Nna o Dire Botswelelopele

FA O ne o simolola go ithuta melaometheo ya Baebele la ntlha, tsela ya gago ya go akanya, puo ya gago le boitshwaro jwa gago tse di neng di nweleletse kwa tengteng di ne tsa nna tsa fetoga ka iketlo. Bontsi jwa diphetogo tseno di ne tsa direga le e leng pele o ikwadisa mo Sekolong sa Bodiredi sa Puso ya Modimo. Jaanong go ka direga gore o dirile botswelelopele go ya bokgakaleng jwa gore o neele botshelo jwa gago mo go Jehofa. A seo se bolela gore o emise go tlhola o dira botswelelopele? Nnyaa. Go kolobediwa ga gago ke tshimologo fela.

Morutwa Timotheo o ne a setse a le mogolwane wa Mokeresete fa Paulo a ne a mmolelela gore a ‘tlhatlhanye’ ka kgakololo e a neng a e neilwe le ka ditshiamelo tsa tirelo tse a neng a di neilwe—gore a ‘nwelelele’ mo dilong tseno—gore ‘botswelelopele jwa gagwe bo bonatshege mo bathong botlhe.’ (1 Tim. 4:12-15) Le fa o ka tswa o simolola go tsamaya mo tseleng ya boammaaruri kgotsa o na le maitemogelo a le mantsi mo botshelong jwa Bokeresete, o tshwanetse go kgatlhegela go dira botswelelopele.

Kitso le go Dira Diphetogo

Mo go Baefeso 3:14-19, re bala gore moaposetoloi Paulo o ne a rapelela gore badumedi mmogo le ene ba “kgone go tshwara ka botlalo ka mogopolo . . . bophara le boleele le bogodimo le boteng” jwa boammaaruri. Gore ba kgone go dira jalo, Jesu o tlhomile dimpho tse e leng banna gore ba rute, ba lolamise, le gore ba age phuthego. Go tlhatlhanya ka metlha ka Lefoko le le tlhotlheleditsweng la Modimo, mmogo le go kaelwa ke barutisi ba ba nang le maitemogelo, go ka re thusa go ‘gola’ semoyeng.—Baef. 4:11-15.

Kgolo eo e akaretsa go ‘dirwa basha mo maatleng a a tlhotlheletsang mogopolo wa lona.’ E akaretsa go nna le mogopolo o o dumalanang le wa Modimo le wa ga Keresete ka tsela e e nonofileng. E batla gore ka dinako tsotlhe motho a nne a ntse a itse tsela e ba akanyang ka yone, gore a “apare botho jo bosha.” (Baef. 4:23, 24) Fa o ithuta Diefangele, a o leba dipego tseno tsa botshelo jwa ga Keresete e le tse di bontshang sekao se o tshwanetseng go se latela? A o leka go tlhomolola dinonofo tse di kgethegileng tsa ga Jesu o bo o leka thata go di etsa mo botshelong jwa gago?—1 Pet. 2:21.

Dilo tse o buang ka tsone fa o tlotla le ba bangwe di ka nna tsa supa gore o dirile botswelelopele joo go ya bokgakaleng jo bo kana kang. Batho ba ba apereng botho jo bosha ga ba dirise puo ya go tlhoka boikanyegi, e e kgobang, e e tlhapatsang kgotsa e e sa siamang. Go na le moo, puo ya bone e “molemo go aga . . . gore [e] tle [e] abele bautlwi se se rategang.” (Baef. 4:25, 26, 29, 31; 5:3, 4; Jude 16) Dikakgelo tsa bone fa ba le kwa dipokanong tsa phuthego le fa ba se kwa go tsone di bontsha gore boammaaruri bo fetola matshelo a bone.

Fa o sa tlhole o “heheutlelwa kwa le kwa jaaka e kete [o] heheutlwa ke makhubu e bile [o] akgaakgelwa kwa le kwa ke phefo nngwe le nngwe ya thuto,” seno le sone se bontsha gore o dirile botswelelopele. (Baef. 4:14) Ka sekai, o itshwara jang fa lefatshe le go tlhasela ka dikgopolo dingwe tse disha, melao kgotsa mefuta mengwe ya boitlosobodutu? A o raelesega go utswa nako ya dilo tsa semoya tse o tshwanetseng go di dira gore o latelele dilo tseno? Go dira jalo go ka kgoreletsa botswelelopele jwa gago jwa semoya. A bo go le botlhale jang ne go reka nako ya go latelela dilo tsa semoya!—Baef. 5:15, 16.

Tsela e o dirisanang le ba bangwe ka yone le yone e ka supa gore o tsweletse pele semoyeng. A o ithutile go nna ‘pelotlhomogi ka bonolo, o itshwarela bakaulengwe le bokgaitsadi ba gago o gololesegile’?—Baef. 4:32.

Botswelelopele jwa gago jwa go dira dilo ka tsela ya ga Jehofa bo tshwanetse gore bo bonale mo phuthegong le kwa gae. Gape bo tshwanetse go bonala kwa sekolong, mo mafelong a botlhe le kwa lefelong le o berekang kwa go lone. (Baef. 5:21–6:9) Fa e le gore o bontsha dinonofo tsa bomodimo ka botlalo mo maemong otlhe a a ntseng jalo, he go bolela gore botswelelopele jwa gago bo a iponatsa.

Dirisa Mpho ya Gago

Jehofa o segofaditse mongwe le mongwe wa rona ka bokgoni le ka ditalenta. O lebeletse gore re di dirisetse go thusa ba bangwe ka tsela e e leng gore ka rona, a ka ba bontsha bopelonomi jo bo sa re tshwanelang. Moaposetoloi Petere o ne a kwala jaana malebana le seno: “Go ya ka selekanyo se mongwe le mongwe a amogetseng mpho ka sone, e diriseng mo go direlaneng jaaka balebedi ba ba molemo ba bopelonomi jo bo sa re tshwanelang jwa Modimo.” (1 Pet. 4:10) O dirisa bolebedi jwa gago jang?

Petere o tswelela jaana: “Fa mongwe a bua, a a bue jaaka e ka bo e le ditaelo tse di boitshepo tsa Modimo.” (1 Pet. 4:11) Temana eno e gatelela boikarabelo jwa go bua ka tsela e e dumalanang ka botlalo le Lefoko la Modimo, gore Modimo a galalediwe. Tsela e go buiwang ka yone le yone e tshwanetse go galaletsa Jehofa. Thapiso e o e amogelang mo Sekolong sa Bodiredi sa Puso ya Modimo e ka go thusa go dirisa mpho ya gago ka tsela e e ntseng jalo—o galaletsa Modimo ka tsela e o thusang ba bangwe ka yone. Fa o dirile seno gore e nne mokgele wa gago, o ka bona jang gore o dira botswelelopele mo sekolong?

Go na le gore o akanye ka gore o setse o akareditse dintlha di le kae tse o berekelang mo go tsone mo pampitshaneng ya gago ya kgakololo ya sekolo kgotsa mofuta wa dipuo tse o ntseng o di newa, akanya ka tsela e thapiso eno e tokafaditseng boleng jwa setlhabelo sa gago ka yone. Sekolo seno se re baakanyetsa gore re nne le matswela ka tsela e e oketsegileng mo bodireding jwa tshimo. Ka jalo ipotse jaana: ‘A ruri ke baakanyetsa se ke tlileng go se bua fa ke le kwa tirelong ya tshimo? A ke ithutile go kgatlhegela ba ke ba neelang bosupi? A ke bua ka tsela e e dirang gore ke kgone go dira maeto a go boela ka go tlogela batho ka potso ya se ke tla se tlotlang le bone mo nakong e e tlang? Fa ke ithuta Baebele le mongwe, a ke leka go tokafatsa gore ke nne morutisi yo o fitlhelelang pelo?’

O se ka wa leba botswelelopele ka go leba fela ditshiamelo tsa tirelo tse o di newang. Botswelelopele jwa gago ga bo bonwe mo kabelong ya gago mme bo bonala mo go se o se dirang ka yone. Fa o neilwe kabelo ya go ruta, ipotse jaana: ‘A ruri ke dirisitse botswerere jwa go ruta? A ke neetse puo eno ka tsela e e neng ya ama matshelo a ba ba neng ba e utlwa?’

Kgothatso ya gore o dirise mpho e o nang le yone e raya gore o tseye matsapa. A o tsaya matsapa a go bereka le ba bangwe mo bodireding jwa tshimo? A o batla ditshono tsa go thusa maloko a masha a phuthego ya lona, ba ba sa ntseng ba le babotlana kgotsa ba ba bokoa? A o ithaopela go phepafatsa Holo ya Bogosi kgotsa go thusa ka ditsela tse di farologaneng kwa dikopanong tse dikgolo le tse dinnye? A o ka kgona go nna o ikwadisa nako le nako jaaka mmulatsela yo o thusang? A o kgona go nna mmulatsela wa ka metlha kgotsa go thusa kwa phuthegong e go nang le tlhokego e kgolo kwa go yone? Fa o le mokaulengwe, a o leka go fitlhelela ditshwanelego tsa Dikwalo tsa batlhanka ba bodiredi le bagolwane? Go rata ga gago go thusa le go amogela maikarabelo go supa gore o dira botswelelopele.—Pes. 110:3.

Seabe sa Maitemogelo

O se ka wa kgobega marapo fa o ikutlwa o sa kgone go dira go le gontsi gonne o se na maitemogelo mo botshelong jwa Bokeresete. Lefoko la Modimo le ka kgona go “tlhalefisa yo o se nang maitemogelo.” (Pes. 19:7; 119:130; Dia. 1:1-4) Go dirisa kgakololo ya Baebele go dira gore re solegelwe molemo ke botlhale jo bo itekanetseng jwa ga Jehofa, jo bo mosola thata go gaisa thuto epe fela e e bapetsweng fela ka ntlha ya maitemogelo. Le fa go ntse jalo, fa re ntse re dira botswelelopele mo go direleng Jehofa, re nna le maitemogelo a a botlhokwa. Re ka a dirisa jang ka tsela e e molemo?

Fa motho a kile a lebana le maemo a a farologaneng a botshelo, a ka nna a raelesega go akanya jaana: ‘Nkile ka lebana le boemo jono. Ke a itse gore ke tshwanetse go dirang.’ A seno e tla nna tsela e e botlhale? Diane 3:7 e tlhagisa jaana: “O se ka wa ipona o le botlhale.” Ruri maitemogelo a tshwanetse go atolosa tsela e re lebang dilo ka yone tse re tshwanetseng go di akanyetsa fa re lebane le maemo mangwe mo botshelong. Mme fa re dira botswelelopele jwa semoya, maitemogelo a rona a tshwanetse gore gape a gatelele mo megopolong le mo dipelong tsa rona gore re tlhoka tshegofatso ya ga Jehofa gore re atlege. Ka jalo, botswelelopele jwa rona ga bo bonadiwe ke go lebana ga rona le maemo ka go itshepa, mme bo bonadiwa ke go retologela kwa go Jehofa re sa okaoke gore a re kaele mo matshelong a rona. Bo bontshiwa ke go nna le tsholofelo ya gore ga go na sepe se se tla diregang kwantle ga tetla ya gagwe le ka go nna re ikanya Rraarona wa selegodimo le go nna le kamano e e lorato le ene.

Nna o Gagamalele Kwa Pele

Le fa moaposetoloi Paulo a ne a godile sentle mo semoyeng e bile e le Mokeresete yo o tloditsweng, o ne a lemoga gore o ne a tlhoka go nna a “gagamalela pele” go ya go bona sekgele sa botshelo. (Bafil. 3:13-16) A le wena o na le pono e e ntseng jalo?

O dirile botswelelopele go ya bokgakaleng bofe? Sekaseka kgolo ya gago ka go leba gore o apere botho jo bosha ka botlalo go le kana kang, o ineetse mo bolaoding jwa ga Jehofa ka botlalo go le kana kang, le gore o dirisa dimpho tsa gago ka tlhoafalo go le kana kang gore o tlotle Jehofa. Fa o ntse o solegelwa molemo ke Sekolo sa Bodiredi sa Puso ya Modimo, dinonofo tse di tlhalosiwang mo Lefokong la Modimo di tshwanetse go tswelela pele di bonala mo tseleng e o buang ka yone le e o rutang ka yone. Dira gore dikarolo tseno tsa kgolo ya gago di bonale sentle. Ee, di ipelele, mme botswelelopele jwa gago bo tla bonala ka bonako.