Kgwetlho E Batsadi ba Lebaneng Nayo
Boitsholo jwa lefatshe bo wetse kwa tlase fela thata go gaisa pele. Go na le ipapatso e e tletsetletseng ka thotloetso ya tlhakanelodikobo. Dimakasine tse di tshwantshanyang basadi le dilo fela tsa go tshameka di rekisiwa mo mabenkeleng a a rekisang dikorousara. Pina ya rock e kgothaletsa go betelelwa ke motho yo o mo itseng. Tota ebile, jaaka go itshupa ka se se bonwang le go utlwiwa letsatsi le letsatsi, lefatshe leno ruri ga le na boitsholo!
POROFESARA ya dithuto tsa lelapa ebong Greer Litton Fox o lemogile gore ditiro tsa tlhakanelodikobo kgotsa tseo di lebisang koo tse di “ka nnang 40” tse motho a ka di bonang mo thelebisheneng go simolola ka 1:30 go ya go 11 p.m. letsatsi le letsatsi, mo go tsone ke tse di kafa tlase ga 5 lekgolong fela tse di amanang le batho ba ba nyalaneng.” Ereka bobegadikgang bo kgothaletsa tlhakanelodikobo thata, ga go gakgamatse gape go bo re bala ka “dipalopalo tse di golelang kwa godimo le diphelelo tse di maswe tsa go ima ga bana ba dingwaga tsa bolesome.”
Ka phepafalo, batsadi bao ba batlelang bana ba bone dilo tse di molemo, ba lebane le kgwetlho ya go ba godisetsa mo lefatsheng leno le le senang boitsholo. Mme lefa go le jalo, seno ga se reye gore basha botlhe ba tlhakanela dikobo. Dipatlisiso di bontsha gore sephatlo sa basha ba basetsana ba dingwaga tse 15 go ya go 19 ba Maamerika ba setse ba kile ba tlhakanela dikobo, mme ka jalo go tlhomamisa ntlha ya gore sephatlo sa bone ga ba ise! Mo godimo ga moo, tota le bao eleng gore ba setse ba kile ba tlhakanela dikobo ba eletsa okare ba ka bo ba se ka ba dira jalo. Mongwe o kile a kwalela mmegadikgang wa pampiri nngwe ya dikgang ebong Ann Landers jaana:
“Go tlhakanela dikobo ga me le Joe (yo eleng motho wa ntlha go ntsaya maikutlo) e ne e le dilo di sele fela, mme ka jalo ke ne ka leka gape le Mike, go tsweng foo gape le Neal, mme gapegape le George. Ga ke itse gore ke ne ke batla eng. Go sa kgathalesege gore e ka tswa e ne e le eng, ga ke a ka ka se bona. Ke ne ke ithutile dilo tse dintsintsi tseo eleng tsa boeleele mo dimakasineng, le mo difiliming tsa dikgangtswelelopele, le mo dibaesekopong. Botshelo tota ga bo a nna jalo.
“Fa ke ne ke ka kgona go bua le basetsana ba basha ba ba balang se o se kwalang, ke ne ke tla ba bolelela gore tlhakanelodikobo ya basha ga e rarabolole mathata, go na le moo e baka mathata a le mantsi. Ga e dire gore mosetsana a ikutlwe a ratiwa, e mo dira gore a ikutlwe a se motho wa sepe. Ke ka ba itsise gore ga e dire gore mosetsana a ‘nne mosadi,’ go na le moo e ka mo dira gore a se ka a nna mosadi sentle.
“Fa ke ne ke ka kgona go bua le batsadi, ke ne ke ka ba kgothaletsa gore ba gatisetse mo megopolong ya bana ba bone gore ba itlotle le go tshegetsa ditekanyetso tse di kwa godimo.”
Boammaaruri ke gore basha ba ba atamalaneng thata le batsadi ba bone mme ba ikutlwa ba babalesegile mo malapeng a bone ebile ba itlotla gantsi ga ba tshabelelwe ke go wela mo boitsholong jo bo sa siamang jwa tlhakanelodikobo go na le bao eleng gore ga go a nna jalo ka bone. Mme go na le phuthego ya batho ba ba fetang dimilione tse nnè lefatshe ka bophara e e thusang basha go tshegetsa ditekanyetso tse di kwa godimo fela thata go na le tse di salwang morago gompieno.
Ka ntlha ya mabaka ano, o ka dira jang go thusa bana ba gago go itshireletsa kgatlhanong le boitsholo jono jo bo sa siamang jwa tlhakanelodikobo jo bo golang mo lefatsheng mo malatsing ano? O ka ba thusa jang go tshela matshelo a a itumedisang, a a botoka, le a a bontshang boitsholo fela thata? Re tla tlotla ka seno mo ditlhogong tse pedi tse di latelang.