Ditsala Tsa Modimo ga di Dire se se Bosula

Satane o leka batho gore ba dire dilo tse di bosula. Motho yo o batlang go nna tsala ya Modimo o tshwanetse go tlhoa se Jehofa a se tlhoileng. (Pesalema 97:10) Dingwe tsa dilo tse ditsala tsa Modimo di sa di direng ke tseno:

Maleo a tlhakanelodikobo. “O se ka wa dira boaka.” (Ekesodo 20:14) Go tlhakanela dikobo pele ga lenyalo le gone go phoso.—1 Bakorintha 6:18.

Botagwa. ‘Matagwa . . . ga a na go rua bogosi jwa Modimo.’—1 Bakorintha 6:10.

Polao, Go senya mpa. “O se ka wa bolaya motho.”—Ekesodo 20:13.

Bogodu. “O se ka wa utswa.”—Ekesodo 20:15.

Go bua maaka. Jehofa o tlhoile “loleme lo lo maaka.”—Diane 6:17.

Thubakanyo le Bogale Jo bo Sa Laolesegeng. “[Jehofa] o tlhoile ope fela yo o ratang thubakanyo.” (Pesalema 11:5) “Ditiro tsa nama [di akaretsa] . . . go phatloga ka bogale.”—Bagalatia 5:19, 20.

Go betšha. “Lo tlogele go ikopanya le motho . . . yo e leng . . . motho yo o bogagaru.”—1 Bakorintha 5:11.

Letlhoo la lotso. “Tswelelang lo rate baba ba lona lo bo lo rapelele ba ba lo bogisang.”—Mathaio 5:43, 44.

Dilo tse Modimo a di re bolelelang di solegela rona molemo. Ga go motlhofo ka metlha go kgona go sa dire dilo tse di bosula. Ka thuso ya ga Jehofa le ka thuso ya Basupi ba gagwe, o ka kgona gore o se ka wa dira dilo tse di sa itumediseng Modimo.—Isaia 48:17; Bafilipi 4:13; Bahebera 10:24, 25.