,+ o dire thato ya gagwe,+ o mo rate, o direle Jehofa, Modimo wa gago ka pelo yotlhe ya gago le ka moya otlhe wa gago,+ 13 le gore o boloke ditaelo le melao ya ga Jehofa e ke go e laelang gompieno gore o solegelwe molemo.+ 14 Bona, magodimo ke a ga Jehofa, Modimo wa gago, tota le magodimo a magodimo,* le lefatshe le tsotlhe tse di mo go lone.+ 15 Le fa go ntse jalo, Jehofa o ne a atamalana le borragomogolo a bo a ba bontsha lorato e bile o ne a tlhopha wena, losika lwa bone,+ go tswa mo ditšhabeng tsotlhe, jaaka go ntse gompieno. 16 Lo tshwanetse go dira gore dipelo tsa lona di nne phepa*+ mme lo tlogele go nna tlhogoethata.*+ 17 Gonne Jehofa, Modimo wa lona ke Modimo wa medimo+ le Morena wa barena, Modimo yo mogolo, yo o maatla le yo o boitshegang, yo o sa tlhaoleng ope+ e bile ga a amogele pipamolomo. 18 O tlhomamisa gore khutsana* le motlholagadi ba direlwa tshiamiso+ e bile o rata motswakwa,+ o mo naya dijo le diaparo. 19 Le lona lo tshwanetse go rata motswakwa ka gonne lo ne lwa nna batswakwa kwa lefatsheng la Egepeto.+

20 “O boife Jehofa, Modimo wa gago, o mo direle,+ o mo ngaparele, mme o dire maikano ka leina la gagwe. 21 Ke Ene yo o tshwanetseng go mmaka.+ Ke Modimo wa gago, yo o go diretseng dilo tseno tsotlhe tse dikgolo le tse di boitshegang tse o di boneng.+ 22 Borragomogolo ba ne ba ya kwa Egepeto ba na le batho ba le 70,+ mme jaanong Jehofa, Modimo wa gago o go dirile gore o nne montsi thata jaaka dinaledi tsa magodimo.+

11 “O tshwanetse go rata Jehofa, Modimo wa gago+ mme ka metlha o diragatse boikarabelo jwa gago mo go ene e bile o boloke melao ya gagwe, ditshwetso tsa gagwe tsa boatlhodi le ditaelo tsa gagwe. 2 Lo a itse gore gompieno ke bua le lona, e seng le bomorwaalona ba ba sa itseng e bile ba sa bona kotlhao ya ga Jehofa, Modimo wa lona,+ bogolo jwa gagwe,+ seatla sa gagwe se se nonofileng+ le lebogo la gagwe le le otlolotsweng. 3 Ga ba a ka ba bona ditshupo tsa gagwe le ditiro tsa gagwe tse a neng a di dira kwa Egepeto mo go Faro kgosi ya Egepeto le mo lefatsheng lotlhe la gagwe;+ 4 kgotsa se a neng a se dira masole a Egepeto, dipitse le dikara tsa ntwa tsa ga Faro, tse di neng tsa khurumediwa ke metsi a Lewatle le Lehibidu fa ba ne ba lo lelekisa, mme Jehofa o ne a ba senya gotlhelele ka yone nako eo.*+ 5 Ga ba a ka ba bona se a neng a se lo direla* mo nageng go fitlha lo tla mo lefelong leno 6 kgotsa se a neng a se dira Dathane le Abirame, bomorwa Eliabe morwa Rubene, fa pele ga matlho a Iseraele yotlhe, fa lefatshe le ne le bulega le bo le ba kometsa mmogo le ba malapa a bone le ditente tsa bone le setshedi sengwe le sengwe se se neng se ba latela.+ 7 Matlho a lona a bone ditiro tsotlhe tse dikgolo tse Jehofa a neng a di dira.

8 “Lo tshwanetse go boloka ditaelo tsotlhe tse ke lo di nayang gompieno, gore lo nonofe mme lo kgabaganye lo tsene mo lefatsheng gore lo le rue, 9 le gore lo tshele lobaka lo loleele+ mo lefatsheng le Jehofa a neng a ikana gore o tla le naya borraalonamogolo le losika lwa bone,+ lefatshe le le elelang mashi le tswina ya dinotshe.+

10 “Lefatshe le lo yang go le rua ga le tshwane le lefatshe la Egepeto, le lo duleng kwa go lone, kwa lo neng lo tle lo jale peo ya lona gone lo bo lo e nosetsa ka lonao lwa lona,* fela jaaka tshingwana ya merogo. 11 Mme lefatshe le lo tlogang lo kgabaganyetsa kwa go lone lo bo lo le rua ke lefatshe le le nang le dithaba le mabala.+ Ke le le nwang metsi a a tswang kwa magodimong;+ 12 ke lefatshe le Jehofa, Modimo wa gago a le tlhokomelang. Matlho a ga Jehofa, Modimo wa gago a mo go lone ka metlha, go tloga fa ngwaga o simologa go fitlha o fela.

13 “Mme fa lo ka ikobela ditaelo tsa me ka tlhoafalo tse ke di lo laelang gompieno mme lwa rata Jehofa, Modimo wa lona lo bo lo mo direla ka pelo yotlhe ya lona le ka moya otlhe wa lona,+ 14 le nna ke tla nesetsa lefatshe la lona pula ka nako ya yone e e tlhomilweng, pula ya letlhabula le pula ya kgogolamoko, mme lo tla phutha dijo tsa lona le beine ya lona e ntšha le leokwane la lona.+ 15 Mme ke tla dira gore naga ya lona e nne le dimela gore e nne tsa leruo la lona, mme lo tla ja lo bo lo kgotsofala.+ 16 Lo nne kelotlhoko gore pelo ya lona e se ka ya raelesega go fapoga, lwa obamela medimo e mengwe mme lwa e ikobela.+ 17 Go seng jalo, bogale jwa ga Jehofa bo tla lo tukela mme o tla tswala magodimo gore pula e se ka ya na+ mme mmu ga o kitla o ntsha maungo a one mme lo tla nyelela ka bonako mo lefatsheng le le molemo le Jehofa a le lo nayang.+

18 “Lo tshwanetse go dira gore mafoko ano a me a nwelelele kwa teng mo pelong ya lona le mo mogopolong wa lona mme lo a bofelele mo seatleng sa lona e le sengwe se se lo gopotsang, mme a tshwanetse go nna jaaka lebanta la tlhogo mo phatleng ya lona.*+ 19 Lo a rute bana ba lona, lo bue ka one fa lo ntse mo matlong a lona le fa lo tsamaya mo tseleng le fa lo rapama le fa lo tsoga.+ 20 Lo a kwale mo diforeiming* tsa matlo a lona le mo dikgorong tsa lona, 21 gore lona le bomorwaalona lo tshele lobaka lo loleele+ mo lefatsheng le Jehofa a neng a ikanela borraalonamogolo gore o tla le ba naya,+ fa fela magodimo a sa ntse a okametse lefatshe.

22 “Fa lo ikobela ka kelotlhoko taelo eno e ke e lo nayang lo bo lo e diragatsa, lo rata Jehofa, Modimo wa lona,+ lo tsamaya mo ditseleng tsotlhe tsa gagwe e bile lo mo ngaparela,+ 23 Jehofa o tla leleka ditšhaba tseno tsotlhe fa pele ga lona,+ mme lo tla gapa thuo ya ditšhaba tse dikgolo le tse di nang le batho ba bantsi go lo feta.+ 24 Lefelo lengwe le lengwe le lonao lwa lona lo tla gatang mo go lone e tla nna la lona.+ Molelwane wa lona o tla simologa kwa nageng go ya go fitlha kwa Lebanona, go simologa kwa Nokeng, noka ya Euferatese, go ya go fitlha kwa lewatleng le le kwa bophirima.*+ 25 Ga go na motho ope yo o tla emelanang le lona.+ Jehofa, Modimo wa lona o tla dira gore lo tshabiwe lo bo lo boifiwe mo lefatsheng lotlhe le lo tsamayang mo go lone,+ fela jaaka a lo solofeditse.

26 “Bonang, ke baya fa pele ga lona tshegofatso le phutso gompieno:+ 27 tshegofatso fa e le gore lo tla ikobela ditaelo tsa ga Jehofa, Modimo wa lona tse ke di lo laelang gompieno,+ 28 le phutso fa e le gore ga lo kitla lo ikobela ditaelo tsa ga Jehofa, Modimo wa lona+ mme lo fapoga mo tseleng e ke lo laelang gore lo e latele gompieno lo bo lo sala medimo e lo sa e itseng morago.

29 “Fa Jehofa, Modimo wa gago a go tsenya mo lefatsheng le o tla le ruang, o tshwanetse go bolela* tshegofatso mo Thabeng ya Gerisime le phutso mo Thabeng ya Ebale.+ 30 A ga di ka fa letlhakoreng le lengwe la Joredane go ela kwa bophirima, mo lefatsheng la Bakanana ba ba nnang kwa Araba, go lebagana le Gilegala, fa thoko ga ditlhare tse dikgolo tsa More?+ 31 Gonne lo kgabaganya Joredane gore lo tsene mme lo gape lefatshe le Jehofa, Modimo wa lona a le lo nayang.+ Fa lo le gapa lo bo lo nna mo go lone, 32 lo tlhomamise gore lo diragatsa melao yotlhe le ditshwetso tsotlhe tsa boatlhodi tse ke di bayang fa pele ga lona gompieno.+

12 “Eno ke melao le ditshwetso tsa boatlhodi tse lo tshwanetseng go nna kelotlhoko gore lo di diragatse malatsi otlhe a fa lo tshela mo lefatsheng le Jehofa, Modimo wa borraalonamogolo a tla le lo nayang gore lo le rue. 2 Lo senye mafelo otlhe a ditšhaba tse lo tla gapang lefatshe la tsone di neng di direla medimo ya tsone kwa go one,+ e ka tswa e le mo dithabeng tse di kwa godimo kgotsa mo dithoteng kgotsa ka fa tlase ga setlhare sepe se segolo. 3 Lo senye dibeso tsa tsone, lo thubaganye dipilara tsa tsone tse di boitshepo,+ lo fise dikota tsa tsone tse di boitshepo* mo molelong lo bo lo reme ditshwantsho tse di betlilweng tsa medimo ya tsone,+ lo nyeletse maina a medimo ya tsone gotlhelele mo lefelong leo.+

4 “Ga lo a tshwanela go obamela Jehofa, Modimo wa lona ka tsela eo.+ 5 Go na le moo, lo obamele Jehofa, Modimo wa lona gongwe le gongwe kwa a tlhophang go tlhoma leina la gagwe gone le lefelo le a tla nnang mo go lone mo ditsong tsotlhe tsa lona, mme lo ye teng.+ 6 Ke gone kwa lo tla tlisang ditlhabelo tsa lona tse di fisiwang,+ ditlhabelo tsa lona tse dingwe, ditsabosome*+ tsa lona, moneelo o lo o ntshang,+ ditlhabelo tsa lona tsa maikano,+ ditlhabelo tsa lona tse di ntshiwang ka go rata le maitibolo a motlhape le a letsomane la lona.+ 7 Lona le ba matlo a lona lo tshwanetse go jela gone fa pele ga ga Jehofa, Modimo wa lona+ lo bo lo itumele mo ditirong tsotlhe tsa lona,+ ka gonne Jehofa, Modimo wa lona o lo segofaditse.

8 “Ga lo a tshwanela go dira jaaka re dira fano gompieno, mo mongwe le mongwe a dirang sepe fela se se siameng mo matlhong a gagwe,* 9 ka gonne ga lo ise lo goroge mo lefelong la boikhutso+ le mo bosweng jo Jehofa, Modimo wa lona a lo bo nayang. 10 Fa lo kgabaganya Joredane+ lo bo lo nna mo lefatsheng le Jehofa, Modimo wa lona a le lo nayang gore lo le rue, ruri o tla lo naya boikhutso, go se na mmaba ope yo o lo dikologileng yo o tla lo tshwenyang, mme lo tla nna ka polokesego.+ 11 Lo tla tlisa tsotlhe tse ke di lo laelang mo lefelong le Jehofa, Modimo wa lona a tlhophang gore leina la gagwe le nne mo go lone:+ ditlhabelo tsa lona tse di fisiwang, ditlhabelo tsa lona tse dingwe, ditsabosome tsa lona,+ moneelo o lo o ntshang le setlhabelo sengwe le sengwe se lo se ikanelang Jehofa. 12 Lo tla itumela fa pele ga ga Jehofa, Modimo wa lona,+ lona le bomorwaalona, bomorwadialona, batlhanka le malata a lona le Molefi yo o mo teng ga metse* ya lona, ka gonne ga a newa kabelo epe kgotsa boswa bope le lona.+ 13 O nne kelotlhoko gore o se ka wa ntshetsa ditlhabelo tsa gago tse di fisiwang mo lefelong lepe le lengwe le o le ratang.+ 14 O ntshetse ditlhabelo tsa gago tse di fisiwang mo lefelong le Jehofa a le tlhophang mo go nngwe ya dikgaolo tsa ditso tsa gago, mme fa o le koo o dire sengwe le sengwe se ke se go laelang.+

15 “Mme gone, nako nngwe le nngwe fa o eletsa go ja nama, o ka nna wa tlhaba phologolo o bo o ja nama+ go ya ka tshegofatso e Jehofa, Modimo wa gago a e go neileng mo metseng yotlhe ya gago.* Motho yo o itshekologileng le motho yo o itshekileng a ka nna a e ja, fela jaaka o ka ja tshephe kgotsa kgama. 16 Mme ga lo a tshwanela go ja madi;+ lo a tshololele fa fatshe jaaka metsi.+ 17 Ga o kitla o letlelelwa go jela mo metseng ya gago* karolo ya bolesome ya dijo tsa gago tsa ditlhaka, beine ya gago e ntšha, leokwane la gago, maitibolo a motlhape le a letsomane la gago,+ setlhabelo sepe fela mo ditlhabelong tsa maikano a o a dirang, ditlhabelo tsa gago tse di ntshiwang ka go rata kgotsa moneelo o o o ntshang. 18 Tseno o tla di jela fa pele ga ga Jehofa, Modimo wa gago mo lefelong le Jehofa, Modimo wa gago a tla le tlhophang,+ wena le morwao, morwadio, motlhanka le lelata la gago le Molefi yo o mo teng ga metse* ya gago; mme o tla itumela fa pele ga ga Jehofa, Modimo wa gago mo ditirong tsotlhe tsa gago. 19 O nne kelotlhoko gore o se ka wa tlhokomologa Molefi+ fa fela o sa ntse o tshela mo lefatsheng la gago.

20 “Fa Jehofa, Modimo wa gago a oketsa karolo ya gago ya naga,+ fela jaaka a go solofeditse,+ mme o bo o re, ‘Ke batla go ja nama,’ ka gonne o eletsa go ja nama, o ka nna wa ja nama nako nngwe le nngwe fela fa o e eletsa.+ 21 Fa e le gore lefelo le Jehofa, Modimo wa gago a le tlhophang gore a beye leina la gagwe mo go lone+ le kgakala le wena, foo o tlhabe nngwe ya diphologolo mo motlhapeng wa gago kgotsa mo letsomaneng la gago le Jehofa a le go neileng, fela jaaka ke go laetse, mme o e jele mo teng ga metse* ya gago nako nngwe le nngwe fela fa o e eletsa. 22 O ka nna wa e ja fela jaaka o ka ja tshephe le kgama;+ motho yo o itshekologileng mmogo le motho yo o itshekileng ba ka nna ba e ja. 23 O tlhomamise gore ga o je madi+ ka gonne madi ke botshelo,+ mme ga o a tshwanela go ja botshelo le nama. 24 Ga o a tshwanela go a ja. O a tshololele fa fatshe jaaka metsi.+ 25 Ga o a tshwanela go a ja, gore dilo di go tsamaele sentle le bana ba gago morago ga gago, ka gonne o tla bo o dira se se siameng mo matlhong a ga Jehofa. 26 O tseye fela dilo tse di boitshepo tse o nang le tsone le ditlhabelo tsa gago tsa maikano fa o tla mo lefelong le Jehofa a tla le tlhophang. 27 Fa o le koo, o tla ntsha ditlhabelo tsa gago tse di fisiwang, nama le madi,+ mo sebesong sa ga Jehofa, Modimo wa gago, mme madi a ditlhabelo tsa gago a tshololelwe fa sebesong+ sa ga Jehofa, Modimo wa gago, mme nama yone o ka nna wa e ja.

28 “O tlhomamise gore o ikobela mafoko ano otlhe a ke go a laelang, gore ka metlha dilo di go tsamaele sentle wena le bomorwao morago ga gago, ka gonne o tla bo o dira se se molemo le se se siameng mo matlhong a ga Jehofa, Modimo wa gago.

29 “Fa Jehofa, Modimo wa gago a fedisa ditšhaba tse o yang go gapa thuo ya tsone+ o bo o nna mo lefatsheng la tsone, 30 o nne kelotlhoko gore o se ka wa raelesega fa di sena go nyelediwa fa pele ga gago. O se ka wa botsa ka medimo ya tsone o re, ‘Ditšhaba tseno di ne di tlwaetse go direla medimo ya tsone jang? Le nna ke tla dira se se tshwanang.’+ 31 Ga o a tshwanela go direla Jehofa, Modimo wa gago seno, ka gonne ba direla medimo ya bone sengwe le sengwe se se makgapha se Jehofa a se tlhoileng, tota e bile ba fisa bomorwaabone le bomorwadiabone mo molelong ba ba fisetsa medimo ya bone.+ 32 Lo tlhomamise gore lo dira go ya ka ditaelo tsotlhe tse ke lo di laelang.+ Ga lo a tshwanela go oketsa kgotsa go tlosa sepe mo go tsone.+

13 “Fa go direga gore go nne le moporofeti kgotsa motho yo o bolelelang dilo pele ka ditoro mo go lona a bo a lo naya sesupo kgotsa kgakgamatso, 2 mme sesupo seo kgotsa kgakgamatso eo e a lo e boleletseng e bo e diragala, e a neng a e bua a re, ‘A re saleng medimo e mengwe morago,’ medimo e lo sa e itseng, ‘mme a re e direleng,’ 3 ga lo a tshwanela go reetsa mafoko a moporofeti yoo kgotsa a molori+ yoo ka gonne Jehofa, Modimo wa lona o a lo leka+ gore a itse gore a lo rata Jehofa, Modimo wa lona ka pelo yotlhe ya lona le ka moya otlhe wa lona.+ 4 Lo sale Jehofa, Modimo wa lona morago, lo mmoife, lo boloke ditaelo tsa gagwe, lo reetse lentswe la gagwe; ke ene yo lo tshwanetseng go mo direla le go mo ngaparela.+ 5 Mme moporofeti yoo kgotsa molori yoo a bolawe,+ ka gonne o ne a lo kgothaletsa gore lo tlhanogele Jehofa, Modimo wa lona yo o lo ntshitseng kwa lefatsheng la Egepeto a bo a lo golola kwa lefatsheng la bokgoba. Moporofeti yoo kgotsa molori yoo o lekile go lo faposa mo tseleng e Jehofa, Modimo wa lona a laetseng gore lo tsamaye mo go yone. Mme lo tshwanetse go tlosa se se bosula mo go lona.+

6 “Fa morwarrago, morwammago kgotsa morwao kgotsa morwadio kgotsa mosadi wa gago yo o mo ratang kgotsa tsala e e atamalaneng thata le wena,* a leka go go raela mo sephiring a re, ‘A re tsamaye mme re ye go direla medimo e mengwe,’+ medimo e wena kgotsa borragomogolo ba sa e itseng, 7 go tswa mo medimong ya ditšhaba tse di lo dikologileng, di ka tswa di le gaufi le lona kgotsa di le kgakala le lona, go tswa ntlheng e nngwe ya lefatshe go ya ntlheng e nngwe ya lefatshe, 8 ga o a tshwanela go dumalana le ene kgotsa go mo reetsa+ e bile o se ka wa mo utlwela botlhoko kgotsa wa mo tlhomogela pelo kgotsa wa mo sireletsa; 9 go na le moo, o tshwanetse go mmolaya.+ Seatla sa gago e nne sone sa ntlha go tla mo go ene gore o mmolaye, mme morago ga moo go latele seatla sa batho botlhe.+ 10 O tshwanetse go mo kgobotletsa ka maje gore a bo a swe,+ ka gonne o ne a batla go go faposa mo go Jehofa, Modimo wa gago, yo o go ntshitseng kwa lefatsheng la Egepeto, kwa lefatsheng la bokgoba. 11 Foo Baiseraele botlhe ba tla utlwa ba bo ba boifa, mme ga ba kitla ba dira sepe gape se se bosula se se tshwanang le seno mo go lona.+

12 “Fa go direga gore lo utlwe go buiwa mo go mongwe wa metse ya lona, e Jehofa, Modimo wa lona a e lo nayang gore lo nne mo go yone go twe, 13 ‘Banna ba ba se nang molemo wa sepe ba ne ba tswa mo go lona gore ba fapose banni ba motse wa bone ba re: “A re tsamayeng mme re ye go direla medimo e mengwe,” medimo e lo sa e itseng,’ 14 lo batlisise kgang eo, lo e sekaseke thata lo bo lo botsolotse;+ mme fa go fitlhelwa gore ke boammaaruri gore mongwe mo go lona o dirile selo seno se se makgapha, 15 lo tshwanetse go kgemetha banni ba motse oo ka tšhaka.+ Lo o senye+ le sengwe le sengwe se se mo go one ka tšhaka, go akaretsa le leruo la one. 16 Go tswa foo, lo phuthele dilo tsotlhe tsa one tse di gapilweng mo gare ga patlelo ya one lo bo lo fisa motse oo ka molelo, mme dilo tsa one tse di gapilweng di tla nna setlhabelo se se feletseng se se yang kwa go Jehofa, Modimo wa lona. E tla nna mokoa wa marope a a tla nnelang ruri. O se ka wa tlhola o agiwa sesha. 17 O se ka wa tsaya sepe se se neng se tshwanetse go senngwa,*+ gore Jehofa a tle a boe mo bogaleng jwa gagwe jo bo tukang mme a lo bontshe kutlwelobotlhoko le bopelotlhomogi a bo a lo ntsifatse, fela jaaka a ikanetse borraalonamogolo.+ 18 Gonne lo tshwanetse go ikobela* Jehofa, Modimo wa lona ka go boloka ditaelo tsotlhe tsa gagwe tse ke di lo laelang gompieno, ka go dira jalo lo tla bo lo dira se se siameng mo matlhong a ga Jehofa, Modimo wa lona.+

14 “Lo bana ba ga Jehofa, Modimo wa lona. Lo se ka lwa itshega+ kgotsa lwa beola ditlhogo tsa lona fa pele gore di nne lefatla* ka ntlha ya motho yo o suleng.+ 2 Gonne lo setšhaba se se boitshepo+ mo go Jehofa, Modimo wa lona, mme Jehofa o tlhophile lona gore lo nne setšhaba sa gagwe, batho ba gagwe ba ba kgethegileng,* go tswa mo ditšhabeng tsotlhe tse di mo godimo ga lefatshe.+

3 “Ga lo a tshwanela go ja selo sepe fela se se makgapha.+ 4 Tseno ke diphologolo tse lo ka di jang:+ poo, nku, podi, 5 kgama, tshephe, tholo, podi ya naga, phala, nku ya naga le nku ya dithaba. 6 Lo ka nna lwa ja phologolo epe e e nang le tlhakwana e e sa pataganang e e maphata mabedi e bile e otla. 7 Le fa go ntse jalo, ga lo a tshwanela go ja diphologolo tse di latelang tse di otlang kgotsa tse di nang le ditlhakwana tse di sa pataganang: kamela, mmutla le pela, ka gonne di a otla mme ditlhakwana tsa tsone di patagane. Di itshekologile mo go lona.+ 8 Le kolobe, ka gonne e na le tlhakwana e e sa pataganang mme ga e otle. E itshekologile mo go lona. Ga lo a tshwanela go ja nama epe ya tsone kgotsa go kgoma ditoto tsa tsone.

9 “Mo dilong tsotlhe tse di nnang mo metsing, lo ka nna lwa ja tseno: Sepe fela se se nang le mafafa le makape lo ka nna lwa se ja.+ 10 Mme ga lo a tshwanela go ja sepe fela se se se nang mafafa le makape. Se itshekologile mo go lona.

11 “Lo ka nna lwa ja nonyane nngwe le nngwe e e itshekileng. 12 Mme tseno ga lo a tshwanela go di ja: ntsu, segootsane, lenong le lentsho,+ 13 phakalane e khibidu, phakalane e ntsho, mofuta mongwe le mongwe wa mankgodi, 14 mofuta mongwe le mongwe wa legakabe, 15 ntšhe, morubisi, nonyane ya metsi, mofuta mongwe le mongwe wa segodi, 16 morubisi o monnye, morubisi o o ditsebe ditelele, makgotlwe, 17 kukara, lenong, timeletsane, 18 mogolori, mofuta mongwe le mongwe wa kokolofutwe, lerenkete le mmamanthwane. 19 Ditshedi* tsotlhe tse di nang le diphuka, tse di tsamayang di le setlhopha le tsone di itshekologile mo go lona. Di se ka tsa jewa. 20 Lo ka nna lwa ja setshedi sepe fela se se fofang se se itshekileng.

21 “Ga lo a tshwanela go ja nama ya phologolo epe e e fitlhetsweng e sule.+ Lo ka nna lwa e naya motswakwa yo o mo teng ga metse* ya lona, mme a ka nna a e ja, kgotsa e ka nna ya rekisediwa motswakwa. Gonne lo setšhaba se se boitshepo mo go Jehofa, Modimo wa lona.

“Ga lo a tshwanela go bedisa potsane ka mashi a mmaayone.+

22 “O tshwanetse go ntsha karolo ya bolesome* ya maungo a peo e o e jadileng mo tshimong ya gago ngwaga le ngwaga.+ 23 O tla jela karolo ya bolesome ya dijo tsa gago tsa ditlhaka, beine ya gago e ntšha, leokwane la gago le maitibolo a motlhape le a letsomane la gago fa pele ga ga Jehofa, Modimo wa gago, mo lefelong le a le tlhophang gore leina la gagwe le nne mo go lone,+ gore o ithute go boifa Jehofa, Modimo wa gago ka metlha.+

24 “Mme fa e le gore loeto lo loleele thata mo go wena e bile o ka se kgone go rwala dilo tseno tsotlhe o ya kwa lefelong le Jehofa, Modimo wa gago a le tlhophang gore e nne lefelo la leina la gagwe+ ka gonne le le kgakala thata le wena (ka gonne Jehofa, Modimo wa gago o tla go segofatsa), 25 foo o ka nna wa e rekisa, mme o tseye madi ao o bo o ya kwa lefelong le Jehofa, Modimo wa gago a tla le tlhophang. 26 Go tswa foo, o ka nna wa dirisa madi ao mo go sepe fela se o se eletsang, e ka tswa e le dikgomo, dinku, dipodi, beine le dinô tse dingwe tse di tagang le sepe fela se o se ratang;* mme o tla jela foo fa pele ga ga Jehofa, Modimo wa gago o bo o itumela, wena le ba lelapa la gago.+ 27 Mme o se ka wa tlhokomologa Molefi yo o mo teng ga metse ya gago+ ka gonne ga a newa kabelo epe kgotsa boswa bope le wena.+

28 “Kwa bokhutlong jwa dingwaga dingwe le dingwe tse tharo, o ntshe karolo yotlhe ya bolesome ya thobo ya gago ya ngwaga oo, mme o e beye mo teng ga metse ya gago.+ 29 Go tswa foo, Molefi yo o sa newang kabelo epe kgotsa boswa bope le wena, motswakwa, khutsana* le motlholagadi, ba ba mo metseng ya gago ba tla tla ba bo ba ja gore ba kgotsofale,+ gore Jehofa, Modimo wa gago a go segofatse mo go sotlhe se o se dirang.+

15 “Kwa bokhutlong jwa dingwaga dingwe le dingwe di le supa, o phimole melato.+ 2 Ono ke mokgwa wa go phimola melato: Mongwe le mongwe yo o kolotiwang o tla phimola molato o moagelani wa gagwe a o dirileng. A se ka a pateletsa moagelani wa gagwe kgotsa morwarraagwe gore a duele, ka gonne molato o o phimotsweng o tla itsisiwe Jehofa.+ 3 O ka nna wa pateletsa motswakwa gore a duele+ mme gone o phimole molato wa sepe fela se morwarrago a se go kolotang. 4 Le fa go ntse jalo, ope wa lona a se ka a humanega, ka gonne ruri Jehofa o tla lo segofatsa+ mo lefatsheng le Jehofa, Modimo wa lona a le lo nayang gore lo le rue e le boswa, 5 fa fela lo ikobela ka botlalo lentswe la ga Jehofa, Modimo wa lona e bile lo boloka ka kelotlhoko ditaelo tseno tsotlhe tse ke di lo nayang gompieno.+ 6 Gonne Jehofa, Modimo wa lona o tla lo segofatsa fela jaaka a lo solofeditse, lo tla adima* ditšhaba di le dintsi, mme lona ga lo kitla lo tlhoka go adimiwa;+ lo tla laola ditšhaba di le dintsi, mme tsone ga di kitla di lo laola.+

7 “Fa mongwe wa bomorwarrago a humanega mo metseng mengwe ya lona e e mo lefatsheng le Jehofa, Modimo wa lona a le lo nayang, o se ka wa thatafatsa pelo ya gago kgotsa wa tima morwarrago yo o humanegileng.+ 8 Gonne o tshwanetse go mmulela seatla sa gago ka bopelotshweu+ o bo o mo adima* sepe fela se a se tlhokang kgotsa se a se tlhaelang. 9 O nne kelotlhoko gore o se ka wa nna le kakanyo eno e e bosula mo pelong ya gago, ‘Ngwaga wa bosupa, ngwaga wa go phimola melato, o atametse,’+ mme o bo o sa thuse morwarrago yo o humanegileng, o sa mo neye sepe. Fa a goela kwa go Jehofa ka ntlha ya gago, seo e tla nna boleo mo go wena.+ 10 O tshwanetse go mo abela ka bopelotshweu,+ mme o* se ka wa mo abela ka go ikgoga fela, ka gonne Jehofa, Modimo wa gago o tla segofatsa tiro nngwe le nngwe ya gago le matsapa a gago+ ka ntlha ya seno. 11 Gonne ka metlha go tla nna le batho ba ba humanegileng mo lefatsheng.+ Ke gone ka moo ke go laelang ke re, ‘O bulele morwarrago yo o bogisiwang le yo o humanegileng seatla sa gago ka bopelotshweu mo lefatsheng la gaeno.’+

12 “Fa o rekisediwa mongwe wa bomorwarrago, Mohebera wa monna kgotsa wa mosadi, mme a go diretse dingwaga di le thataro, foo mo ngwageng wa bosupa o mo golole.+ 13 Mme fa o mo golola, o se ka wa mo tsamaisa a iphotlhere fela. 14 O mo neye ka bopelotshweu sengwe go tswa mo letsomaneng la gago, mo seboaneng sa gago le mo segatisetsong sa gago sa leokwane le sa beine. O mo abele go ya kafa Jehofa, Modimo wa gago a go segofaditseng ka gone. 15 Gakologelwa gore o ne wa nna lekgoba kwa lefatsheng la Egepeto le gore Jehofa, Modimo wa gago o ne a go golola. Ke gone ka moo ke go laelang gore o dire seno gompieno.

16 “Mme fa a go raya a re, ‘Ga nkitla ke kgaogana le wena!’ ka gonne a go rata le ba lelapa la gago, e re ka a ne a itumetse fa a ntse a nna le wena,+ 17 foo o tseye thoko mme o e phunyeletse mo tsebeng ya gagwe mo setswalong, mme o tla nna motlhanka wa gago botshelo jotlhe. O dire se se tshwanang le ka lelata la gago. 18 O se ka wa tsaya gore ga o direlwe sentle fa o mo golola a bo a go tlogela, ka gonne tirelo e a go e diretseng dingwaga di le thataro e ne e lekana le tirelo ya modiri yo o thapilweng e menagane gabedi, mme Jehofa, Modimo wa gago o go segofaditse mo go sengwe le sengwe se se dirilweng.

19 O tlhaolele Jehofa, Modimo wa gago, leitibolo lengwe le lengwe le le tonanyana la motlhape le la letsomane la gago gore le nne boitshepo.+ Ga o a tshwanela go dira tiro epe ka leitibolo la motlhape* wa gago kgotsa go beola leitibolo la letsomane la gago. 20 Wena le ba ba mo ntlong ya gago lo le jele fa pele ga ga Jehofa, Modimo wa gago ngwaga le ngwaga mo lefelong le Jehofa a tla le tlhophang.+ 21 Mme fa leitibolo leo le na le bogole, gongwe le tlhotsa, le foufetse kgotsa le na le bogole bope jo bo maswe, ga o a tshwanela go isetsa Jehofa, Modimo wa gago setlhabelo+ ka lone. 22 O le jele mo teng ga metse* ya gago, le jewe ke motho yo o itshekologileng mmogo le motho yo o itshekileng, fela jaaka go ka jewa tshephe kgotsa kgama.+ 23 Mme gone ga o a tshwanela go ja madi a lone;+ o a tshololele fa fatshe jaaka metsi.+

16 “Lo boloke kgwedi ya Abibe,* mme lo ketekele Jehofa, Modimo wa lona Tlolaganyo,+ ka gonne mo kgweding ya Abibe Jehofa, Modimo wa lona o ne a lo ntsha kwa Egepeto go le bosigo.+ 2 Mme lo ntshetse Jehofa, Modimo wa lona setlhabelo sa Tlolaganyo,+ go tswa mo letsomaneng le mo motlhapeng,+ mo lefelong le Jehofa a tlhophang gore leina la gagwe le nne mo go lone.+ 3 Ga lo a tshwanela go se ja mmogo le sepe se se nang le sebediso;+ mo malatsing a le supa lo je senkgwe se se se nang sebediso, e leng senkgwe sa pogisego, ka gonne lo ne lwa tswa kwa lefatsheng la Egepeto lo itlhaganetse.+ Lo dire seno gore lo gakologelwe letsatsi le lo duleng kwa lefatsheng la Egepeto ka lone, fa fela lo sa ntse lo tshela.+ 4 Go se ka ga fitlhelwa tlhama e e nang le sebediso mo go lona mo kgaolong yotlhe ya lona malatsi a le supa,+ e bile nama epe e lo tla e ntshang setlhabelo mo maitseboeng a letsatsi la ntlha e se ka ya lala bosigo jotlhe go fitlha mo mosong.+ 5 Ga lo kitla lo letlelelwa go ntsha setlhabelo sa Tlolaganyo mo motseng mongwe le mongwe fela mo go e Jehofa, Modimo wa lona a lo e nayang. 6 Mme se ntshediwe kwa lefelong le Jehofa, Modimo wa gago a le tlhophang gore leina la gagwe le nne mo go lone. Lo ntshe setlhabelo sa Tlolaganyo mo maitseboeng fela fa letsatsi le sena go phirima,+ ka nako e e tlhomilweng e lo duleng kwa Egepeto ka yone. 7 Lo tshwanetse go e apaya lo bo lo e jela+ mo lefelong le Jehofa, Modimo wa lona a tla le tlhophang,+ mme mo mosong lo ka nna lwa boela kwa ditenteng tsa lona. 8 Lo je senkgwe se se se nang sebediso malatsi a le marataro mme mo letsatsing la bosupa go tla nna le kopano e e kgethegileng ya ga Jehofa, Modimo wa lona. Ga lo a tshwanela go dira tiro epe.+

9 “Lo bale dibeke di le supa. Lo simolole go bala dibeke di le supa go tloga ka nako e lo tsenyang sekele la ntlha mo dijong tsa ditlhaka tse di mo tshimong.+ 10 Morago ga moo, lo tla ketekela Jehofa, Modimo wa lona Moletlo wa Dibeke+ ka setlhabelo se se ntshiwang ka go rata se se tswang mo seatleng sa lona, se se ntshiwang go lekana le kafa Jehofa, Modimo wa lona a lo segofatsang ka gone.+ 11 Mme o itumele fa pele ga ga Jehofa, Modimo wa gago, wena le morwao, morwadio, motlhanka wa gago, lelata la gago, Molefi yo o mo metseng* ya gago, motswakwa, khutsana* le motlholagadi, ba ba agileng le wena, mo lefelong le Jehofa, Modimo wa gago a le tlhophang gore leina la gagwe le nne mo go lone.+ 12 O gakologelwe gore o ne wa nna lekgoba kwa Egepeto,+ mme o boloke melao eno o bo o e diragatse.

13 “O keteke Moletlo wa Diobo*+ malatsi a le supa fa o phutha dijo tsa ditlhaka go tswa mo seboaneng sa gago le go tswa mo segatisetsong sa gago sa leokwane le sa beine. 14 O itumele ka nako ya moletlo wa gago,+ wena le morwao, morwadio, motlhanka wa gago, lelata la gago, Molefi, motswakwa, khutsana le motlholagadi, ba ba mo metseng ya gago. 15 O ketekele Jehofa, Modimo wa gago moletlo malatsi a le supa+ mo lefelong le Jehofa a le tlhophang, ka gonne Jehofa, Modimo wa gago o tla segofatsa thobo yotlhe ya gago le sotlhe se o se dirang,+ mme o tla itumela fela thata.+

16 “Gararo ka ngwaga, banna botlhe ba gago ba tle fa pele ga ga Jehofa, Modimo wa gago mo lefelong le a le tlhophang: mo Moletlong wa Senkgwe Se se Se Nang Sebediso,+ mo Moletlong wa Dibeke+ le mo Moletlong wa Diobo,*+ mme ope wa bone a se ka a tla fa pele ga ga Jehofa a iphotlhere fela. 17 Mpho e mongwe le mongwe a e tlisang e lekane le tshegofatso e Jehofa, Modimo wa gago a e mo neileng.+

18 “O tlhomele lotso longwe le longwe baatlhodi+ le balaodi mo metseng yotlhe* e Jehofa, Modimo wa gago a e go nayang, mme ba tshwanetse go atlhola batho ka katlholo e e siameng. 19 Ga o a tshwanela go sokamisa tshiamiso,+ go tlhaola+ batho kgotsa go amogela pipamolomo, ka gonne pipamolomo e foufatsa matlho a ba ba botlhale+ e bile e sokamisa mafoko a ba ba siameng. 20 O latelele tshiamiso mme e seng sepe gape,+ gore o tswelele o tshela le gore o rue lefatshe le Jehofa, Modimo wa gago a le go nayang.

21 “O se ka wa jala setlhare sa mofuta ope gore e nne kota e e boitshepo*+ gaufi le sebeso sa ga Jehofa, Modimo wa gago se o se itirelang.

22 “Le gone o se ka wa itlhomela pilara e e boitshepo,+ e leng sengwe se Jehofa, Modimo wa gago a se tlhoileng.

17 “Ga o a tshwanela go ntshetsa Jehofa, Modimo wa gago setlhabelo ka poo kgotsa nku e e nang le bogole kgotsa e e nang le sepe fela se se sa siamang, ka gonne e tla nna selo se se makgapha mo go Jehofa, Modimo wa gago.+

2 “A re re go fitlhelwa monna kgotsa mosadi, mo metseng mengwe e Jehofa, Modimo wa gago a e go nayang, yo o dirang se se bosula mo matlhong a ga Jehofa, Modimo wa gago e bile a tlola kgolagano ya gagwe,+ 3 mme a fapoga a bo a obamela medimo e mengwe e bile a e ikobela kgotsa a ikobela letsatsi kgotsa ngwedi kgotsa lesomo lotlhe la magodimo,+ e leng selo se ke sa se go laelang.+ 4 Fa o begelwa kgotsa o utlwela ka gone, foo o batlisise kgang eo ka kelotlhoko. Fa go tlhomamisitswe+ gore ruri selo seno se se makgapha se dirilwe mo Iseraele, 5 o tshwanetse go ntshetsa monna yoo kgotsa mosadi yoo yo o dirileng selo seo se se bosula kwa ntle ga dikgoro tsa motse, mme monna yoo kgotsa mosadi yoo, o tshwanetse go kgobotlediwa ka maje gore a bo a swe.+ 6 Motho yo o tshwanetseng go bolawa, a bolawe ka bosupi* jwa basupi ba le babedi kgotsa ba le bararo.+ Ga a tshwanela go bolawa ka bosupi jwa mosupi a le mongwe fela.+ 7 Basupi bao e nne bone ba ntlha go mo kgobotletsa ka maje gore a swe, mme morago ga moo o tla kgobotlediwa ke batho botlhe. O tshwanetse go tlosa se se bosula mo go wena.+

8 “Fa go nna le kgang e go leng thata go e atlhola mo motseng mongwe wa gago, e ka tswa e le kgang e e akaretsang go bolaya motho+ kgotsa go dirilwe kopo e e ka fa molaong kgotsa go dirilwe tiro nngwe ya thubakanyo kgotsa dikgang tse dingwe tsa dikganetsano, o eme mme o ye kwa lefelong le Jehofa, Modimo wa gago a le tlhophang.+ 9 O ye kwa baperesiting ba Balefi le kwa moatlhoding+ yo o direlang mo malatsing ao, mme o ba botse, mme ba tla go itsise tshwetso e e dirilweng.+ 10 Go tswa foo, o dire go dumalana le tshwetso e ba e go boleletseng go tswa mo lefelong le Jehofa a le tlhophang. O tlhomamise gore o dira go ya ka fa go sotlhe se ba se go laelang. 11 O dire go dumalana le molao o ba go o bontshang le go dumalana le tshwetso e ba go e bolelelang.+ O se ka wa fapoga mo tshwetsong e ba tla go e bolelelang, wa tsaya tsela e e phoso.+ 12 Motho yo ka boikgogomoso a sa reetseng moperesiti yo o direlang Jehofa, Modimo wa gago kgotsa moatlhodi o tshwanetse go swa.+ O tshwanetse go tlosa se se bosula mo Iseraele.+ 13 Foo batho botlhe ba tla utlwa ba bo ba boifa, mme ba ka se tlhole ba nna boikgogomoso.+

14 “Fa o tsena mo lefatsheng le Jehofa, Modimo wa gago a le go nayang, mme o le gapile e bile o nna mo go lone, o bo o re, ‘Mma ke tlhome kgosi gore e mpuse jaaka ditšhaba tsotlhe tse di ntikologileng,’+ 15 mo maemong ao, o tshwanetse go tlhoma kgosi e Jehofa, Modimo wa gago a e tlhophang.+ O tlhome kgosi go tswa mo go bomorwarrago. Ga o a letlelelwa go tlhoma motswakwa yo e seng morwarrago gore a go okamele. 16 Le fa go ntse jalo, kgosi eo e se ka ya ikokoanyetsa dipitse di le dintsi+ kgotsa ya dira gore batho ba boele kwa Egepeto gore ba ye go tsaya dipitse tse di oketsegileng,+ ka gonne Jehofa o lo reile a re, ‘Le ka motlha ga lo a tshwanela go boela morago gape ka tsela eno.’ 17 Le gone e se ka ya nyala basadi ba bantsi, gore pelo ya gagwe e se ka ya fapoga;+ e bile e se ka ya ikokoanyetsa selefera le gauta e ntsi thata.+ 18 Fa e simolola go busa, e tshwanetse go ikwalela Molao ono mo bukeng,* e o kwalolole go tswa mo molaong o o bolokilweng ke baperesiti ba Balefi.+

19 “E nne mo go ene, mme o tshwanetse go e bala malatsi otlhe a botshelo jwa gagwe,+ gore a ithute go boifa Jehofa, Modimo wa gagwe le go ikobela mafoko otlhe a Molao ono le melawana eno ka go e diragatsa.+ 20 Ka jalo, pelo ya gagwe ga e kitla e ikgodisetsa bomorwarraagwe e bile ga a kitla a fapoga taelo eo, a tsaya tsela e e phoso, gore a nne lobaka lo loleele mo bogosing jwa gagwe, ene le bomorwawe mo Iseraele.

18 “Baperesiti le Balefi ba bangwe, e leng lotso lotlhe lwa ga Lefi, ga ba kitla ba newa kabelo epe kgotsa boswa bope mmogo le Iseraele. Ba tla ja ditlhabelo tse di direlwang Jehofa ka molelo, tse e leng boswa jwa gagwe.+ 2 Ka jalo, ba se ka ba nna le boswa bope mo go bomorwarraabone. Jehofa ke boswa jwa bone, fela jaaka a ba boleletse.

3 “Jaanong seno e tla nna tshwanelo ya baperesiti e e tswang mo bathong: Ope fela yo o ntshang setlhabelo, e ka tswa e le sa poo kgotsa sa nku, a neye moperesiti legetla, ditlhaa le mogodu. 4 O mo neye mabutswapele a dijo tsa gago tsa ditlhaka, beine ya gago e ntšha, leokwane la gago le boboa jwa ntlha jo bo beotsweng mo letsomaneng la gago.+ 5 Jehofa, Modimo wa gago o tlhophile ene le bomorwawe go tswa mo ditsong tsotlhe tsa gago gore a direle mo leineng la ga Jehofa ka metlha.+

6 “Mme fa Molefi a tswa mo motseng mongwe wa gago mo Iseraele, kwa a neng a nna gone+ mme a eletsa go ya kwa lefelong le Jehofa a le tlhophang,*+ 7 a ka nna a direla koo mo leineng la ga Jehofa, Modimo wa gagwe fela jaaka bomorwarraagwe botlhe, e bong Balefi, ba ba direlang koo fa pele ga ga Jehofa.+ 8 O tla amogela kabelo ya dijo e e lekanang le ya bone,+ kwantle ga se a se amogelang fa a rekisa dithoto tsa borraagwemogolo.

9 “Fa o setse o le mo lefatsheng le Jehofa, Modimo wa gago a le go nayang, ga o a tshwanela go leka go etsa mekgwa e e makgapha ya ditšhaba tseo.+ 10 Go se ka ga fitlhelwa mo go wena ope yo o fisang morwawe kgotsa morwadie mo molelong,*+ ope yo o dirisang boitseanape,+ ope yo o dirang maselamose,+ ope yo o batlang ditshupo+ dipe, moloi,+ 11 ope yo o konopang ba bangwe a dirisa boselamose, ope yo o batlang kgakololo mo mothong yo o dirisanang le badimo+ kgotsa yo o bolelelang ditiragalo pele+ kgotsa ope yo o buang le baswi.+ 12 Gonne ope fela yo o dirang dilo tseno o makgapha mo go Jehofa, mme Jehofa, Modimo wa gago o ba leleka fa pele ga gago ka ntlha ya mekgwa eno e e makgapha. 13 O itshupe o se na molato fa pele ga ga Jehofa, Modimo wa gago.+

14 “Gonne ditšhaba tseno tse o gapang lefatshe la tsone di ne di tle di reetse ba ba dirang maselamose+ le boitseanape,+ mme Jehofa, Modimo wa gago ga a go letla go dira sepe se se tshwanang le seno. 15 Jehofa, Modimo wa gago o tla go tlhomela moporofeti yo o tshwanang le nna yo o tswang mo go bomorwarrago. Lo tshwanetse go mo reetsa.+ 16 Seno ke karabo ya se lo neng lwa se kopa Jehofa, Modimo wa lona kwa Horeba ka letsatsi la kokoano*+ fa lo ne lo re, ‘Mma ke se ka ka utlwa lefoko la ga Jehofa, Modimo wa me kgotsa ke se ka ka tlhola ke bona molelo o mogolo ono, gore ke se ka ka swa.’+ 17 Foo Jehofa o ne a nthaya a re, ‘Se ba se buileng se molemo. 18 Ke tla ba tlhomela moporofeti yo o tshwanang le wena yo o tswang mo gare ga bomorwarraabone,+ mme ke tla tsenya mafoko a me mo molomong wa gagwe,+ mme o tla bua le bone sotlhe se ke se mo laelang.+ 19 Eleruri, ke tla otlhaya motho yo o se kitlang a reetsa mafoko a me a moporofeti yoo a tla a buang mo leineng la me.+

20 “‘Fa moporofeti ope ka boikgogomoso a bua lefoko le ke sa mo laelang gore a le bue mo leineng la me kgotsa a bua mo leineng la medimo e mengwe, moporofeti yoo o tshwanetse go swa.+ 21 Le fa go ntse jalo, o ka nna wa bua jaana mo pelong ya gago: “Re tla itse jang gore Jehofa ga a bua lefoko leo?” 22 Fa moporofeti a bua mo leineng la ga Jehofa mme lefoko leo le bo le sa diragale kgotsa le sa nne boammaaruri, foo Jehofa ga a bua lefoko leo. Moporofeti yoo o le buile ka boikgogomoso. O se ka wa mo tshaba.’

19 “Fa Jehofa, Modimo wa gago a fedisa ditšhaba tse Jehofa, Modimo wa gago a go nayang lefatshe la tsone, mme o setse o gapile lefatshe la tsone e bile o nna mo metseng ya tsone le mo matlong a tsone,+ 2 o tlhophe metse e le meraro mo lefatsheng la gago le Jehofa, Modimo wa gago a le go nayang gore o le rue.+ 3 Lefatshe le Jehofa, Modimo wa gago a le go neileng gore o le rue, o le kgaoganye ka dikarolo tse tharo, mme o baakanye ditsela gore mmolai a kgone go tshabela kwa motseng mongwe wa metse eo.

4 “Jaanong seno ke se se tla dirwang ka mmolai yo o ka nnang a tshabela koo e le gore a tshele: Fa a bolaya motho yo mongwe e se ka boomo mme a ne a sa mo tlhoa;+ 5 jaaka fa a tsamaya le motho yo mongwe kwa sekgweng go ya go rwalela dikgong a bo a tsholetsa selepe a re o rema setlhare, mme tlhogo ya selepe e bo e somoga mo mohinyaneng wa sone e bo e itaya motho yoo a bo a swa, mmolai a tshabele mo motseng mongwe wa metse eno gore a tshele.+ 6 Go seng jalo, e re ka mmusolosi wa madi+ a tla bo a galefile thata,* a ka nna a lelekisa mmolai a bo a mo tshwara mme a mmolaya ka gonne sekgala sa go ya kwa motseng oo se le seleele. Le fa go ntse jalo, o ne a sa tshwanela go bolawa ka gonne o ne a ntse a sa tlhoa motho yoo.+ 7 Ke gone ka moo ke go laelang ke re: ‘Tlhopha metse e le meraro.’

8 “Jehofa, Modimo wa gago o tla atolosa karolo ya gago ya naga jaaka a ikanetse borragomogolo+ e bile o tla go naya lefatshe lotlhe le a neng a le ba solofeditse.+ 9 Mme gore seno se direge, o tshwanetse go ikanyega ka go ikobela ditaelo tseno tsotlhe tse ke di go nayang gompieno. Seno se raya gore o tshwanetse go rata Jehofa, Modimo wa gago le go tsamaya mo ditseleng tsa gagwe ka metlha.+ Fa lefatshe la gago le atolositswe, o oketse metse eno e meraro ka e mengwe e meraro.+ 10 Seo se tla dira gore go se ka ga nna le madi ape a a se nang molato a a tla tshololwang+ mo lefatsheng la gago le Jehofa, Modimo wa gago a le go nayang gore e nne boswa e bile ga o kitla o nna le molato ope wa madi.+

11 “Mme gone, fa motho a ne a tlhoile motho yo mongwe+ e bile a ne a mo laletse gore a mo tlhasele a bo a mo gobatsa thata a bo a swa, mme motho yono a tshabetse kwa motseng mongwe wa metse eno, 12 foo bagolwane ba motse wa gagabo ba rome batho gore a ye go tsewa koo, mme ba mo tsenye mo seatleng sa mmusolosi wa madi, mme o tshwanetse go swa.+ 13 Lo* se ka lwa mo utlwela botlhoko, mme lo tshwanetse go phimola molato wa madi a a tsholotsweng a a se nang molato mo Iseraele,+ gore dilo di lo tsamaele sentle.

14 “Fa o amogela boswa jwa gago mo lefatsheng le Jehofa, Modimo wa gago a le go nayang gore o le rue, ga o a tshwanela go sutisa matshwao a molelwane wa moagelani wa gago+ mo lefelong le borraagwemogolo ba neng ba tlhomile melelwane mo go lone.

15 “Motho ga a ka ke a bonwa molato ka bosupi jwa motho a le mongwe fela jo bo bontshang gore o dirile molato kgotsa boleo.+ Go tlhokega bosupi* jwa batho ba le babedi kgotsa ba le bararo go bona gore a tatofatso e boammaaruri.+ 16 Fa mosupi yo o logang maano a a bosula a neela bosupi ka motho a bo a mo latofatsa ka molato mongwe,+ 17 batho bao ba babedi ba ba ganetsanang ba tla ema fa pele ga ga Jehofa, fa pele ga baperesiti le baatlhodi ba ba tla bong ba direla mo malatsing ao.+ 18 Baatlhodi ba tla batlisisa ka kelotlhoko,+ mme fa motho yo o ileng a neela bosupi e le mosupi wa maaka e bile a tlisitse tatofatso ya maaka ka morwarraagwe, 19 lo mo dire fela jaaka a ne a ikaeletse go dira morwarraagwe,+ mme lo tshwanetse go tlosa se se bosula mo go lona.+ 20 Ba ba salang ba tla utlwa ba bo ba boifa, mme ba ka se tlhole ba dira sepe gape se se bosula se se tshwanang le seno mo go lona.+ 21 Lo* se ka lwa mo utlwela botlhoko:+ Botshelo bo tla duelelwa ka botshelo, leitlho ka leitlho, leino ka leino, seatla ka seatla, lonao ka lonao.+

20 “Fa o ya ntweng o ya go tlhabana le baba ba gago mme o bona dipitse le dikara tsa bone le masole a a fetang a gago, o se ka wa ba boifa, ka gonne Jehofa, Modimo wa gago, yo o neng a go ntsha kwa lefatsheng la Egepeto o na le wena.+ 2 Fa o tloga o tsena mo tlhabanong, moperesiti a atamele mme a bue le batho.+ 3 A ba reye a re, ‘Utlwa, wena Iseraele, lo tloga lo tlhabana le baba ba lona. Lo se ka lwa kgobega marapo. Lo se ka lwa boifa kgotsa lwa tshoga kgotsa lwa roroma ka ntlha ya bone, 4 ka gonne Jehofa, Modimo wa lona o tsamaya le lona. O tla tlhabana le baba ba lona a bo a lo boloka.’+

5 “Balaodi le bone ba bolelele batho ba re, ‘Ke mang yo o agileng ntlo e ntšha mme a ise a e kgakole? A a boele kwa ntlong ya gagwe. Go seng jalo, a ka nna a swela mo tlhabanong mme monna yo mongwe o tla e kgakola. 6 Mme ke mang yo o jetseng tshimo ya morara* e bile a ise a je maungo a yone? A a tsamaye a boele kwa ntlong ya gagwe. Go seng jalo, a ka nna a swela mo tlhabanong mme monna yo mongwe o tla ja maungo a yone. 7 Le gone, ke mang yo o beeleditseng mosadi mme a ise a mo nyale? A a tsamaye a boele kwa ntlong ya gagwe.+ Go seng jalo, a ka nna a swela mo tlhabanong mme monna yo mongwe o tla mo nyala.’ 8 Gape balaodi ba botse batho ba re, ‘Ke mang yo o boifang e bile a kgobegile marapo?+ A a boele kwa ntlong ya gagwe, gore a se ka a dira gore bomorwarraagwe ba kgobege marapo jaaka ene.’*+ 9 Fa balaodi ba feditse go bua le batho, ba tlhome balaodi ba masole gore ba etelele batho pele.

10 “Fa o atamela motse gore o tlhabane le one, gape o o bolelele ditumalano tsa go dira kagiso.+ 11 Fa motse oo o go araba ka kagiso e bile o go bulela dikgoro, batho botlhe ba ba fitlhelwang mo go one e tla nna ba gago ba ba patelediwang go dira tiro e e boima, mme ba tla go direla.+ 12 Le fa go ntse jalo, fa motse oo o gana go dira kagiso le wena, mme go na le moo o tlhabana le wena, o o tlhasele, 13 mme Jehofa, Modimo wa gago o tla o tsenya mo seatleng sa gago, mme o tshwanetse go kgemetha monna mongwe le mongwe mo go one ka tšhaka. 14 Le fa go ntse jalo, basadi, bana, leruo le sengwe le sengwe se se mo motseng, dilo tsotlhe tse di mo go one, o ka di ikgapela+ mme o tla ja dijo tse o di gapileng mo babeng ba gago, tse Jehofa, Modimo wa gago a go di neileng.+

15 “Seo ke se o tla se dirang metse yotlhe e e kgakala thata le wena, e seng metse ya ditšhaba tseno tse di gaufi le wena. 16 Mme gone, mo metseng ya ditšhaba tseno, e Jehofa, Modimo wa gago a e go nayang go nna boswa, ga o a tshwanela go tlogela sepe se se hemang gore se tshele.+ 17 Go na le moo, o tshwanetse go ba senya gotlhelele, Bahite, Baamore, Bakanana, Baperise, Bahife le Bajebuse,+ fela jaaka Jehofa, Modimo wa gago a go laetse; 18 gore ba se ka ba lo ruta go latela mekgwa ya bone e e makgapha e ba neng ba e direla medimo ya bone, mme ba dira gore lo leofele Jehofa, Modimo wa lona.+

19 “Fa o tlhasela motse gore o o gape e bile go fetile malatsi a le mantsi o ntse o lwa le one, o se ka wa senya ditlhare tsa one ka go di rema ka selepe. O ka nna wa ja maungo a tsone, mme o se ka wa di rema.+ A o tla tlhasela setlhare sa naga jaaka e kete o tlhasela motho? 20 O ka nna wa senya fela setlhare se o itseng gore ga se sa dijo. O ka nna wa se rema o bo o aga dithako go dikologa motse o o tlhabanang le wena, go fitlha o wa.

21 “Fa mongwe a fitlhelwa mo nageng a bolailwe setlhogo mo lefatsheng le Jehofa, Modimo wa gago a le go nayang gore o le rue mme go sa itsiwe gore o bolailwe ke mang, 2 bagolwane le baatlhodi+ ba gago ba tswe mme ba ye go lekanya sekgala sa go tswa mo setopo se leng gone go ya kwa metseng e e se dikologileng. 3 Go tswa foo, bagolwane ba motse o o gaufi thata le setopo seo ba tseye kgongwana e namagadi go tswa mo motlhapeng e e iseng e ko e dirisiwe, e e iseng e ko e goge jokwe, 4 mme bagolwane ba motse oo ba ise kgongwana eo kwa mokgatšheng* o o elelang metsi, o go iseng go ke go lengwe kgotsa go jalwe peo mo go one, mme ba robe molala wa kgongwana eo gone koo mo mokgatšheng.+

5 “Mme baperesiti, e bong Balefi, ba tla atamela ka gonne Jehofa, Modimo wa gago o tlhophile bone gore ba mo direle,+ ba segofatse batho mo leineng la ga Jehofa.+ Ba tla bolela kafa kganetsano nngwe le nngwe e e amanang le thubakanyo e tshwanetseng go rarabololwa ka gone.+ 6 Go tswa foo, bagolwane botlhe ba motse oo ba ba gaufi le setopo ba tlhapele diatla+ tsa bone mo godimo ga kgongwana e molala wa yone o neng wa robelwa mo mokgatšheng, 7 mme ba bue ba re, ‘Diatla tsa rona ga di a tsholola madi ano e bile matlho a rona ga a a bona fa a tshololwa. 8 Jehofa, o se ka wa pega batho ba gago ba Iseraele molato ono, ba o neng wa ba golola,+ e bile o se ka wa dira gore molato wa madi a a tsholotsweng a a se nang molato o nne mo bathong ba gago ba Iseraele.’+ Foo ga ba kitla ba pegiwa molato wa go tsholola madi. 9 Seno se tla dira gore go phimolwe molato wa go tsholola madi a a se nang molato mo go wena ka go dira se se siameng mo matlhong a ga Jehofa.

10 “Fa o ya go tlhabana le baba ba gago mme Jehofa, Modimo wa gago a ba fenya mo boemong jwa gago o bo o ba isa botshwarwa,+ 11 mme o bona mosadi yo montle mo gare ga batshwarwa bao e bile o mo kgatlhegela mme o batla go mo tsaya gore e nne mosadi wa gago, 12 o ka nna wa mo tlisa mo ntlong ya gago. Go tswa foo, a beole tlhogo ya gagwe, a kgaole dinala tsa gagwe 13 a bo a apole seaparo sa gagwe sa botshwarwa mme a nne mo ntlong ya gago. O tla lelela rraagwe le mmaagwe kgwedi yotlhe,+ morago ga moo o ka nna wa tlhakanela dikobo le ene; wena o tla nna monna wa gagwe mme ene o tla nna mosadi wa gago. 14 Mme fa o sa mo itumelele, foo o mo tlogele+ a ye gongwe le gongwe kwa a batlang go ya teng. Mme gone, o se ka wa mo rekisa ka madi kgotsa wa mo tshwara makgwakgwa ka gonne o tla bo o setse o mo tlontlolotse.

15 “Fa monna a na le basadi ba babedi mme a rata yo mongwe thata go feta yo mongwe,* mme boobabedi ba mo tsholetse bana ba basimane, mme morwa wa leitibolo e le wa mosadi yo o sa ratiweng,+ 16 mo letsatsing la fa a abela bomorwawe boswa jwa gagwe, ga a kitla a letlelelwa go tshwara morwa wa mosadi yo o ratiwang jaaka e kete ke leitibolo la gagwe mo boemong jwa morwa wa mosadi yo o sa ratiweng, yo e leng leitibolo. 17 O tshwanetse go lemoga gore morwa wa mosadi yo o sa ratiweng ke leitibolo ka go mo abela dikarolo tse pedi mo go sengwe le sengwe se a nang le sone, ka gonne morwa yoo ke tshimologo ya maatla a gagwe a go tshola. Tshwanelo ya go nna leitibolo ke ya gagwe.+

18 “Fa monna a na le morwa yo o tlhogoethata e bile e le motlhanogi mme a sa ikobele rraagwe kgotsa mmaagwe,+ mme ba lekile go mo otlhaya mme a gana go ba reetsa,+ 19 rraagwe le mmaagwe ba mo tshware mme ba mo ise kwa bagolwaneng kwa kgorong ya motse wa gagabo 20 mme ba reye bagolwane ba motse wa gagabo ba re, ‘Morwa yono wa rona o tlhogoethata e bile ke motlhanogi, gape o gana go re ikobela. O ja bobe+ e bile ke letagwa.’+ 21 Foo banna botlhe ba motse wa gagabo ba tshwanetse go mo kgobotletsa ka maje gore a bo a swe. Ka jalo, o tshwanetse go tlosa se se bosula mo go wena, mme Iseraele yotlhe e tla utlwa e bo e boifa.+

22 “Fa motho a dira boleo jo bo tshwanelang kotlhao ya loso+ a bo a bolawa lo bo lo mo kaletsa mo koteng,+ 23 setopo sa gagwe se se ka sa tlogelwa bosigo jotlhe mo koteng.+ Go na le moo, lo tlhomamise gore o fitlhwa mo go lone letsatsi leo, ka gonne motho yo o kaleditsweng ke sengwe se se hutsitsweng ke Modimo,+ mme lo se ka lwa leswafatsa lefatshe la lona le Jehofa, Modimo wa lona a le lo nayang gore e nne boswa.+

22 “Fa o bona poo kgotsa nku ya ga morwarrago e timela, o se ka wa e tlhokomologa ka boomo.+ O tshwanetse go e busetsa kwa go morwarrago. 2 Mme fa morwarrago a sa nne gaufi le wena kgotsa o sa mo itse, o tlise phologolo eo mo ntlong ya gago, mme e tla tswelela e nna le wena go fitlha morwarrago a e batla. Foo, o e busetse kwa go ene.+ 3 Seo ke se o tla se dirang ka tonki ya gagwe, ka diaparo tsa gagwe le ka sepe fela sa ga morwarrago se se latlhegileng mme o se bone. Ga o a tshwanela go se tlhokomologa.

4 “Fa o bona tonki kgotsa poo ya ga morwarrago e wela fa fatshe mo tseleng, ga o a tshwanela go e tlhokomologa ka boomo. O tshwanetse go mo thusa go tsosa phologolo eo.+

5 “Mosadi ga a tshwanela go apara diaparo tsa monna e bile monna a se ka a apara diaparo tsa mosadi. Gonne ope fela yo o dirang jalo o makgapha mo go Jehofa, Modimo wa gago.

6 “Fa o bona sentlhaga sa nonyane mo tseleng se na le mamphorwana kgotsa mae, e ka tswa e le mo setlhareng kgotsa fa fatshe, mme mmaaone a ntse mo godimo ga mamphorwana kgotsa mae, ga o a tshwanela go tsaya mmaaone mmogo le mamphorwana.+ 7 O tlogele mmaaone a tsamaye, mme o ka nna wa itseela mamphorwana. O dire seno gore dilo di go tsamaele sentle le gore o tshele lobaka lo loleele.

8 “Fa o aga ntlo e ntšha, gape o direle borulelo jwa gago+ lobotana go bo dikologa, gore o se ka wa tlisetsa ntlo ya gago molato wa madi ka gonne mongwe a ka nna a wa mo go yone.

9 “Ga o a tshwanela go jala tshimo ya gago ya morara* ka peo ya mefuta e mebedi.+ Go seng jalo, sengwe le sengwe se se ungwang go tswa mo peong e o e jalang mmogo le thobo ya tshimo eo e tla nna sa lefelo le le boitshepo.

10 “Ga o a tshwanela go lema ka poo le tonki di golegilwe mmogo.+

11 “Ga o a tshwanela go apara seaparo se se dirilweng ka wulu e tlhakantswe le tlhale.+

12 “O dire makgabe mo dintlheng tse nnê tsa diaparo tse o di aparang.+

13 “Fa monna a nyala mosadi a bo a tlhakanela dikobo le ene go tswa foo a bo a mo tlhoa* 14 e bile a mo latofatsa a re o dirile boitsholo jo bo maswe a bo a mo senya leina ka go bua a re: ‘Ke nyetse mosadi yono, mme fa ke ne ke tlhakanela dikobo le ene ga ke a ka ka bona bosupi jwa gore e ne e le kgarebane,’ 15 rraagwe mosetsana le mmaagwe ba ise bosupi jwa bokgarebane jwa mosetsana yono kwa bagolwaneng kwa kgorong ya motse. 16 Rraagwe mosetsana o tshwanetse go raya bagolwane a re, ‘Ke ne ka naya monna yono morwadiake gore e nne mosadi wa gagwe, mme jaanong o mo tlhoile* 17 e bile o a mo latofatsa a re o dirile boitsholo jo bo maswe, a re: “Ke lemogile gore morwadio ga a na bosupi jwa bokgarebane.” Jaanong jono ke bosupi jwa bokgarebane jwa ga morwadiake.’ Go tswa foo, ba tla phuthololela letsela fa pele ga bagolwane ba motse. 18 Bagolwane ba motse+ ba tla tsaya monna yoo ba bo ba mo otlhaya.+ 19 Ba tla mo duedisa dishekele* tsa selefera di le 100 ba bo ba di naya rraagwe mosetsana, ka gonne monna yoo o tlontlolotse kgarebane ya Iseraele,+ mme o tla tswelela e le mosadi wa gagwe. Ga a kitla a letlelelwa go mo tlhala fa fela a sa ntse a tshela.

20 “Mme gone, fa tatofatso eo e le boammaaruri e bile go se na bosupi jwa gore mosetsana yoo e ne e le kgarebane, 21 ba ntshetse mosetsana kwa ntle kwa kgorong ya ntlo ya ga rraagwe, mme banna ba motse ba mo kgobotletse ka maje gore a bo a swe, ka gonne o dirile tiro ya matlhabisaditlhong+ mo Iseraele ka go dira boitsholo jo bo sa siamang jwa tlhakanelodikobo* mo ntlong ya ga rraagwe.+ Ka jalo, o tshwanetse go tlosa se se bosula mo go wena.+

22 “Fa monna a fitlhelwa a tlhakanela dikobo le mosadi wa monna yo mongwe, boobabedi ba tshwanetse go swa, monna yoo yo o tlhakanetseng dikobo le mosadi, mmogo le mosadi yoo.+ Ka jalo, o tshwanetse go tlosa se se bosula mo Iseraele.

23 “Fa kgarebane e beeleditswe ke monna, mme monna yo mongwe a bo a kopana le yone mo motseng a bo a tlhakanela dikobo le yone, 24 boobabedi lo ba ntshetse kwa ntle kwa kgorong ya motse oo mme lo ba kgobotletse ka maje gore ba bo ba swe, mosetsana ka gonne o ne a se ka a goa mo motseng le monna ka gonne o tlontlolotse mosadi wa motho yo mongwe.+ Ka jalo, o tshwanetse go tlosa se se bosula mo go wena.

25 “Le fa go ntse jalo, fa go direga gore monna mongwe a kopane le mosetsana yo o beeleditsweng a le mo nageng, mme monna yoo a bo a mo fekeetsa a bo a tlhakanela dikobo le ene, monna yo o tlhakanetseng dikobo le ene a swe a le nosi, 26 mme ga o a tshwanela go dira mosetsana sepe. Mosetsana yoo ga a dira boleo jo bo tshwanelang loso. Kgang eno e tshwana fela le fa motho a tlhasela motho yo mongwe a bo a mmolaya.+ 27 Gonne go ne ga direga gore a kopane le ene mo nageng, mme mosetsana yo o beeleditsweng o ne a goa, mme go ne go se na ope yo o ka mo namolang.

28 “Fa monna mongwe a kopana le mosetsana wa kgarebane yo o iseng a beelediwe a bo a mo tshwara a tlhakanela dikobo le ene, mme ba bo ba lemogiwa,+ 29 monna yo o tlhakanetseng dikobo le ene o tshwanetse go naya rraagwe mosetsana dishekele tsa selefera di le 50, mme mosetsana yono e tla nna mosadi wa gagwe.+ E re ka a mo tlontlolotse, ga a kitla a letlelelwa go mo tlhala fa fela a sa ntse a tshela.

30 “Go se nne le monna ope yo o tsayang mosadi wa ga rraagwe, gore a se ka a tlontlolola rraagwe.*+

23 “Go se nne le monna ope yo o opafaditsweng ka go letla gore dikgeleswa tsa gagwe tsa bonna di thubiwe kgotsa yo o neng a letla gore serwe sa gagwe sa bonna se kgaolwe, yo o ka tsenang mo phuthegong ya ga Jehofa.+

2 “Go se nne le morwa ope yo o tshotsweng pele ga lenyalo yo o ka tsenang mo phuthegong ya ga Jehofa.+ Tota le go ya kokomaneng ya bolesome, ope wa ditlogolwana tsa gagwe a se ka a tsena mo phuthegong ya ga Jehofa.

3 “Go se nne le Moamone ope kgotsa Momoabe ope yo o ka tsenang mo phuthegong ya ga Jehofa.+ Tota le go ya kokomaneng ya bolesome, ope wa ditlogolwana tsa bone le ka motlha a se ka a tsena mo phuthegong ya ga Jehofa, 4 ka gonne ba ne ba se ka ba lo thusa ka dijo le metsi fa lo ne lo le mo tseleng lo tswa kwa Egepeto,+ le ka gonne ba ne ba lo thapela Balaame morwa Beore yo o tswang kwa Pethore wa Mesopotamia gore a lo hutse.+ 5 Le fa go ntse jalo, Jehofa, Modimo wa gago o ne a gana go reetsa Balaame.+ Go na le moo, Jehofa, Modimo wa gago o ne a fetola phutso eo gore e nne tshegofatso mo go wena+ ka gonne Jehofa, Modimo wa gago o ne a go rata.+ 6 Le ka motlha o se ka wa dira sepe se se ka dirang gore dilo di ba tsamaele sentle kgotsa ba atlege malatsi otlhe a gago.+

7 “Ga o a tshwanela go tlhoa Moedoma ka gonne ke morwarrago.+

“Ga o a tshwanela go tlhoa Moegepeto ka gonne o ne wa nna motswakwa kwa nageng ya gagabo.+ 8 Bana ba kokomana ya boraro ba ba tla ba tsholelwang ba ka nna ba tsena mo phuthegong ya ga Jehofa.

9 “Fa o tlhomile kampa ya gago gore o tlhasele baba ba gago, o ithibe mo go sengwe le sengwe se se bosula.*+ 10 Fa monna a itshekologa ka ntlha ya go tswa peo+ bosigo, a a tswele kwa ntle ga kampa mme a se ka a boela mo go yone. 11 Fa go nna maitseboa, a tlhape ka metsi, go tswa foo a ka nna a boela kwa kampeng fa letsatsi le phirima.+ 12 Go tlhophiwe lefelo le le kwa thoko* kwa ntle ga kampa, mme ke gone kwa lo tla ithomelang gone. 13 Mo didirisiweng tsa gago, go nne le kepu. Fa o kotama kwa ntle, o epe mosima ka yone, go tswa foo o bo o katela mantle a gago. 14 Gonne Jehofa, Modimo wa gago o mo kampeng ya gago+ gore a go golole le gore a tsenye baba ba gago mo seatleng sa gago, mme kampa ya gago e tshwanetse go nna boitshepo,+ gore a se ka a bona sepe se se sa siamang mo go wena mme a tlogela go tsamaya le wena.

15 “O se ka wa busetsa motlhanka kwa go mong wa gagwe fa a tshaba kwa go mong wa gagwe mme a tla kwa go wena. 16 A ka nna a aga mo lefelong lepe fela le a le tlhophang mo metseng mengwe ya gago, gongwe le gongwe fela kwa a batlang gone. Ga o a tshwanela go mo tshwara setlhogo.+

17 “Go se nne le ope wa bomorwadia Iseraele yo o nnang mogwebakammele wa tempele+ e bile go se nne le ope wa bomorwa Iseraele yo o nnang mogwebakammele wa tempele.+ 18 Ga o a tshwanela go tlisa kwa ntlong ya ga Jehofa, Modimo wa gago, tlhwatlhwa e e duetseng mogwebakammele wa mosadi kgotsa tlhwatlhwa e e duetseng* mogwebakammele wa monna* e le go diragatsa maikano, ka gonne tsoopedi ke dilo tse di makgapha mo go Jehofa, Modimo wa gago.

19 “Ga o a tshwanela go duedisa morwarrago morokotso,+ e ka tswa e le morokotso wa madi, wa dijo kgotsa wa sepe fela se motho a ka duedisiwang morokotso wa sone. 20 O ka nna wa duedisa motswakwa morokotso,+ mme ga o a tshwanela go duedisa morwarrago morokotso,+ gore Jehofa, Modimo wa gago a go segofatse mo tirong nngwe le nngwe ya gago mo lefatsheng le o yang go le rua.+

21 “Fa o direla Jehofa, Modimo wa gago maikano,+ o se ka wa nna bonya go a diragatsa.+ Gonne ruri Jehofa, Modimo wa gago o tla a batla mo go wena; go seng jalo, seo e tla nna boleo mo go wena.+ 22 Mme gone, fa o ithiba go dira maikano, ga o kitla o nna le molato wa boleo.+ 23 O boloke mafoko a molomo wa gago,+ mme o tshwanetse go diragatsa se molomo wa gago o se ikanetseng e le setlhabelo se se ntshediwang Jehofa, Modimo wa gago ka go rata.+

24 “Fa o tsena mo tshimong ya morara* ya moagelani wa gago, o ka nna wa ja morara o o lekaneng go go kgorisa, mme gone o se ka wa tsenya ope wa one mo mmanking wa gago.+

25 “Fa o tsena mo tshimong ya moagelani wa gago ya dijo tsa ditlhaka tse di iseng di robiwe, o ka nna wa kgetla diako* tse di buduleng ka seatla, mme gone o se ka wa kgaola dijo tsa ditlhaka tsa moagelani wa gago ka sekele.+

24 “Fa monna a nyala mosadi mme mosadi yoo a bo a sa mo itumedise ka gonne a bone sengwe se se sa siamang mo go ene, o tshwanetse go mo kwalela lekwalo la tlhalo,+ a le mo neye mme a mo ntshe mo ntlong ya gagwe.+ 2 Fa a sena go tswa mo ntlong ya monna yoo, a ka nna a tsamaya mme a nyalwa ke monna yo mongwe.+ 3 Fa monna wa bobedi a mo tlhoa* a bo a mo kwalela lekwalo la tlhalo, a le mo naya a bo a mo ntsha mo ntlong ya gagwe, kgotsa fa monna yono wa bobedi yo a mo nyetseng a swa, 4 monna wa gagwe wa ntlha yo a neng a mo tsamaisa ga a kitla a letlelelwa go mo nyala gape fa a sena go leswafadiwa, ka gonne seo ke selo se se makgapha mo go Jehofa. Ga o a tshwanela go tlisa boleo mo lefatsheng le Jehofa, Modimo wa gago a le go nayang gore e nne boswa.

5 “Fa monna a sa tswa go nyala, a se ka a direla mo bosoleng kgotsa a newa ditiro dipe tse dingwe. A nne ngwaga otlhe a sa dire ditiro tseo mme a nne kwa gae, mme a itumedise mosadi wa gagwe.+

6 “Ope a se ka a tsaya leje le legolo* kgotsa tshilo ya lone e le peeletso ya se a se adimileng mongwe,+ ka gonne o tla bo a tsaya se motho yo mongwe a itshedisang ka sone* e le peeletso.

7 “Fa mongwe a fitlhelwa a tsere mongwe wa bomorwarraagwe yo e leng Moiseraele ka dikgoka, mme a mo tshwere setlhogo e bile a mo rekisitse,+ motho yoo yo o tsayang batho ka dikgoka o tshwanetse go swa.+ O tlose se se bosula mo go wena.+

8 “Fa go nna le lepero,* lo nne kelotlhoko thata gore lo dira go dumalana le sotlhe se baperesiti ba Balefi ba tla se lo laelang.+ Lo tlhomamise gore lo dira fela jaaka ke ba laetse. 9 Lo gakologelwe se Jehofa, Modimo wa lona a neng a se dira Miriame mo tseleng fa lo ne lo tswa kwa Egepeto.+

10 “Fa o adima moagelani wa gago selo sa mofuta ope fela,+ ga o a tshwanela go tsena mo ntlong ya gagwe gore o tseye se a rileng o tla se ntsha e le peeletso. 11 O eme kwa ntle, mme motho yo o amogetseng se o se mo adimileng a ntshetse kwa ntle kwa go wena se a se go nayang e le peeletso. 12 Mme fa e le gore motho yoo o a tlhoka, ga o a tshwanela go ya go robala o sa ntse o tshwere selo se a se go neileng e le peeletso.+ 13 Fela fa letsatsi le phirima, o tshwanetse go mmusetsa selo seo se a se go neileng e le peeletso mme o tla ya go robala ka seaparo sa gagwe+ e bile o tla go segofatsa; mme seo e tla bo e le tshiamo mo go wena fa pele ga ga Jehofa, Modimo wa gago.

14 “Ga o a tshwanela go tsietsa modiri yo o thapilweng yo o tlhokang e bile a humanegile, e ka tswa e le mongwe wa bomorwarrago kgotsa motswakwa mo lefatsheng la gaeno, mo teng ga metse* ya gago.+ 15 O mo neye tuelo ya gagwe mo go lone letsatsi leo,+ pele ga letsatsi le phirima, ka gonne o a tlhoka e bile botshelo jwa gagwe bo ikaegile ka tuelo ya gagwe. Go seng jalo, o tla lelela kwa go Jehofa ka ntlha ya gago, mme wena o tla bo o na le molato wa gore o dirile boleo.+

16 “Borre ba se ka ba bolaelwa se bana ba bone ba se dirileng, bana le bone ba se ka ba bolaelwa se borraabone ba se dirileng.+ Motho a bolaelwe fela boleo jwa gagwe.+

17 “Ga o a tshwanela go sokamisa katlholo ya motswakwa kgotsa ya khutsana,*+ e bile ga o a tshwanela go tsaya seaparo sa motlholagadi gore e nne peeletso ya sengwe se a se adimileng.+ 18 O gakologelwe gore o ne wa nna lekgoba kwa Egepeto, mme Jehofa, Modimo wa gago o ne a go golola gone.+ Ke gone ka moo ke go laelang gore o dire seno.

19 “Fa o roba dijalo mo tshimong ya gago o bo o lebala ngata kwa tshimong, o se ka wa boa wa ya go e tsaya. O e tlogelele motswakwa, khutsana le motlholagadi,+ gore Jehofa, Modimo wa gago a go segofatse mo go sotlhe se o se dirang.+

20 “Fa o tlhotlhora setlhare sa gago sa motlhware, o se ka wa tlhotlhora dikala tsa sone gape. Se se setseng o se tlogelele motswakwa, khutsana le motlholagadi.+

21 “Fa o phutha morara* mo tshimong ya gago ya morara, ga o a tshwanela go boa o tla go phutha o o setseng. O o tlogelele motswakwa, khutsana le motlholagadi. 22 O gakologelwe gore o ne wa nna lekgoba kwa lefatsheng la Egepeto. Ke gone ka moo ke go laelang gore o dire seno.

25 “Fa go tsoga kganetsano fa gare ga banna, ba ka nna ba tla fa pele ga baatlhodi+ mme ba tla ba atlhola ba bo ba dira tshwetso ya gore ke mang yo o molato le yo o seng molato.+ 2 Fa yo o bosula a tshwanelwa ke go itewa,+ moatlhodi o tla mo laela gore a patlame mme o tla itewa fa pele ga gagwe. Palo ya dithupa tse a tla di itewang e tsamaisane le bosula jwa se a se dirileng. 3 A ka nna a mo itaya dithupa di le 40+ mme e seng go feta foo. Fa a ka tswelela a mo itaya dithupa tse di fetang tseno, morwarrago o tla tlhabisiwa ditlhong fa pele ga gago.

4 “Ga o a tshwanela go bofa poo molomo fa e photha dijo tsa ditlhaka.+

5 “Fa barwa ba motho ba nna mmogo mme yo mongwe mo go bone a bo a swa a se na ngwana wa mosimane, mosadi wa yo o suleng a se ka a nyalwa ke monna o sele yo e seng wa lelapa leo. Morwarraagwe monna wa gagwe a ye kwa go ene, a mo tseye gore a nne mosadi wa gagwe mme a mo nyale seyantlo.+ 6 Leitibolo le mosadi yoo a tla le tsholang le tla tsweledisa leina la ga morwarraagwe yo o suleng,+ gore leina la gagwe le se ka la phimolwa mo Iseraele.+

7 “Jaanong fa monna yoo a sa batle go nyala motlholagadi wa ga morwarraagwe, motlholagadi wa ga morwarraagwe a ye kwa bagolwaneng kwa kgorong ya motse mme a ba reye a re, ‘Morwarraagwe monna wa me o ganne go boloka leina la ga morwarraagwe mo Iseraele. Ga a dumela go nnyala seyantlo.’ 8 Bagolwane ba motse wa gagabo ba tshwanetse go mmitsa mme ba bue le ene. Fa a tswelela a re, ‘Ga ke batle go mo nyala,’ 9 foo motlholagadi wa ga morwarraagwe a mo atamele fa pele ga bagolwane, a somole setlhako* mo lonaong lwa gagwe,+ a mo kgwele mathe mo sefatlhegong a bo a re, ‘Monna yo o sa batleng go aga ntlo ya ga morwarraagwe o tshwanetse go dirwa seno.’ 10 Morago ga moo, leina la lelapa la gagwe* mo Iseraele le tla itsege e le ‘Ntlo ya motho yo setlhako sa gagwe se neng sa somolwa.’

11 “Fa banna ba babedi ba lwa mme mosadi wa yo mongwe a bo a tsereganya gore a sireletse monna wa gagwe mme a bo a tshwara monna yoo ka dirwe tsa gagwe tsa sephiri, 12 o tshwanetse go kgaola seatla sa gagwe. O* se ka wa mo tlhomogela pelo.

13 “Ga o a tshwanela go nna le dilekanyabokete tsa leje di le pedi tse di farologaneng mo kgetsing ya gago,+ se segolo le se sennye. 14 Ga o a tshwanela gore mo ntlong ya gago o nne le dilwana tse di lekanyang di le pedi tse di farologaneng,*+ se segolo le se sennye. 15 O nne le selekanyabokete se se tlhomameng e bile se siame le selwana se se lekanyang se se tlhomameng e bile se siame, gore o tshele lobaka lo loleele mo lefatsheng le Jehofa, Modimo wa gago a le go nayang.+ 16 Gonne motho mongwe le mongwe yo o sa ikanyegeng yo o dirang dilo tseno, o makgapha mo go Jehofa, Modimo wa gago.+

17 “Lo gakologelwe se Baamaleke ba neng ba se lo dira mo tseleng fa lo ne lo tswa kwa Egepeto,+ 18 kafa ba neng ba kopana le lona mo tseleng ka gone mme ba tlhasela botlhe ba ba neng ba saletse kwa morago fa lo ne lo feletswe ke maatla e bile lo lapile. Ba ne ba se ka ba boifa Modimo. 19 Fa Jehofa, Modimo wa lona a lo neile boikhutso, go se na mmaba ope yo o lo dikologileng yo o tla lo tshwenyang mo lefatsheng le Jehofa, Modimo wa lona a le lo nayang e le boswa gore lo nne mo go lone,+ lo nyeletse Baamaleke gore ba se ka ba tlhola ba gakologelwa mo lefatsheng.+ Ga lo a tshwanela go lebala seo.

26 “Fa o setse o tsene mo lefatsheng le Jehofa, Modimo wa gago a le go nayang gore e nne boswa mme o le gapile e bile o nna mo go lone, 2 o tseye mangwe a mabutswapele a maungo otlhe a lefatshe, a o tla a phuthang go tswa mo lefatsheng la gago le Jehofa, Modimo wa gago a le go nayang mme o a tsenye mo mmanking o bo o ya kwa lefelong le Jehofa, Modimo wa gago a le tlhophang gore leina la gagwe le nne mo go lone.+ 3 O ye kwa moperesiting yo o tla bong a direla mo metlheng eo mme o mo reye o re, ‘Gompieno ke begela Jehofa, Modimo wa gago gore ke gorogile mo lefatsheng le Jehofa a neng a ikanela borraaronamogolo gore o tla le re naya.’+

4 “Go tswa foo, moperesiti o tla tsaya mmanki mo seatleng sa gago a bo a o baya fa pele ga sebeso sa ga Jehofa, Modimo wa gago. 5 Morago ga moo, o bue jaana fa pele ga ga Jehofa, Modimo wa gago, ‘Rre e ne e le Moaramaika+ yo o neng a nna mo mafelong a a farologaneng* mme o ne a ya kwa Egepeto+ mme a nna gone e le motswakwa, a na le ba lelapa la gagwe ba le mmalwa.+ Le fa go ntse jalo, fa a le koo, o ne a nna setšhaba se segolo, se se maatla le se se nang le batho ba le bantsi.+ 6 Mme Baegepeto ba ne ba re tshwara makgwakgwa, ba re gatelela e bile ba re dirisa ditiro tse di boima tsa bokgoba.+ 7 Ka jalo, re ne ra simolola go lelela kwa go Jehofa, Modimo wa borraaronamogolo, mme Jehofa o ne a utlwa lentswe la rona e bile o ne a bona go boga ga rona le matshwenyego a rona le go gatelelwa ga rona.+ 8 La bofelo Jehofa o ne a re ntsha kwa Egepeto ka seatla se se nonofileng le lebogo le le otlolotsweng+ le ka ditiro tse di boifisang le ka ditshupo le dikgakgamatso.+ 9 Go tswa foo, o ne a re tlisa mo lefelong leno a bo a re naya lefatshe leno, lefatshe le le elelang mashi le tswina ya dinotshe.+ 10 Jaanong ke tlisitse mabutswapele a thobo ya lefatshe le Jehofa a le nneileng.’+

“O a beye fa pele ga ga Jehofa, Modimo wa gago o bo o ikoba fa pele ga ga Jehofa, Modimo wa gago. 11 Go tswa foo, o itumele ka ntlha ya molemo otlhe o Jehofa, Modimo wa gago a go o neileng le ba ba nnang mo ntlong ya gago, wena le Molefi le motswakwa yo o nnang le ene.+

12 “Mo ngwageng wa boraro, e leng ngwaga wa karolo ya bolesome, fa o sena go ntsha karolo yotlhe ya bolesome+ ya thobo ya gago, o e neye Molefi, motswakwa, khutsana* le motlholagadi, mme ba tla ja gore ba kgotsofale mo metseng* ya gago.+ 13 Go tswa foo, o bue jaana fa pele ga ga Jehofa, Modimo wa gago, ‘Ke ntshitse karolo e e boitshepo mo ntlong ya me mme ke e neile Molefi, motswakwa, khutsana le motlholagadi,+ fela jaaka o ne o ntaetse. Ga ke a tlola ditaelo tsa gago e bile ga ke a di tlhokomologa. 14 Ga ke a ka ka ja karolo eo fa ke ne ke hutsafetse, ga ke a ka ka ntsha epe ya yone fa ke ne ke itshekologile e bile ga ke a ka ka ntshetsa ope yo o suleng epe ya yone. Ke ne ka ikobela lentswe la ga Jehofa, Modimo wa me mme ke dirile sotlhe se o se ntaetseng. 15 Jaanong leba kwa tlase go tswa kwa lefelong le le boitshepo le o nnang kwa go lone, e leng magodimo, mme o segofatse batho ba gago ba Iseraele le lefatshe le o le re neileng,+ lefatshe le le elelang mashi le tswina ya dinotshe,+ fela jaaka o ne wa ikanela borraaronamogolo.’+

16 “Mo letsatsing leno Jehofa, Modimo wa gago o go laela gore o diragatse melao eno le ditshwetso tseno tsa boatlhodi. O tshwanetse go di boloka o bo o di diragatse ka pelo yotlhe ya gago+ le ka moya otlhe wa gago. 17 Gompieno o utlwile Jehofa a bolela gore ene o tla nna Modimo wa gago fa o tsamaya mo ditseleng tsa gagwe e bile o boloka melao ya gagwe,+ ditaelo tsa gagwe+ le ditshwetso tsa gagwe tsa boatlhodi+ le fa o reetsa lentswe la gagwe. 18 Mme gompieno Jehofa o go utlwile o bolela gore o tla nna setšhaba sa gagwe, batho ba gagwe ba ba kgethegileng,*+ fela jaaka a go solofeditse le gore o tla boloka ditaelo tsotlhe tsa gagwe 19 mme o tla go baya kwa godimo ga ditšhaba tse dingwe tsotlhe tse a di dirileng,+ e bile o tla go naya pako le go tuma le kgalalelo fa o ntse o itshupa gore o setšhaba se se boitshepo mo go Jehofa, Modimo wa gago,+ fela jaaka a solofeditse.”

27 Go tswa foo, Moshe mmogo le bagolwane ba Iseraele ba ne ba laela batho ba re: “Ikobeleng taelo nngwe le nngwe e ke lo e nayang gompieno. 2 Mme mo letsatsing la fa lo tla bo lo kgabaganya Joredane lo tsena mo lefatsheng le Jehofa, Modimo wa lona a le lo nayang, lo itlhomele maje a magolo lo bo lo a poleisetera.*+ 3 Go tswa foo, lo kwale mafoko otlhe a Molao ono mo go one fa lo setse lo kgabagantse, gore lo tsene mo lefatsheng le Jehofa, Modimo wa lona a le lo nayang, lefatshe le le elelang mashi le tswina ya dinotshe, fela jaaka Jehofa, Modimo wa borraalonamogolo, a lo solofeditse.+ 4 Fa lo setse lo kgabagantse Joredane, lo tlhome maje ao mo Thabeng ya Ebale+ lo bo lo a poleisetera,* fela jaaka ke lo laela gompieno. 5 Gape lo agele Jehofa, Modimo wa lona sebeso gone, sebeso sa maje. Lo se ka lwa dirisa didirisiwa tsa tshipi mo go one.+ 6 Lo age sebeso sa ga Jehofa, Modimo wa lona ka maje a a sa segiwang mme lo isetse Jehofa, Modimo wa lona ditlhabelo tse di fisiwang mo go sone. 7 Lo ntshe ditlhabelo tsa go abelana+ lo bo lo di jela gone koo,+ mme lo itumele fa pele ga ga Jehofa, Modimo wa lona.+ 8 Mme lo kwale mafoko otlhe a Molao ono mo majeng ao+ ka tsela e e bonalang sentle.”

9 Go tswa foo, Moshe le baperesiti ba Balefi ba ne ba bua le Iseraele yotlhe, ba re: “Didimala wena Iseraele mme o reetse. Mo letsatsing leno o fetogile setšhaba sa ga Jehofa, Modimo wa gago.+ 10 O tshwanetse go reetsa lentswe la ga Jehofa, Modimo wa gago o bo o diragatse ditaelo+ tsa gagwe le melao ya gagwe, e ke go e laelang gompieno.”

11 Mo letsatsing leo, Moshe o ne a laela batho a re: 12 “Ditso tse di latelang di tla ema mo Thabeng ya Gerisime+ gore di segofatse batho fa lo setse lo kgabagantse Joredane: Simeone, Lefi, Juda, Isakare, Josefa le Benjamine. 13 Mme tse di latelang di tla ema mo Thabeng ya Ebale+ gore di bolele phutso: Rubene, Gada, Ashera, Sebulone, Dana le Nafetali. 14 Mme Balefi ba tla araba motho mongwe le mongwe wa Iseraele ka lentswe le le kwa godimo ba re:+

15 “‘Go hutsegile motho yo o dirang setshwantsho se se betlilweng+ kgotsa sefikantswe se se bopilweng,+ selo se se makgapha mo go Jehofa,+ tiro ya diatla tsa motho yo o betlang* le yo o se fitlhileng.’ (Mme batho botlhe ba re, ‘Amen!’*)

16 “‘Go hutsegile motho yo o nyatsang rraagwe kgotsa mmaagwe.’+ (Mme batho botlhe ba re, ‘Amen!’)

17 “‘Go hutsegile motho yo o sutisang letshwao la molelwane wa moagelani wa gagwe.’+ (Mme batho botlhe ba re, ‘Amen!’)

18 “‘Go hutsegile motho yo o dirang gore sefofu se timelelwe ke tsela.’+ (Mme batho botlhe ba re, ‘Amen!’)

19 “‘Go hutsegile motho yo o sokamisang katlholo+ ya motswakwa, ya khutsana* kgotsa ya motlholagadi.’+ (Mme batho botlhe ba re, ‘Amen!’)

20 “‘Go hutsegile motho yo o tlhakanelang dikobo le mosadi wa ga rraagwe, ka gonne o tlontlolotse rraagwe.’*+ (Mme batho botlhe ba re, ‘Amen!’)

21 “‘Go hutsegile motho yo o tlhakanelang dikobo le phologolo epe fela.’+ (Mme batho botlhe ba re, ‘Amen!’)

22 “‘Go hutsegile motho yo o tlhakanelang dikobo le kgaitsadie, e ka ne e le kgaitsadie yo ba tlhakanetseng rre kgotsa mmê.’+ (Mme batho botlhe ba re, ‘Amen!’)

23 “‘Go hutsegile motho yo o tlhakanelang dikobo le mmaagwe mosadi wa gagwe.’+ (Mme batho botlhe ba re, ‘Amen!’)

24 “‘Go hutsegile motho yo o iphitlhelang moagelani wa gagwe a bo a mmolaya.’+ (Mme batho botlhe ba re, ‘Amen!’)

25 “‘Go hutsegile motho yo o amogelang pipamolomo gore a bolaye motho yo o se nang molato.’+ (Mme batho botlhe ba re, ‘Amen!’)

26 “‘Go hutsegile motho yo o se kitlang a ikobela mafoko a Molao ono e bile a sa a diragatse.’+ (Mme batho botlhe ba re, ‘Amen!’)

28 “Mme fa e le gore o tla reetsa lentswe la ga Jehofa, Modimo wa gago ka go diragatsa ditaelo tsotlhe tsa gagwe tse ke di go laelang gompieno, ruri Jehofa, Modimo wa gago o tla go baya kwa godimo ga ditšhaba tse dingwe tsotlhe tsa lefatshe.+ 2 Ditshegofatso tseno tsotlhe di tla tla mo go wena di le dintsi,+ ka gonne o nna o reetsa lentswe la ga Jehofa, Modimo wa gago:

3 “O tla segofala mo motseng e bile o tla segofala mo tshimong.+

4 “Bana ba gago* ba tla segofala+ le leungo la mmu wa gago le bana ba leruo la gago, e leng dinamane le dikwanyana tsa gago.+

5 “O tla segofatsa mmanki wa gago le sekotlele se o dubelang mo go sone.+

6 “O tla segofala mo go sengwe le sengwe se o se dirang.

7 “Jehofa o tla dira gore baba ba gago ba ba lwang le wena ba fenngwe fa pele ga gago.+ Ba tla go tlhasela ba tswa kwa ntlheng e le nngwe, mme ba tla tshaba ba tswa fa go wena ka ditsela di le supa tse di farologaneng.+ 8 Jehofa o tla laela gore mabolokelo+ a gago le tiro nngwe le nngwe ya gago di segofale, mme ruri o tla go segofatsa mo lefatsheng le Jehofa, Modimo wa gago a le go nayang. 9 Jehofa o tla go tlhoma gore o nne setšhaba sa gagwe se se boitshepo,+ fela jaaka a ile a go ikanela,+ ka gonne o tswelela o boloka ditaelo tsa ga Jehofa, Modimo wa gago e bile o tsamaya mo ditseleng tsa gagwe. 10 Ditšhaba tsotlhe tsa lefatshe di tla tshwanelwa ke go bona gore o ntse o bidiwa ka leina la ga Jehofa,+ mme di tla go boifa.+

11 “Jehofa o tla dira gore o nne le bana ba bantsi thata le leruo le lentsi thata le mmu o o ungwang thata+ mo lefatsheng le Jehofa a neng a ikanela borragomogolo gore o tla le go naya.+ 12 Jehofa o tla go bulela mabolokelo a gagwe a a molemo, e leng magodimo, gore a nese pula mo lefatsheng la gago ka paka ya yone+ le gore a segofatse sotlhe se o se dirang. O tla adima ditšhaba di le dintsi, mme wena ga o kitla o tlhoka go adimiwa.+ 13 Jehofa o tla go dira tlhogo mme e seng mogatla; mme o tla nna kwa godimo+ e seng kwa tlase, fa o nna o ikobela ditaelo tsa ga Jehofa, Modimo wa gago tse ke di go laelang gompieno gore o di boloke o bo o di dire. 14 Ga o a tshwanela go fapoga mo mafokong otlhe a ke go a laelang gompieno, o tsaya tsela e e phoso,+ o sala medimo e mengwe morago gore o e direle.+

15 “Mme fa o sa reetse lentswe la ga Jehofa, Modimo wa gago e bile o sa diragatse ditaelo tsotlhe tsa gagwe le melao ya gagwe e ke go e laelang gompieno, diphutso tseno tsotlhe di tla tla mo go wena di le dintsi:+

16 “O tla hutsega mo motseng e bile o tla hutsega mo tshimong.+

17 “Mmanki wa gago le sekotlele se o dubelang mo go sone di tla hutsega.+

18 “Bana ba gago* ba tla hutsega+ le leungo la mmu wa gago le dinamane le dikwanyana tsa gago.+

19 “O tla hutsega mo go sengwe le sengwe se o se dirang.

20 “Jehofa o tla go tlisetsa phutso, tlhakatlhakano le kotlhao mo tirong nngwe le nngwe ya gago go fitlha o fedisitswe e bile o nyeletse ka bonako, ka ntlha ya ditiro tsa gago tse di bosula le ka ntlha ya go bo o ntlogetse.+ 21 Jehofa o tla dira gore bolwetse bo go ngaparele go fitlha a go fedisitse mo lefatsheng le o yang go le rua.+ 22 Jehofa o tla go otlhaya ka thiibii, letshoroma le le fisang,+ go ruruga, mogote o o tseneletseng, tšhaka,+ phefo e e fisang le mouta;+ mme di tla go latelela go fitlha o nyelela. 23 Ke tla tswala magodimo gore a se ka a nesa pula* e bile ke tla dira gore lefatshe la gago le se ka la ungwa.*+ 24 Jehofa o tla dira gore pula ya lefatshe la gago e nne motlhaba* le lorole tse di tla tlang mo go wena di tswa kwa magodimong go fitlha o nyeleditswe. 25 Jehofa o tla dira gore o fenngwe fa pele ga baba ba gago.+ O tla ba tlhasela o tswa ntlheng e le nngwe, mme o tla tshaba o tswa fa go bone ka ditsela di le supa tse di farologaneng; mme o tla nna selo se se tshosang magosi otlhe a lefatshe.+ 26 Ditopo tsa lona di tla nna dijo tsa nonyane nngwe le nngwe ya loapi le phologolo nngwe le nngwe ya naga, go se na ope yo o di lelekang.+

27 “Jehofa o tla go otlhaya ka mathopa* a Egepeto, go ruruga ga ditshika tsa marago, motshweetshwee le bogwata, tse di se kitlang di fola. 28 Jehofa o tla go otlhaya ka botsenwa, ka bofofu+ le ka tlhakatlhakano.* 29 O tla apaapa go le sethoboloko, fela jaaka motho yo o foufetseng a apaapa mo lefifing+ mme ga o kitla o atlega mo go sepe se o se dirang; e bile o tla nna o tsiediwa le go thukuthiwa, go se na ope yo o go bolokang.+ 30 O tla beeletsa mosadi, mme monna yo mongwe o tla mmetelela. O tla aga ntlo, mme ga o kitla o nna mo go yone.+ O tla jala tshimo ya morara,* mme ga o kitla o simolola go e dirisa.+ 31 Poo ya gago e tla tlhabelwa fa pele ga gago, mme ga o kitla o ja sepe sa yone. Tonki ya gago e tla utswiwa fa pele ga gago, mme ga e kitla e boela kwa go wena. Dinku tsa gago di tla newa baba ba gago, mme ga o kitla o nna le mmoloki ope. 32 Bomorwao le bomorwadio ba tla newa batho ba bangwe+ o ntse o lebile, mme o tla ba tlhologelelwa ka metlha, mme o tla bo o sa kgone go dira sepe. 33 Maungo a lefatshe la gago le thobo yotlhe ya se o se jadileng di tla jewa ke setšhaba se o sa se itseng,+ mme o tla nna o tsiediwa le go gatelelwa. 34 O tla tsenwa ka ntlha ya se o se bonang.

35 “Jehofa o tla go otlhaya ka mathopa a a botlhoko le a a sa foleng mo mangoleng le mo maotong, go simologa mo lonaong go fitlha kwa tlhogong ya gago. 36 Jehofa o tla lelekela wena le kgosi e o neng wa e tlhoma gore e go okamele kwa setšhabeng se wena le borragomogolo lo sa se itseng,+ mme fa lo le koo lo tla direla medimo e mengwe, medimo ya logong le ya leje.+ 37 Mme o tla nna selo se se tshosang le sa go kgobiwa,* le sengwe sa go sotliwa mo ditšhabeng tsotlhe tse Jehofa a go lelekelang kwa go tsone.+

38 “O tla jala peo e ntsi kwa tshimong, mme o tla phutha dijalo di le dinnye+ ka gonne di tla jewa ke tsie. 39 O tla jala masimo a morara o bo o a baakanya, mme ga o kitla o nwa beine epe e bile ga o kitla o phutha sepe,+ ka gonne seboko se tla ja morara oo. 40 O tla nna le ditlhare tsa motlhware mo kgaolong yotlhe ya naga ya gago, mme ga o kitla o itshasa leokwane lepe, ka gonne maungo a gago a motlhware a tla tlhotlhorega. 41 O tla tshola bana ba basimane le bana ba basetsana, mme ga ba kitla ba tswelela e le ba gago, ka gonne ba tla isiwa botshwarwa.+ 42 Ditlhopha tsa ditshenekegi* di tla tlala mo ditlhareng tsotlhe tsa gago le mo maungong a lefatshe la gago. 43 Motswakwa yo o nnang le ene o tla nna a nonofela pele, fa wena o tla nna o koafalela pele. 44 O tla go adima, mme wena ga o kitla o mo adima.+ Ene o tla nna tlhogo, mme wena o tla nna mogatla.+

45 “Ruri diphutso tseno tsotlhe+ di tla tla mo go wena di le dintsi go fitlha o fedisiwa,+ ka gonne o ne wa se ka wa reetsa lentswe la ga Jehofa, Modimo wa gago e bile o ne wa se ka wa boloka ditaelo tsa gagwe le melao ya gagwe e a e go laetseng.+ 46 Mme di tla tswelela di le mo go wena le mo baneng ba gago e le sesupo le kgakgamatso tse di tla nnelang ruri,+ 47 ka gonne o ne wa se ka wa direla Jehofa, Modimo wa gago ka boitumelo le ka pelo e e itumetseng fa o ne o na le letlotlo la sengwe le sengwe.+ 48 Jehofa o tla go romelela baba ba gago, mme o tla ba direla+ o tshwerwe ke tlala+ le lenyora, o apere diaparo tse e seng tsa sepe e bile o tlhoka sengwe le sengwe. O tla baya jokwe ya tshipi mo molaleng wa gago go fitlha a go nyeletsa.

49 “Jehofa o tla dira gore setšhaba se se kgakala,+ se se tswang kwa bofelelong jwa lefatshe se go tlhasele; se tla tlhasela jaaka ntsu,+ setšhaba se o se kitlang o tlhaloganya puo ya sone,+ 50 setšhaba se tebego ya sone e tshosang, se se se kitlang se rekegela mogolo kgotsa se bontsha mosha kutlwelobotlhoko.+ 51 Ba tla ja leruo la gago le maungo a lefatshe la gago go fitlha o nyelela. Ga ba kitla ba go tlogelela dijo dipe tsa ditlhaka, beine e ntšha kgotsa leokwane, dinamane kgotsa dikwanyana go fitlha ba go fedisa.+ 52 Ba tla go tlhasela, ba go tswalela mo teng ga metse* yotlhe ya gago mo lefatsheng lotlhe la gago go fitlha dipota tsa gago tse di kwa godimo le tse di sireletsegileng tse o di ikantseng di wa. Ruri ba tla go tlhasela mo metseng yotlhe ya gago mo lefatsheng lotlhe la gago le Jehofa, Modimo wa gago a le go neileng.+ 53 Foo o tla tshwanelwa ke go ja bana ba gago,* nama ya bomorwao le bomorwadio+ ba Jehofa, Modimo wa gago a go ba neileng, ka gonne tlhaselo eo e tla bo e le maswe thata e bile mmaba wa gago o tla bo a go tlisetsa matshwenyego.

54 “Tota le monna yo o lorato thata le yo o neng a tlwaetse go tshela monate mo go wena, ga a kitla a bontsha morwarraagwe kgotsa mosadi wa gagwe yo a mo ratang kgotsa bomorwawe ba ba setseng kutlwelobotlhoko, 55 e bile ga a kitla a kgaogana le bone nama epe ya bomorwawe e a tla e jang, ka gonne a se na sepe se sengwe ka ntlha ya gore tlhaselo eo e tla bo e le maswe thata e bile mmaba wa gago o tla bo a go tlisetsa matshwenyego mo metseng ya gago.+ 56 Mme mosadi yo o bonolo le yo o neng a tlwaetse go tshela monate mo go wena yo o ka se kang a akanya go gata fa fatshe ka gonne a le bonolo,+ ga a kitla a bontsha monna wa gagwe yo a mo ratang kgotsa morwawe kgotsa morwadie kutlwelobotlhoko, 57 tota le motlhana o o tswang fa gare ga maoto a gagwe le bomorwawe ba a ba tshotseng ga a kitla a ba utlwela botlhoko, ka gonne o tla ba ja mo sephiring ka gore tlhaselo eo e tla bo e le maswe thata e bile mmaba wa gago o tla bo a go tlisetsa matshwenyego mo metseng ya gago.

58 “Fa e le gore ga o kitla o ikobela ka kelotlhoko mafoko otlhe a Molao ono a a kwadilweng mo bukeng eno+ e bile o se kitla o boifa leina leno le le galalelang le le le boitshegang+ la ga Jehofa,+ Modimo wa gago, 59 Jehofa o tla tlisetsa wena le bana ba gago dipetso tse di botlhoko thata, e leng dipetso tse dikgolo tse di sa feleng,+ le malwetse a a botlhoko a a sa foleng. 60 O tla busetsa malwetse otlhe a Egepeto mo go wena a o neng o a tshaba, mme ga o kitla o fodisiwa. 61 Mo godimo ga moo, Jehofa o tla go tlisetsa le bolwetse bongwe le bongwe kgotsa petso nngwe le nngwe e e sa kwalwang mo bukeng ya Molao ono go fitlha o nyelediwa. 62 Le fa gone jaanong lo le bantsi jaaka dinaledi tsa magodimo,+ go tla sala ba le mmalwa fela+ ba lona ka gonne lo ne lwa se ka lwa reetsa lentswe la ga Jehofa, Modimo wa lona.

63 “Mme fela jaaka Jehofa a ile a itumelela go dira gore lo atlege lo bo lo nne bantsi, ka tsela e e tshwanang Jehofa o tla itumelela go lo senya le go lo nyeletsa; mme lo tla kumolwa mo lefatsheng le lo tlogang lo ya go le rua.

64 “Jehofa o tla lo gasamisetsa mo ditšhabeng tsotlhe, go tswa ntlheng e nngwe ya lefatshe go ya ntlheng e nngwe ya lefatshe,+ mme fa lo le koo lo tla tshwanelwa ke go direla medimo ya logong le ya leje, e lona le borraalonamogolo lo neng lo sa e itse.+ 65 Ga lo kitla lo nna le kagiso mo ditšhabeng tseo+ kgotsa lefelo la boikhutso. Go na le moo, fa lo le koo Jehofa o tla dira gore pelo ya lona e tlhobaele+ le matlho a lona a nne bokoa lo bo lo tshwenyege mo maikutlong.+ 66 Botshelo jwa lona bo tla nna mo kotsing e e seng kana ka sepe e bile lo tla nna ka poifo bosigo le motshegare; mme ga lo kitla lo itse gore a lo tla falola. 67 Mo mosong lo tla re, ‘E kete go ka bo go ne go le maitseboa!’ mme mo maitseboeng lo tla re, ‘E kete go ka bo go ne go le mo mosong!’ ka ntlha ya poifo e e tla bong e le mo pelong ya lona le ka ntlha ya se matlho a lona a tla se bonang. 68 Mme ruri Jehofa o tla lo busetsa kwa Egepeto ka sekepe ka tsela e ke neng ka lo bolelela ka yone ka re, ‘Ga lo kitla lo tlhola lo e bona gape,’ mme fa lo le koo lo tla tshwanelwa ke go ithekisa mo babeng ba lona gore lo nne batlhanka le malata, mme ga go kitla go nna le yo o lo rekang.”

29 Ano ke mafoko a kgolagano e Jehofa a neng a laela Moshe gore a e dire le batho ba Iseraele kwa lefatsheng la Moabe, kwantle ga kgolagano e a neng a e dirile le bone kwa Horeba.+

2 Go tswa foo, Moshe o ne a bitsa Iseraele yotlhe mme a e raya a re: “Lo bone sotlhe se Jehofa a neng a se dira fa pele ga matlho a lona kwa lefatsheng la Egepeto mo go Faro le mo batlhankeng botlhe ba gagwe le mo lefatsheng lotlhe la gagwe,+ 3 dikatlholo* tse dikgolo tse matlho a lona a neng a di bona, ditshupo le dikgakgamatso tseo tse dikgolo.+ 4 Le fa go ntse jalo, Jehofa ga a lo naya pelo gore lo tlhaloganye le matlho gore lo bone le ditsebe gore lo utlwe, go tla go fitlha mo letsatsing leno.+ 5 ‘Fa ke ne ke ntse ke lo kaela dingwaga di le 40 mo nageng,+ diaparo tsa lona ga di a ka tsa onalela mo go lona le ditlhako* tsa lona ga di a ka tsa onalela mo dinaong+ tsa lona. 6 Ga lo a ka lwa ja senkgwe e bile ga lo a ka lwa nwa beine kgotsa sepe se se tagang, gore lo itse gore ke nna Jehofa, Modimo wa lona.’ 7 La bofelo lo ne lwa tla mo lefelong leno, mme Sihone kgosi ya kwa Heshebone+ le Oge kgosi ya kwa Bashana+ ba ne ba tswa ba tla go re kgatlhantsha gore ba tlhabane le rona, mme re ne ra ba fenya.+ 8 Morago ga moo, re ne ra tsaya lefatshe la bone mme ra le naya Barubene, Bagada le halofo ya lotso lwa Bamanase+ gore e nne boswa jwa bone. 9 Ka jalo, lo boloke mafoko a kgolagano eno lo bo lo a ikobele, gore sengwe le sengwe se lo tla se dirang se atlege.+

10 “Lotlhe lo eme fa pele ga ga Jehofa, Modimo wa lona gompieno, ditlhogo tsa ditso tsa lona, bagolwane ba lona, balaodi ba lona, monna mongwe le mongwe wa Iseraele, 11 bana ba lona, basadi+ ba lona le motswakwa+ yo o mo kampeng ya lona, go simolola ka yo o lo rwalelelang dikgong go fitlha ka yo o lo gelang metsi. 12 Lo fano gore lo dire maikano a go tsena mo kgolaganong le Jehofa, Modimo wa lona, kgolagano e Jehofa, Modimo wa lona a e dirang le lona gompieno,+ 13 e le gore gompieno a lo dire setšhaba+ sa gagwe le gore a nne Modimo wa lona,+ fela jaaka a lo solofeditse le jaaka a ne a ikanela borraalonamogolo e bong Aborahame,+ Isake+ le Jakobe.+

14 “Jaanong ga ke dire kgolagano eno le maikano ano le lona fela, 15 mme ke e dira le ba ba emeng le rona fano gompieno fa pele ga ga Jehofa, Modimo wa rona le ba ba se nang le rona fano gompieno. 16 (Gonne lo itse sentle kafa re neng ra nna kwa lefatsheng la Egepeto ka gone le kafa re neng ra feta fa gare ga ditšhaba tse di farologaneng ka gone fa re ne re le mo loetong.+ 17 Mme lo ne lo tle lo bone dilo tsa tsone tse di makgapha le medingwana ya tsone e e ferosang sebete,*+ ya logong le leje, selefera le gauta, e e neng e le mo gare ga tsone.) 18 Lo nne kelotlhoko gore go se ka ga nna le monna kgotsa mosadi, lelapa kgotsa lotso mo go lona gompieno lo pelo ya lone e fapogang mo go Jehofa, Modimo wa rona gore lo ye go direla medimo ya ditšhaba tseo,+ gore go se ka ga nna le modi o o ungwang leungo le le botlhole le longana mo go lona.+

19 “Mme gone, fa mongwe a utlwa mafoko ano a maikano a bo a ipelafatsa mo pelong ya gagwe, a re, ‘Ke tla nna le kagiso, le fa gone ke tla tswelela ke tsamaya mo ditseleng tsa pelo ya me,’ ka boikaelelo jwa go senya sengwe le sengwe* mo tseleng ya gagwe, 20 Jehofa ga a kitla a batla go mo itshwarela.+ Go na le moo, bogale jwa ga Jehofa bo tla tukela motho yoo, mme ruri phutso yotlhe e e kwadilweng mo bukeng eno e tla tla mo go ene+ e bile Jehofa o tla phimola leina la gagwe mo lefatsheng. 21 Go tswa foo, Jehofa o tla mo tlhaola mo ditsong tsotlhe tsa Iseraele gore a lebane le masetlapelo go dumalana le phutso yotlhe ya kgolagano e e kwadilweng mo bukeng eno ya Molao.

22 “Mme kokomana e e latelang ya bomorwaalona le motswakwa yo o tswang kwa lefatsheng le le kgakala ba tla bona dipetso tsa lefatshe leno le malwetse a Jehofa a a tlisitseng mo go lone. 23 O rometse sulefera le letswai le molelo, gore go se ka ga jalwa mo lefatsheng lotlhe kgotsa la tlhogisa sepe e bile go se ka ga tlhoga dimela dipe mo go lone fela jaaka Sodoma le Gomora,+ Adema le Seboima,+ tse Jehofa a neng a di senya fa a ne a galefile e bile a shakgetse. 24 Bomorwaalona le motswakwa le ditšhaba tsotlhe ba tla re, ‘Ke ka ntlha yang fa Jehofa a ile a dira seno mo lefatsheng leno?+ Ke eng se se bakileng bogale jono jo bogolo jo bo tukang?’ 25 Foo ba tla re, ‘Ke ka gonne ba ne ba tlogela kgolagano ya ga Jehofa,+ Modimo wa borraabonemogolo, e a neng a e dira le bone fa a ne a ba ntsha kwa lefatsheng la Egepeto.+ 26 Mme ba ne ba tsamaya, ba ya go direla medimo e mengwe ba bo ba e ikobela, medimo e ba neng ba sa e itse e bile a ne a sa ba letlelela gore ba e obamele.*+ 27 Foo bogale jwa ga Jehofa jo bo tukang bo ne jwa tlela lefatshe leo fa a ne a le tlisetsa phutso yotlhe e e kwadilweng mo bukeng eno.+ 28 Ka jalo, Jehofa o ne a ba kumola mo lefatsheng la bone a galefile,+ a shakgetse e bile a gaketse thata mme o ne a ba isa kwa lefatsheng le lengwe, kwa ba leng gone gompieno.’+

29 “Dilo tse di fitlhegileng ke tsa ga Jehofa, Modimo wa rona,+ mme dilo tse di senotsweng ke tsa rona le ditlogolwana tsa rona ka bosakhutleng, gore re diragatse mafoko otlhe a Molao ono.+

30 “Fa mafoko ano otlhe a go diragalela, tshegofatso le phutso tse ke di beileng fa pele ga gago+ e bile o a gakologelwa*+ o le kwa ditšhabeng tsotlhe tse Jehofa, Modimo wa gago a go gasamiseditseng kwa go tsone,+ 2 mme o boela kwa go Jehofa, Modimo wa gago+ e bile o reetsa lentswe la gagwe go ya ka fa go sotlhe se ke se go laelang gompieno, wena le bomorwao, o dira jalo ka pelo yotlhe ya gago le ka moya otlhe wa gago,+ 3 foo Jehofa, Modimo wa gago o tla busa batshwarwa ba gago+ mme o tla go bontsha kutlwelobotlhoko+ a bo a go phutha gape a go ntsha mo ditšhabeng tsotlhe tse Jehofa, Modimo wa gago a neng a go gasamiseditse kwa go tsone.+ 4 Tota le fa batho ba gago ba ka tswa ba gasamiseditswe kwa bofelelong jwa magodimo, Jehofa, Modimo wa gago o tla go phutha gone koo a bo a go busa.+ 5 Jehofa, Modimo wa gago o tla go tlisa mo lefatsheng le borrago ba neng ba le rua, mme o tla le rua; o tla dira gore o atlege e bile o tla dira gore o ntsifale go feta borrago.+ 6 Jehofa, Modimo wa gago o tla itshekisa* pelo ya gago le pelo ya bana ba gago,+ gore o rate Jehofa, Modimo wa gago ka pelo yotlhe ya gago le ka moya otlhe wa gago gore o tle o tshele.+ 7 Go tswa foo Jehofa, Modimo wa gago o tla tlisa diphutso tseno tsotlhe mo babeng ba gago, ba ba neng ba go tlhoile e bile ba go bogisa.+

8 “Foo o tla boa o bo o reetsa lentswe la ga Jehofa mme o tla ikobela ditaelo tsotlhe tsa gagwe tse ke di go laelang gompieno. 9 Jehofa, Modimo wa gago o tla dira gore o atlege thata mo tirong nngwe le nngwe ya diatla tsa gago,+ o tla ntsifatsa bana ba gago le leruo la gago le se se tlhogang mo lefatsheng la gago, ka gonne Jehofa o tla itumelela go go atlegisa gape, fela jaaka a ne a itumelela borragomogolo.+ 10 Gonne ka nako eo o tla reetsa lentswe la ga Jehofa, Modimo wa gago o bo o boloka ditaelo le melao ya gagwe e e kwadilweng mo bukeng eno ya Molao, mme o tla boela kwa go Jehofa, Modimo wa gago ka pelo yotlhe ya gago le ka moya otlhe wa gago.+

11 “Jaanong taelo eno e ke go e laelang gompieno ga e thata mo go wena e bile ga e kwa o ka se kang wa kgona go e fitlhelela.*+ 12 Ga e kwa magodimong, mo o ka tshwanelwang ke go re, ‘Ke mang yo o tla tlhatlogelang kwa magodimong mme a re tlela ka yone, gore re tle re e utlwe mme re e ikobele?’+ 13 E bile ga e ka kwa ntlheng e nngwe ya lewatle, mo o ka tshwanelwang ke gore, ‘Ke mang yo o tla kgabaganyetsang kwa ntlheng e nngwe ya lewatle mme a re tlela ka yone, gore re tle re e utlwe mme re e ikobele?’ 14 Gonne molaetsa o gaufi thata le wena, o mo molomong wa gago le mo pelong ya gago,+ gore o o dire.+

15 “Bona, gompieno ke baya fa pele ga gago botshelo le molemo, le loso le bosula.+ 16 Fa o reetsa ditaelo tsa ga Jehofa, Modimo wa gago tse ke di go laelang gompieno, ka go rata Jehofa, Modimo wa gago,+ ka go tsamaya mo ditseleng tsa gagwe le ka go boloka ditaelo tsa gagwe le melao ya gagwe le ditshwetso tsa gagwe tsa boatlhodi, foo o tla tshela+ o bo o ntsifala mme Jehofa, Modimo wa gago o tla go segofatsa mo lefatsheng le o yang go le rua.+

17 “Le fa go ntse jalo, fa dipelo tsa lona di fapoga+ e bile lo sa reetse mme lo raelwa lo bo lo ikobela medimo e mengwe le go e direla,+ 18 ke a lo bolelela gompieno gore ruri lo tla nyelela.+ Ga lo kitla lo tshela lobaka lo loleele mo lefatsheng le lo kgabaganyang Joredane lo ya go le rua. 19 Ke tsaya magodimo le lefatshe e le basupi ba lona gompieno, gore ke beile fa pele ga lona botshelo le loso, tshegofatso le phutso;+ mme lo tshwanetse go tlhopha botshelo gore lo tshele,+ lona le ditlogolwana tsa lona,+ 20 ka go rata Jehofa, Modimo wa lona,+ ka go reetsa lentswe la gagwe le ka go mo ngaparela,+ ka gonne ke ene botshelo jwa lona e bile ka ene lo tla tshela lobaka lo loleele mo lefatsheng le Jehofa a neng a ikana gore o tla le naya borraalonamogolo e bong Aborahame, Isake le Jakobe.”+

31 Go tswa foo, Moshe o ne a tswa mme a bua mafoko ano le Iseraele yotlhe, 2 a ba raya a re: “Gompieno ke na le dingwaga di le 120.+ Nka se tlhole ke kgona go lo etelela pele,* ka gonne Jehofa o ntheile a re, ‘Ga o kitla o kgabaganya Joredane eno.’+ 3 Jehofa, Modimo wa gago ke ene a kgabaganyang fa pele ga gago e bile ke ene a tla nyeletsang ditšhaba tseno fa pele ga gago mme wena o tla di leleka.+ Joshua ke ene a tla lo etelelang pele gore lo kgabaganye,+ fela jaaka Jehofa a buile. 4 Jehofa o tla ba dira fela jaaka a ile a dira Sihone+ le Oge,+ dikgosi tsa Baamore, le lefatshe la bone fa a ne a ba nyeletsa.+ 5 Jehofa o tla ba fenya mo boemong jwa lona, mme lo ba dire go ya ka taelo yotlhe e ke e lo neileng.+ 6 Lo nne pelokgale lo bo lo nonofe.+ Lo se ka lwa boifa kgotsa lwa tshoga fa pele ga bone,+ ka gonne Jehofa, Modimo wa lona ke ene a tsamayang le lona. Ga a kitla a lo tlogela kgotsa a lo latlha.”+

7 Go tswa foo, Moshe o ne a bitsa Joshua mme a bua le ene fa pele ga matlho a Iseraele yotlhe a re: “O nne pelokgale o bo o nonofe,+ ka gonne ke wena o tla isang setšhaba seno kwa lefatsheng le Jehofa a neng a ikanela borraabonemogolo gore o tla le ba naya, mme wena o tla le ba naya gore e nne boswa.+ 8 Jehofa ke ene a tsamayang fa pele ga gago, mme o tla tswelela a na le wena.+ Ga a kitla a go tlogela kgotsa a go latlha. O se ka wa boifa kgotsa wa tshoga.”+

9 Morago ga moo, Moshe o ne a kwala Molao ono+ a bo a o naya baperesiti, e bong Balefi, ba ba tshwarang letlole la kgolagano ya ga Jehofa le bagolwane botlhe ba Iseraele. 10 Moshe o ne a ba laela, a re: “Kwa bokhutlong jwa dingwaga dingwe le dingwe tse supa, ka nako e e tlhomilweng mo ngwageng wa kgololo,+ ka nako ya Moletlo wa Diobo,*+ 11 fa Iseraele yotlhe e tla fa pele ga ga Jehofa,+ Modimo wa lona mo lefelong le a le tlhophang, lo balele Baiseraele Molao ono gore ba o utlwe.+ 12 Lo phuthe batho,+ banna, basadi, bana* le motswakwa yo o mo teng ga metse* ya lona, e le gore ba reetse ba bo ba ithute ka Jehofa, Modimo wa lona mme ba mmoife ba bo ba tlhomamise gore ba diragatsa mafoko otlhe a Molao ono. 13 Foo bomorwaabone ba ba iseng ba itse Molao ono ba tla reetsa+ mme ba tla ithuta go boifa Jehofa, Modimo wa lona malatsi otlhe a fa lo tla bo lo tshela mo lefatsheng le lo kgabaganyang Joredane lo ya go le rua.”+

14 Go tswa foo, Jehofa o ne a raya Moshe a re: “Nako ya gore o swe e atametse.+ Bitsa Joshua, mme lo itlhagise* kwa tenteng ya bokopanelo, gore ke tle ke mo tlhome.”+ Ka jalo, Moshe le Joshua ba ne ba ya mme ba itlhagisa kwa tenteng ya bokopanelo. 15 Foo Jehofa o ne a bonala kwa tenteng a le mo pilareng ya leru, mme pilara ya leru e ne ya ema fa kgorong ya tente.+

16 Jaanong Jehofa o ne a raya Moshe a re: “O tloga o swa,* mme batho bano ba tla simolola go obamela* medimo e sele e e ba dikologileng mo lefatsheng le ba yang kwa go lone.+ Ba tla ntlogela+ e bile ba tla tlola kgolagano ya me e ke e dirileng le bone.+ 17 Ka nako eo, bogale jwa me bo tla ba tukela,+ mme ke tla ba tlogela+ e bile ke tla ba fitlhela sefatlhego sa me+ go fitlha ba nyeleditswe. Go tswa foo, fa ba sena go tlelwa ke masetlapelo le matshwenyego a le mantsi,+ ba tla re, ‘A ga se ka gonne Modimo wa rona a se mo go rona go bo re tletswe ke masetlapelo ano?’+ 18 Le fa go ntse jalo, ke tla nna ke ba fitlhetse sefatlhego sa me mo letsatsing leo ka ntlha ya bosula jotlhe jo ba bo dirileng ka go ya kwa medimong e mengwe.+

19 “Jaanong ikwaleleng pina eno+ mme lo e rute Baiseraele.+ Dirang gore ba e itse* e le gore pina eno e tle e ba gopotse gore ke ne ka ba tlhagisa.+ 20 Fa ke ba tlisa mo lefatsheng le le elelang mashi le tswina ya dinotshe+ le ke ikanneng gore ke tla le naya borraabonemogolo+ mme ba ja gore ba kgotsofale ba bo ba atlega,*+ ba tla ya kwa medimong e mengwe ba bo ba e direla mme ga ba kitla ba ntlotla e bile ba tla tlola kgolagano ya me.+ 21 Fa ba tlelwa ke masetlapelo le matshwenyego a le mantsi,+ pina eno e tla nna jaaka mosupi mo go bone (ka gonne ditlogolwana tsa bone ga di a tshwanela go e lebala), ka gonne ke setse ke itse dikakanyo tse ba nang le tsone+ le e leng pele ga ke ba tlisa mo lefatsheng le ke ikanneng gore ke tla le ba naya.”

22 Ka jalo, Moshe o ne a kwala pina eno mo letsatsing leo mme a e ruta Baiseraele.

23 Go tswa foo, o* ne a tlhoma Joshua+ morwa Nune mme a re: “O nne pelokgale o bo o nonofe,+ ka gonne ke wena o tla isang Baiseraele kwa lefatsheng le ke ikanneng gore ke tla le ba naya,+ mme ke tla tswelela ke na le wena.”

24 E rile fela fa Moshe a sena go fetsa go kwala mafoko otlhe a Molao ono mo bukeng,+ 25 Moshe o ne a laela Balefi ba ba tshwarang letlole la kgolagano ya ga Jehofa, a re: 26 “Tsayang buka eno ya Molao+ mme lo e beye ka fa letlhakoreng la letlole+ la kgolagano ya ga Jehofa, Modimo wa lona, mme e tla nna mosupi yo o lo latofatsang. 27 Gonne nna ke itse sentle gore lo batlhanogi+ e bile lo tlhogoethata.*+ Fa lo tlhanogetse Jehofa fa ke sa ntse ke tshela ke na le lona, ruri lo tla mo tlhanogela le go feta morago ga loso lwa me! 28 Phuthelang bagolwane botlhe ba ditso tsa lona kwa go nna le balaodi ba lona, gore ke bue mafoko ano ba utlwa, mme mma ke tseye magodimo le lefatshe e le basupi ba bone.+ 29 Gonne ke itse sentle gore morago ga loso lwa me lo tla dira bosula+ lo bo lo fapoga tsela e ke lo e laetseng. Mme ruri lo tla welwa ke masetlapelo+ kwa bokhutlong jwa metlha eo, ka gonne lo tla dira se se bosula mo matlhong a ga Jehofa e bile lo tla mo kgopisa ka ditiro tsa diatla tsa lona.”

30 Go tswa foo, Moshe o ne a bua mafoko a pina eno go tswa kwa tshimologong go fitlha kwa bowelong, phuthego yotlhe ya Iseraele e reeditse:+

 3 Gonne ke tla bolela leina la ga Jehofa.+

Buang ka bogolo jwa Modimo wa rona!+

 5 Ke bone ba ba dirileng bosula.+

Ga se bana ba gagwe, bogole ke jwa bone.+

Ke kokomana e e sa tlhamalalang le e e sokameng!+

15 Fa Jeshurune* a simolola go nona, o ne a tlhanoga mme a raga mong wa gagwe.

O nonne, o mokima, o kgotshe thata.+

29 E kete ba ka bo ba le botlhale!+ Ba ne ba tla tlhatlhanya ka seno.+

Ba ne ba tla akanya kafa ba tla felelang ka gone.+

A e tle go lo thusa.

A e nne lefelo la lona la botshabelo.

Ke a bolaya e bile ke a tshedisa.+

44 Ka jalo, Moshe o ne a tla mme a bua mafoko otlhe a pina eno batho ba mo reeditse,+ ene le Hoshea*+ morwa Nune. 45 Fa Moshe a sena go bua mafoko ano otlhe le Iseraele yotlhe, 46 o ne a ba raya a re: “Mafoko otlhe a ke lo tlhagisang ka one gompieno lo a tsenye mo pelong,+ gore lo tle lo laele bomorwaalona gore ba diragatse mafoko otlhe a Molao+ ono. 47 Gonne leno ga se lefoko le le se nang mosola mo go lona, mme le raya botshelo+ jwa lona e bile ka lefoko leno lo ka nna lwa tshela lobaka lo loleele mo lefatsheng le lo kgabaganyang Joredane lo ya go le rua.”

48 Jehofa o ne a bua le Moshe mo go lone letsatsi leno a re: 49 “Tlhatlogela mo thabeng eno ya Abarime,+ Thaba ya Nebo,+ e e mo lefatsheng la Moabe, e e lebaganeng le Jeriko mme o lebe lefatshe la Kanana le ke le nayang Baiseraele gore ba le rue.+ 50 Go tswa foo, o tla swela mo thabeng e o tlogang o e palama, mme o tla phuthelwa kwa bathong ba gaeno,* fela jaaka Arone mogoloo a ile a swela mo Thabeng ya Hore+ mme a phuthelwa kwa bathong ba gagabo, 51 ka gonne loobabedi lo ne lwa se ka lwa ikanyega mo go nna fa lo na le Baiseraele kwa metsing a Meriba+ kwa Kadeshe mo nageng ya Tsine, ka gonne lo ne lwa se ka lwa dira gore batho ba Iseraele ba bone gore ke boitshepo.+ 52 O tla bona lefatshe leo o le kgakajana, mme gone ga o kitla o tsena kwa lefatsheng le ke le nayang batho ba Iseraele.”+

33 Jaanong eno ke tshegofatso e Moshe monna wa Modimo wa boammaaruri a neng a e bolelela Baiseraele pele ga loso+ lwa gagwe. 2 O ne a re:

 7 Mme o ne a bolela tshegofatso eno mo go Juda:+

 8 O ne a bua jaana ka Lefi:+

12 O ne a bua jaana ka Benjamine:+

13 O ne a bua jaana ka Josefa:+

18 O ne a bua jaana ka Sebulone:+

19 Ba tla biletsa ditšhaba kwa thabeng.

Fa ba le koo ba tla isa ditlhabelo tsa tshiamo.

20 O ne a bua jaana ka Gada:+

“Go sego yo o atolosang melelwane ya ga Gada.+

Ditlhogo tsa batho di tla phuthega mmogo.

22 O ne a bua jaana ka Dana:+

“Dana ke ngwana wa tau.+

O tla tlola a tswa kwa Bashana.”+

23 O ne a bua jaana ka Nafetali:+

Aga kwa bophirima le kwa borwa.”

24 O ne a bua jaana ka Ashera:+

“Ashera o segofaditswe ka bana ba basimane.

29 Go itumela wena Iseraele!+

34 Go tswa foo, Moshe o ne a tswa mo sekakeng sa Moabe a tlhatlogela kwa Thabeng ya Nebo,+ kwa godimo ga Pisega,+ e e lebaganeng le Jeriko.+ Mme Jehofa o ne a mmontsha lefatshe lotlhe, go simologa kwa Gileade go ya go fitlha kwa Dana,+ 2 le Nafetali yotlhe le lefatshe la ga Eferaime le Manase le lefatshe lotlhe la Juda go ya go fitlha kwa lewatleng le le ka fa bophirima,*+ 3 le Negebe+ le Kgaolo ya Joredane,+ e leng lebala la Jeriko, motse wa ditlhare tsa mokolane, go ya go fitlha kwa Soare.+

4 Go tswa foo, Jehofa o ne a mo raya a re: “Leno ke lefatshe le ke neng ka ikanela Aborahame, Isake le Jakobe ka re, ‘Ke tla le naya losika lwa gago.’+ Ke go letlile gore o le iponele, mme gone ga o kitla o kgabaganyetsa kwa go lone.”+

5 Morago ga moo, Moshe motlhanka wa ga Jehofa o ne a swela koo mo lefatsheng la Moabe fela jaaka Jehofa a ne a buile.+ 6 O ne a mo fitlha mo mokgatšheng mo lefatsheng la Moabe, go lebagana le Bethe-peore, mme ga go na ope yo o itseng gore lebitla la gagwe le kwa kae go tla go fitlha mo letsatsing leno.+ 7 Moshe o ne a na le dingwaga di le 120 fa a swa.+ Matlho a gagwe a ne a se letobo e bile o ne a sa ntse a na le nonofo. 8 Batho ba Iseraele ba ne ba lelela Moshe malatsi a le 30+ mo sekakeng sa Moabe. Go tswa foo, malatsi a go lelela Moshe le go mo hutsafalela a ne a wela.

9 Joshua morwa Nune o ne a tletse botlhale* ka gonne Moshe o ne a beile seatla sa gagwe mo go ene;+ mme Baiseraele ba ne ba simolola go mo reetsa mme ba dira fela jaaka Jehofa a ne a laetse Moshe.+ 10 Mme go ne ga se ka ga tsoga moporofeti yo mongwe gape mo Iseraele yo o tshwanang le Moshe,+ yo Jehofa a neng a mo itse ba lebane difatlhego.+ 11 O ne a dira ditshupo le dikgakgamatso tsotlhe tse Jehofa a neng a mo romile gore a ye go di dira kwa lefatsheng la Egepeto mo go Faro le mo batlhankeng botlhe ba gagwe le mo lefatsheng lotlhe la gagwe.+ 12 Moshe o ne a dira ditiro tse dikgolo a bo a bontsha le maatla a a boitshegang Baiseraele botlhe ba mo lebile.+