Kafa re ka Amang Dipelo Tsa Baithuti ba Rona ka Gone
1. Tsela e Jesu a neng a ruta ka yone e ne ya dira gore bareetsi ba gagwe ba ikutlwe jang?
1 Jesu Keresete o ne a kgona go ama dipelo tsa bareetsi ba gagwe. Nako nngwe, dipelo tsa barutwa ba gagwe di ne tsa “tuka” fa a sena go ba tlhalosetsa Dikwalo ka botlalo. (Luke 24:32) E re ka batho ba tshwanetse go direla Modimo go tswa pelong, re ka ba ruta jang ka tsela e e tla dirang gore ba batle go fetola matshelo a bone?—Bar. 6:17.
2. Go akanyetsa maikutlo a motho le go nna botlhale go thusa jang gore re kgone go mo ama pelo?
2 Akanyetsa Maikutlo a Batho Mme o Nne Botlhale: Go tlhalosetsa motho se se siameng le se se siamang ga se ka dinako tsotlhe go dirang gore a tseye kgato ka se o se buang. Tota e bile, go kgala dilo tse a di dumelang go ka nna ga dira gore a se ka a ba a go reetsa. Fa re batla go thusa motho, re tshwanetse go tlhaloganya mabaka a dilo tse a di dumelang le gore ke eng a dira dilo tse a di dirang. Go akanyetsa maikutlo a gagwe le go mmotsa dipotso ka botlhale go ka dira gore a tlhalose kafa a ikutlwang ka teng. (Dia. 20:5) Fa re dira jalo, re tla kgona go tlhopha temana e e ka mo amang pelo. Ka jalo, re tshwanetse go bontsha motho gore re a mo kgatlhegela mme re nne pelotelele le ene. (Dia. 25:15) Se lebale gore batho ga ba tshwane. Letla moya wa ga Jehofa gore o ba thuse go akanya le go dira dilo ka tsela e e siameng.—Mar. 4:26-29.
3. Re ka thusa jang batho ba re ithutang Baebele le bone gore ba bontshe dinonofo tse di molemo?
3 Ba Thuse Gore ba Nne le Dinonofo Tse di Molemo: Ditemana tsa Baebele tse di tlhalosang tsela e Jehofa a ratang batho e bile a leng molemo ka yone di ka thusa baithuti gore ba nne le dinonofo tse di molemo. Re ka dirisa ditemana tse di jaaka Pesalema 139:1-4 kgotsa Luke 12:6, 7 go bontsha tsela e Modimo a ratang mongwe le mongwe wa rona ka yone. Fa batho ba simolola go leboga Jehofa ka ntlha ya bopelonomi jwa gagwe jo bo sa re tshwanelang, ba tla mo rata le go feta le go ineela mo go ene. (Bar. 5:6-8; 1 Joh. 4:19) Gape fa ba itse gore Jehofa o ikutlwa jang ka tsela e ba itshwarang ka yone, ba ka nna ba tlhotlheletsega go dira dilo tse di mo itumedisang le go mo tlotla.—Pes. 78:40, 41; Dia. 23:15.
4. Re ka bontsha jang gore re tlotla tshwanelo ya motho ya go itirela ditshwetso fa re mo ruta Baebele?
4 Jehofa ga a pateletse ope gore a ikobele ditaelo tsa gagwe. Go na le moo, o thusa batho gore ba lemoge botlhokwa jwa go latela kgakololo ya gagwe. (Isa. 48:17, 18) Re tla bo re etsa Jehofa fa re ruta ka tsela e e dirang gore motho a itirele tshwetso. Go molemo tota fa motho a dira diphetogo mo botshelong jwa gagwe ka gonne a batla go dira jalo e seng ka gonne a patelediwa. (Bar. 12:2) Gape seo se dira gore ba atamalane thata le “motlhatlhobi wa dipelo.”—Dia. 17:3.