Go Leka go Fitlhelela Pelo

MO GODIMO ga go neela batho bosupi, o tshwanetse go leka go fitlhelela dipelo tsa bone. Mo Baebeleng, gantsi pelo e farologanngwa le se motho a bonalang a le sone kafa ntle. Pelo ya tshwantshetso e emela se motho a leng sone kafa teng—kafa a ikutlwang ka gone, dilo tsotlhe tse a akanyang ka tsone, lebaka la go bo a akanya ka tsone, le kafa dikakanyo tseo di tlhotlheletsang ditiro tsa gagwe ka gone. Peo ya boammaaruri e jalwa mo pelong eno ya tshwantshetso. (Math. 13:19) E bile, go utlwa Modimo go tshwanetse ga tswa mo pelong.—Dia. 3:1; Bar. 6:17.

Gore thuto ya gago e tsenelele kwa teng jalo, tlhoma mogopolo mo dintlheng tseno: (1) Leka go bona gore ke eng se se setseng se tlhotlheleditse pelo ya moreetsi wa gago. (2) Nonotsha dinonofo tse di molemo, tse di jaaka lorato le go boifa Modimo. (3) Kgothaletsa moreetsi wa gago go sekaseka maitlhomo a gagwe gore a tle a itumedise Jehofa ka botlalo.

Go Dirisa Temogo. Go na le mabaka a a farologaneng a go bo batho ba ise ba amogele boammaaruri. Fa o tshwere thuto ya legae ya Baebele, o ka nna wa tshwanelwa ke go tlosa maikutlo a a sa siamang a moithuti a nang le one malebana le se a se ithutang o bo o ntshe mabaka a a tla tlosang dikgopolo tse di phoso tse a nang le tsone, kgotsa o ka nna wa tshwanelwa ke go mo naya bosupi fela. Ipotse jaana: ‘A motho yono o a lemoga gore jaaka motho, go na le dilo dingwe tsa semoya tse a di tlhokang? Ke eng se a setseng a se dumela? Ke eng se a sa se dumeleng? Ke ka ntlha yang fa a fitlheletse ditshwetso tse di ntseng jalo? A o tlhoka thuso go fenya dikeletso tse di ka nnang tsa mo thibela go amogela maikarabelo a a tsamaisanang le go itse boammaaruri?’

Gantsi ga go motlhofo go bona gore ke eng fa batho ba dumela dilo tse ba di dumelang. Diane 20:5 e bolela jaana: “Kgakololo mo pelong ya motho ke metsi a a boteng, mme motho yo o nang le temogo ke yo o tla a gelelang.” Temogo ke bokgoni jwa go tlhaloganya selo se se sa bonaleng sentle. Seno se batla gore motho a nne kelotlhoko thata le go amega ka ba bangwe.

Ga se ka metlha go buisanwang fela ka molomo. Fa o tlotla kgang nngwe le motho yo o ithutang le ene, o ka nna wa mmona a fetola sefatlhego kgotsa lentswe. Fa o le motsadi, ga go na pelaelo gore o a lemoga gore go fetoga ga boitshwaro jwa ngwana wa gago go bontsha gore go na le dilo dingwe tse disha mo botshelong tse di mo tlhotlheletsang. O se ka wa itlhokomolosa matshwao ano. Ke matshwao a a bontshang se tota se leng mo pelong ya motho.

Go botsa dipotso tse o di akanyeditseng ka kelotlhoko go tla go thusa go fata motho go bona se se mo pelong ya gagwe. O ka nna wa mmotsa jaana: “O ikutlwa jang ka . . . ?” “Ke eng se se go tlhatswitseng pelo gore . . . ?” “O tla dirang fa . . . ?” Le fa go ntse jalo, ela tlhoko gore o se ka wa tlhasela batho ka dipotso. O ka nna wa botsa dipotso tsa gago jaana ka botlhale, “A nka go botsa jaana . . . ?” Ga go motlhofo go lemoga se se mo pelong ya motho e bile ga go a tshwanela go dirwa ka lepotlapotla. Gantsi go tla tsaya nakonyana gore motho a go tshepe pele ga a ka go bulela mafatlha. Le teng moo, o tshwanetse go nna kelotlhoko gore motho a se ka a akanya gore o mmotsa dilo tse di sa go ameng.—1 Pet. 4:15.

Tsela e o itshwarang ka yone ka se o se utlwang le yone e batla gore motho a dirise temogo. Gakologelwa gore mokgele wa gago ke go tlhaloganya batho gore o tle o kgone go lemoga gore ke tshedimosetso efe e e theilweng mo Baebeleng e go bonalang e tla ba rotloetsa. O se ka wa itlhaganelela go ba bolelela gore tsela e ba lebang dilo ka yone e phoso. Go na le moo, nna o ntshitse matlho dinameng gore o kgone go lemoga maikutlo a a dirang gore ba bue jaaka ba bua. Fa o dira jalo o tla itse kafa o tshwanetseng go araba ka gone; mme fa motho yo o ithutang le ene a bona gore o a mo tlhaloganya, o tla akanyetsa ka tsela e e masisi se o se buang.—Dia. 16:23.

Ka selekanyo se se rileng, o ka kgona go tlhotlheletsa batho bangwe le fa o bua le setlhopha se segolo. Fa o kgona go leba bareetsi sentle, o kgona go bona mo difatlhegong tsa bone tsela e ba arabelang ka yone, e bile o botsa dipotso tse ba sa tlhokeng go di araba mme e le tse di dirang gore ba akanye, o ka kgona go lemoga gore bareetsi ba gago ba ikutlwa jang ka se o se buang. Fa o itse bareetsi ba gago sentle, bontsha gore o akanyetsa maemo a bone. Akanyetsa boikutlo jo phuthego yotlhe e nang le jone fa o tlotla le bone ka Lefoko la Modimo.—Bagal. 6:18.

Go Tsosa Maikutlo a a Molemo. Fa o sena go tlhaloganya gore ke eng se motho a se dumelang, le gore ke eng se a sa se dumeleng le mabaka a teng, o tla thaya motlotlo wa gago mo dintlheng tseo. Fa Jesu a sena go tsosiwa mo baswing, o ne a fitlhelela dipelo tsa barutwa ba gagwe ka go ba “bulela Dikwalo ka botlalo” a dirisa ditiragalo tse di neng di sa tswa go direga bosheng. (Luke 24:32) Le wena o tshwanetse go amanya selo se se diragaletseng motho, se a se ratang, le se a se bonang mo Lefokong la Modimo. Pelo ya motho yo o ithutang le ene e tla amega ka tsela e e molemo fa a lemoga sentle gore: “Seno ke BOAMMAARURI!”

Fa o gatelela bomolemo jwa ga Jehofa, lorato lwa gagwe, bopelonomi jwa gagwe jo bogolo, o bo o bontsha kafa ditsela tsa gagwe di siameng ka teng, o thusa ba o ba rutang gore ba rate Modimo. Fa o ipha nako ya go bontsha bareetsi ba gago dinonofo tse di molemo tse Modimo a di bonang mo go bone, o ba naya lebaka la go dumela gore ba ka kgona go nna le kamano le ene. O ka kgona go dira jalo ka go akanya ka ditemana tse di jaaka Pesalema 139:1-3, Luke 21:1-4 le Johane 6:44 le go thusa bareetsi ba gago go lemoga kafa Jehofa a ratang ka gone batlhanka ba gagwe ba ba ikanyegang. (Bar. 8:38, 39) Ba tlhalosetse gore Jehofa ga a lebe diphoso tsa rona mme o leba dilo tsotlhe tse re di dirang mo botshelong, kafa re tlhoafaletseng kobamelo e e itshekileng ka teng le kafa re ratang leina la gagwe ka teng. (2 Ditir. 19:2, 3; Baheb. 6:10) O gakologelwa le dilo tse dinnye thata ka tsela e re dirilweng ka yone, mme ka tsela e e gakgamatsang, o tla tsosa “botlhe ba ba mo mabitleng a kgakologelo.” (Joh. 5:28, 29; Luke 12:6, 7) E re ka batho ba dirilwe mo setshwanong sa Modimo, go tlotla ka dinonofo tsa gagwe gantsi go tla dira gore motho a arabele sentle go tswa pelong.—Gen. 1:27.

Gape o ka kgona go fitlhelela pelo ya motho fa o mo ruta go leba batho ba bangwe ka tsela e Jehofa a ba lebang ka yone. Go a utlwala go dumela gore fa Modimo a re rata, seo se bolela gore o rata batho ba bangwe ka tsela e e tshwanang, go sa kgathalesege tsela e ba godileng ka yone, gore ke ba setšhaba sefe kgotsa ba lotso lofe. (Dit. 10:34, 35) Fa motho a setse a tlhaloganya dilo tseno, o tla nna le mabaka a a nonofileng a Dikwalo a go fedisa letlhoo le maikutlo ape a a sa siamang mo pelong ya gagwe. Seno se tla dira gore a kgone go dirisana le ba bangwe ka kagiso fa a ntse a ithuta go dira thato ya Modimo.

Gape, o tshwanetse go thusa ba bangwe gore ba boife Modimo. (Pes. 111:10; Tshen. 14:6, 7) Go tlotla Modimo thata jalo kgotsa go mmoifa ka tsela e e ntseng jalo go ka rotloetsa motho go fitlhelela se a neng a ka se ka a se fitlhelela ka maatla a gagwe. O ka thusa ba bangwe go boifa go kgopisa Jehofa ka go tlotla le bone ka ditiro tsa gagwe tse di gakgamatsang le bopelonomi jwa gagwe jo bogolo jo bo sa tshwaneng le bope.—Pes. 66:5; Jer. 32:40.

Tlhomamisa gore bareetsi ba gago ba a tlhaloganya gore tsela e ba itshwarang ka yone e botlhokwa mo go Jehofa. O na le maikutlo, mme re ka mo utlwisa botlhoko kgotsa ra mo itumedisa ka tsela e re itshwarang ka yone fa a re kaela. (Pes. 78:40-42) Bontsha batho gore ke ka ntlha yang fa tsela e ba itshwarang ka yone e le botlhokwa mo kgwetlhong e Satane a gwetlhang Modimo ka yone.—Dia. 27:11.

Thusa bareetsi ba gago go bona gore go dira se Modimo a se batlang go solegela bone molemo. (Isa. 48:17) Tsela nngwe e seno se ka dirwang ka yone ke go ba bontsha ditlamorago tse di nnang teng mo mmeleng le mo maikutlong ka ntlha ya go gana botlhale jwa Modimo, le fa motho a ka tswa a dirile jalo ka nakwana fela. Tlhalosa gore boleo bo re katosetsa kgakala le Modimo, bo dira gore ba bangwe ba se ka ba nna le tshono ya go ithuta boammaaruri mo go rona, e bile bo tsenelela mo ditshwanelong tsa ba bangwe. (1 Bathes. 4:6) Thusa bareetsi ba gago go anaanela masego a ba setseng ba na le one ka ntlha ya go boloka melao ya Modimo. Dira gore ba anaanele thata ntlha ya gore go tsamaya mo ditseleng tse di siameng tsa ga Jehofa go re sireletsa mo mathateng a mantsi. Fa motho a dumela gore go tsamaya mo ditseleng tsa Modimo go botlhale, o tla gana tsela nngwe le nngwe e e sa tsamaisaneng le tsone. (Pes. 119:104) Ga a kitla a leba go nna kutlo e le mokgweleo, mme o tla go leba e le go ineela mo go Jehofa ka lorato.

Go Thusa ba Bangwe go Itshekatsheka. Gore batho ba tswelele pele ba gola semoyeng, ba tshwanetse go lemoga se se mo dipelong tsa bone. Tlhalosa kafa Baebele e ka ba thusang go dira jalo ka gone.

Thusa bareetsi ba gago go lemoga gore Baebele ga se buka fela e e tletseng melao, kgakololo, ditiragalo tsa hisitori le boporofeti. Gape e senola tsela e Modimo a akanyang ka yone. Mo go Jakobe 1:22-25, Lefoko la Modimo le tshwantshiwa le seipone. Molaetsa wa Baebele o senola se se mo dipelong tsa rona ka tsela e re tsibogelang ka yone se e se buang le tsela e re tsibogelang ka yone go diragadiwa ga maikaelelo a ga Jehofa. Ka jalo e senola tsela e Modimo, yo e leng “motlhatlhobi wa dipelo,” a re lebang ka yone. (Dia. 17:3) Kgothaletsa bareetsi ba gago gore ba se ka ba lebala ntlha eno. Ba kgothaletse go tlhatlhanya ka se Modimo a re boloketseng sone mo Baebeleng le gore ke diphetogo dife tse ba ka nnang ba tshwanelwa ke go di dira mo botshelong jwa bone gore ba tle ba mo itumedise. Ba thuse gore ba lebe go bala Baebele e le tsela e Jehofa a sekasekang “dikakanyo le maikaelelo a pelo” ya bone ka yone gore ba tle ba dirisane mmogo le Modimo fa ba dira diphetogo dipe fela tse di tlhokegang.—Baheb. 4:12; Bar. 15:4.

Baithuti bangwe ba Baebele ba ka nna ba batla go dirisa se ba se ithutang; le fa go ntse jalo ba tshwenngwa ke gore batho ba bangwe ba tla reng. Ba ka tswa ba lwantshana le dikeletso dingwe tse di nonofileng tsa nama. Kgotsa go ka tswa go na le dilo dingwe tse ba di dirang ba re ba direla Modimo mme ba ntse ba ngaparetse ditlwaelo tsa lefatshe. Ba bontshe gore go kotsi go le kana kang go nna pelopedi jalo. (1 Dikg. 18:21) Ba kgothaletse gore ba rapele Modimo gore a sekaseke dipelo tsa bone a bo a di itshekise.—Pes. 26:2; 139:23, 24.

Ba bontshe gore Jehofa o tlhaloganya mathata a bone le gore Baebele e tlhalosa kgwetlho e re lebaneng le yone. (Bar. 7:22, 23) Ba thuse go nna kelotlhoko gore ditshekamelo tsa pelo e e sa itekanelang di se ka tsa ba fekeetsa.—Dia. 3:5, 6; 28:26; Jer. 17:9, 10.

Kgothaletsa mongwe le mongwe gore a sekaseke gore o dira dilo ka maitlhomo afe. Mo rute gore a ipotse jaana: ‘Ke ka ntlha yang fa ke batla go dira selo seno? A go tla bontsha Jehofa gore tota ke anaanela sotlhe se a se ntiretseng?’ Dira gore a bone sentle gore go nna le kamano e ntle le Modimo ke selo se se botlhokwa thata se motho ope fela a ka nnang le sone.

Thusa bareetsi ba gago go tlhaloganya gore go botlhokwa go direla Jehofa ka “pelo yotlhe” ya bone. (Luke 10:27) Seno se bolela gore maikutlo otlhe a bone, dikeletso tsa bone le maitlhomo a bone di tshwanetse go dumalanngwa le ditsela tsa ga Jehofa. Ka jalo, ruta bareetsi ba gago go sekaseka e seng fela se ba se dirang mme gape gore ba ikutlwa jang ka melao ya Modimo le gore ba mo direla ka maitlhomo afe. (Pes. 37:4) Fa batho ba o ithutang le bone ba ntse ba lemoga dilo tse ba tshwanetseng go di tokafatsa, ba kgothaletse go rapela Jehofa jaana: “Kitlanya pelo ya me gore e boife leina la gago.”—Pes. 86:11.

Fa motho yo o ithutang le ene a nna tsala ya ga Jehofa, o tla ikobela Modimo ka ntlha ya tumelo mme e seng fela ka gonne o mo kgothaletsa go dira jalo. Fa a sena go dira jalo o tla ‘nna a tlhomamisa se se amogelesegang mo Moreneng.’ (Baef. 5:10; Bafil. 2:12) Go nna kutlo go tswa pelong ka tsela e e ntseng jalo go itumedisa Jehofa.—Dia. 23:15.

Gakologelwa gore Jehofa ke ene yo o tlhatlhobang dipelo e bile ke ene a dirang gore batho ba nne le kamano e ntle le ene. (Dia. 21:2; Joh. 6:44) Rona re tshwanetse go dirisana mmogo le ene. (1 Bakor. 3:9) Go ntse “jaaka e kete Modimo o rapela ka rona.” (2 Bakor. 5:20; Dit. 16:14) Jehofa ga a pateletse ope gore a amogele boammaaruri, mme fa re ntse re dirisa Dikwalo, a ka dira gore bareetsi ba rona ba lemoge gore se ba se utlwang ke karabo ya dipotso tsa bone—kgotsa ya dithapelo tsa bone. Nako le nako fa o ruta nna o akantse ka seno mme o kope Jehofa ka tlhoafalo gore a go kaele a bo a go thuse.—1 Ditir. 29:18, 19; Baef. 1:16-18.