Ditsala Tsa Modimo di Dira se se Siameng

Fa o na le tsala e o e kgatlhegelang e bile o e tlotla, o leka go tshwana le yone. Baebele ya re, “Jehofa o molemo e bile o thokgame.” (Pesalema 25:8) Gore re nne ditsala tsa Modimo, re tshwanetse go nna molemo e bile re tshwanetse go thokgama. Baebele ya re: “Nnang baetsi ba Modimo, jaaka bana ba ba rategang, lo bo lo tswelele lo tsamaya mo loratong.” (Baefeso 5:1, 2) Ditsela tse dingwe tsa go dira seno ke tseno:

Nna motho yo o ratang go thusa ba bangwe. “A re direng se se molemo mo go botlhe.”—Bagalatia 6:10.

Dira ka natla. “A moutswi a se ka a tlhola a utswa, mme go na le moo a a dire ka natla, a dira ka diatla tsa gagwe se e leng tiro e e molemo.”—Baefeso 4:28.

Nna phepa mo mmeleng le mo boitsholong. “A re intlafatseng leswe lengwe le lengwe la nama le moya, re itekanedisa boitshepo mo go boifeng Modimo.”—2 Bakorintha 7:1.

Tshwara ba lelapa la gago ka lorato le ka tlotlo. “A mongwe le mongwe wa lona . . . a rate mosadi wa gagwe jalo jaaka a ithata; kafa letlhakoreng le lengwe, mosadi o tshwanetse go nna le tlotlo e e boteng mo monneng wa gagwe. Bana, utlwang batsadi ba lona.”—Baefeso 5:33–6:1.

Bontsha ba bangwe lorato. “A re tsweleleng re ratana, ka gonne lorato lo tswa kwa Modimong.”—1 Johane 4:7.

Ikobele melao ya naga. “A moya mongwe le mongwe o nne mo taolong ya [puso] . . . Nayang botlhe ditshwanelo tsa bone, yo o tshwanetsweng ke lekgetho, lekgetho.”—Baroma 13:1, 7.