Ditsala Tsa Modimo ke Bomang?

Jesu Keresete ke Morwa Modimo e bile ke tsala ya gagwe e kgolo, e e rategang thata. Pele ga Jesu a tshela jaaka motho mo lefatsheng, o ne a tshela kwa legodimong e le sebopiwa se se maatla sa moya. (Johane 17:5) Go tswa foo o ne a tla mo lefatsheng a tla go ruta batho boammaaruri ka Modimo. (Johane 18:37) Gape o ne a ntsha botshelo jwa gagwe gore a boloke batho ba ba kutlo mo boleong le mo losong. (Baroma 6:23) Jesu jaanong ke Kgosi ya Bogosi jwa Modimo, puso ya selegodimo e e tla tlisang Paradaise mo lefatsheng leno.—Tshenolo 19:16.

Baengele le bone ke ditsala tsa Modimo. Baengele ga ba a tshela mo lefatsheng e le batho. Ba bopilwe kwa legodimong pele ga Modimo a dira lefatshe. (Jobe 38:4-7) Go na le baengele ba le dimilionemilione. (Daniele 7:10) Ditsala tseno tsa Modimo tsa selegodimo di batla gore batho ba ithute boammaaruri ka Jehofa.—Tshenolo 14:6, 7.

Modimo gape o na le ditsala mo lefatsheng; o di bitsa basupi ba gagwe. Mosupi kwa kgotlatshekelo o bolela se a se itseng ka mongwe kgotsa ka sengwe. Basupi ba ga Jehofa ba bolelela ba bangwe se ba se itseng ka Jehofa le boikaelelo jwa gagwe. (Isaia 43:10) Jaaka baengele, Basupi ba batla go go thusa gore o ithute boammaaruri ka Jehofa. Ba batla gore le wena o nne tsala ya Modimo.