Badimona Ke Babolai!
Satane le badimona ga ba bolo go nna setlhogo ebile ba kotsi thata. Satane o ne a bolaya leruo le batlhanka botlhe ba ga Jobe yo o ikanyegang. Morago o ne a bolaya bana ba ba lesome ba ga Jobe ka go tsosa “sehehō se segolo” gore se senye ntlo e ba neng ba le mo go yone. Morago ga foo Satane o ne a itaya Jobe ka “dishō tse di boshula, go simolola ka sebete sa lonaō go ea phugoñ ea gagwè.”—Yobe 1:7-19; 2:7.
Mo motlheng wa ga Jesu, badimona ba ne ba dira batho ba bangwe dimumu bangwe ba ba foufatsa. (Mathaio 9:32, 33; 12:22) Ba ne ba bogisa monna mongwe mme ba mo dira gore a itshegake ka maje. (Mareko 5:5) Gape ba ne ba dira gore mosimanyana mongwe a nnele go goa, a itatlhele fa fatshe, “ba mo piriganya ba mo tsibiketsa mo go botlhoko.”—Luke 9:42.
Bogologolo, badimona ba ne ba lwatsa batho ba bangwe mme ba bangwe ba ba piriganya fa fatshe
Gompieno, Satane le badimona ba gagwe ba baka polao e e seng kana ka sepe. Ebile tota, ditiro tsa bone tse di boikepo di oketsegile tota fa ba sale ba kobiwa kwa legodimong. Dipego tse di tswang mo lefatsheng lotlhe di naya bosupi jwa gore ba setlhogo. Ba tlhasela batho ba bangwe ka malwetsi. Ba bangwe ba ba tlhasela bosigo, ba dira gore ba se ka ba kgona go robala ka ditoro tse di maswe tota. Ba bangwe ba tlhakanela dikobo nabo ka tsela e e sa tshwanelang. Ba bangwe gape ba ba dira ditsenwa, ba ba dira gore ba bolaye ba bangwe, kana ba ipolaye.
Gompieno badimona ba dira batho ba bangwe gore ba rate ntwa; ba tlhasela ba bangwe bosigo, ba ba lorisa ditoro tse di tshosang
Lintina, yoo a nnang kwa Suriname, o bolela gore ledimona lengwe, kana moya mongwe o o bosula, le ne la bolaya maloko a le 16 a lelapa la gaabo la bo la mo tlhasela mo mmeleng le go mmogisa mo tlhaloganyong ka dingwaga di le 18. Go ya ka se se mo diragaletseng o bolela gore badimona ba “itumelela go bogisa batho ba ba sa ineeleng mo go bone go fitlha ba ba bolaya.”
Mme Jehofa o kgona go sireletsa batlhanka ba gagwe gore ba se ka ba tlhaselwa ke Satane.—Diane 18:10.