Thulaganyo

Tlhaloso: Bokopano kana mokgatlho wa batho bao maiteko a bone a tshwaraganyediwang tiro e e rileng kana boikaelelo jo bo rileng. Maloko a thulaganyo e e rileng a kitlanngwa ka ditsamaiso tsa bolaodi le ka ditekanyetso kana dipatlafalo. Batho ba eleng basupi ba ga Jehofa ba ba ineetseng le go kolobediwa ba tla mo thulaganyong ya ga Jehofa ka go ikgethela ga bone, eseng ka botsalo lefa e le ka pateletso epe. Ba ile ba gogelwa mo thulaganyong ya gagwe ya selefatshe ka ntlha ya dithuto tsa yone le ditlwaelo tsa yone le ka go bo ba batla go tlhakanela mo tirong eo e e dirang.

A Jehofa eleruri o na le thulaganyo mono mo lefatsheng?

Go arabela potso eo, akanyetsa tse di latelang:

A dibopiwa tsa Modimo tsa selegodimo, baengele, ba rulagantswe?

Dan. 7:9, 10: “Ka nna ka leba ga tsamaea ga bèwa ditulō tsa bogosi, me ga dula moñwe eo o leñ mogologolo: diaparō tsa gagwè di ne di le dichweu yaka kapōkō; le moriri oa tlhōgō ea gagwè o no o nntse yaka boboea yoa nku yo bo itshekileñ; setulō sa gagwè sa bogosi, e ne e le dikgabo tsa molelō, le maoto a shōna a a dikologañ e le molelō o o tukañ. Ga pomponyèga nokana ea molelō e èlèla e cwa ha pele ga gagwè: ba ba makgolo kgolo ba ne ba mo dihèla, le ba ba makgolo a makgolo kgolo ba èma ha pele ga gagwè: tshekō ea bèwa, le dikwalō tsa pètlèkwa.”

Pes. 103:20, 21: “Bakañ Yehofa, lona baengele ba gagwè: lona dinatla mo nonohoñ, ba lo dihahatsañ lehoko ya gagwè, lo nntse lo reeditse lencwe ya lehoko ya gagwè. Bakañ Yehofa lona mashomōshomō [masole, NW] aotlhe a gagwè; lona badihedi ba gagwè ba lo dihañ go natehèlwa ga gagwè.” (‘Masole’ ke setlhopha se se rulagantsweng.)

Modimo o ne o neela batlhanka ba gagwe mo lefatsheng ditaelo jang mo dinakong tse di fetileng?

Fa baobamedi ba ga Jehofa ba ne ba se bantsi, o ne a neela ditlhogo tsa malapa jaaka Noa le Aberahame ditaelo, mme ka gone ba ne ba direla jaaka babueledi ba ga Jehofa mo malapeng a bone. (Gen. 7:1, 7; 12:1-5) Fa Jehofa a ne a golola Baiseraele mo Egepeto, o ne a ba neela ditaelo ka Moshe. (Ekes. 3:10) Kwa Thabeng ya Sinai, Modimo o ne wa rulaganyetsa batho go nna tšhaba, a ba baakanyetsa ka melao le ditao go laola kobamelo ya bone le dikamano tsa bone mongwe go yo mongwe. (Ekes. 24:12) O ne a tlhoma boperesiti go etelela pele mo dikgannyeng tsa kobamelo le go laya batho mo dipatlafalong tsa ga Jehofa; ka dinako tse dingwe gape o ne a tlhoma baperofeti go neela kgalemo e e neng e tlhokafala le tlhagiso mo bathong. (Dute. 33:8, 10; Yer. 7:24, 25) Ka gone, lemororo Jehofa a ne a reetsa dithapelo tsa baobamedi ka bongwe, o ne a baakanyetsa ka tao ka tsela e e rulagantsweng.

Jaaka nako e ne e ntse e atamela ka Jehofa go simolola go kitlanya baobamedi ba gagwe ba boammaaruri le ene ka Jesu Keresete, Modimo o ne a mo romela mo lefatsheng go direla jaaka mmueledi wa Gagwe. (Baheb. 1:1, 2) Go tswa foo ka go tshololwa ga moya o o boitshepo ka Pentekosete ya 33 C.E., phuthego ya Bokeresete e ne ya tsalwa. Morago ga Jesu a se na go boela kwa legodimong, phuthego eno e ne ya nna thulaganyo ya ga Jehofa ya go laya le go nyalanya maiteko a Bakeresete ka bongwe. Go ne go na le balebedi ba ba neng ba etelela pele mo diphuthegong tsa mafelo ao, mme ga nna le setlhopha se se laolang sa konokono se se neng se dira diphetso tse di neng di tlhokafala le go thusa go nyalanya tiro. Ka phepafalo, Jehofa o ne a lerile thulaganyo mo lefatsheng e e dirilweng ka Bakeresete ba boammaaruri.—Dit. 14:23; 16:4, 5; Bagal. 2:7-10.

A ditiro tsa ga Jehofa tsa popo e e bonalang di supa gore ke Modimo wa thulaganyo?

Isa. 40:26: “Kalèlañ matlhō a lona godimo, me lo bōnè eo o tlhodileñ dilō tse, eo o bolotsañ leshomōshomō ya cōna ka palō; o di bitsa cotlhe ka maina; ke ka bogolo yoa nonohō ea gagwè, le ka go bo a nonohile mo thateñ, ha go se sepe se se tlhōkahalañ.” (Dinaledi di gobokiwa ka masagaripana mme di tsamaisana mmogo, le eleng fa mekgwa ya dinaledi ka bongwe e farologana. Dipolanete di tsamaya ka nako e e tsepameng mo medikologong ya tsone e e tlhomilweng. Dieleketerone tse di fitlhelwang mo atomong nngwe le nngwe ya elemente nngwe le nngwe le tsone di na le medikologo. Mme popego yotlhe ya matter e latela mekgwa ya dipalo tse dikgolo eo e tsepameng mo eleng gore go ne ga kgonega ka baitseanape go bolelela pele ka go nna gone ga dielemente dingwe le eleng pele ga di ka bonwa tota. Seno sotlhe se neela bosupi jwa thulaganyo ya mofuta o o kwa godingwana.)

A Bibela e supa gore Bakeresete ba boammaaruri ba tla nna batho ba ba rulagantsweng?

Math. 24:14; 28:19, 20: “Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe; hoñ ke gōna bokhutlō bo tla tlañ.” “Ke gōna tsamaeañ, lo dihè merahe eotlhe barutwa, lo ba kolobetsè . . . lo ba rute.” (Seno se ne se ka diragadiwa jang kwantle ga thulaganyo? Fa Jesu a ne a thapisa barutwa ba gagwe ba pele mo tirong eno, ga a ka a ba bolelela fela gore mongwe le mongwe a ye kwa a neng a eletsa go ya teng, mme a latele tumelo ya gagwe ka tsela nngwe le nngwe e a e ratang fela. O ne a ba thapisa, a ba neela ditaelo mme a ba romela ka mokgwa o o rulagantsweng. Bona Luke 8:1; 9:1-6; 10:1-16.)

Baheb. 10:24, 25: “Me a re gopolaneñ re tlhotlheletsanyeñ mo loratoñ le mo ditihoñ tse di molemō; Re se ka ra bakèla go phuthèga ga rona, yaka mokgwa oa bañwe, me re laelanè; me bogolo thata ka lo bōna motlha o atamèla.” (Mme motho o ne a tla kaela batho ba ba kgatlhegang kae e le gore ba tle ba utlwe taolo eno ya Bibela, fa e le gore go tla bo go se na thulaganyo e e nang le dipokano tsa ka metlha koo ba neng ba tla phuthegela gone?)

1 Bakor. 14:33, 40: Gonne Modimo ga se Modimo oa tlhakatlhakanyō, ha e se oa kagishō hèla . . . Me a dilō cotlhe di dihwè sentlè hèla, le ka thulaganyō.” (Moaposetoloi Paulo fano o ne a tlotla ka mokgwa o o rulagantsweng wa dipokano tsa phuthego. Go dirisa kgakololo eno e e tlhotlheleditsweng go tlhokafala gore go tlotlwe thulaganyo.)

1 Pet. 2:9, 17: “Me lona, lo losika lo lo itshenkecweñ, lo boperisito yoa segosi, morahe o o boitshèpō, lo chaba e e ruilweñ ke Modimo sebele, gore lo tlè lo bōnatsè go tlotlomala ga eo o lo biditseñ, a lo bitsa lo le mo lehihiñ a lo isa mo lesediñ ya gagwè ye le gakgamatsañ . . . Ratañ bokauleñwe.” (Bolekane jwa batho bao maiteko a bone a lebisitsweng mo go fitlheleleng tiro e e rileng ke thulaganyo.)

A bao e leng batlhanka ba ba ikanyegang ba Modimo ke batho bao fela ba gasameng le dikereke tse di farologaneng tsa La-Bodumedi?

2 Bakor. 6:15-18: “Eo o dumèlañ o na le kabèlō ehe le eo o sa dumeleñ? . . . Me ke gōna, Cwañ mo gare ga bōnè, lo lomologanè, go bua Yehofa, me lo se ka loa ama sepè se se itshekologileñ; me ke tla lo amogèla, Ke tla nna Rra lona, me lo tla nna bomorwaake le bomorwadiake, go bua Yehofa Mothataeotlhe.” (A motho eleruri ke motlhanka yo o ikanyegang wa Modimo fa a tswelela go tlhakanela mo kobamelong le bao ba bontshang ka tsela ya bone ya botshelo gore eleruri ke ba ba sa dumeleng? Bona setlhogo se segolo “Babelona o Mogolo.”)

1 Bakor. 1:10: “Me yana, ba ga echo, kea lo rapèla, ka leina ya Morèna oa rona Yesu Keresete, gore lo nnè puō ñwe hèla lotlhe, le gore go se nne dikgaoganō mo go lona; me lo ko lo itekanèlè mmōgō, le mo mogopoloñ o le moñwe hèla, le mo tshekatshekoñ e le ñwe hèla.” (Kutlwano e e ntseng jalo ga e gone gareng ga dikereke tse di farologaneng tsa La-Bodumedi.)

Yoh. 10:16: “Ke bile ke na le dinku di sele, tse e señ tsa saka ye; le cōna ke na le go di lere, me di tla utlwa lencwe ya me; me di tla nna lecomane le le leñwe hèla, le modisa a le moñwe hèla.” (Ereka Jesu a ne a tla tlisa ba ba ntseng jalo go nna “lecomane le le leñwe hèla,” a ga se mo go phepafetseng gore ba ne ba se ketla ba gasama le ditumelo tse di farologaneng tsa La-Bodumedi?)

Phuthego ya ga Jehofa e e bonalang mo motlheng wa rona e ka kgethololwa jang?

(1) Eleruri e tlotlomatsa Jehofa jaaka Modimo o osi wa boammaaruri, e godisa leina la gagwe.—Math. 4:10; Yoh. 17:3.

(2) E lemoga ka botlalo seabe se se botlhokwa-tlhokwa sa ga Jesu Keresete mo boikaelelong jwa ga Jehofa—jaaka motlotlomatsi wa bolaodi jwa ga Jehofa, Kgosana e Kgolo ya botshelo, tlhogo ya phuthego ya Bokeresete, Kgosi ya Bomesia e e busang.—Tshen. 19:11-13; 12:10; Dit. 5:31; Baef. 1:22, 23.

(3) E ngaparela ka thata Lefoko je le tlhotlheleditsweng ja Modimo, e aegile dithuto tsotlhe tsa yone le ditekanyetso tsotlhe tsa boitsholo mo Bibeleng.—2 Tim. 3:16, 17.

(4) E tswelela ka go ikgaoganya le lefatshe.—Yak. 1:27; 4:4.

(5) E boloka bophepa jwa boitsholo jo bo kwa godimodimo thata mo malokong a yone, ka gobo Jehofa ka boene o boitshepo.—1 Pet. 1:15, 16; 1 Bakor. 5:9-13.

(6) E lebaganya maiteko otlhe a yone a magolo mo go direng tiro e Bibela e e boleletseng pele mo motlheng wa rona, eleng, go rera mafoko a a molemo a Bogosi jwa Modimo mo lefatsheng lotlhe go nna tshupo.—Math. 24:14.

(7) Go sa kgathalesege bosaitekanelang jwa motho, maloko a yone a tlhagolela le go godisa maungo a moya wa Modimo—lorato, boitumelo, kagiso, bopelotelele, bopelonomi, molemo, boikanngo, boingotlo, boikgapo—ba dira jalo ka bogolo jo bo dirang gore ba bo ba aroganye thata le lefatshe ka kakaretso.—Bagal. 5:22, 23; Yoh. 13:35.

Re ka bontsha thulaganyo ya ga Jehofa tlotlo jang?

1 Bakor. 10:31: “Cotlhe hèla lo di dihèlè kgalaleco ea Modimo.”

Baheb. 13:17: “Utlwañ ba ba lo laolañ, me lo ba ineèlè: gonne ba disitse meōea ea lona, yaka ba ba tla ikarabèlañ.”

Yak. 1:22: “Me lo nnè badihi ba lehoko, e señ bautlwi hèla.”

Tito 2:11, 12: “Gonne tshegōhaco ea Modimo e bonetse, e tlèla batho botlhe polokō, E re ruta, go re, e tle e re re nntse re ikgaogantse le boikèpō le dithatō tsa lehatshe, re bo re tshela ka go ikgapa, le ka tshiamō, le ka poihōmodimo.”

1 Pet. 2:17: “Ratañ bokauleñwe.”